TULUN-AN NGA ARTIKULO 39
Ara Bala sa “Libro sang Kabuhi” ang Imo Ngalan?
“Isa ka libro nga nagaunod sang mga ngalan nga ginadumdom sang Dios ang ginsulat sa atubangan niya tuhoy sa mga nagakahadlok kay Jehova.”—MAL. 3:16.
AMBAHANON 61 Sulong, mga Saksi!
ANG BINAGBINAGON SA SINI NGA ARTIKULO *
Padayon nga ginasulat ni Jehova ang mga ngalan sa “libro sang kabuhi” sugod pa sang panahon ni Abel (Tan-awa ang parapo 1-2)
1. Suno sa Malaquias 3:16, ano nga libro ang ginasulatan ni Jehova halin sang una, kag ano ang makita sa sini?
LINIBO na ka tuig nga nagasulat si Jehova sa isa ka pinasahi nga libro. Libro ini sang mga ngalan, kag ang una nga nasulat sa sini amo ang ngalan ni Abel, ang una nga matutom nga saksi. * (Luc. 11:50, 51) Sugod sadto, padayon nga ginasulat ni Jehova sa sini nga libro ang iban pa nga mga ngalan. Subong, minilyon na ka ngalan ang makita sa sini. Sa Biblia, ginatawag ini nga “isa ka libro nga nagaunod sang mga ngalan nga ginadumdom sang Dios,” “libro sang kabuhi,” kag “linukot sang kabuhi.” Sa sini nga artikulo, gamiton naton ang ekspresyon nga “libro sang kabuhi.”—Basaha ang Malaquias 3:16; Bug. 3:5; 17:8.
2. Kay sin-o mga ngalan ang nasulat sa libro sang kabuhi, kag ano ang himuon naton para masulat sa sini ang aton ngalan?
2 Makita sa sining pinasahi nga libro ang ngalan sang tanan nga nagaalagad kay Jehova, nagatahod gid sa iya, kag nagapabalor sa iya ngalan. May paglaum sila nga mabuhi sing wala sing katapusan. Subong, masulat man sa sini nga libro ang aton ngalan kon may suod kita nga kaangtanan kay Jehova nga nabase sa halad-gawad sang iya Anak nga si Jesucristo. (Juan 3:16, 36) Sa langit man ukon sa duta ang aton paglaum, gusto gid naton tanan nga masulat sa sini nga libro ang aton ngalan.
3-4. (a) Sigurado na bala nga mabuhi kita sing wala sing katapusan kon nasulat subong ang aton ngalan sa libro sang kabuhi? Ipaathag. (b) Ano ang binagbinagon naton sa sini nga artikulo kag sa masunod nga artikulo?
3 Buot silingon bala sini nga sigurado na nga mabuhi sing wala sing katapusan ang tanan nga nasulat sa sini nga libro? Mabal-an naton ang sabat sa sini sa ginsiling ni Jehova kay Moises nga mabasa sa Exodo 32:33. Nagsiling si Jehova: “Ang bisan sin-o nga nakasala sa akon, panason ko sia sa akon libro.” Gani puede mapanas ang mga ngalan nga nasulat sa sini nga libro. Sang ginsulat ni Jehova ang mga ngalan, daw pareho lang nga naggamit sia sang lapis. (Bug. 3:5) Dapat siguraduhon naton nga indi mapanas ang aton ngalan sa sini nga libro asta nga isulat ini sing permanente nga daw gingamitan sang ballpen.
4 Basi may ipamangkot kita. Halimbawa, ano ang ginasiling sang Biblia parte sa mga tawo nga nasulat ang ngalan sa libro sang kabuhi kag sa mga tawo nga wala nasulat ang ngalan sa sini? San-o makabaton sang kabuhi nga wala sing katapusan ang mga tawo nga nasulat ang ngalan sa sini nga libro? Ano ang matabo sa mga napatay nga wala mahatagan sang tsansa nga makilala si Jehova? Posible bala nga masulat pa ang ila ngalan sa sini nga libro? Sabton ini nga mga pamangkot sa sini nga artikulo kag sa masunod nga artikulo.
KAY SIN-O MGA NGALAN ANG ARA SA LIBRO SANG KABUHI?
5-6. (a) Suno sa Filipos 4:3, sin-o ang nalakip sa mga ngalan nga nasulat sa libro sang kabuhi? (b) San-o permanente nga isulat ang ila ngalan sa libro sang kabuhi?
5 Kay sin-o mga ngalan ang nasulat sa libro sang kabuhi? Para masabat ini, binagbinagon naton ang lima ka grupo sang mga tawo. Ang ngalan sang pila sa ila nasulat sa libro sang kabuhi, pero ang ngalan sang iban wala sa sini.
6 Ang una nga grupo amo ang mga ginpili nga magagahom kaupod ni Jesus sa langit. Nasulat na bala ang ila ngalan sa libro sang kabuhi? Huo. Ginsilingan ni apostol Pablo ang iya “mga masigkamanugpangabudlay” sa Filipos nga ara na sa libro sang kabuhi ang ngalan sang mga hinaplas, nga gin-agda nga maggahom kaupod ni Jesus. (Basaha ang Filipos 4:3.) Pero para indi mapanas ang ila ngalan sa sini nga libro, dapat padayon sila nga mangin matutom. Sa katapusan nga pagmarka sa ila, nga matabo antes sila mapatay ukon antes magsugod ang dakung kapipit-an, permanente nga isulat ang ila ngalan sa sini nga libro.—Bug. 7:3.
7. Base sa Bugna 7:16, 17, san-o permanente nga isulat sa libro sang kabuhi ang mga ngalan sang daku nga kadam-an sang iban nga mga karnero?
7 Ang ikaduha nga grupo amo ang daku nga kadam-an sang iban nga mga karnero. Nasulat na bala ang ila ngalan sa libro sang kabuhi? Huo. Ara bala gihapon sa libro sang kabuhi ang ila ngalan sa tapos sang Armageddon? Huo. (Bug. 7:14) Nagsiling si Jesus nga magabaton sila sang “kabuhi nga wala sing katapusan.” (Mat. 25:46) Pero indi buot silingon nga makabaton gilayon sang kabuhi nga wala sing katapusan ang mga maluwas sa Armageddon. Kon sa aton pa, lapis pa lang ang gingamit sa pagsulat sa ila ngalan sa libro sang kabuhi. Sa Isa ka Libo ka Tuig nga Paggahom ni Jesus, ‘bantayan niya sila kag tuytuyan sila sa mga tuburan sang tubig sang kabuhi.’ Kon tumanon nila ang Cristo, mangin matutom sila kay Jehova, kag makapasar sila sa katapusan nga pagtilaw, permanente nga isulat ang ila ngalan sa libro sang kabuhi.—Basaha ang Bugna 7:16, 17.
8. Kay sin-o mga ngalan ang indi pag-isulat sa libro sang kabuhi, kag ano ang matabo sa ila?
8 Ang ikatlo nga grupo amo ang mga kanding nga laglagon sa Armageddon. Wala sa libro sang kabuhi ang ila ngalan. Nagsiling si Jesus nga “maagom nila ang kamatayon nga wala sing katapusan.” (Mat. 25:46) Gintuytuyan si Pablo sang Dios sang ginsiling niya nga “magabaton sila sang silot nga wala sing katapusan nga kalaglagan.” (2 Tes. 1:9; 2 Ped. 2:9) Indi man mabuhi sing wala sing katapusan ang mga hungod nga nakasala sa balaan nga espiritu. Buot silingon, kabalo sila kon ano ang kabubut-on ni Jehova pero ginpamatukan nila ini. Laglagon sila sing bug-os. Indi na sila pagbanhawon. (Mat. 12:32; Mar. 3:28, 29; Heb. 6:4-6) Binagbinagon naman naton ang duha ka grupo sang mga tawo nga banhawon diri sa duta.
ANG MGA BANHAWON
9. Suno sa Binuhatan 24:15, ano ang duha ka grupo sang mga tawo nga banhawon sa duta, kag ano ang kinalain sang duha ka grupo?
9 Suno sa Biblia, may duha ka grupo sang mga tawo nga banhawon kag may paglaum nga mabuhi sing wala sing katapusan sa duta. Sila amo ang “mga matarong” kag ang “mga indi matarong.” (Basaha ang Binuhatan 24:15.) Ang “mga matarong” amo ang mga tawo nga matutom nga nag-alagad kay Jehova sang buhi pa sila. Pero ang “mga indi matarong” amo ang mga tawo nga wala nag-alagad kay Jehova antes sila napatay. Ang matuod, malain ang ginhimo sang kalabanan sa ila. Bangod banhawon ining duha ka grupo, masiling bala naton nga nasulat ang ila ngalan sa libro sang kabuhi? Para masabat ini, binagbinagon naton ang kada grupo.
10. Ngaa banhawon ang “mga matarong,” kag ano nga responsibilidad ang ihatag sa pila sa ila? (Tan-awa man sa sini nga isyu ang “Mga Pamangkot Gikan sa mga Bumalasa” parte sa mga banhawon sa duta.)
10 Ang ikap-at nga grupo amo ang “mga matarong.” Antes sila napatay, nasulat na ang ila ngalan sa libro sang kabuhi. Ginpanas bala sa sini nga libro ang ila ngalan sang napatay sila? Wala, bangod “buhi” sila sa handumanan ni Jehova. Si Jehova Dios “sang mga buhi, kag indi sang mga patay, kay para sa iya buhi sila tanan.” (Luc. 20:38) Buot silingon sini nga kon banhawon sa duta ang mga matarong, nasulat na ang ila ngalan sa libro sang kabuhi. Pero indi pa ini permanente. (Luc. 14:14) Ang pila sa ila hatagan sang responsibilidad nga mag-alagad bilang “mga prinsipe sa bug-os nga duta.”—Sal. 45:16.
11. Ano ang dapat tun-an sang “mga indi matarong” para masulat ang ila ngalan sa libro sang kabuhi?
11 Ang ikalima nga grupo amo ang “mga indi matarong.” Posible nga wala nila nahimo kon ano ang matarong antes sila napatay bangod wala sila kabalo sang mga kasuguan ni Jehova. Gani wala nasulat ang ila ngalan sa libro sang kabuhi. Pero banhawon sila sang Dios kag hatagan niya sila sang tsansa para masulat ang ila ngalan sa sini nga libro. Dapat gid buligan ining “mga indi matarong.” Kay man, antes sila napatay, grabe gid kalain sang ginhimo sang pila sa ila. Gani dapat sila tudluan kon paano nila sundon ang matarong nga mga kasuguan ni Jehova. Para matudluan sila, dumalahan sang Ginharian sang Dios ang pagtudlo sa pinakamadamo nga tawo nga wala pa gid anay natabo sa duta.
12. (a) Sin-o ang magatudlo sa mga indi matarong? (b) Ano ang matabo sa mga wala nagatuman sa mga ginatudlo sa ila?
12 Sin-o ang magatudlo sa mga indi matarong? Ang daku nga kadam-an kag ang banhawon nga mga matarong. Para masulat sa libro sang kabuhi ang ngalan sang mga indi matarong, dapat may suod sila nga kaangtanan kay Jehova kag dapat sila magdedikar sa iya. Obserbahan sing maayo ni Jesucristo kag sang kaupod niya nga mga hukom sa langit ang reaksion sining mga indi matarong sa mga ginatudlo sa ila. (Bug. 20:4) Indi pagtugutan nga padayon nga mabuhi ang mga wala nagatuman, bisan 100 ka tuig na ang ila edad. (Isa. 65:20) Mabasa ni Jehova kag ni Jesus ang tagipusuon, gani siguraduhon nila nga wala sing makapabilin sa bag-ong kalibutan nga makahalit sa iban.—Isa. 11:9; 60:18; 65:25; Juan 2:25.
ANG MGA BANHAWON PARA MABUHI SING WALA SING KATAPUSAN KAG PARA HUKMAN
13-14. (a) Sang una, ano ang paghangop naton sa ginsiling ni Jesus sa Juan 5:29? (b) Ano ang matalupangdan naton sa iya ginsiling?
13 May ginsiling man si Jesus parte sa mga banhawon sa duta. Halimbawa, nagsiling sia: “Magaabot ang tion nga ang tanan nga yara sa handumanan nga mga lulubngan makabati sang iya tingog kag magagua, ang mga naghimo sang maayo makabaton sang kabuhi nga wala sing katapusan, apang ang mga naghimo sang malaut hukman.” (Juan 5:28, 29) Ano ang buot silingon ni Jesus?
14 Sang una, abi naton ginapatuhuyan ni Jesus ang himuon sang mga banhawon pagkatapos sila mabanhaw. Buot silingon, ang iban nga banhawon magahimo sang maayo kag ang iban naman magahimo sang malain. Pero, matalupangdan naton nga wala si Jesus nagsiling nga ang magagua sa handumanan nga mga lulubngan magahimo sang maayo ukon magahimo sang malain. Sa baylo, ginsambit niya ang mga “naghimo sang maayo” kag ang mga “naghimo sang malaut.” Gani ang ginapatuhuyan ni Jesus amo ang ginhimo nila antes sila napatay. May basihan gid ini. Kay man, indi na pagtugutan nga maghimo sang malain ang bisan sin-o sa bag-ong kalibutan. Naghimo sang malain ang mga indi matarong antes sila napatay. Gani ano ang buot silingon sang ginsiling ni Jesus parte sa mga banhawon nga “makabaton sang kabuhi nga wala sing katapusan” kag sa mga banhawon nga “hukman”?
15. Sin-o ang mga banhawon nga “makabaton sang kabuhi nga wala sing katapusan,” kag ngaa?
15 Ang mga matarong nga naghimo sang maayo antes sila napatay banhawon kag “makabaton sang kabuhi nga wala sing katapusan.” Ngaa? Bangod nasulat na ang ila ngalan sa libro sang kabuhi. Buot silingon, ang banhawon nga “mga naghimo sang maayo” nga ginsambit sa Juan 5:29 amo man ang “mga matarong” nga ginsambit sa Binuhatan 24:15. Ini nga paathag nagasanto sa ginasiling sang Roma 6:7: “Ang isa nga napatay nahilway na sa iya sala.” Gani sang napatay ang mga matarong, ginpatawad na sila ni Jehova sa ila mga sala. Pero dumdumon niya ang tanan nila nga ginhimo sa pag-alagad sa iya. (Heb. 6:10) Kon banhawon na ini nga mga matarong, dapat padayon sila nga mangin matutom para indi mapanas ang ila ngalan sa libro sang kabuhi.
16. Ano ang buot silingon nga “hukman” ang mga banhawon?
16 Kamusta naman ang mga naghimo sang malain antes sila napatay? Sang napatay sila, ginpatawad na sila ni Jehova sa ila mga sala. Pero wala sila nag-alagad sa iya sang buhi pa sila. Wala nasulat ang ila ngalan sa libro sang kabuhi. Gani ang banhawon nga “mga naghimo sang malaut” amo man ang “mga indi matarong” nga ginsambit sa Binuhatan 24:15. Banhawon sila para “hukman.” * Buot silingon, hukman ni Jesus ang mga indi matarong kay magadesisyon sia base sa iya naobserbahan sa ila. (Luc. 22:30) Hatagan sila sang tion para pamatud-an nila nga nagakabagay isulat ang ila ngalan sa libro sang kabuhi. Kon bag-uhon sining mga indi matarong ang ila kabuhi, indi na sila maghimo sang malain, kag magdedikar sila kay Jehova, isulat niya ang ila ngalan sa libro sang kabuhi.
17-18. Ano ang dapat himuon sang tanan nga banhawon sa duta, kag ano nga “mga buhat” ang ginapatuhuyan sang Bugna 20:12, 13?
17 Ang tanan nga banhawon, matarong man sila ukon indi matarong sang una, dapat magtuman sa mga kasuguan sa bag-o nga mga linukot nga buksan sa tion sang 1,000 ka tuig. Amo ini ang nakita ni apostol Juan sa iya palanan-awon: “Nakita ko ang mga patay, ang mga kadalagkuan kag mga kubos, nga nagatindog sa atubangan sang trono, kag ginbukad ang mga linukot. Apang may isa pa ka linukot nga ginbukad; amo ini ang linukot sang kabuhi. Ang mga patay ginhukman pasad sa mga butang nga nasulat sa mga linukot suno sa ila mga buhat.”—Bug. 20:12, 13.
18 Base sa ano nga “mga buhat” hukman ang mga banhawon? Base bala ini sa mga ginhimo nila antes sila napatay? Indi. Dumdumon naton nga sang napatay sila, ginpatawad na sila ni Jehova sa ila mga sala. Gani ini nga “mga buhat” indi ang mga ginhimo nila antes sila napatay. Sa baylo, amo ini ang ila himuon sa tapos sila matudluan sa bag-ong kalibutan. Dapat man magtuon parte kay Jesucristo ang matutom nga mga alagad sang Dios, pareho nanday Noe, Samuel, David, kag Daniel. Kag dapat man sila magtuo sa iya halad. Kon madamo sang dapat tun-an ini nga mga matarong, mas madamo pa gid sang dapat tun-an ang mga indi matarong.
19. Ano ang matabo sa mga magasikway sa sining dalayawon nga tsansa nga ginhatag sa ila?
19 Ano ang matabo sa mga magasikway sa sining dalayawon nga tsansa nga ginhatag sa ila? Ang Bugna 20:15 nagasiling: “Ang bisan sin-o nga wala masapwan nga nasulat sa libro sang kabuhi gintagbong man sa linaw nga kalayo.” Laglagon sila sing bug-os. Gani dapat gid naton siguraduhon nga nasulat ang aton ngalan sa libro sang kabuhi kag indi ini mapanas.
Ginatudluan sang isa ka brother ang iban. Isa sia sa mga nagatudlo sa pinakamadamo nga tawo sa tion sang Isa ka Libo ka Tuig nga Paggahom (Tan-awa ang parapo 20)
20. Ano nga makalilipay nga hilikuton ang himuon sa tion sang Isa ka Libo ka Tuig nga Paggahom? (Tan-awa ang piktyur sa kober.)
20 Makalilipay gid nga tion ang Isa ka Libo ka Tuig nga Paggahom. Himuon sa sini nga tion ang pagtudlo sa pinakamadamo nga tawo nga wala pa gid anay natabo sa duta. Pero sa sini nga tion, dapat pamatud-an sang mga matarong kag mga indi matarong nga handa sila sa pagtuman sa mga kasuguan ni Jehova. (Isa. 26:9; Binu. 17:31) Paano himuon ang pagtudlo sa mga tawo? Buligan kita sang masunod nga artikulo para mahangpan kag mapabaloran naton ini nga pagtudlo.
AMBAHANON 147 Kabuhi nga Dayon—Saad sa Aton
^ Binagbinagon sa sini nga artikulo ang aton bag-o nga paghangop sa ginsiling ni Jesus sa Juan 5:28, 29. Parte ini sa mga banhawon nga “makabaton sang kabuhi nga wala sing katapusan” kag sa mga banhawon nga “hukman.” Matun-an naton kon ano ang ginapatuhuyan sining duha ka klase sang pagkabanhaw kag kon sin-o ang nalakip sa kada grupo.
^ Ginsulatan ini nga libro sugod sang “pagtukod sa kalibutan.” Ini nga kalibutan amo ang mga tawo nga puede makabenepisyo sa halad-gawad ni Jesus. (Mat. 25:34; Bug. 17:8) Gani posible gid nga ang ngalan sang matarong nga si Abel amo ang una nga nasulat sa libro sang kabuhi.
^ Sang una, ginpaathag naton nga ang tinaga nga “hukman” nga gingamit diri nagakahulugan sang pagpakamalaut ukon may malain nga resulta. Ang matuod, isa ini sang posible nga kahulugan sang tinaga nga “paghukom.” Pero gingamit ni Jesus ang tinaga nga “hukman” sa Juan 5:29 sa lain nga kahulugan. Nagapatuhoy ini sa pagdesisyon base sa naobserbahan sa isa ka tawo ukon sa “pag-usisa sa ginahimo sang isa ka tawo,” suno sa isa ka diksionaryo sang Griego nga mga tinaga sa Biblia.
