TULUN-AN NGA ARTIKULO 40
“Nagabulig sa Madamo nga Mangin Matarong”
“Ang mga nagabulig sa madamo nga mangin matarong magasilak pareho sang mga bituon tubtob sa wala sing katubtuban.”—DAN. 12:3.
AMBAHANON 151 Magapanawag Sia
ANG BINAGBINAGON SA SINI NGA ARTIKULO *
1. Ano ang makalilipay nga matabo sa tion sang Isa ka Libo ka Tuig nga Paggahom?
MAKALILIPAY gid kon magsugod na ang pagbanhaw sa mga tawo diri sa duta sa tion sang Isa ka Libo ka Tuig nga Paggahom sang Cristo. Nahidlaw na gid kita nga makita liwat ang aton mga pinalangga nga napatay. Amo man sini ang ginabatyag ni Jehova. (Job 14:15) Imadyina ang kalipay sang tanan sa duta kon banhawon na ang ila mga pinalangga. Natun-an naton sa nagligad nga artikulo nga nasulat na ang ngalan sang “mga matarong” sa libro sang kabuhi, kag banhawon sila para “makabaton sang kabuhi nga wala sing katapusan.” (Binu. 24:15; Juan 5:29) Posible nga malakip sa mga una nga banhawon sa duta ang madamo sa aton mga pinalangga. * Natun-an man naton nga banhawon ang “mga indi matarong” para “hukman.” Nalakip sa ila ang mga napatay nga wala mahatagan sang tsansa nga makilala si Jehova ukon maalagad sia sang buhi pa sila.
2-3. (a) Suno sa Isaias 11:9, 10, ano nga pagtudlo sa pinakamadamo nga tawo ang himuon nga wala pa gid anay natabo sa duta? (b) Ano ang binagbinagon naton sa sini nga artikulo?
2 Dapat tudluan ining tanan nga mga banhawon. (Isa. 26:9; 61:11) Gani dapat himuon ang pagtudlo sa pinakamadamo nga tawo nga wala pa gid anay natabo sa duta. (Basaha ang Isaias 11:9, 10.) Ngaa? Una, dapat tun-an sang mga indi matarong nga banhawon ang parte kay Jesucristo, sa Ginharian sang Dios, sa halad-gawad ni Jesus, kag kon ngaa importante gid ang ngalan ni Jehova kag kon ngaa sia lang ang may kinamatarong sa paggahom. Dayon, dapat man tun-an sang mga matarong kon ano ang amat-amat nga gintudlo ni Jehova sa iya katawhan parte sa iya katuyuan para sa duta. Madugay na nga napatay ang iban sa sining matutom nga mga alagad ni Jehova antes pa nakompleto ang Biblia. Gani madamo gid sang dapat tun-an ang mga matarong kag mga indi matarong.
3 Sa sini nga artikulo, binagbinagon naton ini nga mga pamangkot: Paano himuon ini nga pagtudlo sa pinakamadamo nga tawo? Ano ang basihan sa desisyon kon bala permanente nga isulat ang ila ngalan sa libro sang kabuhi ukon indi? Importante sa aton ang sabat sa sini nga mga pamangkot. Matun-an naton ang pila ka dalayawon nga mga tagna sa mga libro sang Daniel kag Bugna. Magabulig ini sa aton para mahangpan pa gid naton sing maayo kon ano ang matabo kon banhawon na ang mga napatay. Una, binagbinagon naton ang makalilipay nga matabo nga gintagna sa Daniel 12:1, 2.
‘MAGAMATA ANG MGA HALIN SA YAB-OK’
4-5. Ano ang ginasiling sang Daniel 12:1 parte sa tion sang katapusan?
4 Basaha ang Daniel 12:1. Mabasa sa libro sang Daniel ang makalilipay nga matabo sa tion sang katapusan. Halimbawa, ang Daniel 12:1 nagasiling nga “nagatindog para sa [katawhan sang Dios]” si Miguel, nga amo si Jesucristo. Natuman ini nga tagna sang 1914 sang nangin Hari si Jesus sa Ginharian sang Dios sa langit.
5 Pero ginsilingan man si Daniel nga “magahulag” si Jesus sa “tion sang kagamo nga wala pa gid matabo halin sang gintukod ang mga pungsod.” Ining “tion sang kagamo” amo ang “dakung kapipit-an” nga ginsambit sa Mateo 24:21. Magahulag si Jesus para amligan ang katawhan sang Dios sa katapusan sini nga tion sang kagamo, nga amo ang Armageddon. Ini nga katawhan amo ang ginasiling sang libro sang Bugna nga daku nga kadam-an nga “naggua halin sa dakung kapipit-an.”—Bug. 7:9, 14.
6. Ano ang matabo pagkatapos makalampuwas ang daku nga kadam-an sa dakung kapipit-an? Ipaathag. (Tan-awa man sa sini nga isyu ang “Mga Pamangkot Gikan sa mga Bumalasa” parte sa mga banhawon sa duta.)
6 Basaha ang Daniel 12:2. Ano ang matabo pagkatapos makalampuwas ang daku nga kadam-an sa sining tion sang kagamo? Sang una, abi naton nagapatuhoy ini nga tagna sa malaragwayon nga pagbanhaw sa mga alagad sang Dios, ukon sa pag-uswag sang pagbantala nga hilikuton sang halos napauntat ini sang mga nagapamatok sang 1918. Pero subong, nahangpan naton nga nagapatuhoy ini sa pagbanhaw sa mga napatay nga matabo sa bag-ong kalibutan. * Ngaa masiling naton ini? Ang tinaga nga “yab-ok” gingamit man sa Job 17:16 kag nagakahulugan ini sing “Lulubngan.” Gani ang ginapatuhuyan sang Daniel 12:2 amo ang pagbanhaw sa mga napatay nga matabo pagkatapos sang katapusan nga mga adlaw kag pagkatapos sang Armageddon.
7. (a) Ano ang buot silingon nga magabaton sing “kabuhi nga wala sing katapusan” ang iban sa mga banhawon? (b) Ngaa ‘mas maayo ini nga pagkabanhaw’?
7 Pero ano ang buot silingon sang ginasiling sang Daniel 12:2 nga magabaton sing “kabuhi nga wala sing katapusan” ang iban sa mga banhawon? Buot silingon sini nga ang mga banhawon may paglaum nga mabuhi sing wala sing katapusan. Mabaton nila ini kon kilalahon nila, ukon padayon nga kilalahon, kag tumanon si Jehova kag si Jesus sa tion sang 1,000 ka tuig. (Juan 17:3) ‘Mas maayo ini nga pagkabanhaw’ kon ipaanggid sa naeksperiensiahan sang mga tawo nga ginbanhaw sang una. (Heb. 11:35) Ngaa? Bangod ang mga tawo nga ginbanhaw sang una napatay liwat sang ulihi.
8. Ano ang buot silingon nga “pakahuy-an kag pakamalauton tubtob san-o” ang iban sa mga banhawon?
8 Pero may mga banhawon nga indi gusto magpatudlo kay Jehova. Gintagna sa libro sang Daniel nga “pakahuy-an kag pakamalauton tubtob san-o” ang iban sa mga banhawon. Bangod magarebelde sila, indi pag-isulat ang ila ngalan sa libro sang kabuhi kag indi sila magabaton sing kabuhi nga wala sing katapusan. Sa baylo, ‘pakamalauton sila tubtob san-o’ ukon laglagon sing bug-os. Gani ginapatuhuyan sang Daniel 12:2 ang matabo sa ulihi sa tanan nga banhawon, kag depende ini sa himuon nila pagkatapos sila banhawon. * (Bug. 20:12) Ang iban mabuhi sing wala sing katapusan, pero ang iban laglagon.
“NAGABULIG SA MADAMO NGA MANGIN MATARONG”
9-10. Ano pa gid ang matabo pagkatapos sang dakung kapipit-an, kag sin-o ang “magasilak pareho sang kasanag sang kahawaan”?
9 Basaha ang Daniel 12:3. Ano pa gid ang matabo pagkatapos sang “tion sang kagamo”? Dugang sa ginsiling sang Daniel 12:2, may ginsiling ang bersikulo 3 nga matabo pagkatapos sang dakung kapipit-an.
10 Sin-o ang “magasilak pareho sang kasanag sang kahawaan”? Buligan kita sang Mateo 13:43 para mabal-an kon sin-o sila. Nagsiling si Jesus: “Sa sina nga tion, ang mga matarong magasilak sing masanag kaangay sang adlaw sa Ginharian sang ila Amay.” Ginapatuhuyan diri ni Jesus “ang mga anak sang Ginharian,” ukon ang iya hinaplas nga mga kauturan, nga magaalagad kaupod niya sa Ginharian sa langit. (Mat. 13:38) Gani ang ginapatuhuyan sang Daniel 12:3 amo ang mga hinaplas kag ang ila himuon sa tion sang Isa ka Libo ka Tuig nga Paggahom.
Suportahan gid sang 144,000 si Jesucristo sa pagdumala sa pagtudlo sa mga tawo sa 1,000 ka tuig (Tan-awa ang parapo 11)
11-12. Ano ang himuon sang 144,000 sa 1,000 ka tuig?
11 Paano buligan sang mga hinaplas ang “madamo nga mangin matarong”? Suportahan gid sang mga hinaplas si Jesucristo sa pagdumala sa pagtudlo sa mga tawo diri sa duta sa 1,000 ka tuig. Magagahom bilang mga hari ang 144,000, pero magaalagad man sila bilang mga saserdote. (Bug. 1:6; 5:10; 20:6) Gani magabulig sila para ‘mag-ayo ang mga pungsod’ kag para amat-amat nga mangin perpekto ang mga tawo. (Bug. 22:1, 2; Ezeq. 47:12) Mangin malipayon gid ang mga hinaplas sa paghimo sini.
12 Sin-o ang “madamo” nga buligan nga mangin matarong? Nalakip sa ila ang mga banhawon, ang mga makalampuwas sa Armageddon, kag ang mga bata nga posible nga mabun-ag sa bag-ong kalibutan. Sa katapusan sang 1,000 ka tuig, mangin perpekto na ang tanan nga nagaistar sa duta. Gani san-o permanente nga isulat ang ila ngalan sa libro sang kabuhi?
ANG KATAPUSAN NGA PAGTILAW
13-14. Ano ang dapat ipakita sang tanan nga perpekto nga mga tawo sa duta antes sila makabaton sang kabuhi nga wala sing katapusan?
13 Dapat naton tandaan nga bisan pa perpekto ang isa ka tawo, indi buot silingon sini nga mabuhi na sia sing wala sing katapusan. Binagbinaga si Adan kag si Eva. Perpekto sila, pero dapat nila ipakita nga ginatuman nila si Jehova nga Dios antes sila hatagan sang kabuhi nga wala sing katapusan. Kag makapasubo gid kay wala sila nagtuman sa iya.—Roma 5:12.
14 Ano ang kahimtangan sang mga tawo diri sa duta sa katapusan sang 1,000 ka tuig? Perpekto na sila tanan. Suportahan bala sang tanan nga perpekto nga mga tawo ang paggahom ni Jehova sing wala sing katapusan? Ukon mangin pareho bala kay Adan kag kay Eva ang iban sa ila nga nangin indi matutom bisan pa perpekto sila? Dapat masabat ini nga mga pamangkot, pero paano?
15-16. (a) San-o hatagan sang tsansa ang tanan nga tawo para ipakita nga matutom sila kay Jehova? (b) Ano ang matabo pagkatapos sini nga pagtilaw?
15 Gapuson si Satanas sa sulod sang 1,000 ka tuig. Gani indi na niya mapatalang ang mga tawo. Pero pagkatapos sang 1,000 ka tuig, buy-an si Satanas. Tinguhaan niya nga patalangon ang perpekto nga mga tawo. Sa sini nga tion, may tsansa ang tanan nga perpekto nga mga tawo para ipakita nga ginapadunggan nila ang ngalan sang Dios kag ginasuportahan nila ang iya paggahom. (Bug. 20:7-10) Nagadepende sa himuon sang kada isa kon bala permanente nga isulat ang iya ngalan sa libro sang kabuhi.
16 May pila ka tawo nga mangin indi matutom pareho kay Adan kag kay Eva, kag isikway nila ang paggahom ni Jehova. Ano ang matabo sa ila? Ang Bugna 20:15 nagasiling: “Ang bisan sin-o nga wala masapwan nga nasulat sa libro sang kabuhi gintagbong man sa linaw nga kalayo.” Gani laglagon sing bug-os ini nga mga rebelde. Pero ang kalabanan sa perpekto nga mga tawo makapasar sa sining katapusan nga pagtilaw. Permanente nga isulat ang ila ngalan sa libro sang kabuhi.
“SA TION SANG KATAPUSAN”
17. Ano ang ginsiling sang anghel kay Daniel nga matabo sa aton tion subong? (Daniel 12:4, 8-10)
17 Nalipay gid kita nga hunahunaon ang mga matabo sa palaabuton. Pero may nabaton man si Daniel nga importante nga impormasyon parte “sa tion sang katapusan,” nga amo ang aton tion subong. (Basaha ang Daniel 12:4, 8-10; 2 Tim. 3:1-5) Nagsiling ang anghel kay Daniel: “Ang matuod nga ihibalo magabugana.” Buot silingon, mas mahangpan pa gid sing maayo sang katawhan sang Dios ang mga tagna sa libro sang Daniel. Nagsiling man ang anghel nga sa sini nga tion, “ang mga malauton magahimo sing malaut. Wala gid sing malauton nga makahangop sini.”
18. Ano ang dali na lang matabo sa malain nga mga tawo?
18 Subong, daw wala ginasilutan ang malain nga mga tawo sa ila malain nga ginahimo. (Mal. 3:14, 15) Pero dali na lang hukman ni Jesus ang mga tawo nga pareho sa mga kanding, kag painon niya sila sa mga tawo nga pareho sa mga karnero. (Mat. 25:31-33) Indi makalampuwas sa dakung kapipit-an ining malain nga mga tawo, kag indi sila pagbanhawon para mabuhi sa bag-ong kalibutan. Wala ang ila ngalan sa “libro nga nagaunod sang mga ngalan nga ginadumdom sang Dios” nga ginsambit sa Malaquias 3:16.
19. Ano ang dapat naton himuon subong, kag ngaa? (Malaquias 3:16-18)
19 Dapat naton pamatud-an subong paagi sa aton ginahimo nga wala kita nalakip sa malain nga mga tawo. (Basaha ang Malaquias 3:16-18.) Ginatipon na ni Jehova ang ginakabig niya nga “hamili nga katawhan,” ukon hamili nga ginapanag-iyahan. Gusto naton nga malakip kita sa ila.
Malipay gid kita nga makita si Daniel, ang aton mga pinalangga, kag ang madamo pa kon banhawon na sila sa bag-ong kalibutan (Tan-awa ang parapo 20)
20. Ano ang katapusan nga ginpromisa kay Daniel, kag ngaa gusto mo na gid matuman ini nga promisa?
20 Dalayawon gid ang mga nagakatabo subong. Pero mas dalayawon pa gid ang mga matabo sa palaabuton. Dali na lang laglagon ang tanan nga malain. Dayon, makita naton nga matuman ang ginpromisa ni Jehova kay Daniel: “Magatindog ka para sa imo bahin sa katapusan sang mga adlaw.” (Dan. 12:13) Sigurado nga gusto mo na gid mag-abot ang tion nga “magatindog” ukon mabuhi liwat si Daniel kag ang imo mga pinalangga. Gani himua ang imo bug-os nga masarangan subong nga mangin matutom, kag makasigurado ka nga permanente nga isulat ni Jehova ang imo ngalan sa iya libro sang kabuhi.
AMBAHANON 80 Tilawi kag Tan-awa nga Maayo si Jehova
^ Binagbinagon sa sini nga artikulo ang aton bag-o nga paghangop sa ginasiling sang Daniel 12:2, 3 parte sa himuon nga pagtudlo sa pinakamadamo nga tawo. Tun-an naton kon san-o ini matabo kag kon sin-o ang magahimo sini. Tun-an man naton kon paano ini makabulig para mangin handa ang mga ari sa duta sa katapusan nga pagtilaw nga matabo pagkatapos sang Isa ka Libo ka Tuig nga Paggahom sang Cristo.
^ Posible nga una nga banhawon ang henerasyon sang matutom nga mga alagad ni Jehova nga napatay sa katapusan nga mga adlaw. Dayon banhawon ang ginsundan nila nga henerasyon. Himuon ang pagbanhaw sa kada henerasyon asta mabanhaw ang tanan nga ara sa handumanan ni Jehova. Kon amo sini ang matabo, maabiabi sang kada henerasyon ang mga kilala gid nila. Ano man ang matabo, makasalig kita nga mangin organisado ang pagbanhaw sa mga mabuhi sa duta. Kay man, ang Biblia nagasiling nga organisado gid ang pagbanhaw sa mga mabuhi sa langit kay ang kada isa mabanhaw sa iya “kaugalingon nga turno.”—1 Cor. 14:33; 15:23.
^ Ginabag-o sini ang aton una nga paghangop nga mabasa sa kapitulo 17 sang libro nga Binagbinaga ang Tagna ni Daniel!, kag sa Hulyo 1, 1987, nga Ang Lalantawan, p. 21-25.
^ Lain naman ang ginapatuhuyan sang mga tinaga nga “mga matarong” kag “mga indi matarong” sa Binuhatan 24:15 kag “mga naghimo sang maayo” kag “mga naghimo sang malaut” sa Juan 5:29. Nagapatuhoy ini sa ginhimo sang mga banhawon antes sila napatay.
