1. Paano naton mabal-an nga masaligan ang isa ka tawo?

 GINATINGUHAAN sang masaligan nga tawo nga tumanon ang iya mga ginpromisa kag nagahambal sia sang matuod. (Sal. 15:4) Wala nagaduhaduha ang mga tawo nga masaligan nila sia. Gusto naton nga amo sini ang masiling sang aton mga kauturan parte sa aton. Ano ang himuon naton para saligan nila kita?

2. Paano naton mapamatud-an nga masaligan kita?

² Indi naton mapilit sa iban nga saligan nila kita. Dapat naton pamatud-an paagi sa aton ginahimo nga masaligan kita. Ang pagsalig daw pareho sa kuarta. Nagapanikasog gid kita para makakita sang kuarta, pero kadasig lang sini madula. Dapat man kita magpanikasog para saligan kita sang iban, pero kadasig lang madula sini nga pagsalig. Napamatud-an gid ni Jehova nga masaligan naton sia. Wala sing rason para madula ang aton pagsalig sa iya bangod “masaligan ang tanan niya nga ginahimo.” (Sal. 33:4) Kag gusto niya nga ilugon naton sia. (Efe. 5:1) Binagbinagon naton ang pila ka halimbawa sang mga alagad ni Jehova nga nag-ilog sa ila Amay sa langit kag nagpamatuod nga masaligan sila. Binagbinagon man naton ang lima ka kinaiya nga magabulig sa aton para saligan kita sang iban.

3-4. Paano ginpamatud-an sang manalagna nga si Daniel nga masaligan sia, kag ano ang dapat naton ipamangkot sa aton kaugalingon?

³ Masaligan gid ang manalagna nga si Daniel. Isa sia ka bihag sang gindala sia sa Babilonia, pero napamatud-an niya sang ulihi nga masaligan sia nga tawo. Mas ginsaligan pa gid sia sang mga tawo sang ginpaathag niya ang kahulugan sang damgo ni Hari Nabocodonosor sang Babilonia paagi sa bulig ni Jehova. Isa ka bes, dapat isugid ni Daniel sa hari nga wala nalipay si Jehova sa hari. Isa ini ka mensahe nga indi gusto mabatian sang isa ka hari. Kinahanglan ni Daniel sang kaisog kay grabe kon mangakig si Nabocodonosor.  (Dan. 2:12; 4:20-22, 25) Pagligad sang madamo nga tuig, napamatud-an liwat ni Daniel nga masaligan sia kay napaathag niya ang kahulugan sang mensahe nga nasulat sa dingding sang palasyo sa Babilonia. (Dan. 5:5, 25-29) Sang ulihi, natalupangdan man ni Dario nga Medianhon kag sang iya mga opisyal nga ‘may pinasahi nga kaalam’ si Daniel. Nagsiling sila nga “masaligan sia kag wala nagapabaya kag wala gid sia nagahimo sing malain nga butang.” (Dan. 6:3, 4) Gani bisan ang pagano nga mga manuggahom nagsiling nga masaligan si Daniel nga isa ka alagad ni Jehova.

⁴ Samtang ginapamalandungan naton ang halimbawa ni Daniel, mas maayo kon pamangkuton naton ang aton kaugalingon: ‘Ano ang masiling sang mga indi Saksi ni Jehova parte sa akon? Masiling bala nila nga ginahimo ko gid ang akon mga responsibilidad kag masaligan ako?’ Ngaa importante ini nga mga pamangkot? Bangod kon masaligan kita, madayaw naton si Jehova.

5. Ngaa nakilala si Hananias nga masaligan nga tawo?

⁵ Sang 455 B.C.E., pagkatapos mahuman ang mga pader sang Jerusalem, nangita si Gobernador Nehemias sang masaligan nga mga tawo para mag-asikaso sa siudad. Lakip sa mga ginpili ni Nehemias si Hananias nga amo ang prinsipe sang Pamakod sang templo. Ginsiling sang Biblia nga si Hananias “ang pinakamasaligan nga tawo kag mas mahinadlukon sa matuod nga Dios sangsa iban.” (Neh. 7:2) Bangod palangga ni Hananias si Jehova kag nahadlok sia nga indi malipay sa iya ang Dios, ginhimo niya ang iya bug-os nga masarangan sa bisan ano nga asaynment nga ginhatag sa iya. Makabulig man ini nga mga kinaiya para saligan kita sa aton pag-alagad sa Dios.

6. Paano ginpamatud-an ni Tiquico nga masaligan sia nga abyan ni apostol Pablo?

 ⁶ Binagbinaga ang halimbawa ni Tiquico. Isa sia ka masaligan nga utod nga nangin kaupod ni apostol Pablo. Sang napriso si Pablo sa isa ka balay, ginsaligan niya si Tiquico kag gintawag niya sia nga “matutom nga ministro.” (Efe. 6:21, 22) Ginsaligan sia ni Pablo sa pagdala sang mga sulat sa mga kauturan sa Efeso kag sa Colosas, kag sa pagpalig-on kag pagpaumpaw sa ila. Bangod sang halimbawa ni Tiquico, madumduman naton ang matutom kag masaligan nga mga brother nga nagabulig sa aton para mangin suod kita kay Jehova.—Col. 4:7-9.

7. Ano ang matun-an mo sa masaligan nga mga gulang kag mga ministeryal nga alagad sa inyo kongregasyon?

⁷ Subong, nagapasalamat gid kita sa aton masaligan nga mga gulang kag mga ministeryal nga alagad. Pareho kanday Daniel, Hananias, kag Tiquico, ginahimo nila ang ila mga responsibilidad sa bug-os nila nga masarangan. Halimbawa, kon mag-attend kita sa aton midweek miting, kabalo kita nga may naasayn sa tanan nga bahin sang programa. Kag nagapasalamat gid ang mga gulang kon ara sa miting ang mga ginhatagan sang bahin kag ginhandaan nila ini. Kon gin-agda naton ang aton mga Bible study nga mag-attend sa aton miting sa Sabado ukon Domingo, sigurado kita nga may brother nga magahatag sang pamulongpulong publiko. Kag nagasalig kita nga may mga publikasyon kita nga magamit naton sa aton pagbantala. Nagapasalamat kita kay Jehova kay wala gid kita ginapabay-an sining matutom nga mga brother. Pero paano naton mapamatud-an nga masaligan kita?

8. Paano naton mapakita ang husto nga kabalaka sa kaayuhan sang iban? (Hulubaton 11:13)

⁸ Palangga naton ang aton mga kauturan, kag nabalaka kita sa ila kaayuhan. Pero dapat naton respetuhon ang ila personal nga kabuhi. May pila ka Cristiano sang unang siglo nga “mga kutsokutsera” kag “mga hilabtera sa kabuhi sang iban, nga nagahambal sang mga butang nga indi nila dapat ihambal.” (1 Tim. 5:13) Indi gid naton gusto nga mangin pareho sa ila. Pero ano abi kon may ginsugid sa aton ang isa ka utod parte sa iya personal nga kabuhi kag ginpangabay niya kita nga indi ini pag-isugid sa iban? Halimbawa, basi sugiran kita sang isa ka sister parte sa iya balatian ukon parte sa iban pa niya nga problema, kag ginpangabay niya kita nga indi ini pag-isugid sa iban. Dapat naton himuon ang iya ginpangabay. * (Basaha ang Hulubaton 11:13.) Binagbinagon naman naton ang iban pa nga sitwasyon nga indi naton dapat pag-isugid sa iban ang kompidensial nga mga impormasyon.

9. Paano mapamatud-an sang mga miembro sang pamilya nga masaligan sila?

⁹ Pamatud-i sa imo pamilya nga masaligan ka. May pila ka kompidensial nga impormasyon ang pamilya nga indi dapat pag-isugid sa iban. Responsibilidad ini sang kada miembro sang pamilya. Halimbawa, basi may batasan ang isa ka sister nga naham-ot gid ang iya bana. Isugid bala ini sang iya bana sa iban? Indi ini paghimuon sang bana kay mahuy-an ang iya asawa. Palangga niya ang iya asawa, kag indi gid niya gusto nga masakitan ang iya asawa. (Efe. 5:33) Gusto man sang mga tin-edyer nga respetuhon sila. Dapat ini tandaan sang mga ginikanan. Indi dapat pag-isugid sang mga ginikanan sa iban ang mga sala sang ila kabataan kay mahuy-an ang ila kabataan. (Col. 3:21) Dapat man maghalong ang kabataan. Indi nila dapat pag-isugid sa iban ang mga impormasyon nga posible nga magresulta sa kahuy-anan sang iban nga miembro sang ila pamilya. (Deut. 5:16) Kon panikasugan sang kada miembro sang  pamilya nga indi pag-isugid sa iban ang kompidensial nga mga impormasyon parte sa ila pamilya, magasuod pa gid sila sa isa kag isa.

10. Ano ang isa ka kinaiya sang matuod nga abyan? (Hulubaton 17:17)

¹⁰ Pamatud-i sa imo mga abyan nga masaligan ka. May mga tion nga kinahanglan naton isugid sa aton suod nga abyan ang aton ginabatyag. Mabudlay ini himuon kon kaisa. Posible nga nasaw-ahan kita magsugid sa iban sang aton ginahunahuna, kag magalalain gid kita kon mabal-an naton nga ginsugid sang aton abyan sa iban ang aton ginsiling sa iya. Pero nagapasalamat gid kita kon may abyan kita nga masugiran naton sang aton ginabatyag, kag wala sia nagapanugid sa iban. ‘Matuod sia nga abyan.’—Basaha ang Hulubaton 17:17.

11. (a) Paano mapakita sang mga gulang kag sang ila asawa nga masaligan sila? (b) Ano ang matun-an naton sa isa ka gulang nga wala nagasugid sang kompidensial nga mga impormasyon sa iya pamilya? (Tan-awa ang piktyur.)

¹¹ Pamatud-i sa imo mga kauturan nga masaligan ka. Ang mga gulang nga masaligan sa kompidensial nga mga impormasyon daw pareho sang “palalipdan sa hangin, isa ka duog nga palanaguan” para sa mga kauturan. (Isa. 32:2) Masugiran naton sila sang tanan nga gusto naton isugid kay nagasalig kita nga indi nila ini pag-isugid sa iban. Wala naton sila ginapilit nga isugid sa aton ang mga impormasyon nga indi nila dapat pag-isugid. Nagapasalamat man kita sa mga asawa sang mga gulang nga wala nagapamangkot sa ila bana sang kompidensial nga mga impormasyon. Ang matuod, para sa kaayuhan sang asawa sang gulang kon indi niya mabal-an ang personal nga mga impormasyon sang mga kauturan. Ang asawa sang isa ka gulang nagsiling: “Nagapasalamat ako nga wala gid ako ginasugiran sang akon bana kon sin-o ang mga kauturan nga gina-shepherding nila nga mga gulang ukon ang mga kauturan nga nagakinahanglan sang ila bulig, kag kon ano ang mga problema sini nga mga kauturan. Nagapasalamat ako kay nalikawan ko nga mabalaka sa mga problema nga wala man ako sing mahimo. Bangod sini, wala ako natahap mag-istorya sa tanan nga kauturan. Kag nagasalig ako nga kon isugid ko sa  akon bana ang akon personal nga nabatyagan ukon mga problema, indi man niya ini pag-isugid sa iban.” Ang matuod, gusto naton tanan nga saligan kita sang iban. Ano nga mga kinaiya ang makabulig sa aton para saligan nila kita? Binagbinagon naton ang lima ka kinaiya.

12. Ipaathag kon ngaa ang gugma amo ang pinakaimportante nga kinaiya para saligan kita sang iban.

¹² Ang gugma amo ang pinakaimportante nga kinaiya para saligan kita sang iban. Nagsiling si Jesus nga dapat naton higugmaon si Jehova kag ang aton isigkatawo. Ginsiling niya nga amo ini ang duha ka pinakaimportante nga mga sugo. (Mat. 22:37-39) Masaligan gid si Jehova kag gusto naton sia ilugon bangod sang aton gugma sa iya. Ginailog naton sia kon ginarespeto naton ang personal nga kabuhi sang aton mga kauturan bangod sang aton gugma sa ila. Indi gid naton pag-isugid sa iban ang impormasyon nga posible nga maghalit sa ila, makasakit sa ila, ukon magresulta sa ila kahuy-anan.—Juan 15:12.

13. Kon mapainubuson kita, paano ini makabulig sa aton para saligan kita sang iban?

¹³ Saligan kita sang iban kon mapainubuson kita. Wala ginatinguhaan sang mapainubuson nga alagad ni Jehova nga sia gid ang una nga magsugid sang isa ka impormasyon para dayawon sia sang iban. (Fil. 2:3) Wala niya ginapabatyag sa iban nga labaw sia sangsa ila kay may nabal-an sia nga mga impormasyon pero indi niya ini puede isugid sa ila. Kon mapainubuson kita, wala man naton ginapanugidsugid ang aton personal nga opinyon sa mga topiko nga wala ginabinagbinag sa Biblia ukon sa aton mga publikasyon nga nabase sa Biblia.

14. Paano makabulig sa aton ang paghangop para saligan kita sang iban?

¹⁴ Makabulig sa aton ang paghangop para mabal-an naton ang “tion sa paghipos kag tion sa paghambal.” (Man. 3:7) Sa iban nga pungsod, kinaandan mabatian ang pareho sa sini nga ekspresyon, “Kon ang paghambal isa ka pilak, bulawan naman ang paghipos.” Buot silingon, may mga tion nga mas maayo nga maghipos na lang sangsa maghambal. Amo ini ang rason kon ngaa nagsiling ang Hulubaton 11:12: “Ang tawo nga mahinangpanon nagahipos lang.” Binagbinaga ang isa ka halimbawa. Pirme ginapangabay ang isa ka madugay na nga gulang nga magbulig sa iban nga mga kongregasyon sa pag-asikaso sa mabudlay nga mga problema. Amo ini ang ginsiling sang isa pa ka gulang parte sa iya, “Wala gid sia nagapanugid sang kompidensial nga mga impormasyon parte sa iban nga mga kongregasyon.” Ginpakita sang gulang nga may paghangop sia, gani ginarespeto gid sia sang mga gulang nga kaupod niya sa kongregasyon. Sigurado sila nga indi niya pag-isugid sa iban ang ila kompidensial nga mga impormasyon.

15. Maghatag sing halimbawa nga nagapakita nga saligan kita sang iban kon bunayag ukon honest kita.

¹⁵ Para saligan kita sang iban, dapat bunayag ukon honest man kita. Ginasaligan naton ang honest nga tawo kay kabalo kita nga pirme sia nagasugid sang matuod. (Efe. 4:25; Heb. 13:18) Halimbawa, ibutang ta nga gusto mo mag-uswag sa imo ikasarang sa pagtudlo. Gani ginpangabay mo ang isa ka utod nga pamatian ang imo bahin kag maghatag sang panugda kon paano mo pa ini mapauswag. Sin-o sa banta mo ang magasiling sang dapat mo gid nga pauswagon? Ang utod bala nga nagahambal sang gusto mo lang mabatian ukon ang utod nga mainayuhon nga nagahambal sang matuod? Kabalo ka na sang sabat. Ang Biblia nagasiling: “Mas maayo ang dayag nga pagsabdong sangsa ginatago nga gugma. Ang matutom nga abyan nagasabdong bisan pa makasakit ini sa balatyagon.” (Hulu. 27:5, 6) Sa primero, basi masakitan ka sa mga panugda sang imo honest nga abyan, pero amo gid ini ang makabulig sa imo para mag-uswag ka sa ulihi.

16. Suno sa Hulubaton 10:19, ngaa importante gid ang pagpugong sa kaugalingon?

 ¹⁶ Importante gid ang pagpugong sa kaugalingon para saligan kita sang iban. Kon may pagpugong kita sa kaugalingon, magabulig ini sa aton nga indi pag-ihambal ang kompidensial nga ginsugid sa aton sang iban. (Basaha ang Hulubaton 10:19.) Posible nga mabudlay punggan ang aton kaugalingon kon nagagamit kita sang social media. Kon indi kita maghalong, basi mapalapta naton sing indi hungod ang kompidensial nga mga impormasyon sa madamo nga tawo. Kag kon naglapta na ini nga mga impormasyon, wala na kita sang kontrol kon paano ini gamiton sang iban kag indi na naton mapunggan ang halit nga mangin resulta sini. Makabulig man ang pagpugong sa kaugalingon kon nagaistar kita sa pungsod nga ginadumilian ang aton hilikuton. Dapat kita maghalong sa pagsabat sa mga pamangkot sang mga nagapamatok kay basi paagi nila ini para makakuha sang mga impormasyon. Posible nga interogahon kita sang mga pulis para isugid naton ang mga impormasyon nga magabutang sa peligro sang kabuhi sang aton mga kauturan. Sa sini nga mga sitwasyon, dapat gid kita maghipos. Kon himuon naton ini, daw pareho lang nga ‘ginabusalan naton ang aton baba.’ (Sal. 39:1) Dapat naton pamatud-an nga masaligan kita sang tanan, lakip na sang aton pamilya, mga abyan, kag mga kauturan. Kag para saligan nila kita, kinahanglan naton ang pagpugong sa kaugalingon.

17. Paano kita makabulig sa kongregasyon para indi madula ang pagsalig sang mga kauturan sa kada isa?

¹⁷ Nagapasalamat gid kita kay Jehova bangod sa aton mapinalanggaon kag masaligan nga mga kauturan. Dapat naton tanan pamatud-an paagi sa aton ginahimo nga masaligan kita sang aton mga kauturan. Kon ang kada isa sa aton nagapanikasog nga ipakita ang gugma, pagkamapainubuson, paghangop, pagkabunayag, kag pagpugong sa kaugalingon, makabulig kita sa kongregasyon para indi madula ang pagsalig sang mga kauturan sa kada isa. Dapat padayon kita nga magpanikasog para pamatud-an nga masaligan kita sang iban. Kabay pa nga ilugon naton ang aton Dios nga si Jehova kag pamatud-an naton nga masaligan gid kita.