Sa 1 Corinto 15:8, nagsiling si Pablo: “Sa katapusan nagpakita man sia sa akon nga daw subong nga natawo ako sa wala pa ang tion.” Sang una, ginpaathag naton nga posible nga ginapatuhuyan ni Pablo ang iya eksperiensia sang nakita niya sa palanan-awon si Jesus sa langit. Daw pareho lang nga ginhatagan sia sang kadungganan nga mabun-ag liwat, ukon mabanhaw, kag makabaton sang espiritu nga kabuhi sa langit antes pa ini aktual nga matabo ginatos ka tuig sang ulihi. Pero pagkatapos matun-an pa gid sing maayo ini nga bersikulo, dapat naton bag-uhon ang paathag sa sini.

Ginapatuhuyan diri ni Pablo ang natabo sang nangin Cristiano sia. Pero ano ang buot niya silingon sang nagsiling sia nga ‘natawo sia sa wala pa ang tion’? May ara pila ka posible nga kahulugan sini.

Gulpi kag grabe gid ang epekto sang natabo sa iya. Wala gid ginapaabot kon ang isa ka bata matawo sa wala pa ang tion ukon kulang sa binulan. Daw pareho sa sini ang natabo kay Saulo (nga nakilala sang ulihi nga si Pablo). Sang nagapakadto sia sa Damasco para hingabuton ang mga Cristiano didto, wala gid sia nagapaabot nga makita niya sa palanan-awon si Jesus nga nabanhaw na. Wala gid ginapaabot ni Pablo nga mangin Cristiano sia, kag wala man ini ginapaabot sang mga Cristiano nga ginaplano niya nga hingabuton sa sini nga siudad. Kag grabe gid ang epekto sa iya sini nga eksperiensia kay temporaryo sia nga nabulag.—Binu. 9:1-9, 17-19.

Nangin Cristiano sia sa daw indi husto nga tion. Ang Griego nga tinaga nga gin-translate “natawo ako sa wala pa ang tion” puede man i-translate nga “natawo sa indi pa oras.” Amo ini ang mabasa sa Ang Pulong sang Dios: “Ang akon halimbawa pareho sang lapsag nga natawo sa indi pa oras.” Sang nangin Cristiano si Pablo, nakabalik na sa langit si Jesus. Sa nauna nga mga bersikulo, ginsambit ni Pablo nga nagpakita si Jesus sa mga disipulo antes magbalik si Jesus sa langit. Indi pareho sa ila, wala niya makita si Jesus nga nabanhaw. (1 Cor. 15:4-8) Pero nakita niya si Jesus sang ulihi bangod nagpakita sa iya si Jesus nga wala niya ginapaabot, kag natabo ini sa daw indi husto nga tion.

Wala sia nagapahambog sa natabo sa iya. Suno sa pila ka eksperto sa mga tinaga sa Biblia, ang ekspresyon nga gingamit ni Pablo puede magpahangop nga ginapakanubo niya ang iya kaugalingon. Kon amo sini ang ginahunahuna ni Pablo, mahangpan naton nga daw pareho lang nga nagasiling sia nga indi sia bagay nga mangin apostol. Ang matuod, amo ini ang masunod niya nga ginsiling: “Ako ang labing kubos sa mga apostoles, kag indi ako takus tawgon nga apostol, bangod ginhingabot ko ang kongregasyon sang Dios. Apang paagi sa wala tupong nga kaayo sang Dios may yara ako sini nga katungdanan.”—1 Cor. 15:9, 10.

Gani posible nga ginapatuhuyan ni Pablo ang gulpi kag wala ginapaabot nga pagpakita sa iya ni Jesus, ang daw indi husto nga tion nga nangin Cristiano sia, ukon ang pagbatyag niya nga indi sia bagay nga mangin apostol nga makakita kay Jesus sa palanan-awon. Ano man ang ginapatuhuyan ni Pablo, maathag nga ginpabaloran gid niya ini nga eksperiensia. Para sa iya, mabakod ini nga ebidensia nga nabanhaw si Jesus. Gani pirme niya ginasambit ini nga eksperiensia kon ginabantala niya nga nabanhaw si Jesus.—Binu. 22:6-11; 26:13-18.