1. Sang lapit na lang mapatay si apostol Pedro, ano ang ginpahimo sa iya ni Jehova?

 MATUTOM nga nag-alagad si apostol Pedro kay Jehova sa sulod sang madamo nga tinuig. Gin-updan niya si Jesus sa iya pagministeryo, ginsugdan niya ang pagbantala sa mga indi Judiyo, kag nangin miembro sia sang nagadumala nga hubon. Pero indi lang amo sini ang mga nahimo ni Pedro. Kabalo sadto si Pedro nga indi na magdugay ang iya kabuhi. Sang lapit na lang sia mapatay, may ginpahimo si Jehova sa iya. Sang mga 62-64 C.E., gingamit sia ni Jehova para maghimo sang duha ka sulat, nga amo ang mga libro sa Biblia nga 1 kag 2 Pedro. Nagalaum si Pedro nga makabulig sa mga Cristiano ang iya mga sulat bisan pa patay na sia.​—2 Ped. 1:​12-15.

2. Ngaa suno gid sa tion ang mga sulat ni Pedro?

² Ginhimo ni Pedro ang iya mga sulat sang tion nga ‘nagaantos sang nanuhaytuhay nga pagtilaw’ ang iya mga kauturan. (1 Ped. 1:6) Ginatinguhaan sadto sang malain nga mga tawo nga impluwensiahan ang kongregasyon sang butig nga mga panudlo kag mahigko nga mga buhat. (2 Ped. 2:​1, 2, 14) Kag malapit na lang maeksperiensiahan sang mga Cristiano sa Jerusalem “ang katapusan sang tanan nga butang,” ukon ang paglaglag sang Romano nga mga soldado sa Jerusalem kag sa templo sini. (1 Ped. 4:7) Sigurado gid nga nakabulig sa mga Cristiano ang mga sulat ni Pedro. Nabal-an nila kon ano ang dapat nila himuon para mabatas nila ang ila mga problema kag kon paano nila mahandaan ang mga kabudlayan sa ulihi. b

3. Ngaa dapat naton tun-an ang mga sulat ni Pedro?

³ Bisan pa para sa mga Cristiano sang unang siglo ang mga sulat ni Pedro, ginlakip ini ni Jehova sa Iya Pulong. Gani makabenepisyo kita subong sa sini nga mga sulat. (Roma 15:4) Pareho sa mga  Cristiano sang una, nagakabuhi man kita sa tion nga grabe kalain sang ginahimo sang mga tawo, kag may mga problema man kita nga nagapabudlay sa aton pag-alagad kay Jehova. Dugang pa, malapit na lang naton maeksperiensiahan ang isa ka daku nga kapipit-an. Mas daku pa ini sangsa kapipit-an nga naeksperiensiahan sang mga Judiyo sang ginlaglag ang Jerusalem kag ang templo sini. May pila ka importante nga mga pahanumdom sa duha ka sulat ni Pedro nga makabulig sa aton. Buligan kita sini nga padayon nga mangin handa sa pag-abot sang adlaw ni Jehova, daugon ang kahadlok sa tawo, kag higugmaon sing tudok ang isa kag isa. Makabulig man sa mga gulang ini nga mga pahanumdom para maatipan nila sing maayo ang mga kauturan.

4. Suno sa 2 Pedro 3:​3, 4, ano ang posible makapaluya sang aton pagtuo?

⁴ Ginapalibutan kita sang mga tawo nga wala nagapati sa mga tagna sa Biblia. Posible pakalainon kita sang mga nagapamatok sa aton bangod madamo na nga tinuig nga ginabantala naton nga malapit na ang katapusan. May pila pa gani ka tawo nga nagasiling nga indi gid ini mag-abot. (Basaha ang 2 Pedro 3:​3, 4.) Kon mabatian naton nga ginasiling ini sang aton ginabantalaan, sang aton kaupod sa obra, ukon sang miembro sang aton pamilya, posible magluya ang aton pagtuo. Sa sini nga sitwasyon, may ginsiling si Pedro nga makabulig sa aton.

5. Samtang ginahulat naton nga laglagon ining malain nga kalibutan, ano ang makabulig sa aton para mangin mapinasensiahon kita? (2 Pedro 3:​8, 9)

⁵ Para sa iban, mahinay si Jehova kay wala pa niya ginlaglag ining malain nga kalibutan. Makabulig sa aton ang ginsiling ni Pedro bangod ginapahanumdom kita sini nga lain ang pagtamod ni Jehova sa tion sangsa pagtamod sang mga tawo. (Basaha ang 2 Pedro 3:​8, 9.) Para kay Jehova, isa lang ka adlaw ang isa ka libo ka tuig. Mapinasensiahon si Jehova, kag indi niya gusto nga malaglag ang bisan sin-o. Pero kon mag-abot na ang iya adlaw, laglagon gid niya ini nga kalibutan. Gani samtang may tion pa, isa gid ka pribilehiyo para sa aton nga bantalaan ang mga tawo sa bilog nga kalibutan.

6. Ano ang himuon naton para ‘madumdom naton pirme’ ang adlaw ni Jehova? (2 Pedro 3:​11, 12)

⁶ Ginapalig-on kita ni Pedro nga ‘dumdumon pirme’ ang adlaw ni Jehova. (Basaha ang 2 Pedro 3:​11, 12.) Paano naton ini mahimo? Kada adlaw, panikasugan naton nga imadyinon kon daw ano kanami sang aton mangin kabuhi sa bag-ong kalibutan. Imadyina nga nagahaklo ka sang matinlo nga hangin, nagakaon ka sang masustansia nga pagkaon, ginaabiabi mo ang imo mga pinalangga nga ginbanhaw, kag ginatudluan mo ang mga tawo nga nagkabuhi ginatos ka tuig na ang nagligad kon paano natuman ang mga tagna sa Biblia. Kon imadyinon mo ini, makabulig ini sa imo nga mangin excited sa sini kag indi ka magduhaduha nga malapit na lang gid ang katapusan. Bangod ‘nahibaluan na naton nga daan’ ang matabo sa palaabuton, ‘indi kita mapatalang’ sang mga tawo nga nagatudlo sang butig nga mga panudlo.​—2 Ped. 3:17.

7. Ano ang indi maayo nga epekto sa aton sang kahadlok sa tawo?

⁷ Bangod kabalo kita nga malapit na lang gid ang adlaw ni Jehova, ginapanikasugan gid naton nga isugid sa iban ang maayong balita. Pero, may mga tion nga nagaalang-alang kita nga himuon ini. Ngaa? Bangod nahadlok kita sa posible hunahunaon sang mga tawo parte sa aton ukon sa ila himuon sa aton. Natabo ini kay Pedro. Sang gab-i nga ginbista si Jesus, nahadlok si Pedro nga magpakilala bilang disipulo ni Jesus kag sulitsulit niya nga ginpanghiwala si Jesus. (Mat. 26:​69-75) Pero sang ulihi, nadaug ni Pedro ang iya kahadlok sa tawo. Nagsiling sia: “Indi kamo magkahadlok sa ginakahadlukan nila, kag indi man kamo matublag.” (1 Ped. 3:14) Ginapasalig  kita sang ginsiling ni Pedro nga masarangan naton nga daugon ang kahadlok sa tawo.

8. Ano ang makabulig sa aton nga madaug ang kahadlok sa tawo? (1 Pedro 3:15)

⁸ Ano ang makabulig sa aton nga madaug ang kahadlok sa tawo? Amo ini ang ginsiling ni Pedro: “Pakabalaana ang Cristo subong Ginuo sa inyo tagipusuon.” (Basaha ang 1 Pedro 3:15.) Buot silingon, dumdumon naton nga si Ginuong Jesucristo amo ang aton Hari kag may daku sia nga gahom. Kon nakulbaan ka nga isugid sa iban ang maayong balita, dumduma ang aton Hari. Imadyina nga nagagahom sia sa langit kag kaupod niya ang indi maisip nga mga anghel. Tandai nga ginhatag sa iya “ang bug-os nga awtoridad sa langit kag sa duta,” kag “kaupod [mo sia] sa tanan nga tion tubtob sa hingapusan sang sistema sang mga butang.” (Mat. 28:​18-20) Ginapalig-on kita ni Pedro nga ‘dapat handa kita pirme’ nga pangapinan ang aton mga ginapatihan. Gusto mo bala magbantala sa ulubrahan, sa eskwelahan, ukon sing indi pormal? Hunahunaa sing abanse ang mga sitwasyon nga posible mahimo mo ini, kag handai kon ano ang imo isiling. Mangamuyo kay Jehova nga hatagan ka sang kaisog, kag magsalig nga buligan ka niya nga madaug ang kahadlok sa tawo.​—Binu. 4:29.

9. San-o wala nakapakita sang gugma si Pedro? (Tan-awa man ang piktyur.)

⁹ Natun-an ni Pedro kon paano magpakita  sang gugma. Ara sia sang nagsiling si Jesus: “Ginahatag ko sa inyo ang isa ka bag-o nga sugo, nga maghigugmaanay kamo; subong nga ginhigugma ko kamo, maghigugmaanay man kamo.” (Juan 13:34) Pero sang ulihi, wala nakapakita sang gugma si Pedro. Wala sia nagkaon upod sa iya mga kauturan nga indi Judiyo bangod nahadlok sia sa Judiyo nga mga Cristiano. Gintawag ni apostol Pablo nga “pagpakunokuno” ang ginhimo ni Pedro. (Gal. 2:​11-14) Ginbaton ni Pedro ang pagtadlong sa iya ni Pablo kag nakatuon sia sa sini. Sa duha ka sulat ni Pedro, nagsiling sia nga dapat mabatyagan naton nga ginahigugma naton ang aton mga kauturan kag dapat naton ipakita ini nga gugma.

10. Paano naton mapakita ang ‘utudnon nga pagpalangga nga indi salimpapaw’? Ipaathag. (1 Pedro 1:22)

¹⁰ Nagsiling si Pedro nga dapat naton pakitaan sang ‘utudnon nga pagpalangga nga indi salimpapaw’ ang aton mga kauturan. (Basaha ang 1 Pedro 1:22.) Paano naton mapakita ini nga sahi sang pagpalangga? Paagi sa aton “pagkamatinumanon sa kamatuoran.” Nalakip sa sini nga kamatuoran ang ginatudlo sang Biblia nga “ang Dios wala sing ginapasulabi.” (Binu. 10:​34, 35) Indi naton matuman ang sugo ni Jesus parte sa gugma kon pila lang ka kauturan sa kongregasyon ang pakitaan naton sang gugma. Siempre, pareho kay Jesus, posible nga mas suod kita sa pila ka kauturan. (Juan 13:23; 20:2) Pero nagsiling si Pedro nga dapat naton panikasugan nga pakitaan sang ‘utudnon nga pagpalangga’ ang tanan naton nga kauturan kay pamilya naton sila.​—1 Ped. 2:17.

11. Paano naton mapakita sa iban nga ‘ginahigugma naton sila sing hanuot halin sa tagipusuon’?

¹¹ Ginapalig-on kita ni Pedro nga dapat “maghigugmaanay [kita] sing hanuot halin sa tagipusuon.” Ang “hanuot” nga gugma nagakahulugan nga dapat naton pakitaan sang gugma bisan ang mga kauturan nga daw nabudlayan kita nga higugmaon. Halimbawa, ano abi kon naglain ang aton buot sa isa ka utod bangod sa iya ginsiling ukon ginhimo? Posible nga mahunahuna naton dayon nga magbalos imbes nga magpakita sang gugma. Pero, natun-an ni Pedro kay Jesus nga wala nalipay ang Dios kon magbalos kita. (Juan 18:​10, 11) Nagsulat si Pedro: “Indi magbalos sang kahalitan sa kahalitan ukon sang insulto sa insulto. Sa baylo, magbalos kamo sing pagpakamaayo.” (1 Ped. 3:9) Kon may hanuot ka nga gugma, pakitaan mo sang kaayo bisan ang nakasakit sang imo balatyagon.

12. (a) Kon may tudok kita nga gugma, ano ang himuon naton? (b) Base sa video nga Hupti ang Hamili nga Regalo sang Paghiusa, ano ang gusto mo nga himuon?

¹² Sa una nga sulat ni Pedro, gingamit niya ang ekspresyon nga ‘maghigugmaanay sing tudok.’ Kon may amo kita sini nga sahi sang gugma, matabunan naton indi lang ang pila ka sala, kundi ang “madamo nga sala.” (1 Ped. 4:8) Posible nadumduman ni Pedro ang gintudlo sa iya ni Jesus parte sa pagpatawad pila ka tuig na ang nagligad. Sadto nga tion, posible nahunahuna ni Pedro nga maayo gid sia nga tawo kay nagsiling sia nga patawaron niya ang iya utod asta sa ‘pito ka beses.’ Pero gintudluan sia ni Jesus nga magpatawad sing “77 ka beses,” ukon indi na niya ini dapat pag-isipon. (Mat. 18:​21, 22) Dapat man naton ini iaplikar. Kon nabudlayan ka nga iaplikar ini nga laygay, indi ka dapat maluyahan sang buot. Indi kita perpekto nga mga alagad ni Jehova, gani may mga tion nga nabudlayan kita nga magpatawad. Ang importante nga himuon mo subong amo ang patawaron ang imo utod. Panikasugi gid nga himua ini para magbalik ang inyo maayo nga kaangtanan. c

13. Ngaa posible mabudlay para sa mga gulang nga magpain sang tion para mag-shepherding sa ila mga kauturan?

¹³ Sigurado nga wala gid nalipatan ni Pedro  ang ginsiling ni Jesus sa iya pagkatapos mabanhaw si Jesus. Nagsiling sia: “Bantayi ang akon magagmay nga mga karnero.” (Juan 21:16) Kon isa ikaw ka gulang, kabalo ka nga dapat mo man sundon ini nga instruksion. Pero posible nga mabudlay para sa mga gulang nga magpain sang tion para himuon ining importante nga asaynment. Kay man, dapat anay nila unahon ang paghatag sang pisikal, emosyonal, kag espirituwal nga mga kinahanglanon sang ila pamilya. Ginapangunahan man nila ang pagbantala nga hilikuton. Nagahanda man sila kag nagapresentar sang mga bahin sa mga miting, mga asembleya, kag mga kombension. Ang pila ka gulang may mga responsibilidad man bilang mga miembro sang Hospital Liaison Committee ukon sang Local Design/Construction Department. Gani masako gid ang mga gulang.

14. Ano ang magapalig-on sa mga gulang nga i-shepherding ang ila mga kauturan? (1 Pedro 5:​1-4)

¹⁴ Ginapalig-on ni Pedro ang pareho niya nga mga gulang nga ‘bantayan nila ang panong sang Dios.’ (Basaha ang 1 Pedro 5:​1-4.) Kon isa ikaw ka gulang, kabalo kami nga palangga mo ang imo mga kauturan kag gusto mo nga i-shepherding sila. Pero, posible may mga tion nga pamatyag mo indi mo ini mahimo bangod grabe sa imo kasako ukon kakapoy. Ano ang puede mo himuon? Isugid kay Jehova ang imo ginabatyag. Nagsulat si Pedro: “Kon nagaalagad ang isa, himuon niya ini suno sa kusog nga ginahatag sang Dios.” (1 Ped. 4:11) Posible nga wala sing permanente nga solusyon ang mga problema sang imo mga kauturan subong. Pero tandai nga mabuligan sila sang aton “puno nga manugbantay” nga si Jesucristo, kag mas labaw ini sangsa mabulig mo sa ila. Mabuligan niya sila subong kag sa bag-ong kalibutan. Gusto lang ni Jehova nga palanggaon sang mga gulang ang ila mga kauturan, i-shepherding nila ang ila mga kauturan, kag mangin “mga halimbawa [sila] sa panong.”

15. Paano gina-shepherding sang isa ka gulang ang iya mga kauturan? (Tan-awa man ang piktyur.)

¹⁵ Nahangpan ni William, nga isa ka madugay na nga gulang, nga importante ang pag-shepherding. Sang nag-umpisa ang COVID-19 nga pandemic, ginsigurado niya kag sang kaupod niya nga mga gulang nga makontak nila kada semana ang tanan nga kauturan sa ila grupo. Amo ini ang ginsiling niya kon ngaa ginhimo nila ini: “Madamo nga kauturan ang nagaisahanon lang sa ila balay, gani mahapos lang nga makahunahuna sila sang mga butang nga makapaluya sang ila buot.” Kon may problema ang isa ka  utod, ginapamatian sia sing maayo ni William para mabal-an niya kon ano ang iya mga ginakabalak-an kag mga kinahanglan. Dayon nagapangita sia sang mga publikasyon ukon mga video sa aton website nga puede niya gamiton para palig-unon ang utod. Nagsiling sia: “Importante gid subong ang pag-shepherding. Kon nagapanikasog gid kita para buligan ang iban nga makatuon parte kay Jehova, dapat panikasugan man naton nga i-shepherding ang aton mga kauturan para buligan sila nga indi mag-untat sa pag-alagad kay Jehova.”

16. Paano naton maaplikar ang mga leksion nga natun-an naton sa mga sulat ni Pedro?

¹⁶ Ginbinagbinag naton ang pila lang ka leksion sa duha ka sulat ni Pedro. Posible narealisar mo nga may dapat ka pauswagon. Halimbawa, gusto mo bala dugangan ang imo tion sa pagpamalandong parte sa kabuhi sa bag-ong kalibutan? Gusto mo bala panikasugan nga makabantala sa ulubrahan, sa eskwelahan, ukon sing indi pormal? May nahunahuna ka bala nga mga paagi para mas mapakita mo pa gid sa imo mga kauturan ang imo hanuot nga gugma sa ila? Mga gulang, nalangkag bala kamo nga i-shepherding sing kinabubut-on ang mga karnero ni Jehova? Kon honest ka sa imo kaugalingon, posible gid nga may makita ka nga dapat mo pauswagon. Pero indi ka dapat maluyahan sang buot. “Ang Ginuo maayo gid,” kag buligan ka niya nga mag-uswag. (1 Ped. 2:3) Ginapasalig kita ni Pedro: “Ang Dios . . . magatapos sang inyo paghanas. Pabaskugon niya kamo, pabakuron niya kamo, kag lig-unon sing maayo.”​—1 Ped. 5:10.

17. Kon indi kita mag-untat sa pag-alagad kag magpahanas kita kay Jehova, ano ang mabaton naton?

¹⁷ Sang primero, pamatyag ni Pedro indi sia nagakabagay mag-upod kay Jesus. (Luc. 5:8) Pero ginpalangga sia kag ginbuligan ni Jehova kag ni Jesus, gani nangin matutom sia nga sumulunod ni Jesus. Bangod sini, ‘nakasulod sia sa wala katapusan nga Ginharian sang aton Ginuo kag Manluluwas nga si Jesucristo.’ (2 Ped. 1:11) Dalayawon gid ini nga padya. Kon indi ka mag-untat sa pag-alagad pareho sa ginhimo ni Pedro kag magpahanas ka kay Jehova, mabaton mo man ang padya nga kabuhi nga wala sing katapusan. Makasigurado ka nga ‘ang imo pagtuo magaresulta sa imo kaluwasan.’—1 Ped. 1:9.