1. Ano ang nabatyagan ni Pedro sang ginbuligan sia ni Jesus nga makakuha sang madamo nga isda paagi sa milagro?

 BILOG nga gab-i nga nagpangisda si Pedro pero wala gid sia sing nakuha nga isda. Gani makatilingala ang ginsiling ni Jesus sa iya: “Pakadtua ninyo ang sakayan sa madalom kag iladlad ang inyo mga pukot agod makakuha kamo sang isda.” (Luc. 5:4) Bisan pa nagduhaduha si Pedro nga may makuha sia nga isda, gintuman niya si Jesus. Nakakuha sia kag ang iya mga kaupod sang madamo gid nga isda amo nga nagisi ang ginladlad nila nga mga pukot. Narealisar nila nga isa ini ka milagro, gani “nahalawhaw gid” sila. Nagsiling si Pedro: “Ginuo, palayo ka sa akon, kay ako makasasala nga tawo.” (Luc. 5:​6-9) Posible nga nabatyagan ni Pedro nga indi sia nagakabagay mag-upod kay Jesus.

2. Ano ang benepisyo kon tun-an naton ang halimbawa ni Pedro?

² Husto si Pedro nga isa sia ka “makasasala nga tawo.” Mabasa sa Biblia nga may mga tion nga may ginsiling sia kag ginhimo nga ginhinulsulan niya sang ulihi. Pareho kay Pedro, may kaluyahon ka man bala nga madugay mo na nga ginapakigbatuan? Kon huo, mapalig-on ka kon tun-an mo ang halimbawa ni Pedro. Ngaa masiling naton ini? Binagbinaga ini: Puede kuntani nga wala ginpasulat ni Jehova sa Biblia ang mga sala nga nahimo ni Pedro. Pero ginpasulat niya ini kay may matun-an kita sa sini. (2 Tim. 3:​16, 17) Pareho kita kay Pedro nga may mga kaluyahon man kag may balatyagon. Gani kon tun-an naton ang iya halimbawa, makabulig ini sa aton nga mahangpan nga wala ginahunahuna ni Jehova nga indi gid kita makasala. Sa baylo, gusto niya nga padayon kita nga mag-alagad sa iya bisan pa may mga kaluyahon kita.

3. Ngaa indi kita dapat mag-untat sa pag-alagad?

³ Ngaa indi kita dapat mag-untat sa pag-alagad? May hulubaton sa English nga nagasiling, Practice makes perfect. Binagbinaga ini nga ilustrasyon: Para magsagad magtokar sang gitara ang isa ka  tawo, dapat sia magpraktis sa sulod sang madamo nga tinuig. Samtang nagapraktis sia, posible nga madamo nga beses nga sala nga nota ang iya matokar. Pero kon padayon sia nga magpraktis, magasagad gid sia sa pagtokar sang gitara. Bisan pa gani sagad na sia, posible gihapon nga magsala sia. Pero, indi gid sia mag-untat sa pagtokar kay gusto niya nga magsagad pa gid sia. Sing kaanggid, bisan pa pamatyag naton nadula na naton ang isa ka kaluyahon, posible nga magbalik ini liwat. Pero padayon kita nga nagapanikasog nga dulaon ini. May mga tion nga may ginsiling kita ukon ginhimo nga ginhinulsulan naton sang ulihi. Pero indi kita mag-untat sa pag-alagad kay Jehova kay buligan niya kita nga mangin mas maayo nga tawo. (1 Ped. 5:10) Binagbinagon naton ang halimbawa ni Pedro. Bisan pa may nahimo sia nga mga sala, wala gid sia nag-untat sa pag-alagad. Kag kon binagbinagon naton kon paano sia ginpakitaan ni Jesus sang kaluoy, mapalig-on kita sini nga padayon nga mag-alagad kay Jehova.

4. Suno sa Lucas 5:​5-10, ano ang ginsiling ni Pedro parte sa iya kaugalingon, pero paano sia ginpalig-on ni Jesus?

⁴ Wala ginasugid sang Biblia kon ngaa nagsiling si Pedro nga isa sia ka “makasasala nga tawo” ukon ano nga mga sala nga nahimo niya ang iya ginahunahuna. (Basaha ang Lucas 5:​5-10.) Pero posible nga nakahimo sia sang serioso nga mga sala. Nabatyagan ni Jesus nga nahadlok si Pedro kay posible ginahunahuna niya nga indi sia nagakabagay mag-upod kay Jesus. Pero kabalo man si Jesus nga masarangan ni Pedro nga padayon nga mangin matutom. Gani ginsilingan niya si Pedro nga “indi ka na magkahadlok.” Bangod may pagsalig si Jesus kay Pedro, nagbag-o gid ang kabuhi ni Pedro. Sang ulihi, ginbiyaan ni Pedro kag sang iya utod nga si Andres ang ila negosyo nga pagpangisda kag nag-upod sila sa pagministeryo ni Jesus. Bangod sini, ginpakamaayo gid sila ni Jehova.​—Mar. 1:​16-18.

5. Bangod ginpakigbatuan ni Pedro ang negatibo nga mga balatyagon kag nagsunod sia kay Jesus, ano nga mga pagpakamaayo ang iya nabaton?

⁵ Bilang sumulunod sang Cristo, madamo si Pedro sang dalayawon nga mga eksperiensia. Nakita ni Pedro nga gin-ayo ni Jesus ang mga nagamasakit, gintabog niya ang mga demonyo, kag ginbanhaw pa gani niya ang mga patay. b (Mat. 8:​14-17; Mar. 5:​37, 41, 42) Nakita man ni Pedro sa isa ka palanan-awon ang parte sa paghari ni Jesus sa Ginharian sang Dios, kag wala gid ini nalipatan ni Pedro. (Mar. 9:​1-8; 2 Ped. 1:​16-18) Wala gid kuntani nasaksihan ni Pedro ini tanan kon wala sia nagsunod kay Jesus. Sigurado nga nalipay gid  sia kay ginpakigbatuan niya ang negatibo nga mga balatyagon, gani madamo sia sang nabaton nga pagpakamaayo.

6. Nadula bala dayon ni Pedro ang iya mga kaluyahon? Ipaathag.

⁶ Bisan pa sang mga nakita kag nabatian ni Pedro, may mga kaluyahon gihapon sia nga dapat niya pakigbatuan. Binagbinaga ang pila sa sini. Sang ginpaathag ni Jesus ang tagna sa Biblia nga paantuson sia kag patyon, ginsilingan sia ni Pedro nga indi gid ini matabo. (Mar. 8:​31-33) Madamo nga beses nga nagbaisay si Pedro kag ang iban pa nga mga apostoles kon sin-o ang pinakamataas sa ila. (Mar. 9:​33, 34) Sang gab-i antes ginpatay si Jesus, gin-utod ni Pedro ang dulunggan sang isa ka tawo. (Juan 18:10) Sadto man nga gab-i, hinadlukan si Pedro kag tatlo ka beses niya nga ginpanghiwala ang iya abyan nga si Jesus. (Mar. 14:​66-72) Bangod sini, naghilibion gid si Pedro.​—Mat. 26:75.

7. Pagkatapos ginbanhaw si Jesus, ginhatagan niya si Pedro sang tsansa nga himuon ang ano?

⁷ Wala ginsikway ni Jesus ang iya apostol nga naluyahan sang buot. Pagkatapos ginbanhaw si Jesus, ginhatagan niya sang tsansa si Pedro para ipakita nga palangga sia gihapon ni Pedro. Ginsilingan ni Jesus si Pedro nga mag-alagad sing mapainubuson kag bantayan niya ang iya mga karnero. (Juan 21:​15-17) Nagsiling si Pedro nga himuon gid niya ini. Gani sang adlaw sang Pentecostes, ara sia sa Jerusalem kag isa sia sa una nga ginhaplasan sang balaan nga espiritu.

8. Ano nga serioso nga sala ang nahimo ni Pedro sa Antioquia?

⁸ Bisan pa isa na ka hinaplas si Pedro, padayon gihapon ang pagpakigbato niya sa iya mga kaluyahon. Sang 36 C.E., nakita ni Pedro nga ginhaplasan sang balaan nga espiritu si Cornelio. Isa ka Gentil si Cornelio ukon indi sia Judiyo, kag wala sia matuli. Gani ginapakita sini nga “ang Dios wala sing ginapasulabi,” kag puede mangin bahin sang Cristianong kongregasyon ang mga indi Judiyo. (Binu. 10:​34, 44, 45) Pagkatapos sini, nagaupod na si Pedro sa mga Gentil kon nagakaon sila. Sang una, indi gid niya ini paghimuon. (Gal. 2:12) Pero para sa iban nga Judiyo nga mga Cristiano, indi dapat mag-upod sa pagkaon ang mga Judiyo kag mga Gentil. Sang nagkadto sa Antioquia ang pila ka Judiyo nga may amo sini nga panghunahuna, wala na nagaupod si Pedro sa iya Gentil nga mga kauturan kon nagakaon sila. Ginhimo ini ni Pedro kay posible nahadlok sia nga basi maakig sa iya ini nga mga Judiyo. Nakita ini ni apostol Pablo, gani ginsaway niya si Pedro sa atubangan sang iban. (Gal. 2:​13, 14) Bisan pa nakasala si Pedro, wala sia nag-untat sa pag-alagad. Ano ang nakabulig sa iya?

9. Paano ginapakita sang Juan 6:​68, 69 ang pagkamainunungon ni Pedro?

⁹ Mainunungon si Pedro. Bisan pa sa mga natabo, wala gid sia nag-untat sa pagsunod kay Jesus. Halimbawa, sang may ginsiling si Jesus nga wala nahangpan sang iya mga disipulo, ginpakita ni Pedro nga mainunungon sia. (Basaha ang Juan 6:​68, 69.) Sadto nga tion, madamo ang nag-untat sa pagsunod kay Jesus. Wala na nila ginhulat nga magpaathag si Jesus, kag wala man nila sia ginpangabay nga ipaathag ang iya ginsiling. Pero mainunungon si Pedro, kag nagsiling sia nga si Jesus lang “ang may pinamulong sang kabuhi nga wala sing katapusan.”

10. Paano ginpakita ni Jesus nga may pagsalig sia kay Pedro? (Tan-awa man ang piktyur.)

¹⁰ Wala ginsikway ni Jesus si Pedro. Sang gab-i antes ginpatay si Jesus, kabalo sia nga biyaan sia ni Pedro kag sang iban pa nga mga apostoles. Pero, ginsilingan ni Jesus si Pedro nga sigurado sia nga magapanumbalik si Pedro kag magapabilin sia nga matutom. (Luc. 22:​31, 32) Nahangpan ni Jesus nga “ang espiritu handa, apang ang unod maluya.” (Mar. 14:38) Gani bisan pa ginpanghiwala ni Pedro si Jesus, wala sia ginsikway ni Jesus. Pagkatapos ginbanhaw si Jesus, nagpakita sia kay Pedro sang tion nga nagaisahanon si Pedro.  (Mar. 16:7; Luc. 24:34; 1 Cor. 15:5) Nasubuan gid sadto si Pedro, gani sigurado nga napalig-on gid sia sa ginhimo ni Jesus.

11. Paano ginpasalig ni Jesus si Pedro nga atipanon sia ni Jehova?

¹¹ Ginpasalig ni Jesus si Pedro nga atipanon sia ni Jehova. Sang ginbanhaw si Jesus, naghimo sia liwat sang milagro. Gani nakakuha naman sang madamo nga isda si Pedro kag ang iban pa nga mga apostoles. (Juan 21:​4-6) Sigurado gid nga paagi sa sini nga milagro, nagbakod pa gid ang pagsalig ni Pedro nga masarangan ni Jehova nga hatagan sia sang iya materyal nga mga kinahanglanon. Posible nga nadumduman dayon ni Pedro ang ginsiling ni Jesus nga amanan ni Jehova ang mga padayon nga ‘nagauna sa pagpangita sa Ginharian.’ (Mat. 6:33) Nakabulig ini kay Pedro nga unahon sa iya kabuhi ang pagbantala, indi ang iya negosyo nga pagpangisda. Maisog sia nga nagbantala sang adlaw sang Pentecostes 33 C.E., kag linibo ang nagbaton sang maayong balita. (Binu. 2:​14, 37-41) Pagkatapos sini, ginbuligan niya ang mga Samaritano kag ang mga Gentil nga batunon ang Cristo. (Binu. 8:​14-17; 10:​44-48) Ginapakita sini nga gingamit ni Jehova si Pedro sa pinasahi nga paagi para buligan nga mangin Cristiano ang tanan nga sahi sang tawo.

12. Paano makabulig ang halimbawa ni Pedro kon may kaluyahon kita nga madugay na naton nga ginapakigbatuan?

¹² Buligan kita ni Jehova para padayon kita nga makaalagad sa iya. Posible nga may mga tion nga nabudlayan kita nga himuon ini, ilabi na kon may kaluyahon kita nga madugay na naton nga ginapakigbatuan. Kon kaisa, posible nga nagabatyag kita nga mas mabudlay pakigbatuan ang aton mga kaluyahon sangsa mga kaluyahon ni Pedro. Pero pabakuron kita ni Jehova para indi kita mag-untat sa pag-alagad sa iya. (Sal. 94:​17-19) Halimbawa, antes natun-an sang isa ka brother ang kamatuoran, isa sia ka homoseksuwal sa sulod sang madamo nga tinuig. Ginbag-o niya ang iya kabuhi kag gintuman niya ang mga kasuguan sa Biblia. Pero, may mga tion nga ginapakigbatuan niya gihapon ang sala nga mga handum. Ano ang nakabulig sa iya nga padayon nga himuon ang husto? Nagsiling sia: “Ginapabakod kita ni Jehova.” Nagsiling pa sia: “Sa bulig sang espiritu ni Jehova . . . , masarangan naton nga tumanon sia kag padayon naton ini nga mapakita sa aton paagi sang pagkabuhi . . . Bisan pa sang akon mga kaluyahon, gingamit ako ni Jehova kag padayon niya ako nga ginapabakod.”

13. Paano naton mailog ang halimbawa ni Pedro nga mabasa sa Binuhatan 4:​13, 29, 31? (Tan-awa man ang piktyur.)

¹³ Natun-an naton nga nakahimo si Pedro sang serioso nga mga sala bangod nahadlok sia sa mga  tawo. Pero nangin maisog sia sang nangamuyo sia nga hatagan sia sang kaisog. (Basaha ang Binuhatan 4:​13, 29, 31.) Masarangan man naton nga mangin maisog. Binagbinaga ang eksperiensia ni Horst nga isa ka pamatan-on nga brother sa Germany sa tion sang Bug-os Kalibutan nga Inaway II. May mga tion nga ginsiling ni Horst ang “Heil Hitler” sa eskwelahan bangod nahadlok sia sa mga tawo. Wala gin-akigan si Horst sang iya mga ginikanan. Sa baylo, nangamuyo sila upod sa iya kag nangabay sila kay Jehova nga hatagan sia sang kaisog. Paagi sa bulig sang iya mga ginikanan kag paagi sa pagsalig kay Jehova, napalig-on si Horst nga mangin maisog. Sang ulihi, nakasiling sia: “Wala gid ako ginbiyaan ni Jehova.” c

14. Paano mapalig-on sang mahigugmaon nga mga manugbantay ang mga naluyahan sang buot?

¹⁴ Indi gid kita pagbiyaan ni Jehova kag ni Jesus. Pagkatapos ginpanghiwala ni Pedro si Jesus, kinahanglan ni Pedro maghimo sang importante nga desisyon. Magauntat bala sia sa pagsunod kay Jesus, ukon padayon sia nga magaalagad bilang iya disipulo? Nangamuyo si Jesus kay Jehova nga kabay pa nga indi magluya ang pagtuo ni Pedro. Ginsugid ni Jesus kay Pedro ang parte sa sini nga pangamuyo, kag ginsilingan niya si Pedro nga sigurado sia nga masarangan ni Pedro nga pabakuron ang iya mga kauturan sa ulihi. (Luc. 22:​31, 32) Sigurado gid nga sa kada tion nga madumduman ni Pedro ang mga ginsiling ni Jesus, nagapalig-on ini sa iya. Kon kinahanglan naton maghimo sang importante nga desisyon, posible gamiton ni Jehova ang aton mahigugmaon nga mga manugbantay para buligan kita nga magpabilin nga matutom. (Efe. 4:​8, 11) Amo ini ang ginahimo ni Paul nga isa ka madugay na nga gulang. Kon may mga utod nga daw gusto mag-untat sa pag-alagad kay Jehova, ginapangabay niya sila nga dumdumon ang tion nga ginbuligan sila ni Jehova nga matun-an ang kamatuoran. Dayon ginapasalig  niya sa ila nga indi gid sila pagbiyaan ni Jehova bangod sang Iya mainunungon nga gugma sa ila. Nagsiling sia, “Sa bulig ni Jehova, madamo nga kauturan nga nagluya ang buot ang wala nag-untat sa pag-alagad sa iya.”

15. Paano ginapamatud-an sang halimbawa ni Pedro kag ni Horst nga matuod ang ginasiling sang Mateo 6:33?

¹⁵ Ginhatagan ni Jehova si Pedro kag ang iban pa nga mga apostoles sang ila materyal nga mga kinahanglanon, gani hatagan man Niya kita sini kon unahon naton sa aton kabuhi ang pagbantala. (Mat. 6:33) Pagkatapos sang Bug-os Kalibutan nga Inaway II, gusto ni Horst, nga ginsambit kaina, nga magpayunir. Pero pigado sia katama, gani nahunahuna niya nga indi niya masuportahan ang iya kaugalingon kon magpayunir sia. Ano ang ginhimo niya? Nagdesisyon sia nga tilawan si Jehova. Bilog nga semana sia nga nagbantala sa tion sang bisita sang circuit overseer. Sa katapusan sang semana, nakibot sia sang ginhatagan sia sang circuit overseer sang envelope, pero wala niya ginsugid kon kay sin-o ini naghalin. May unod ini nga kuarta nga makabulig sa iya nga makapayunir sa sulod sang pila ka bulan. Para kay Horst, regalo ini ni Jehova para pasaligon sia nga indi gid Niya sia pagpabay-an. Gani gin-una ni Horst ang Ginharian sa bilog niya nga kabuhi.​—Mal. 3:10.

16. Ngaa mas maayo kon tun-an pa gid naton ang halimbawa ni Pedro kag ang iya mga ginsulat?

¹⁶ Nangabay sadto si Pedro nga magpalayo sa iya si Jesus. Pero sigurado nga nalipay gid si Pedro kay wala ini ginhimo ni Jesus. Sa baylo, padayon nga ginhanas ni Jesus si Pedro nga mangin isa ka matutom nga apostol kag mangin maayo nga halimbawa para sa mga Cristiano. Madamo kita sang matun-an nga mga leksion sa paghanas nga ginhimo ni Jesus kay Pedro. Mabasa sa duha ka sulat ni Pedro para sa mga kongregasyon sang unang siglo ang pila sa sini nga mga leksion. Magluwas sa sini, madamo pa gid kita sang matun-an sa mga sulat ni Pedro. Binagbinagon naton sa masunod nga artikulo ang pila ka leksion kag mga pahanumdom sa sini nga mga sulat kag kon paano naton ini maaplikar.