1-2. Ngaa maayo gid kon tun-an naton ang kasaysayan ni Samson?

 ANO ang ginahunahuna mo kon mabatian mo ang ngalan nga Samson? Posible nga ginahunahuna mo nga makusog gid sia nga tawo. Husto ang ginahunahuna mo. Pero nakahimo si Samson sang indi maayo nga desisyon nga nagresulta sa iya pag-antos. Bisan pa sini, nagpokus si Jehova sa tanan nga ginhimo ni Samson sa pag-alagad sa iya. Ginlakip pa gani niya sa Biblia ang parte sa mabakod nga pagtuo ni Samson para makabenepisyo kita sa iya halimbawa.

² Gingamit ni Jehova si Samson para maghimo sang tumalagsahon nga mga butang para buligan ang Iya pinili nga katawhan nga mga Israelinhon. Pagligad sang ginatos ka tuig pagkatapos mapatay si Samson, gintuytuyan ni Jehova si apostol Pablo nga ilakip ang ngalan ni Samson sa listahan sang Iya mga alagad nga may mabakod nga pagtuo. (Heb. 11:​32-34) Mapalig-on gid kita sang halimbawa ni Samson. Nagsalig sia kay Jehova sang nakaeksperiensia sia sang mabudlay gid nga mga sitwasyon. Binagbinagon naton kon ano ang matun-an naton kay Samson kag kon paano kita mapalig-on sang iya halimbawa.

3. Ano nga asaynment ang ginhatag kay Samson?

³ Sang natawo si Samson, ang mga Filistinhon amo ang nagagahom sa pungsod sang Israel kag ginapigos nila ang mga Israelinhon. (Huk. 13:1) Nag-antos gid sila bangod sang mapintas nga paggahom sang mga Filistinhon. Ginpili ni Jehova si Samson nga amo “ang magaluwas sa Israel batok sa mga Filistinhon.” (Huk. 13:5) Mabudlay gid ini nga asaynment. Para mahimo ini ni Samson, dapat sia magsalig kay Jehova.

4. Paano ginbuligan ni Jehova si Samson para mabugto niya ang mga lubid nga gingapos sa iya kag mapierde niya ang mga Filistinhon? (Hukom 15:​14-16)

 ⁴ Binagbinaga ang isa ka halimbawa nga nagapakita nga nagsalig si Samson nga buligan sia ni Jehova. Sang ara si Samson sa Lehi, nga posible sakop sang Juda, ginkadtuan sia sang Filistinhon nga mga soldado para dakpon. Hinadlukan ang mga lalaki sang Juda, gani gintugyan nila si Samson sa ila mga kaaway. Gingapos si Samson sang pareho niya nga mga Israelinhon paagi sa duha ka bag-o nga lubid, kag gindala nila sia sa mga Filistinhon. (Huk. 15:​9-13) Pero, “ginhatagan sia sang espiritu ni Jehova sing kusog” kag ginbugto ni Samson ang mga lubid. “Dayon may nakita sia nga tul-an sang sag-ang sang asno nga lalaki nga bag-o lang napatay.” Ginkuha niya ini kag gingamit sa pagpatay sa 1,000 ka Filistinhon nga mga lalaki.​—Basaha ang Hukom 15:​14-16.

5. Paano ginpakita ni Samson nga nagasalig sia kay Jehova sang gingamit niya ang tul-an sang sag-ang sang asno?

⁵ Indi armas para sa inaway ang tul-an sang sag-ang sang asno. Pero ngaa gingamit ini ni Samson? Kay man, sigurado si Samson nga buligan sia ni Jehova nga mapierde ang mga Filistinhon, kag wala ini nagadepende sa armas nga iya gamiton. Mabakod gid ang pagtuo ni Samson, kag gingamit niya kon ano lang ang ara nga puede niya gamiton para mahimo niya ang kabubut-on ni Jehova. Bangod nagsalig si Samson kay Jehova, napierde niya ang iya mga kaaway.

6. Ano ang matun-an naton kay Samson parte sa paghimo sang aton mga asaynment?

⁶ Hatagan man kita ni Jehova sing kusog para mahimo naton ang aton mga asaynment, bisan daw ano pa ini kabudlay. Kag posible buligan kita sang Dios sa tumalagsahon nga paagi. Ginhatagan ni Jehova si Samson sing kusog, gani buligan ka man Niya para mahimo mo ang Iya kabubut-on basta magsalig ka lang sa Iya.​—Hulu. 16:3.

7. Ano nga halimbawa ang nagapakita nga dapat kita magpagiya kay Jehova?

⁷ Nagasalig kay Jehova ang madamo naton nga kauturan nga nagabulig sa konstruksion sang mga pasilidad nga ginagamit naton sa pagsimba. Sang una, ang mga kauturan amo ang nagadesinyo kag nagapatindog sang kalabanan  nga bag-o nga mga Kingdom Hall kag iban pa nga mga pasilidad. Pero bangod padayon nga nagauswag ang organisasyon ni Jehova, kinahanglan maghimo sang mga pagbag-o. Gani nangamuyo ang nagapanguna nga mga brother para giyahan sila ni Jehova. Dayon gintestingan nila ang bag-o nga mga paagi, pareho sang pagbakal sang mga pasilidad kag pag-renovate sini. Si Robert, nga nakabulig sa konstruksion sang madamo naton nga pasilidad sa bilog nga kalibutan, nagsiling: “Sang primero, may pila nga nabudlayan sa sining bag-o nga paagi.” Nagsiling pa sia: “Lain gid ini nga paagi kon ikumparar sa ginahimo namon sa sulod sang madamo na nga tinuig. Pero handa sa pag-adjust ang mga kauturan, kag maathag nga ginapakamaayo gid ni Jehova ini nga pagbag-o.” Isa lang ini sa mga halimbawa kon paano ginagiyahan ni Jehova ang iya katawhan para matuman ang iya kabubut-on. Gani maayo gid kon pamangkuton naton pirme ang aton kaugalingon, ‘Nagapagiya bala ako kay Jehova kag handa bala ako nga mag-adjust sa akon pag-alagad sa iya?’

8. Sang grabe gid ang kauhaw ni Samson, ano ang ginhimo niya?

⁸ Posible nga madumduman mo ang iban pa nga tumalagsahon nga mga butang nga ginhimo ni Samson. Halimbawa, nagaisahanon lang sia sang ginpatay niya ang isa ka leon. Sang ulihi, nagaisahanon man sia sang ginpatay niya ang 30 ka Filistinhon sa siudad sang Askelon. (Huk. 14:​5, 6, 19) Kabalo si Samson nga indi niya ini mahimo kon wala sia ginbuligan ni Jehova. Maathag niya ini nga ginpakita sang grabe gid ang iya kauhaw pagkatapos niya mapatay ang 1,000 ka Filistinhon. Ano ang ginhimo niya? Wala sia nagsalig sa iya kaugalingon para mangita sang tubig, kundi nagpanawag sia kay Jehova para magpangayo sang bulig sa iya.​—Huk. 15:18.

9. Ano ang ginhimo ni Jehova sang nagpangayo si Samson sang bulig sa iya? (Hukom 15:19)

⁹ Ginsabat ni Jehova ang pagpangayo ni Samson sang bulig, kag naghimo Sia sang tuburan sang tubig paagi sa isa ka milagro. Sang nag-inom si Samson sa sini nga tuburan, “nagbalik ang iya kusog kag naulian sia.” (Basaha ang Hukom 15:19.) Pagligad sang madamo nga tinuig, ara pa gihapon ining bag-o nga tuburan sang gintuytuyan si manalagna Samuel nga isulat ang libro sang mga Hukom. Sa kada tion nga makita sang mga Israelinhon ini nga tuburan, posible nga madumduman nila nga handa gid si Jehova sa pagbulig sa iya matutom nga mga alagad sa tion nga kinahanglan nila ini.

10. Ano ang dapat naton himuon para mabaton naton ang bulig ni Jehova? (Tan-awa man ang piktyur.)

¹⁰ Dapat man kita magpabulig kay Jehova bisan ano man ang aton mga ikasarang ukon mga hinimuan sa pag-alagad sa iya. Dapat kita mangin mapainubuson kag batunon naton nga mahimo lang naton ang mga ginapahimo sa aton ni Jehova kon magsalig kita sa iya. Sang nag-inom si Samson sang tubig nga gin-aman ni Jehova, nagbakod sia. Pareho kay Samson, magabakod man ang aton pagtuo kag makapabilin kita nga matutom kay Jehova kon gamiton naton ang tanan nga ginaaman Niya.​—Mat. 11:28.

11. Paano naton mapakita nga nagasalig kita kay Jehova? Maghatag sing halimbawa.

¹¹ Binagbinaga ang halimbawa ni Aleksey nga isa sa aton mga utod sa Russia nga nagabatas sang grabe nga paghingabot. Ano ang nakabulig sa iya nga mabatas ang mabudlay gid nga sitwasyon? Regular niya nga ginahimo ang pagtuon sang Biblia kag ang iban pa nga mga hilikuton sa pag-alagad upod sa iya asawa. Nagsiling sia: “Gintinguhaan ko gid nga mangin regular sa akon personal nga pagtuon kag ginabasa ko ang Biblia adlaw-adlaw. Kada aga, ginabinagbinag namon nga mag-asawa ang daily text kag nagapangamuyo kami kay Jehova sing magkaupod.”  Ano ang matun-an naton sa sini? Dapat kita magsalig kay Jehova, indi sa aton kaugalingon. Paano? Paagi sa regular nga paghimo sang mga hilikuton nga nagapabakod sang aton pagtuo, pareho sang pagtuon sang Biblia, pagpangamuyo, pag-attend sa mga miting, kag pagbantala. Kon himuon naton ini, pakamaayuhon gid ni Jehova ang aton mga ginahimo sa pag-alagad sa iya. Ginpabakod ni Jehova si Samson, gani mapabakod man Niya kita.

12. Ano ang indi maayo nga desisyon nga nahimo ni Samson, kag ano ang kinalain sini sa iya mga naeksperiensiahan sang una?

¹² Indi perpekto si Samson pareho sa aton, gani may mga tion nga nakahimo sia sang indi maayo nga mga desisyon. Malain gid ang nangin resulta sang isa niya ka desisyon. Sang medyo madugay na sia nga nagaalagad bilang hukom, ‘ginhigugma ni Samson ang isa ka babayi sa Nalupyakan sang Sorek, kag Delila ang iya ngalan.’ (Huk. 16:4) Antes sini, may tion sadto nga kalaslon na kuntani si Samson sa isa ka Filistinhon nga babayi. Pero, “paagi ini ni Jehova, kay nagapangita Sia sing kahigayunan batok sa mga Filistinhon.” Sang ulihi, nagsulod si Samson sa balay sang isa ka prostityut sa Gaza nga isa ka siudad sang mga Filistinhon. Sa sini nga tion, ginhatagan ni Jehova si Samson sing kusog para mahukas niya ang mga puertahan sang gawang sang siudad. Dayon ginpas-an niya ini kag gindala sa bukid, gani naguba ang depensa sang siudad. (Huk. 14:​1-4; 16:​1-3) Pero lain ang sitwasyon sang relasyon niya kay Delila bangod posible nga isa ka Israelinhon si Delila.

13. Ano ang ginhimo ni Delila nga nagresulta sa indi maayo nga sitwasyon para kay Samson?

¹³ Ginbaton ni Delila ang daku nga kantidad sang kuarta halin sa mga Filistinhon para luiban si Samson. Posible nga grabe gid ang luyag  ni Samson kay Delila, gani wala niya marealisar nga may malain gali nga tuyo si Delila. Sulitsulit nga ginpilit ni Delila si Samson nga isugid sa iya ang ginahalinan sang iya kusog. Sang ulihi, ginsugid ini ni Samson sa iya. Makapasubo gid nga bangod sa indi maayo nga desisyon ni Samson, may tion nga nadula ang iya kusog kag wala nalipay si Jehova sa iya.​—Huk. 16:​16-20.

14. Ano ang natabo kay Samson bangod nagsalig sia kay Delila?

¹⁴ Bangod nagsalig si Samson kay Delila imbes nga kay Jehova, grabe kasakit sang iya mga naeksperiensiahan. Gindakop sang mga Filistinhon si Samson kag ginbulag nila sia. Dayon ginpriso nila sia sa Gaza. Ginpakahuy-an sadto ni Samson ang mga tawo sa sini nga siudad sang ginkuha niya ang mga puertahan sang gawang sang siudad. Pero subong, ginhimo nila sia nga ulipon kag sia ang ginapatiyog nila sang galingan. Dayon ginpakahuy-an sia sang mga Filistinhon sa isa nila ka selebrasyon. Naghalad sila sing madamo nga halad sa ila indi matuod nga dios nga si Dagon kay nagapati sila nga ginbuligan sila sang ila dios nga madakop si Samson. Halin sa prisuhan, gindala nila si Samson sa ila selebrasyon para “maglingaw” sa ila kag himuon sia nga kaladlawan.​—Huk. 16:​21-25.

15. Paano ginpakita ni Samson nga nagsalig sia liwat kay Jehova? (Hukom 16:​28-30) (Tan-awa ang piktyur sa kober.)

¹⁵ Nakahimo si Samson sang serioso nga sala, pero padayon sia nga nag-alagad kay Jehova. Nangita sia sang kahigayunan para matuman niya ang sugo ni Jehova nga pierdihon ang mga Filistinhon. (Basaha ang Hukom 16:​28-30.) Nagpakitluoy si Samson kay Jehova: “Pabalusa ako sa mga Filistinhon.” Ginsabat sang matuod nga Dios ang pangabay ni Samson kag ginhatagan sia liwat sing pinasahi nga kusog. Bangod sini, mas madamo ang napatay ni Samson sa sini nga okasyon sangsa napatay niya sa bilog niya nga kabuhi.

16. Ano ang matun-an naton kay Samson bisan pa nakahimo sia sang sala?

¹⁶ Grabe kasakit sang mga naeksperiensiahan ni Samson bangod sang nahimo niya nga sala, pero wala sia nag-untat sa paghimo sang kabubut-on ni Jehova. Gani bisan pa nakahimo kita sang sala kag kinahanglan nga tadlungon kita ukon kuhaan sang pribilehiyo, indi kita dapat mag-untat sa pag-alagad kay Jehova. Tandai nga handa si Jehova sa pagpatawad sa aton. (Sal. 103:​8-10) Bisan pa sang aton mga sala, puede kita gihapon gamiton ni Jehova pareho sa ginhimo niya kay Samson.

17-18. Paano ka napalig-on sa halimbawa ni Michael? (Tan-awa man ang piktyur.)

 ¹⁷ Binagbinaga ang halimbawa sang isa ka pamatan-on nga brother nga si Michael. Masako sia sa pag-alagad kay Jehova bilang isa ka ministeryal nga alagad kag regular payunir. Pero nakahimo sia sang sala kag ginkuhaan sia sang mga pribilehiyo sa kongregasyon. Nagsiling sia: “Antes sini, madamo gid ako sang ginahimo sa akon pag-alagad kay Jehova. Pero gulpi lang nagbag-o ang sitwasyon. Pamatyag ko daw wala na ako sang puede himuon sa akon pag-alagad sa iya. Kumbinsido ako nga indi gid ako pagpabay-an ni Jehova. Pero nahunahuna ko kon bala mangin maayo pa liwat ang akon kaangtanan sa iya, ukon kon bala maalagad ko pa sia liwat sa bug-os ko nga masarangan pareho sa ginahimo ko sang una.”

¹⁸ Maayo gid ang ginhimo ni Michael kay wala sia nag-untat sa pag-alagad kay Jehova. Nagsiling pa sia: “Ginpanikasugan ko gid nga kay-uhon ang akon kaangtanan kay Jehova paagi sa regular nga pagpangamuyo sa iya, pagtuon, kag pagpamalandong.” Sang ulihi, ginbalik kay Michael ang iya mga pribilehiyo sa kongregasyon. Subong, isa na sia ka gulang kag regular payunir. Nagsiling sia: “Paagi sa mga bulig kag mga pagpalig-on sa akon, ilabi na sang mga gulang, narealisar ko nga palangga gihapon ako ni Jehova. Makaalagad na ako liwat sa kongregasyon nga may matinlo nga konsiensia. Natun-an ko sa akon eksperiensia nga ginapatawad gid ni Jehova ang mga sinsero nga nagahinulsol.” Makasigurado kita nga bisan pa makasala kita, gamiton kita gihapon ni Jehova kag pakamaayuhon man niya kita. Pero himuon lang niya ini kon ginapanikasugan gid naton nga tadlungon ang aton indi husto nga mga ginahimo kag kon padayon kita nga magsalig sa iya.​—Sal. 86:5; Hulu. 28:13.

19. Paano ka napalig-on sa halimbawa ni Samson?

¹⁹ Sa sini nga artikulo, ginbinagbinag naton ang pila lang sa tumalagsahon nga mga eksperiensia ni Samson. Indi sia perpekto, pero wala sia nag-untat sa pag-alagad kay Jehova bisan pa nakasala sia bangod sa iya relasyon kay Delila. Kag padayon nga gingamit ni Jehova si Samson sa tumalagsahon nga paagi. Para kay Jehova, dalayawon ang pagtuo ni Samson, gani ginlakip Niya sia sa listahan sang Iya mga alagad nga may mabakod nga pagtuo nga mabasa sa Hebreo kapitulo 11. Makapalig-on gid mabal-an nga nagaalagad kita sa isa ka mahigugmaon nga Amay sa langit, kag gusto gid niya nga pabakuron kita kon kinahanglan naton ang bulig. Gani pareho kay Samson, mangabay man kita kay Jehova: “Palihug dumduma ako kag pabakura ako.”​—Huk. 16:28.