Samtang nagahanda ka sa imo pagbasa sang Biblia ukon sa imo pagtuon, posible may mahunahuna ka nga leksion nga sa banta mo matun-an mo gid sa imo pagtuon. Pero, likawan mo nga magpokus lang sa ginahunahuna mo nga leksion kay basi indi mo makita ang gusto ni Jehova nga itudlo sa imo. Ano ang himuon mo para may matun-an ka gid nga bag-o nga mga leksion sa imo pagtuon?

Mangamuyo nga hatagan ka sing kaalam. Magpabulig kay Jehova para makita mo ang gusto niya nga matun-an mo sa tion sang imo pagtuon. (Sant. 1:5) Indi makontento sa mga butang nga nabal-an mo na nga daan.​—Hulu. 3:​5, 6.

Tuguti nga maimpluwensiahan ka sang pulong sang Dios. “Ang pulong sang Dios buhi.” (Heb. 4:12) Gani sa kada tion nga magbasa ka sang Biblia, may matun-an ka nga bag-o nga butang nga makabulig sa imo. Pero, posible lang ini kon handa ka nga batunon ang gusto sang Dios nga itudlo sa imo.

Pabalori ang tanan nga ginagamit ni Jehova para matudluan ka. Parte sa espirituwal nga pagkaon nga ginaaman ni Jehova, ginlaragway ini sang Biblia nga “isa ka sinalusalo sang bugana nga pagkaon.” (Isa. 25:6) Gani, indi paglikawi ang mga topiko nga sa banta mo indi ka manamian nga tun-an. Kon magpabulig ka kay Jehova, manamian ka gid sa imo pagtuon kag may matun-an ka gid nga bag-o nga mga leksion.