Natawo ako sang 1934 sa Timmins. Isa ini ka banwa nga may minahan sa Ontario, Canada. Pero taga-Switzerland ang akon mga ginikanan nga nagsaylo sa Canada. Sang mga 1939, nag-umpisa si Nanay sa pagbasa sang magasin nga Lalantawan kag sa pag-attend sa mga miting sang mga Saksi ni Jehova. Ginaupod niya ako kag ang akon mga utod. Sang ulihi, nangin Saksi sia ni Jehova.

Wala nalipay si Tatay nga nangin Saksi si Nanay. Pero, nanamian si Nanay sa iya mga natun-an kag determinado sia nga mangin matutom kay Jehova. Gani bisan pa gindumilian ang hilikuton sang mga Saksi ni Jehova sa Canada sang mga dekada ’40, nagpabilin nga matutom si Nanay. Kag bisan pa ginapakalain ni Tatay si Nanay, ginarespeto gid sia ni Nanay kag ginapakitaan sia pirme sing kaayo. Bangod sa maayo nga halimbawa ni Nanay, napalig-on ako kag ang akon anom ka utod nga alagaron man si Jehova. Nalipay gid kami kay sang ulihi, amat-amat nga nagbag-o ang batasan ni Tatay. Nangin maayo na ang pagtratar niya sa amon pamilya.

Sang Agosto 1950, nag-attend ako sa Theocracy’s Increase Assembly sa New York City. Sang gin-interbyu ang mga naggradweyt sa Gilead School, napalig-on gid ako sang ila mga eksperiensia. Kag sang nakilala ko ang mga kauturan halin sa lainlain nga bahin sang kalibutan, mas napalig-on pa gid ako nga dugangan ang akon ginahimo sa pag-alagad kay Jehova. Gusto ko na gid nga mag-alagad sing full-time. Gani pagpauli ko, nag-aplay ako dayon para mangin regular payunir. Nakabaton ako sang sulat halin sa branch office sang Canada nga dapat magpabawtismo ako anay. Gani, nagpabawtismo ako sang Oktubre 1, 1950. Pagligad sang isa ka bulan, nangin regular payunir ako, kag sa Kapuskasing ang una ko nga asaynment. Malayo gid ini katama halin sa amon.

 Sang 1951, ginpangabay sang branch office ang mga Saksi nga kabalo mag-French nga magsaylo sa probinsia sang Quebec. Daku ang kinahanglan para sa dugang nga manugbantala didto. Kabalo ako mag-French kag mag-English, gani nagboluntaryo ako nga magsaylo sa Quebec. Gin-asayn ako sa Rouyn, pero wala ako sing kilala didto. Suno sa ginsambit ko sa umpisa, ginhatagan lang nila ako sang isa ka address. Pero kanami sang akon mga naeksperiensiahan sa pag-alagad didto. Nangin suod kami nga abyan ni Marcel, kag nakaalagad ako sa Quebec sa sulod sang apat ka tuig. Sang ulihi, nangin isa ako ka espesyal payunir.

Sang ara ako sa Quebec, nalipay gid ako sang nakabaton ako sang isa ka imbitasyon para sa ika-26 nga klase sang Gilead School sa South Lansing, New York. Naggradweyt ako sang Pebrero 12, 1956, kag gin-asayn ako sa Ghana, b West Africa. Pero antes pa ako makakadto sa Ghana, kinahanglan ko magbalik sa Canada asta nga makompleto ang akon mga dokumento. Abi ko makompleto na ini pagkatapos lang sang mga duha ukon tatlo ka semana.

Pero, pito ka bulan ang akon nga ginhulat asta nga nakompleto ang akon mga dokumento. Sadto nga tion, ara ako sa Toronto kag ginpaistar ako ni Brother Cripps kag sang iya pamilya sa ila balay. May bata sila nga babayi nga si Sheila. Sang ulihi, naluyag kami sa isa kag isa. Sang pangabayon ko na kuntani sia nga pakaslan, nag-abot ang akon visa. Ginpangamuyuan gid namon ini ni Sheila, kag nagdesisyon kami nga unahon ko ang akon nga asaynment. Nagdesisyon man kami nga magsulatay, kag sa ulihi na lang namon desisyunan ang parte sa kasal. Indi mahapos ang ginhimo namon nga desisyon, pero narealisar namon sang ulihi nga husto ang amon ginhimo.

Nagbiyahe ako paagi sa tren, barko, kag eroplano sa sulod sang isa ka bulan pakadto sa Accra, Ghana. Dayon gin-asayn ako nga mag-alagad bilang isa ka district overseer. Gani ginakadtuan ko ang bilog nga Ghana pati na ang kaingod nga mga pungsod sini nga Ivory Coast (ginatawag subong nga Côte d’Ivoire) kag Togoland (ginatawag subong nga Togo). Sa masami, nagaisahanon ako magbiyahe gamit ang salakyan nga ginapanag-iyahan sang branch.  Nanamian gid ako magbiyahe para mabisitahan ang mga kauturan.

Sa mga weekend nga may ara sirkito nga mga asembleya, may mga asaynment man ako. Pero bangod wala kami sang mga Assembly Hall, nagapatindog ang mga kauturan sang temporaryo nga tilipunan. Kawayan kag paklang sang palma ang atop sini. Nakabulig ini para indi mainitan ang mga kauturan. Bangod wala kami sang mga refrigerator para taguan sang karne, may buhi nga mga sapat sa cafeteria nga puede ihawon kag lutuon.

Naham-ot gid kami sa pila namon ka eksperiensia. Isa ka bes, samtang nagapamulongpulong si Herb Jennings c nga isa man ka misyonero, may isa ka baka nga nakabuhi sa cafeteria. Nagdalagan ini pakadto sa atubangan sang stage kag nagasalasala gid ini. Gani, nag-untat si Herb sa iya pamulongpulong. Dayon, gindakop sang apat ka makusog nga brother ang baka kag ginbalik ini sa cafeteria. Gani nagpinalakpak ang mga nag-attend.

Antes ukon pagkatapos sang mga asembleya, ginapatan-aw ko sa malapit nga mga baryo ang aton pelikula nga The New World Society in Action. Para mahimo ini, ginahigot ko ang puti nga tela sa duha ka poste ukon duha ka kahoy kag nagagamit ako sang projector. Nanamian gid ang mga tawo sa sini nga pelikula. Para sa madamo sa ila, amo ini ang pinakauna nga pelikula nga natan-aw nila. Mabaskog gid ang ila palakpak kada may makita sila nga eksena sa pelikula nga may ginabawtismuhan nga mga tawo. Nakabulig gid ini sa ila nga makita nga nahiusa sa bilog nga kalibutan ang mga Saksi ni Jehova.

Sang 1958, pagkatapos sang mga duha ka tuig sa Africa, excited ako nga mag-attend sa internasyonal nga kombension sa New York City. Nalipay gid ako nga makita liwat si Sheila kag maistorya sia liwat sing personal. Isa na sia ka espesyal payunir sa Quebec, kag nagbiyahe pa sia halin didto. Ginpangabay ko sia nga magpakasal, kag nagpasugot sia. Gani, nagsulat ako kay Brother Knorr d kag ginpangabay ko kon puede makaeskwela si Sheila sa Gilead kag iasayn sia sa Africa. Nagpasugot si Brother Knorr. Sang ulihi, gin-asayn si Sheila sa Ghana. Dayon, nagpakasal kami sa Accra sang Oktubre 3, 1959. Nabatyagan gid namon nga ginpakamaayo kami ni Jehova bangod ginauna namon sia sa amon kabuhi.

Sang 1961, gin-asayn kami sa pungsod sang Cameroon. Ginpangabay ako nga magbulig para  sugdan ang isa ka bag-o nga branch office didto, gani nangin masako gid ako. Bangod sa akon asaynment nga magpanguna sa hilikuton sa Cameroon, madamo ako sang dapat tun-an. Dayon sang 1965, nagbusong si Sheila. Sa umpisa, wala gid namon maimadyin ni Sheila nga mangin mga ginikanan kami. Pero excited kami sa sining bag-o nga responsibilidad. Sang nagahanda na kami nga magbalik sa Canada, may indi maayo nga natabo.

Nahulugan si Sheila. Suno sa doktor, lalaki kuntani ang amon mangin bata. Wala gid namon ini nalimtan bisan pa sobra na 50 ka tuig ini nga natabo. Bisan pa nasubuan gid kami sa natabo, ginpadayon namon ang amon asaynment kay ginapabaloran gid namon ini.

Sa Cameroon, masami nga ginahingabot ang mga kauturan bangod neutral sila sa pulitika. Mabudlay gid ang ila sitwasyon ilabi na sa tion sang eleksion para magpili sang presidente. Sang Mayo 13, 1970, natabo ang ginakahadlukan gid namon. Gindumilian sang gobierno ang hilikuton sang mga Saksi ni Jehova. Lima ka bulan pa lang ang nagligad sang nagsaylo kami sa amon matahom kag bag-o nga branch office. Pero ginkumpiskar ini sang gobierno. Sa sulod lang sang isa ka semana, ginpagua sa pungsod ang tanan nga misyonero, lakip na kami ni Sheila. Mabudlay para sa amon nga biyaan ang mga kauturan. Palangga gid namon sila kag nabalaka kami sa posible nga matabo sa ila.

Ginpakadto kami sa branch office sa France, kag nagtener kami didto sing anom ka bulan. Ginhimo ko ang akon bug-os nga masarangan para maatipan ang mga kinahanglanon sang aton mga kauturan sa Cameroon. Sang Disiembre sadto nga tuig, gin-asayn kami sa branch sa Nigeria nga amo na ang nagaasikaso sang mga hilikuton sa Cameroon. Gin-abiabi kami sing maayo sang mga kauturan sa Nigeria, kag nalipay kami nga nakaalagad kami didto sing pila ka tuig.

Sang 1973, kinahanglan namon maghimo sing isa ka mabudlay nga desisyon. May malala nga balatian si Sheila kag madugay na niya ini nga ginaantos. Sang nag-attend kami sang kombension sa New York, naghilibion si Sheila kag ginsilingan niya ako: “Indi ko na gid ini masarangan. Nakapoy na gid ’ko kag pirme na lang ’ko nagamasakit.” Magkaupod kami nga nag-alagad sa West Africa sing sobra na 14 ka tuig. Nalipay ako sa iya matutom nga pag-alagad, pero kinahanglan namon maghimo sang pila ka mga pagbag-o. Gin-istoryahan namon ini, kag hanuot kami nga nangamuyo. Nagdesisyon kami nga magbalik sa Canada para mas maatipan sing maayo si Sheila. Ang amon desisyon nga mag-untat sa pag-alagad sing full-time kag maghalin sa amon asaynment amo ang pinakamabudlay nga desisyon nga amon ginhimo.

Sang nagbalik kami sa Canada, ginhatagan ako sang obra sang akon madugay na nga abyan. Nagabaligya sia sang mga salakyan sa isa ka banwa sa naaminhan sang Toronto. Nag-arkila kami ni Sheila sang isa ka apartment, kag nagbakal kami sang secondhand nga mga gamit. Gani, indi na namon kinahanglan nga mangutang para makasaylo kami. Gusto namon nga mangin simple lang ang amon kabuhi, kay nagalaum kami nga makabalik kami sa pag-alagad sing full-time. Pero wala gid namon ginpaabot nga makabalik kami dayon.

 Nagaboluntaryo ako kada Sabado sa construction site sang bag-o nga Assembly Hall sa Norval, Ontario. Sang ulihi, gin-asayn ako nga mangin Assembly Hall overseer. Nangin maayo na ang sitwasyon ni Sheila, gani nahunahuna namon nga masarangan na niya ining bag-o nga asaynment. Sang Hunyo 1974, nagsaylo kami sa apartment sang Assembly Hall. Nalipay gid kami nga makabalik sa pag-alagad sing full-time.

Padayon nga nangin maayo ang sitwasyon ni Sheila. Gani pagligad sang duha ka tuig, ginbaton namon ang asaynment nga mag-alagad sa sirkito. Sa Manitoba ang amon teritoryo. Isa ini ka probinsia sa Canada kag matugnaw gid didto katama. Nalipay kami kay gin-abiabi gid kami sing maayo sang mga kauturan didto. Natun-an namon nga indi importante kon diin kita nagaalagad kay Jehova. Ang importante, padayon kita nga nagaalagad sa iya.

Pagligad sang pila ka tuig nga pag-alagad sa sirkito, ginpangabay kami nga mag-alagad sa Bethel sa Canada sang 1978. Wala madugay pagkatapos sini, natun-an ko ang isa ka importante nga leksion nga mabudlay para sa akon nga batunon. Gin-asayn ako nga magpamulongpulong sa isa ka espesyal nga miting sa Montreal. Isa ka oras kag tunga ang pamulongpulong, kag dapat ako mag-French. Pero, indi manami ang akon pamulongpulong kay daw indi interesado sa sini ang mga nag-attend. Gani ginlaygayan ako sang isa ka brother sa Service Department parte sa akon pamulongpulong. Sa tuod lang, dapat ginbaton ko na dayon nga indi gid man ako manami magpamulongpulong. Pero, indi maayo ang nangin reaksion ko sa iya laygay. Naakig ako kay pamatyag ko nasobrahan sia kon maglaygay kag wala gid niya ako ginkomendahan. Wala ako nanamian sa utod nga naglaygay sa akon. Bangod sini, wala ko ginbaton ang iya laygay kag nagpokus lang ako sa iya paagi sang paglaygay.

Pagligad sang pila ka adlaw, gin-istorya ako sang isa ka miembro sang Branch Committee parte sa natabo. Gin-aku ko nga indi nangin maayo ang akon reaksion sa nabaton ko nga laygay kag nasubuan ako sa akon nahimo. Dayon, nangayo ako sing pasaylo sa brother nga naglaygay sa akon. Mainayuhon niya ako nga ginpatawad. Indi ko gid malipatan ang leksion nga natun-an ko sa sini nga eksperiensia. Natun-an ko nga dapat gid kita mangin mapainubuson. (Hulu. 16:18) Madamo nga beses ako nga nangamuyo kay Jehova parte sa sini. Nagpalig-on ini sa akon nga panikasugan nga indi pagbalewalaon ang mga laygay.

Sobra na 40 ka tuig ako nga nagaalagad sa Bethel sa Canada. Kag sugod sang 1985, nangin miembro ako sang Branch Committee. Sang Pebrero 2021, napatay ang akon pinalangga nga asawa nga si Sheila. Nahidlaw na gid ako sa iya. Magluwas sa ginabatyag ko nga kasubo, may ginabatas man ako nga mga problema sa panglawas. Pero bangod nagaalagad ako kay Jehova, masako ako kag malipayon. Bangod sini, daw ‘indi ko matalupangdan ang mga kabudlayan.’ (Man. 5:20) Bisan pa may mga kabudlayan sa akon kabuhi, mas madamo ako sang makalilipay nga mga eksperiensia. Malipayon gid ako bangod gin-una ko si Jehova sa akon kabuhi, kag 70 ka tuig na ako nga nagaalagad sa iya sing full-time. Ginapangabay ko sa akon mga pangamuyo nga kabay pa nga padayon nga unahon sang mga pamatan-on ang pag-alagad kay Jehova. Kay man, kumbinsido ako nga mangin malipayon gid sila kon himuon nila ini.