1-2. Bangod mas malipayon kita kon nagahatag kita sa iban, ngaa masiling naton nga para ini sa aton kaayuhan?

 MAS malipayon kita kon nagahatag kita sa iban. (Binu. 20:35) Ngaa? Bangod sang gintuga kita ni Jehova, gindesinyo niya kita nga mabatyagan ini. Buot silingon bala sini nga indi kita makabatyag sang kalipay kon makabaton kita sang regalo? Indi amo sina ang buot silingon sini. Kay man, nalipay kita kon makabaton kita sang regalo. Pero, mas malipayon kita kon kita mismo ang nagahatag sang regalo. Ang matuod, para sa aton kaayuhan ang pagkadesinyo sa aton ni Jehova. Ngaa masiling naton ini?

² Base sa pagkadesinyo sa aton ni Jehova, may puede kita himuon para madugangan ang aton kalipay. Mabatyagan naton ini kon nagapangita kita sang mga kahigayunan nga makahatag kita sa iban. Dalayawon gid ang pagkadesinyo sa aton ni Jehova.​—Sal. 139:14.

3. Ngaa ginlaragway si Jehova bilang isa ka “malipayon nga Dios”?

³ Ang Biblia nagasiling nga mangin malipayon kita kon nagahatag kita sa iban, gani indi kita matingala nga ginlaragway sang Biblia si Jehova bilang isa ka “malipayon nga Dios.” (1 Tim. 1:11) Sia ang pinakauna nga naghatag sa iban, kag wala sing makalabaw sa iya kon parte sa paghatag. Suno kay apostol Pablo, “may kabuhi kita kag nagahulag kag nagaluntad” bangod kay Jehova. (Binu. 17:28) Ang matuod, halin kay Jehova “ang tagsa ka maayo nga dulot kag tagsa ka himpit nga regalo.”​—Sant. 1:17.

4. Ano ang himuon naton para mangin mas malipayon kita?

⁴ Posible gid nga gusto naton tanan nga mangin mas malipayon pa gid paagi sa paghatag sa iban. Mabatyagan naton ini kon ilugon naton ang kaalwan ni Jehova. (Efe. 5:1) Sa sini nga artikulo, binagbinagon naton ang iya halimbawa. Binagbinagon man naton kon ano ang puede naton himuon kon pamatyag naton wala kita  napasalamatan sang iban. Buligan kita sini nga padayon nga maghatag sa iban para mangin mas malipayon pa gid kita.

ILUGA ANG KAALWAN NI JEHOVA

5. Ano ang pila ka butang nga ginahatag sa aton ni Jehova?

⁵ Paano ginapakita ni Jehova nga maalwan sia? Binagbinaga ining pila ka halimbawa. Ginahatagan kita ni Jehova sang aton materyal nga mga kinahanglanon. Indi buot silingon sini nga ihatag sa aton ni Jehova ang tanan nga gusto naton. Pero, siguraduhon niya nga mahatag niya sa aton ang mga kinahanglanon gid naton. Halimbawa, ginasigurado niya nga may pagkaon kita, bayo, kag ilistaran. (Sal. 4:8; Mat. 6:​31-33; 1 Tim. 6:​6-8) Ginahatagan bala kita ni Jehova sang aton materyal nga mga kinahanglanon bangod lang obligasyon niya ini? Indi. Ti, ngaa ginahatagan niya kita sang aton mga kinahanglanon?

6. Ano ang matun-an naton sa Mateo 6:​25, 26?

⁶ Ginahatagan kita ni Jehova sang aton materyal nga mga kinahanglanon bangod palangga niya kita. Binagbinaga ang ginsiling ni Jesus sa Mateo 6:​25, 26. (Basaha.) Gingamit ni Jesus ang halimbawa sang mga pispis. Nagsiling sia: “Wala sila nagasab-ug sing binhi ukon nagaani ukon nagatipon sing pagkaon sa mga bodega.” Pero, talupangda ang masunod niya nga ginsiling: “Ginapakaon sila sang inyo langitnon nga Amay.” Dayon namangkot si Jesus: “Indi bala mas importante pa kamo sangsa ila?” Ano ang matun-an naton sa sini? Kon ikumparar sa mga sapat, mas hamili kay Jehova ang iya matutom nga mga alagad. Gani kon ginaamanan ni Jehova ang mga sapat sang ila mga kinahanglanon, makasigurado kita nga amanan man niya kita. Pareho sa isa ka amay nga nagaatipan sa iya pamilya, ginaamanan kita ni Jehova bangod palangga niya kita.​—Sal. 145:16; Mat. 6:32.

7. Ano ang isa ka paagi nga mailog naton ang kaalwan ni Jehova? (Tan-awa man ang piktyur.)

⁷ Pareho kay Jehova, puede naton hatagan ang iban sang ila materyal nga mga kinahanglanon bangod palangga naton sila. Halimbawa, may kilala ka bala nga utod nga nagakinahanglan sang pagkaon ukon bayo? Puede ka gamiton ni Jehova para buligan ini nga utod. Madasig man magbulig ang katawhan ni Jehova kon may mga kalamidad. Halimbawa, sa tion sang COVID-19 nga pandemic, ginhatagan nila sing pagkaon, bayo, kag iban pa nga mga butang ang mga nagakinahanglan sang bulig. Madamo man ang naghatag sing donasyon para sa bug-os kalibutan nga hilikuton. Bangod sini, nabuligan  naton ang aton mga kauturan sa bilog nga kalibutan nga naapektuhan sang mga kalamidad. Gin-aplikar gid sang aton maalwan nga mga kauturan ang ginasiling sang Hebreo 13:16: “Indi man pagkalimti nga maghimo sing maayo kag magpaambit sa iban sing mga butang nga yara sa imo, kay nahamuot gid ang Dios sa sini nga mga halad.”

8. Paano kita nagabenepisyo bangod ginahatagan kita ni Jehova sang kusog? (Filipos 2:13)

⁸ Ginahatagan kita ni Jehova sang kusog. Indi gid maubos ang gahom ni Jehova, kag nalipay sia nga hatagan sang kusog ang iya matutom nga mga alagad. (Basaha ang Filipos 2:13.) Nakaagi ka na bala pangamuyo kay Jehova nga hatagan ka sang kusog para mapamatukan mo ang pagsulay ukon para mabatas mo ang isa ka mabudlay nga pagtilaw? Posible nga nakapangamuyo ka man nga hatagan ka sang kusog para mahimo mo ang imo mga hilikuton sa bilog nga adlaw. Kon ginsabat ang imo pangamuyo nga hatagan ka sang kusog, masiling mo man ang ginsiling ni apostol Pablo: “Sa tanan nga butang may kusog ako paagi sa isa nga nagapabakod sa akon.”​—Fil. 4:13.

9. Paano naton mailog ang kaalwan ni Jehova sa paghatag sa aton sang kusog? (Tan-awa man ang piktyur.)

⁹ Bisan pa indi kita perpekto, mailog naton ang kaalwan ni Jehova. Wala kita sing ikasarang nga hatagan ang iban nga tawo sang aton kusog. Pero, puede naton gamiton ang aton kusog para buligan sila. Halimbawa, kon tigulang na ukon nagamasakit ang isa ka utod kag may kinahanglan sia nga baklon sa tiendahan, puede kita makaboluntaryo sa pagkadto sa tiendahan. Puede man naton sia buligan sa mga ulubrahon niya sa iya balay, pareho sang pagpaninlo sa sini. Kon posible sa aton kahimtangan, puede kita makaboluntaryo sa pagpaninlo kag pagmentinar sang Kingdom Hall. Kon ginagamit naton ang aton kusog sa sini nga mga hilikuton, makabulig gid kita sa aton mga kauturan.

10. Paano naton mapabakod ang iban paagi sa aton mga ginahambal?

¹⁰ Indi pagkalimti nga mapabakod mo man ang iban paagi sa imo mga ginahambal. May kilala ka bala nga sa banta mo mapalig-on gid kon komendahan mo sia? May kilala ka bala nga nagakinahanglan sang paumpaw? Kon huo, pabal-a sia nga nagaulikid ka sa iya. Puede mo sia bisitahan, tawgan sa telepono, ukon padal-an sang card, email, ukon text. Indi kinahanglan nga sobra gid kanami sang imo mensahe. Bisan simple lang ang imo ihambal, makapabakod na ini sa imo utod kon halin ini sa imo tagipusuon. Posible magpalig-on ini sa iya nga magpabilin nga matutom ukon indi madulaan sing paglaum.​—Hulu. 12:25; Efe. 4:29.

11. Ano ang ginahimo ni Jehova sa iya kaalam?

¹¹ Nagahatag si Jehova sang kaalam. Si disipulo  Santiago nagsulat: “Kon may isa sa inyo nga kulang sang kaalam, padayon sia nga magpangayo sa Dios kag ihatag ini sa iya, kay maalwan Sia nga nagahatag sa tanan kag wala nagapangita sang sayop.” (Sant. 1:5; footnote) Ginapakita sini nga wala ginatago ni Jehova ang iya kaalam. Sa baylo, maalwan niya ini nga ginahatag sa iban. Talupangda man nga kon nagahatag si Jehova sang kaalam, ginahimo niya ini nga “wala nagapangtamay,” ukon “wala nagapangita sang sayop.” Buot silingon, wala niya kita ginapakanubo kon nagapangabay kita sa iya nga giyahan niya kita. Ang matuod, gusto niya nga magpagiya kita sa iya.​—Hulu. 2:​1-6.

12. Sa ano nga mga kahigayunan puede naton mapaambit sa iban ang aton kaalam?

¹² Bilang pag-ilog kay Jehova, paano naton mapaambit sa iban ang aton kaalam? (Sal. 32:8) Madamo sang kahigayunan ang katawhan ni Jehova para mapaambit nila sa iban ang ila natun-an. Halimbawa, ginahanas naton sa pagbantala ang mga bag-uhan. Mapinasensiahon nga ginahanas sang mga gulang ang ministeryal nga mga alagad kag ang bawtismado nga mga brother sa paghimo sang ila mga asaynment sa kongregasyon. Kag sa bahin sang mga kauturan nga may eksperiensia sa konstruksion kag sa pagmentinar sang mga pasilidad sang organisasyon, ginahanas man nila ang iban kon paano ini himuon.

13. Kon ginahanas naton ang iban, paano naton mailog ang paagi ni Jehova sa paghatag sang iya kaalam?

¹³ Kon ginahanas naton ang iban, panikasugan naton nga ilugon ang paagi ni Jehova sa paghatag sang iya kaalam. Dumduma nga maalwan si Jehova sa paghatag sini. Sing kaanggid, dapat man naton ipaambit sa aton ginahanas ang aton mga nabal-an kag eksperiensia. Indi naton dapat pagtaguon sa iya ang pila sa aton mga nabal-an bangod lang nahadlok kita nga basi buslan niya kita sa aton asaynment. May iban naman nga nagasiling nga bangod wala sing may naghanas sa ila sang una, indi man nila paghanason ang mga bag-uhan. Indi gid naton dapat pag-ilugon ini nga panimuot. Sa baylo, nalipay kita sa paghanas sa iban. Ginahimo naton ang aton bug-os nga masarangan sa paghanas sa ila, kag ginatudlo naton sa ila ang tanan naton nga nabal-an. (1 Tes. 2:8) Nagalaum kita nga sa ulihi, ‘mangin kalipikado sila nga magtudlo man sa iban.’ (2 Tim. 2:​1, 2) Kon maalwan kita tanan sa pagpaambit sang aton nabal-an, nagabulig kita para padayon naton nga mabatyagan ang kalipay sa paghatag.

KON PAMATYAG NATON WALA KITA NAPASALAMATAN SANG IBAN

14. Ano ang reaksion sang kalabanan nga tawo kon may ginhimo kita para sa ila?

¹⁴ Kon maalwan kita, ilabi na sa aton mga kauturan, nagapasalamat gid ang kalabanan sa ila. Posible nga hatagan nila kita sang card ukon pasalamatan nila kita sa iban pa nga paagi. (Col. 3:15) Kon ginapasalamatan nila kita, nagadugang pa gid ini sa aton kalipay.

15. Ano ang dapat naton dumdumon kon wala kita napasalamatan sang iban?

¹⁵ Pero kon kaisa, posible nga indi kita mapasalamatan sang iban. Posible nga gingamit naton ang aton tion, kusog, kag kuarta para buligan sila, pero daw wala lang sa ila ang aton ginhimo. Kon matabo ini, ano ang himuon naton para indi madula ang aton kalipay ukon para indi maglain ang aton buot? Dumduma ang ginasiling sang Binuhatan 20:35 nga ginbasihan sini nga artikulo. Ang aton kalipay wala nagadepende sa reaksion sang aton ginbuligan. Puede gihapon kita mangin malipayon sa aton paghatag bisan pa daw wala kita napasalamatan sang iban. Ano ang makabulig sa aton nga mahimo ini? Binagbinagon naton ang pila ka paagi.

16. Sa ano kita dapat magpokus kon nagahatag kita?

¹⁶ Magpokus sa pag-ilog kay Jehova. Pasalamatan man sia ukon indi sang mga tawo, padayon sia nga nagahatag sang maayo nga mga  butang sa ila. (Mat. 5:​43-48) Nagapromisa si Jehova nga kon nagahatag man kita nga “wala nagalaum nga bayaran,” “padyaan [niya kita] sing daku.” (Luc. 6:35) Gani, indi dapat maglain ang aton buot kon indi kita mapasalamatan kon kaisa. Tandaan naton nga kon nagahimo kita sing maayo sa iban kag kon ‘nagahatag kita sing malipayon,’ padyaan gid kita pirme ni Jehova.​—Hulu. 19:17; 2 Cor. 9:7.

17. Ano dapat ang aton panimuot kon nagahatag kita sa iban? (Lucas 14:​12-14)

¹⁷ Ang isa pa ka paagi para mailog naton si Jehova sa aton paghatag amo ang pag-aplikar sang prinsipio sa Lucas 14:​12-14. (Basaha.) Siempre, indi sala kon maalwan kita sa mga kauturan nga makasarang magbalos sa aton pareho sang pag-agda sa ila sa pagkaon. Pero, kon natalupangdan naton nga nagahatag lang kita sa iban bangod gusto naton nga balusan nila kita, panikasugan naton nga iaplikar ang ginsiling ni Jesus. Halimbawa, agdahon man naton sa pagkaon ang mga kauturan nga wala sing ikasarang nga magbalos sa aton. Kon nagahatag kita nga wala nagapaabot sang balos, malipay gid kita bangod ginailog naton si Jehova. Kag kon amo sini ang aton panimuot, indi madula ang aton kalipay bisan pa indi nila kita mapasalamatan.

18. Ano ang indi naton dapat paghunahunaon, kag ngaa?

¹⁸ Indi paghunahunaa nga malain ang batasan sang iban. (1 Cor. 13:7) Kon wala kita napasalamatan sang iban, pamangkuton naton ang aton kaugalingon: ‘Batasan gid man bala nila nga indi magpasalamat, ukon nalipat lang gid sila magpasalamat?’ Posible nga may mga rason kon ngaa wala nila kita napasalamatan. May iban nga gusto gid kuntani magpasalamat pero nabudlayan sila nga ipabutyag ini. Posible nga nahuya sila nga nakabaton sila sang bulig, ilabi na kon sila sadto ang pirme nagabulig sa iban. Pero kon palangga gid naton ang aton mga kauturan, indi naton paghunahunaon nga malain ang ila batasan kag padayon kita nga mangin malipayon sa aton paghatag.​—Efe. 4:2.

19-20. Ngaa importante nga mangin mapinasensiahon kita kon nagahatag kita sa iban? (Tan-awa man ang piktyur.)

¹⁹ Mangin mapinasensiahon. Parte sa kaalwan,  nagsulat si Hari Solomon: “Ihaboy ang imo tinapay sa tubig, kay makita mo ini liwat pagligad sang madamo nga adlaw.” (Man. 11:1) Ginapakita sini nga may mga tion nga posible pasalamatan kita sa aton kaalwan pagligad pa “sang madamo nga adlaw.” Binagbinaga ini nga eksperiensia.

²⁰ Madamo nga tinuig na ang nagligad, ginsulatan sang asawa sang circuit overseer ang isa ka sister nga bag-o lang nabawtismuhan. Ginpalig-on niya sia nga magpabilin nga matutom. Pagligad sang mga walo ka tuig, ginsulatan sia sang sister. Amo ini ang ginsulat sang sister: “Gusto ko gid isugid sa imo nga daku ang nabulig mo sa akon sa sulod sang madamo na nga tinuig, kag wala ka kabalo sa sini.” Nagsiling pa sia: “Kanami gid sang imo sulat, kag indi ko gid malipatan ang teksto nga gin-share mo sa akon kay napalig-on gid ako sa sini.” a Ginsugid sang sister ang mga kabudlayan nga iya naeksperiensiahan, kag nagsiling sia: “May mga tion nga gusto ko na mag-untat sa pag-alagad kay Jehova. Pero ginadumdom ko ang teksto nga gin-share mo, kag nagahatag ini sa akon sang kusog nga magpabilin nga matutom.” Nagsiling pa gid sia: “Sa sulod sang walo ka tuig, ang imo sulat kag ang teksto nga gin-share mo sa akon amo gid ang nakabulig sa akon.” Sigurado nga nalipay gid ang asawa sang circuit overseer sa pagpasalamat sa iya sang sister “pagligad sang madamo nga adlaw.” Posible man nga pasalamatan kita sa aton maayo nga ginhimo para sa iban pagligad pa sang malawig nga tion.

21. Ngaa gusto mo gid nga padayon nga ilugon ang kaalwan ni Jehova?

²¹ Ginsambit kaina nga ginhatagan kita ni Jehova sang pinasahi nga ikasarang sang gintuga niya kita. Gintuga niya kita nga mangin mas malipayon kon nagahatag kita sangsa nagabaton kita. Nalipay kita kon nabuligan naton ang aton mga kauturan. Kag nalipay kita kon ginapasalamatan nila kita. Pero, pasalamatan man nila kita ukon indi, dapat kita malipay kay ginhimo naton ang husto. Indi pagkalimti nga bisan ano man ang imo ginhatag, “sobra pa sa sina ang mahatag sa imo ni Jehova.” (2 Cron. 25:9) Indi gid naton malabawan ang kaalwan ni Jehova. Kag ang pinakamaayo nga padya amo ang padya nga halin kay Jehova. Gani, panikasugan gid naton nga padayon nga ilugon ang aton maalwan nga Amay sa langit.