1-2. Ngaa malipayon ang mga alagad sang Dios? (Santiago 1:​22-25)

 GUSTO ni Jehova kag sang iya pinalangga nga Anak nga mangin malipayon kita. Ang manunulat sang Salmo 119:2 nagsiling: “Malipayon ang mga tawo nga nagatuman sang iya mga pahanumdom, nga nagapangita sa iya sing bug-os tagipusuon.” Kag nagsiling si Jesus: “Malipayon ang mga nagapamati sa pulong sang Dios kag nagatuman sini!”—Luc. 11:28.

² Bilang mga alagad ni Jehova, malipayon gid kita. Ngaa? Madamo kita sang rason. Pero ari ang isa ka importante nga rason: Ginabasa naton ang Pulong sang Dios adlaw-adlaw kag ginapanikasugan naton nga iaplikar ang aton natun-an.​—Basaha ang Santiago 1:​22-25.

3. Ano ang benepisyo kon iaplikar naton ang aton nabasahan sa Pulong sang Dios?

³ Kon “mangin mga manugtuman [kita] sang pulong,” madamo nga benepisyo ang aton mabaton. Halimbawa, kon ginaaplikar naton ang aton natun-an sa Pulong sang Dios, nalipay sa aton si Jehova. Bangod sini, nalipay man kita. (Man. 12:13) Kag kon ginatuman naton ang mga laygay sang Pulong sang Dios, nagasuod pa gid kita sa aton pamilya kag sa aton mga kauturan. Posible gid nga naeksperiensiahan mo na ini. Dugang pa, malikawan naton ang madamo nga problema nga ginaantos sang mga tawo nga wala nagatuman sang mga kasuguan ni Jehova. Gani, husto gid ang ginsiling ni Hari David. Pagkatapos niya ginsambit sa iya ambahanon ang parte sa kasuguan, mga mando, kag mga paghukom ni Jehova, nagsiling sia: “Daku ang padya kon tumanon ini.”​—Sal. 19:​7-11.

4. Ngaa nabudlayan kita kon kaisa nga mangin mga manugtuman sang Pulong sang Dios?

⁴ Pero kon kaisa, nabudlayan kita nga mangin mga manugtuman sang Pulong sang Dios. Kay man, masako gid kita sa aton kabuhi.  Gani, dapat kita magpain sang tion para basahon kag tun-an ang Biblia para mabal-an naton ang gusto ni Jehova nga himuon naton. Repasuhon naton ang pila ka panugda nga makabulig sa aton nga mabasa ang Biblia adlaw-adlaw. Binagbinagon man naton kon ano ang makabulig sa aton para mapamalandungan naton ang aton nabasahan kag para maaplikar naton ang aton natun-an.

MAGPAIN SANG TION PARA BASAHON ANG PULONG SANG DIOS

5. Ngaa masako gid kita?

⁵ Masako gid ang kalabanan sa mga alagad ni Jehova. Madamo kita sing responsibilidad, kag daku nga tion ang ginagamit naton para sa sini. Suno sa Biblia, importante gid nga himuon naton ini nga mga responsibilidad. Halimbawa, nagatrabaho ang kalabanan sa aton para masuportahan naton ang aton kaugalingon kag ang aton mga pamilya. (1 Tim. 5:8) Madamo nga kauturan ang nagaatipan sa ila mga paryente nga nagamasakit ukon tigulang na. Kag daku nga tion ang ginagamit naton para maatipan naton ang aton kaugalingon. Magluwas sa sini nga mga responsibilidad, may mga asaynment man kita sa kongregasyon. Ang isa ka importante nga responsibilidad nga dapat naton himuon amo ang pagbantala sa bug-os naton nga masarangan. Bangod masako kita sa tanan naton nga obligasyon, paano kita makakita sang tion para basahon ang Biblia adlaw-adlaw, para pamalandungan ang aton nabasahan, kag para maaplikar naton ang aton natun-an?

6. Ano ang puede mo himuon para masigurado mo nga mabasa mo ang Biblia? (Tan-awa man ang piktyur.)

⁶ Ang pagbasa sang Biblia amo ang isa sa “mas importante nga mga butang” nga dapat naton himuon, gani dapat mangin prioridad naton ini. (Fil. 1:10) Amo ini ang ginasiling sang pinakauna nga salmo parte sa malipayon nga tawo: “Nagakalipay sia sa kasuguan ni Jehova, kag ginabasa niya sa mahinay nga tingog ang Iya kasuguan adlaw kag gab-i.” (Sal. 1:​1, 2) Maathag nga ginapahangop sini nga dapat kita magpain sang tion para basahon ang Biblia. San-o ang pinakamaayo nga tion para basahon ang Biblia? Nagadepende ini sa kada isa sa aton. Ang importante, ang tion nga ginpili naton amo ang tion  nga makabulig sa aton nga mabasa ang Biblia adlaw-adlaw. Ang isa ka brother nga si Victor nagsiling: “Nabudlayan ako magbugtaw sing temprano. Pero nanamian ako magbasa sang Biblia kon aga pa kay diutay lang ang disturbo. Makapokus man ako sing maayo kay matawhay ang akon pensar.” Posible nga amo man sini ang imo sitwasyon. Pamangkuta ang imo kaugalingon, ‘Sa akon sitwasyon, san-o ang pinakamaayo nga tion para basahon ang Biblia?’

PAMALANDUNGI ANG IMO NABASAHAN

7-8. Ano ang posible nga rason kon ngaa indi kita makabenepisyo sing bug-os sa aton pagbasa sang Biblia? Maghatag sing ilustrasyon.

⁷ Kon may iskedyul ka na sa pagbasa sang Biblia, may dapat ka pa gid himuon. Naeksperiensiahan mo na bala nga pagkatapos mo basa sang isa ka balasahon, diutay lang nga impormasyon ang imo madumduman sa sini? Naeksperiensiahan naton ini tanan. Posible man ini matabo sa aton pagbasa sang Biblia. Kon nagdesisyon kita nga magbasa sang pila ka kapitulo kada adlaw, maayo gid ini nga goal ukon tulumuron. Kay man, dapat may mga tulumuron kita kag dapat panikasugan gid naton nga himuon ini. (1 Cor. 9:26) Maayo gid ang aton ginahimo kon nagabasa na kita sang Biblia. Pero, umpisa pa lang ini sang dapat naton himuon. May dapat pa gid kita himuon para makabenepisyo kita sing bug-os sa aton pagbasa sang Pulong sang Dios.

⁸ Binagbinaga ini nga ilustrasyon: Kinahanglan sang mga tanom ang ulan para mabuhi ini. Pero kon nagbundak ang ulan kag nag-untat man ini dayon, posible nga indi magpanalupsop sa duta ang ulan. Kon amo sini ang matabo, indi gid makabenepisyo ang mga tanom. Kay man, kinahanglan ang tion para magpanalupsop sa duta ang ulan. Sing kaanggid, indi kita dapat magdali sa aton pagbasa sang Biblia. Kon nagadali kita, indi na kita makapamalandong. Bangod sini, indi naton madumduman ang aton nabasahan kag indi naton ini maaplikar.​—Sant. 1:24.

9. Ano ang dapat naton himuon kon nagadali kita pirme magbasa sang Biblia?

⁹ May mga tion bala nga nagadali ka sa pagbasa sang Biblia? Ano ang dapat mo himuon? Maghinay sa imo pagbasa. Panikasugi nga mapamalandungan mo ang imo ginabasa ukon  ang bag-o mo lang nabasa. Nabudlayan ka bala nga iaplikar ang panugda parte sa pagpamalandong? Puede mo dugangan ang imo tion sa pagtuon, kag gamita ang gindugang mo nga tion para sa pagpamalandong. Puede man nga buhinan mo ang imo ginabasa, kag gamita ang nabilin nga tion para sa pagpamalandong sa imo nabasahan. Si Victor, nga ginsambit kaina, nagsiling: “Isa lang ka kapitulo sa Biblia ang akon ginabasa. Kag bangod sa aga ako nagabasa, mapamalandungan ko sa bilog nga adlaw ang akon nabasahan.” Nagadepende sa imo kon pila ka bersikulo ukon kapitulo ang imo basahon. Ang importante, indi ka dapat magdali sa imo pagbasa para mapamalandungan mo ang imo ginabasa.​—Sal. 119:97; tan-awa ang kahon nga “ Pamalandungi Ini nga mga Pamangkot.”

10. Maghatag sing halimbawa nga nagapakita kon paano mo maaplikar ang imo natun-an. (1 Tesalonica 5:​17, 18)

¹⁰ Kon may iskedyul ka na sa pagbasa sang Biblia adlaw-adlaw kag kabalo ka na kon daw ano kalawig nga tion ang gamiton mo para sa sini, dapat mo naman siguraduhon nga maaplikar mo ang imo natun-an. Samtang ginabasa mo ang Pulong sang Dios, pamangkuta ang imo kaugalingon, ‘Paano ko maaplikar ini nga impormasyon subong ukon sa ulihi?’ Halimbawa, ibutang ta nga nalakip sa imo ginbasa ang 1 Tesalonica 5:​17, 18. (Basaha.) Pagkatapos mo mabasa ining duha ka bersikulo, puede ka anay mag-untat sa imo pagbasa. Dayon pamalandungi kon pila ka beses ka nagapangamuyo kada adlaw kag kon daw ano ini kahanuot. Puede mo man pamalandungan ang mga butang nga gusto mo pasalamatan kay Jehova. Ibutang ta nga gusto mo sia pasalamatan parte sa tatlo ka butang. Mga pila lang ka minuto ang magamit mo para sa sini nga pagpamalandong, pero makabulig ini sa imo nga maaplikar ang ginasiling sang Pulong sang Dios. Kon himuon mo ini nga klase sang pagpamalandong sa imo pagbasa sang Biblia adlaw-adlaw, daku gid ang benepisyo sini sa imo kay mangin mas maayo ka nga alagad ni Jehova. Pero, ano abi kon marealisar mo nga madamo ka sang dapat bag-uhon sa imo kaugalingon?

ISA UKON DUHA LANG ANAY ANG PANIKASUGI NGA BAG-UHA

11. Ngaa may mga tion nga posible magluya ang imo buot? Maghatag sing halimbawa.

¹¹ Kon nagabasa ka sang Biblia, posible may mga tion nga magluya ang imo buot ilabi na kon marealisar mo nga madamo ka sang dapat bag-uhon sa imo kaugalingon. Binagbinaga ini nga sitwasyon: Ibutang ta nga nalakip sa imo pagbasa sang Biblia sini nga adlaw ang laygay parte sa paboritismo. (Sant. 2:​1-8) Para maaplikar mo ini, nagdesisyon ka nga dapat mo bag-uhon ang imo pagtratar sa iban. Maayo gid ina nga desisyon. Pagkasunod nga adlaw, nabasa mo ang laygay parte sa paghalong sa aton  ginahambal. (Sant. 3:​1-12) Narealisar mo nga may mga tion nga indi makapalig-on ang imo ginahambal. Gani, nagdesisyon ka nga panikasugan nga mangin makapalig-on pirme ang imo ihambal. Pagkasunod naman nga adlaw, nalakip sa imo pagbasa sang Biblia ang paandam parte sa pagpakig-abyan sa kalibutan. (Sant. 4:​4-12) Narealisar mo nga dapat mas maghalong ka pa gid sa imo ginapili nga kalingawan. Sa ikap-at nga adlaw, posible nga magluya ang imo buot bangod narealisar mo nga madamo ka sang dapat bag-uhon sa imo kaugalingon.

12. Ngaa indi ka dapat maluyahan sang buot kon narealisar mo sa imo pagbasa sang Biblia nga may mga dapat ka bag-uhon? (Tan-awa man ang footnote.)

¹² Kon narealisar mo nga madamo ka sang dapat bag-uhon sa imo kaugalingon, indi ka dapat maluyahan sang buot. Kay man, ginapakita sini nga mapainubuson ka. Kon mapainubuson kita kag honest, ginabasa naton ang Biblia kay gusto naton mabal-an kon ano ang mga dapat naton bag-uhon. a Dumduma man nga dapat padayon naton nga isuksok “ang bag-o nga personalidad.” (Col. 3:10) Ano ang makabulig sa imo para maaplikar mo pirme ang ginasiling sang Pulong sang Dios?

13. Ano ang isa ka paagi para maaplikar mo ang imo natun-an? (Tan-awa man ang piktyur.)

¹³ Indi pagtinguhai nga bag-uhon sing dungan ang tanan nga dapat mo bag-uhon. Sa baylo, isa lang anay ukon duha. (Hulu. 11:2) Testingi ini nga paagi: Listaha ang mga dapat mo bag-uhon sa imo kaugalingon. Dayon magpili sing isa ukon duha lang anay sa sini, kag panikasugi nga bag-uha ini. Sa ulihi, panikasugi naman nga bag-uha ang iban pa nga ara sa imo listahan. Ano ang imo unahon nga bag-uhon?

14. Ano ang imo unahon nga bag-uhon?

¹⁴ Puede mo unahon ang sa banta mo mahapos lang bag-uhon. Puede mo man unahon  ang sa banta mo kinahanglan mo gid bag-uhon. Kon nakadesisyon ka na kon ano ang unahon mo nga bag-uhon, mag-research dayon sa aton mga publikasyon. Puede mo gamiton sa pag-research ang Watchtower Online Library ukon ang Giya sa Pagtuon Para sa mga Saksi ni Jehova. Mangamuyo kay Jehova kag pangabaya sia nga hatagan ka “sang handum kag kusog nga himuon kon ano ang iya nahamut-an.” (Fil. 2:13) Dayon panikasugi nga iaplikar ang imo natun-an. Kon nasarangan mo nga bag-uhon ang ginpili mo nga unahon, mapalig-on ka sini nga panikasugan man nga bag-uhon ang iban pa nga ara sa imo listahan. Kay man, kon nakahimo ka sang pagbag-o ukon napauswag mo ang isa ka maayo nga kinaiya, mangin mahapos na lang para sa imo nga bag-uhon ang iban pa nga dapat mo bag-uhon.

TUGUTI ANG PULONG SANG DIOS NGA ‘MAGPANGHIKOT SA INYO’

15. Ano ang kinalain sang katawhan ni Jehova sa madamo nga tawo nga nagabasa man sang Biblia? (1 Tesalonica 2:13)

¹⁵ May pila ka tawo nga nagasiling nga madamo nga beses na nila nga nabasa ang Biblia. Pero nagapati gid bala sila sa ginatudlo sang Biblia? Gin-aplikar bala nila ang ila natun-an ukon ginpanikasugan bala nila nga bag-uhon ang ila kabuhi? Wala ginaaplikar sang kalabanan nga tawo ang mga laygay sang Biblia. Pero, lain gid ang katawhan ni Jehova. Pareho sa mga Cristiano sang unang siglo, ginbaton naton ang Biblia “kon ano gid ini, subong pulong sang Dios.” Kag ginapanikasugan man naton nga iaplikar ang mga laygay sang Biblia.​—Basaha ang 1 Tesalonica 2:13.

16. Ano ang makabulig sa aton para mangin mga manugtuman kita sang Pulong?

¹⁶ Kon kaisa, nabudlayan kita nga makakita sang tion para basahon ang Pulong sang Dios. May mga tion man nga nabudlayan kita nga iaplikar ang aton natun-an. Posible nagadali kita pirme sa aton pagbasa, gani indi na kita makapamalandong. Ukon basi nagaluya ang aton buot bangod narealisar naton nga madamo kita sang dapat bag-uhon sa aton kaugalingon. Pero sa bulig ni Jehova, masarangan naton ini nga mga kabudlayan. Kabay pa nga batunon naton ang iya bulig para mangin manugtuman kita sang iya Pulong, kag indi kita mangin malipaton nga manugpamati. Makasigurado kita nga kon pirme naton ginabasa ang Pulong sang Dios kag ginaaplikar naton ang aton natun-an, mangin mas malipayon kita.​—Sant. 1:25.