Bangod wala ang 70 ka disipulo ni Jesus sang ginsugdan niya ang Panihapon sang Ginuo, indi buot silingon sini nga wala nalipay si Jesus sa ila ukon ginbiyaan nila sia. Gusto lang ni Jesus nga makaupod niya ang iya mga apostoles sa sini nga okasyon.

Pareho niya nga mga disipulo ang 12 kag ang 70. Halin sa madamo niya nga disipulo, nagpili si Jesus sang 12 ka lalaki nga gintawag niya nga mga apostoles. (Luc. 6:​12-16) Ara sia sa Galilea sang “gintawag niya ang 12 ka apostoles,” kag “ginpadala niya sila sa pagbantala sing Ginharian sang Dios kag sa pagpang-ayo.” (Luc. 9:​1-6) Sang ulihi, sang ara si Jesus sa Judea, “nagpili [sia] sang 70 pa gid kag ginpadala sila sing tagduhaduha.” (Luc. 9:51; 10:1) Gani, may mga disipulo si Jesus sa lainlain nga mga lugar nga nagabantala parte sa iya.

Ginasaulog sang mga Judiyo nga nangin disipulo ni Jesus ang Paskua kada tuig, kag posible kaupod nila ang ila pamilya sa sini nga okasyon. (Ex. 12:​6-11, 17-20) Sang lapit na lang mapatay si Jesus, nagkadto sia sa Jerusalem kaupod ang iya mga apostoles. Pero wala niya ginhambalan ang tanan niya nga mga disipulo halin sa Judea, Galilea, kag Perea nga dapat sila magtipon para saulugon ang Paskua kaupod niya. Gani, gusto ni Jesus nga ang iya lang mga apostoles ang iya makaupod sa sini nga okasyon. Nagsiling sia sa ila: “Ginahandum ko gid ang pagkaon sini nga panihapon sa Paskua upod sa inyo sa wala pa ako mag-antos.”​—Luc. 22:15.

May maayo nga rason si Jesus sa iya desisyon. Malapit na lang sia sadto patyon bilang “ang Kordero sang Dios nga nagakuha sang sala sang kalibutan.” (Juan 1:29) Kag patyon sia sa Jerusalem, nga amo ang lugar diin madugay na nga ginahimo ang mga paghalad sa Dios. Sa bahin sang mga Israelinhon, ang kordero sa Paskua nagapahanumdom sa ila nga ginhilway sila ni Jehova halin sa Egipto. Pero mas labaw ang benepisyo sang sakripisyo nga himuon ni Jesus. Kay man, hilwayon sini ang tanan nga tawo sa sala kag kamatayon. (1 Cor. 5:​7, 8) Bangod man sa himuon ni Jesus nga sakripisyo, mangin bahin sang sadsaran sang Cristianong kongregasyon ang 12 ka apostoles. (Efe. 2:​20-22) Talalupangdon gid ini kay ang balaan nga siudad sang Jerusalem may ‘12 ka sadsaran nga bato’ nga may nakasulat nga “12 ka ngalan sang 12 ka apostoles sang Kordero.” (Bug. 21:​10-14) Gani, may importante nga bahin ang matutom nga mga apostoles sa katumanan sang katuyuan sang Dios. Base sa sini, maintiendihan naton kon ngaa gusto ni Jesus nga makaupod ang iya mga apostoles sa pagsaulog sang iya katapusan nga Paskua, kag kon ngaa gusto niya sila makaupod sa okasyon pagkatapos sini. Ini nga okasyon amo ang Panihapon sang Ginuo.

Wala sa sini nga panihapon ang 70 ka disipulo kag ang iban pa nga mga disipulo. Pero makabenepisyo ang tanan nga matutom nga disipulo sa Panihapon sang Ginuo. Sang ulihi, nangin hinaplas ining matutom nga mga disipulo kag nangin bahin sila sang katipan para sa ginharian. Ginsambit ni Jesus ini nga katipan sa iya mga apostoles sadto nga gab-i.​—Luc. 22:​29, 30.