Kada tuig, binilyon ka kahoy ang ginakaingin sang mga tawo. Halin sang mga 1940, naguba ang katunga sang kagulangan sa kalibutan.

Kon maguba ang kagulangan, mahalitan man ang tanan nga tanom kag sapat nga ari diri.

Makatilingala nga sa mga lugar nga ginpang-utod ang mga kahoy sa kagulangan, may nagatubo naman nga mga kahoy. Indi makapati ang mga ecologist kon paano madasig nga nagtubo liwat ang mga kahoy kag nagbalik sa normal ang kagulangan. Binagbinaga ini nga mga halimbawa:

• Ginaobserbahan sang mga researcher ang nagakatabo sa mga kagulangan nga ginkaingin dayon ginpabay-an sang ulihi. Ginapakita sang pagtuon sa 2,200 ka kadutaan sang America kag West Africa makabalik sa normal ang ginpabay-an nga mga kagulangan sa sulod sang napulo ka tuig.

• Suno sa Science nga magasin, ginabulubanta sang mga researcher nga sa sulod sang mga 100 ka tuig, makabalik sa normal nga kahimtangan ini nga mga kagulangan.

• Sining karon lang, gintun-an sang mga scientist sa Brazil kon diin mas madasig ang pagtubo liwat sang mga kahoy—sa mga kagulangan nga gintamnan liwat sang mga tawo ukon sa mga kagulangan nga natural lang nga nagtubo ini liwat.

• Parte sa pagtuon sini nga mga scientist, ang National Geographic nagsiling: “Nadiskobrehan nila nga indi gid man kinahanglan nga magtanom liwat sang kahoy.” Sa sulod lang sang lima ka tuig, “nagdamo na ang mga kahoy” bisan pa wala ini gintanom sang mga tawo.

Sa bilog nga kalibutan, may ginahimo nga mga paagi para proteksionan kag tamnan liwat ang mga kagulangan. Bilang resulta, suno sa United Nations, sang nagligad nga 25 ka tuig, “sobra 50 porsiento ang pagnubo sang kadamuon sang mga kahoy nga ginapang-utod sa bilog nga kalibutan.”

Pero may dapat pa himuon para maproteksionan ang aton kagulangan. Siling sang isa ka report nga ginbalhag sang organisasyon nga Global Forest Watch: “Sang nagligad nga mga tinuig, madamo gihapon nga kahoy ang ginapang-utod sa kagulangan sa tropikal nga mga lugar.”

Ang ilegal nga pagpang-utod sang mga kahoy daku gid nga negosyo kag amo ini ang panguna nga rason kon ngaa nagakaguba ang mga kagulangan.

“Ginpatubo ni Jehova a nga Dios sa duta ang tagsa ka kahoy nga makagalanyat tulukon kag maayo nga kalan-on.”​—Genesis 2:9.

Ang Manunuga sang tanan nga kagulangan nagdesinyo sini nga may ikasarang nga makarekober para mahatag gihapon ang kinahanglanon sang mga tawo. Indi Niya gusto nga maguba ang aton mga kagulangan kag maapektuhan ang ila ecosystem.

Ginapakita sang Biblia nga dulaon sang Dios ang halit nga ginhimo sa duta para indi ini maguba kag padayon nga masuportahan ang tanan nga kabuhi sa duta. Tan-awa ang artikulo nga “Ang Dios Nagpromisa nga Indi Maguba ang Aton Planeta,” sa pahina 15.