Ngaa Nagakadula Na ang Respeto sa Iban?

I-PLAY

KON NGAA IMPORTANTE ANG PAGRESPETO SA IBAN

Kon ginarespeto naton ang iban, malikawan naton nga maglala ang malain na nga daan nga sitwasyon.

Ang isa ka hulubaton sa Biblia nagasiling: “Ang malulo nga sabat nagapatahaw sang kaakig, apang ang matigdas nga pulong nagapaibwal sang kaakig.” (Hulubaton 15:1) Ang paghambal kag paggawi nga wala nagapakita sang respeto makapalala lang sa sitwasyon, kag sa masami malain gid ang resulta sini.
Si Jesus nagsiling: “Sa kabuganaan sang tagipusuon nagahambal ang baba.” (Mateo 12:34) Kon wala kita nagapakita sang respeto paagi sa aton paghambal, posible ginapakita sini kon ano gid ang aton nabatyagan sa mga tawo nga lain ang rasa, tribo, nasyonalidad, ukon ginhalinan sangsa aton.

Sining karon lang, may ginhimo nga survey sa sobra 32,000 ka tawo sa 28 ka pungsod kag sobra sa tunga ang nagsiling nga subong pa lang nila naeksperiensiahan ang amo sini kadamo nga tawo nga wala nagapakita sang respeto.

KON PAANO MO RESPETUHON ANG IBAN

Respetuha ang tanan nga tawo sa imo eskwelahan ukon sa imo ulubrahan, bisan pa indi kamo pareho sang opinyon. Hibalua ang mga butang nga puede ninyo maugyunan. Makabulig ini nga indi mo sia pagpakalainon ukon paghukman dayon.

“Untati ninyo ang paghukom agod indi kamo paghukman sang Dios.”—Mateo 7:1.

Tratara ang iban sa paagi nga gusto mo man trataron. Kon maayo kag may konsiderasyon ka sa iban, labanlaban nga amo man sini ang mangin pagtratar nila sa imo.

“Himua ninyo sa inyo isigkatawo ang luyag ninyo nga himuon nila sa inyo.”—Lucas 6:31.

Magpatawad pirme. Pensara nga basi may rason kon ngaa nakahambal ukon nakahimo sang malain ang iban sa imo.

“Ang paghangop sang tawo nagapahaganhagan sang iya kaakig, kag katahom sa iya bahin nga palampason ang sala.”—Hulubaton 19:11.

KON ANO ANG GINAHIMO SANG MGA SAKSI NI JEHOVA

Sa mga lugar diin nagaistar kag nagaobra ang mga Saksi ni Jehova, nagapakita gid sila sang respeto sa iban.

Ginasugid namon sing libre ang mga impormasyon halin sa Biblia sa tanan nga tawo, pero wala namon ginapilit ang amon ginapatihan ukon opinyon sa iban. Kundi, ginatinguhaan namon nga sundon ang laygay sang Biblia paagi sa pagsugid sang amon mensahe nga “may kalulo kag tudok nga pagtahod.”—1 Pedro 3:15; 2 Timoteo 2:24.

Wala kami sing pinilian kag gina-welcome gid namon sa amon miting sa kongregasyon ang tanan nga tawo nga gusto magtuon parte sa Biblia, bisan ano man ang ila ginhalinan. Ginatinguhaan gid namon nga pakitaan sang kaayo kag ‘pagtahod ang tanan nga tawo.’—1 Pedro 2:17, Ang Pulong sang Dios, APD.

Ginarespeto namon ang awtoridad sang gobierno sa lugar nga ginaistaran namon. (Roma 13:1) Nagatuman kami sa kasuguan kag nagabayad sang buhis. Kag bisan pa neutral kami sa pulitika, ginatahod namon ang kinamatarong sang iban para maghimo sang ila kaugalingon nga desisyon parte sa pulitika.

MAGMATA!