Ngaa Nagakadula Na ang Respeto sa Kabuhi?
KON NGAA IMPORTANTE ANG PAGRESPETO SA KABUHI
Kon maghimo ka sang mga butang nga malain para sa imo panglawas ukon ginabutang mo ang iban sa katalagman, ginapakita sini nga indi importante para sa imo ang imo kabuhi ukon ang kabuhi sang iban.
-
Ang pagpanigarilyo makapakanser, kag bangod sini mabudlayan ang lawas nga mabatuan ang kanser. Sa kabilugan, mga 90 porsiento sang mga napatay bangod sa kanser sa baga ang nagapanigarilyo ukon pirme makahaklo sang aso sang sigarilyo sang mga tawo sa palibot nila.
-
Kada tuig, madamo ang nagaka-trauma bangod sang mga pagpaniro. Ang isa ka report sa Stanford University nagsiling: “Base sa mga research, bisan pa nakapalagyo kag wala mahalitan [sa pagpaniro sa eskwelahan] ang isa ka tawo, mahimo gihapon maapektuhan ang iya emosyon kag pamensaron. Kag posible maeksperiensiahan niya ini sa malawig nga tion.”
-
Ang mga tawo nga nagadrayb bisan pa nakainom sang alkohol ukon naka-drugs posible makahalit sa iban nga drayber kag bisan sa mga tawo nga ara lang sa sidewalk. Kon ginabalewala sang mga tawo ang balor sang kabuhi, mahalitan gid ang inosente nga mga tawo.
KON PAANO MO RESPETUHON ANG KABUHI
Halungi ang imo panglawas. Indi pa ulihi ang tanan para untatan mo ang malain nga bisyo pareho sang pagpanigarilyo, pag-vape, pagpahubog, ukon pag-drugs. Ini nga mga bisyo makahalit sa imo kag wala ini nagapakita sang respeto sa kabuhi sang iban sa palibot mo, lakip sa mga miembro sang imo pamilya.
Pamensara ang imo safety kag ang safety sang iban. Para malikawan ang aksidente, siguraduha nga namentinar ang imo balay. Maghalong sa pagdrayb kag siguraduha nga maayo ang kondisyon sang imo salakyan. Indi magpasugot nga piliton ka sang iban nga maghimo sang mga butang nga makahalit ukon puede magresulta sa kamatayon.
Magpakita sing kaayo sa iban. Ang pagrespeto sa kabuhi nagalakip kon ano ang pagtan-aw naton sa mga tawo nga lain ang rasa, nasyonalidad, manggaranon man sila ukon pigado, may ineskwelahan man ukon wala. Kay man, ang diskriminasyon kag dumot amo ang rason sang pagpamintas kag inaway sa kalibutan.
KON ANO ANG GINAHIMO SANG MGA SAKSI NI JEHOVA
Ginatudlo sang mga Saksi ni Jehova ang balanse kag healthy nga pagkabuhi. Nakabulig ang amon base sa Biblia nga programa para mauntatan sang mga tawo ang adiksion kag malain nga mga bisyo.
Ginasunod namon ang estrikto nga mga safety standard sa amon mga proyekto sa konstruksion. Para malikawan ang mga aksidente, ginahanas ang mga boluntaryo nga nagabulig sa pagtukod sang amon mga tilipunan kag iban pa nga pasilidad nga ginagamit para suportahan ang amon hilikuton nga pagpanudlo sang Biblia. Ang amon mga bilding pirme gina-inspect para masigurado nga masunod ang mga kasuguan sa safety sa sina nga lugar.
Ginabuligan namon ang mga tawo nga naagyan sang mga kalamidad. Sa sulod sang isa ka tuig, nakabulig kami sa nabiktima sang mga 200 ka makahalalit nga kalamidad sa bilog nga kalibutan kag nakagasto sing halos 12 ka milyon ka dolyar halin sa gin-donate nga pondo para buligan ang mga biktima.
Sang nagsugod sa paghalit ang Ebola sa mga nagaistar sa West Africa (2014) kag sa Democratic Republic of Congo (2018), gintudluan namon ang mga tawo kon paano malikawan ang paglapta sining makamamatay nga balatian. Nagpadala kami sang mga representante para mag-istorya sa mga grupo parte sa tema nga “Obedience Saves Lives.” Nagbutang kami sang mga hilinawan sang kamot sa entrance sang lugar nga ginasimbahan namon kag gintudlo gid nga importante ang pagpanghinaw kag iban pa nga puede nila mahimo para malikawan ang paglapta sang balatian.
Sa Sierra Leone, ginpahibalo sa radyo ang pagpasalamat sa mga Saksi ni Jehova kay ginbuligan nila ang mga Saksi kag ang indi mga Saksi sa ila lugar para malikawan ang Ebola nga virus.
Isa ka hilinawan sang kamot sa Kingdom Hall sa Liberia sang natabo ang Ebola outbreak sang 2014
a Sa Middle East sadto, ining maalamon nga sugo nagapakita nga importante gid ang safety sang mga miembro sang pamilya kag sang iban nga tawo.
