ANG REALIDAD

Bangod sa kabalaka makulbaan ka, matublag, ukon indi mapahamtang. Nagakabuhi kita sa isa ka kalibutan nga wala sing kasiguruhan, gani mahimo kita madaug sang kabalaka.

ANG GINASILING SANG BIBLIA

Si Hari David nagsulat: “Tubtob san-o nga magakabalaka ako, kag magapangasubo ang akon tagipusuon sa kada adlaw?” (Salmo 13:2) Ano ang nakabulig kay David? Ginsugid niya sa Dios ang tanan niya nga ginabatyag sa pangamuyo, nga nagasalig sing bug-os sa mainunungon nga gugma sang Dios. (Salmo 13:5; 62:8) Ang matuod, ginaagda kita sang Dios nga magsalig sa iya. ‘Itugyan ninyo sa Dios ang tanan ninyo nga kabalaka, kay nagaulikid sia sa inyo,’ suno sa 1 Pedro 5:7.

Pero sa masami, may mahimo kita agod maghaganhagan ang aton mga kabalaka. Halimbawa, sang ang manunulat sang Biblia nga si Pablo “nagakabalaka sa tanan nga kongregasyon,” gintinguhaan gid niya nga lugpayan kag palig-unon ang mga tawo nga iya ginaulikdan. (2 Corinto 11:28) Gani ang iya kabalaka mapuslanon gid kay nagpahulag ini sa iya nga buligan sila. Mahimo man ini naton. Sa kabaliskaran, ang panimuot nga wala sing interes sa iban nagapakita sang kakulang sa mahigugmaon nga pag-ulikid.—Hulubaton 17:17.

‘Pangitaa ninyo indi lamang ang inyo personal nga kaayuhan, kundi ang iya man sang iban.’—Filipos 2:4.

ANG REALIDAD

Ang mga tawo mahimo mabalaka sa mga sala nila sang una, sa ila palaabuton, ukon sa kuarta. *

ANG GINASILING SANG BIBLIA

Kabalaka sa mga sala sang una: Antes mangin mga Cristiano, ang pila sang unang siglo mga palahubog, manugkilkil, nagahimo sang seksuwal nga imoralidad, kag kawatan. (1 Corinto 6:9-11) Sa baylo nga pensaron pirme ang ila nagligad, ginbag-o nila ang ila paggawi kag nagsalig sa daku nga kaluoy sang Dios, nga kinabubut-on niya nga ginatanyag. “Sa [Dios] yara ang matuod nga kapatawaran, agod tahuron ka sang mga tawo,” siling sang Salmo 130:4.

Wala sing kasiguruhan nga palaabuton: “Indi gid ninyo pagkabalak-i ang buas,” siling ni Jesucristo, “kay ang buas may kaugalingon nga mga kabalaka.” (Mateo 6:25, 34) Ano ang iya punto? Kabalak-i lang ang mga problema mo subong nga adlaw. Indi pagkabalak-i ang buas kay mahimo ini magpaburon sang imo panghunahuna kag magaresulta sa padasudaso nga mga desisyon. Hunahunaa man nga madamo sang aton ginakabalak-an ang mahimo indi man matabo.

Kabalaka sa kuarta: Ang maalam nga tawo nangamuyo: “Indi ako pagpaimula ukon pagpamanggara.” (Hulubaton 30:8) Luyag niya nga mangin kontento—isa ka kinaiya nga nahamut-an sang Dios. Sa Hebreo 13:5, mabasa naton: “Dapat nga ang inyo pagkabuhi hilway sa gugma sa kuarta, kag mangin kontento kamo sa mga butang nga yara sa inyo. Kay ang Dios nagsiling: ‘Indi ko gid kamo pagbayaan, kag indi ko gid kamo pagpabay-an.’” Indi kaangay sa kuarta nga nagakapaslawan, ang Dios wala gid nagapaslaw sa mga nagasalig sa iya kag nagapasimple sang ila kabuhi.

“Wala pa ako makakita sang matarong nga ginpabay-an, ukon sang iya mga anak nga nagapangayukayo sing tinapay.”—Salmo 37:25.

ANG GINASILING SANG MGA TAWO

“Yara na kita sa bag-o nga panahon sang kabalaka,” siling sang dyurnalista nga si Harriet Green sa isa ka artikulo sa The Guardian sang 2008. Sang 2014, si Patrick O’Connor nagsulat sa The Wall Street Journal nga “grabe na ang kabalaka sang mga Amerikano subong.”

ANG GINASILING SANG BIBLIA

“Ang kabalaka sa tagipusuon sang tawo nagapabug-at sini, apang ang maayo nga pulong nagapasadya sa iya.” (Hulubaton 12:25) Makita gid ining “maayo nga pulong” sa “maayong balita sang Ginharian” sang Dios. (Mateo 24:14) Ina nga Ginharian gobierno sang Dios, nga magahimo sang mga butang nga kon kita lang indi naton masarangan—ang pagtapos sang tanan nga kabalaka paagi sa pagdula sang mga kabangdanan sini, lakip na ang balatian kag kamatayon! “Pahiran [sang Dios] ang tagsa ka luha sa [aton] mga mata, kag wala na sing kamatayon, ukon paglalaw ukon paghibi ukon kasakit pa.”—Bugna 21:4.

“Kabay pa nga ang Dios nga nagahatag sing paglaum maghatag sa inyo sing kalipay kag paghidait bangod sang inyo pagtuo sa iya.”—Roma 15:13.