ANG Espanya isa ka pungsod nga may sarisari nga matahom nga talan-awon kag mga tawo. Madamo sa Espanya sing talamnan sing trigo, ubas, kag olibo. Sa bagatnan, makita ang 14 ka kilometro nga tubig, nga ginatawag Strait of Gibraltar, nga nagaseparar sang Espanya sa kontinente sang Aprika.

Madamo nga tawo—lakip na ang mga taga-Fenicia, mga Griego, kag mga taga-Carthage—ang nagsaylo sadto sa bagatnan-katundan nga bahin sang Europa. Sang nag-abot ang mga Romano sang ikatlo nga siglo B.C.E., gintawag nila ining bag-o lang nila nasakop nga teritoryo nga Hispania. Sang ulihi, ginsakop ini nga pungsod sang mga Visigoth kag mga Moor, nga may daku nga impluwensia sa ila kultura.

Sang 2015, sobra sa 68 ka milyon ka tawo ang nagbisita sa Espanya. Nagakadto ang kalabanan diri bangod  sa init sang adlaw, matahom nga mga baybayon, kag sa art, kasaysayan, kag arkitektura sang pungsod. Madamo man ang nanamitan sang mga pagkaon sang Espanya. Lakip sa sini amo ang mga pagkaon halin sa dagat, hamon, linaga, ensalada, kag mga utan nga ginluto sa olive oil ukon ginbutangan sini. Kilala gid sa bilog nga kalibutan ang omelet, paella, kag tapas sang Espanya.

Mainabyanon gid ang mga Espanyol. Kalabanan sa ila nagasiling nga Romano Katoliko sila, pero diutay lang ang nagatambong sa Misa. Sining karon lang nga mga tinuig, ang mga tawo halin sa Aprika, Asia, kag Latin Amerika nagsaylo sa Espanya. Madamo sa ila ang nalipay sa pagsugid parte sa ila ginapatihan sa ila relihion kag mga kustombre. Maayo gid ang resulta sang pagpakig-istorya sa ila sang mga Saksi ni Jehova kag nabuligan sila nga mahibaluan ang ginatudlo sang Biblia sa madamo nga topiko.

Sang 2015, sobra 10,500 ka Saksi ang nagboluntaryo sa pagpatindog ukon pagkay-o sang ila 70 ka tilipunan nga ginatawag Kingdom Hall. Ang mga munisipyo naghatag sing duta para sa pila sini nga proyekto. Para buligan ang mga nagsaylo, ang mga Saksi ni Jehova nagahiwat sang mga miting sa sobra 30 pa ka lenguahe magluwas sa Espanyol. Sang 2016, sobra 186,000 ka tawo ang nagtambong sa espesyal nga pagtilipon sang mga Saksi ni Jehova sa pagdumdom sang kamatayon ni Jesucristo.