Para sa aton, indi husto nga mag-antos ang maayo nga mga tawo. Isa pa, wala sing pulos ang paghimo sing maayo kon magaantos man lang kita gihapon.

Ang iban nagapati nga ang tawo sulitsulit nga makaeksperiensia sang kamatayon kag pagkabun-ag liwat. Siling nila ang mga nagahimo sing maayo mabun-ag liwat sa maayo nga kahimtangan pero ang nagahimo sing malain mabun-ag liwat para mag-antos. Suno sa sina nga pagpati, bisan ang maayo nga tawo magaantos kon may ginhimo sia nga malain sa iya “nagligad nga kabuhi.” Pero . . .

• Ano ang pulos sini nga pag-antos kay indi man madumduman sang tawo nga nabun-ag kuno liwat ang iya nagligad nga kabuhi?

• Ngaa ginatinguhaan gid naton nga mangin maayo ang aton panglawas kag makalikaw sa mga aksidente kon ang matabo sa aton subong nagadepende gali sa aton ginhimo sa aton nagligad nga kabuhi?

  DUGANGI ANG IMO NAHIBALUAN

  Tan-awa ang video nga Ngaa Ginapasugtan sang Dios ang Pag-antos? sa jw.org/hil.

Ang pag-antos indi silot halin sa Dios.

Sa masami, ang kalabanan sini natabuan lang. Halimbawa, nataymingan nga ara ka sa lugar nga may malain nga natabo.

“Indi pirme ang madasig ang nagadaug sa palumba, ukon ang makusog ang nagadaug sa inaway, kag indi ang maalamon ang pirme may pagkaon ukon ang maalam ang pirme may manggad, ukon ang may ihibalo ang pirme nagamadinalag-on, bangod ang tion kag ang wala ginapaabot nga hitabo nagakatabo sa ila tanan.”—MANUGWALI 9:11.

Nagaantos man kita bangod makasasala kita.

Masami nga ginagamit sang mga tawo ang tinaga nga “sala” para patuhuyan ang malain nga butang nga ginahimo sang isa. Pero sa Biblia, ginagamit man ini nga tinaga para ilaragway ang kahimtangan nga napanubli sang tanan nga tawo—maayo man ukon malain.

“Natawo ako nga may kasaypanan, kag makasasala sang ginpanamkon ako sang akon iloy.”—SALMO 51:5, Footnote.

Malain gid ang epekto sang sala sa mga tawo.

Ginguba sini ang aton relasyon sa aton Manunuga kag ang aton relasyon sa tanan nga tinuga sang Dios. Nagresulta ini sa grabe nga pag-antos sang tanan nga tawo.

“Kon luyag ko himuon ang husto, ang malain yari sa akon.”—ROMA 7:21.

“Ang tanan nga tinuga padayon nga nagaugayong sing tingob kag ginasakitan.”—ROMA 8:22.