Pero may mga tawo naman nga amo na lang ini pirme ang paagi nila sa pagpakig-istorya sa ila mga abyan. Galing natalupangdan nga ini nga mga tawo . . .

• nabudlayan na mag-intiende sa ginabatyag sang ila mga abyan.

• pirme gina-depress kag nagabatyag nga wala sila sing pulos.

• kaugalingon lang nila ang ila ginapensar.

PAG-INTIENDE SA IBAN

Para mainteindihan naton ang ginabatyag sang iban, dapat naton pamensaron sing maayo ang ila ginabatyag. Nagakinahanglan man ini sing tion. Mabudlay ini himuon kon masako kita sa pagbasa kag pag-reply sa mga text kag paggamit sang social media.

Kon sobra na kadamo nga message ang imo mabaton, mahimo nga matak-an ka na mag-reply. Kag posible nga indi mo na matalupangdan ang message sang imo abyan nga nagakinahanglan sing bulig.

PAMENSARA INI: Kon naga-message ka sa imo mga abyan, paano mo mapakita ang “simpatiya” ukon pag-ulikid sa ila?—1 PEDRO 3:8.

PAGBATYAG NGA WALA SING PULOS

Suno sa mga researcher, madamo nga tawo ang nasubuan pagkatapos nila tan-aw sang mga piktyur kag sang nagakatabo sa kabuhi sang iban sa social media. Narealisar nila nga gin-usikan lang nila ang ila oras.

Dugang pa, kon makita nila ang masadya nga mga piktyur nga gina-post sang iban, mahimo sila magbatyag nga boring ang ila kabuhi ukon wala ini sing pulos.

PAMENSARA INI: Kon nagagamit sing social media, ano ang himuon mo para indi mo pag-ikumparar ang imo kaugalingon sa iban?—GALACIA 6:4.

KAUGALINGON LANG ANG GINAPENSAR

Ang isa ka manunudlo nagsulat nga ang pila niya ka estudyante kaugalingon lang ang ginapensar. * Nagapakig-abyan lang sila sa iban kon may makuha sila. Para sa ila, ang ila mga abyan daw cellphone lang nga puede nila gamiton kon kinahanglan nila kag pabay-an lang kon matak-an na sila.

PAMENSARA INI: Ang imo bala mga gina-post nagapakita nga indi mo gusto malabawan sang iban ukon kaugalingon mo lang ang imo ginapensar? —GALACIA 5:26.

USISAA KON PAANO MO GINAGAMIT ANG IMO MGA GADYET

Kon kabalo ka magkontrol sa paggamit sang imo mga gadyet, makabulig ini para maistorya mo pirme ang imo mga abyan kag mangin mas malapit sa ila.

Binagbinaga kon diin sa masunod nga mga panugda ang gusto mo himuon, ukon isulat ang imo mismo mga ideya.

• Istoryaha ang imo mga abyan (imbes nga mag-text lang ukon mag-email pirme)

• Indi maggamit sing cellphone (ukon i-silent ini) kon nagaistorya sa iban

• Buhinan ang oras nga ginagamit sa social media

• Magpamati sing maayo kon nagahambal ang kaistorya

• Maghatag sing oras sa isa ka abyan nga may problema