Ano ang Epekto sang mga Gadyet sa Imo Ikasarang sa Pagpamensar?
Ang mga tawo kinahanglan magtuon para sa ila eskwelahan, sa ila obra, ukon sa iban pa nga rason. Daku gid ang mabulig sang mga gadyet. Kay subong, paagi sa mga gadyet puede mo na matun-an ang madamo nga impormasyon bisan ara ka lang sa imo balay.
Pero, ang kalabanan sa mga tawo nga sobrasobra ang paggamit sang ila gadyet . . .
-
nabudlayan magkonsentrar samtang nagabasa.
-
indi makapokus sa ila ginaobra.
-
madasig maboringan kon nagaisahanon sila.
ANO ANG DAPAT MO MAHIBALUAN?
PAGBASA
Ang mga tawo nga pirme nagagamit sang mga gadyet natak-an kon kaisa magbasa sang bilog nga artikulo. Gani, ginapadalian lang nila ang pagbasa.
Indi man malain ina nga paagi sang pagbasa kon kinahanglan mo lang makita ang sabat sa isa ka pamangkot. Pero indi gid ini makabulig kon gusto mo gid maintiendihan sing maayo ang isa ka topiko.
PAMENSARA INI: Anad ka bala magbasa sing malawig? Ngaa makabulig ini sa imo nga makatuon?—HULUBATON 18:15.
PAGPOKUS
Abi sang iban nga tawo, makabulig sa ila ang mga gadyet para madungan nila ang ila mga ginahimo. Halimbawa, naga-text sila samtang nagatuon. Pero indi gid nila mahimo ang ila pinakamaayo kon ginadungan nila ang duha ka ulubrahon, ilabi na kon ini nga mga ulubrahon dapat pokusan gid sing maayo.
Para makapokus ka, kinahanglan mo disiplinahon ang imo kaugalingon, kag may maayo gid ini nga resulta. “Malikawan mo nga magsala kag ma-stress,” siling sang tin-edyer nga si Grace. “Natun-an ko nga mas maayo gid kon magpokus anay sa isa ka ulubrahon, sangsa dunganon ini.”
PAMENSARA INI: Indi mo bala maintiendihan kag madumduman ang imo ginatun-an bangod kay samtang nagatuon ka may iban ka nga ginahimo sa imo gadyet?—HULUBATON 17:24.
PAG-ISAHANON
Ang iban nga tawo nagalalain gid kon nagaisahanon sila, gani nagagamit sila sing gadyet para malingaw sila. “Indi gid ako mahim-os bisan 15 minutos lang nga indi ko matan-aw ang akon cellphone ukon ang akon tablet ukon makatan-aw sing TV,” siling sang isa ka babayi nga si Olivia.
Pero, para makatuon kinahanglan gid sang mga tawo nga mag-isahanon para makapamensar sing maayo. Dapat ini himuon indi lang sang mga pamatan-on, kundi bisan sang mga adulto.
PAMENSARA INI: Ginagamit mo bala sing maayo ang tion nga nagaisahanon ka para makapamensar ka sing maayo?—1 TIMOTEO 4:15.
ANO ANG MAHIMO MO?
USISAA KON PAANO MO GINAGAMIT ANG IMO MGA GADYET
Paano mo magamit ang imo mga gadyet para mapauswag ang imo ikasarang nga makatuon? Indi ka bala makapokus sing maayo kag makatuon bangod sa imo mga gadyet? Ano ang mahimo mo para malikawan ini?
PRINSIPIO SA BIBLIA: “Tipigi ang praktikal nga kaalam kag ang ikasarang sa paghunahuna sing maayo.”—HULUBATON 3:21.
Basi Manamian Ka Man
PAMANGKOT SANG MGA PAMATAN-ON
Paano Ako Makatuon nga Magpokus?
Binagbinaga ang tatlo ka sitwasyon nga matublag ka sang teknolohiya kag kon ano ang mahimo mo para makapokus ka sing maayo.
MAGMATA!
Tama Ka Na Gid Bala Kasako?
Madamo ang nagsiling nga nabudlayan sila sa pagbalanse sang ila mga obligasyon sa trabaho kag sa ila pamilya. Ano ang rason sa sini? Paano mabuhinan ang imo kasakuon?
PAMANGKOT SANG MGA PAMATAN-ON
Ano ang Dapat Mo Mahibaluan Parte sa Multitasking?
Posible bala nga dunganon ang mga ulubrahon kag indi maapektuhan ang imo pokus?
