Sa pila ka pamilya, ang mga bata ginapaabot nga magbulig sa sulod sang balay, kag ginahimo nila ini nga wala nagareklamo. Sa iban naman nga pamilya, nalipay ang mga bata kay wala sila ginaobligar sang ila mga ginikanan, gani halos wala sila nagabulig sa mga ulubrahon sa balay.

Natalupangdan sang mga nagatuon parte sa sini nga amo ini ang nagakatabo sa madamo nga pungsod, nga ang mga bata nagapasagod na lang imbes nga magbulig. “Sa karon, ang mga bata ginapabay-an na lang nga maghampang sang mga video game, mag-Internet, kag magtan-aw sang TV,” siling sang tatay nga si Steven. “Wala na sila ginapaabot nga magbulig.”

Ano sa banta mo? Importante bala ang mga ulubrahon sa sulod sang balay—indi lang para mahimos ang balay kundi sa pagdaku man sang bata?

Ang pila ka ginikanan nagapangalag-ag nga magpaobra sa ila mga bata sa balay ilabi na kon madamo sila sing asaynment kag mga ulubrahon sa eskwelahan. Pero binagbinaga ang mga benepisyo kon tudluan ang mga bata sang mga ulubrahon sa balay.

Nagabulig ini sa ila nga mangin responsable. Mas daku ang posibilidad nga magmadinalag-on sa eskwelahan ang mga bata nga nagabulig sa balay. Indi ini katingalahan kay ang pagbulig sa mga ulubrahon sa balay nagabulig sa bata nga makatigayon sang kompiansa, disiplina sa kaugalingon, kag determinasyon nga importante gid sa pagtuon.

Nagatudlo ini sa ila nga mangin mabinuligon. Natalupangdan sang iban nga kon ang mga bata ginapaabot nga magbulig sa balay, daku ang posibilidad nga mangin mabinuligon sila pagdaku nila. Indi ini katingalahan kay ginatudluan sila sang mga ulubrahon sa balay nga unahon ang iban sangsa ila kaugalingon. Sa pihak nga bahin, si Steven nga ginsambit kaina nagsiling: “Kon wala sila ginapaabot nga magbulig, magapensar ang mga bata nga sila ang dapat serbisyuhan, kag magadaku sila nga sala ang panghunahuna parte sa responsibilidad kag pagtrabaho.”

Nagasuod ang pamilya. Kon nagabulig ang mga bata sa balay, mahibaluan nila nga indi lang sila importante sa pamilya kundi may responsibilidad man sila. Indi ini matun-an sang mga bata kon ginapauna sang mga ginikanan ang mga ulubrahon para sa eskwelahan sangsa mga ulubrahon sa balay. Gani pamangkuta ang imo kaugalingon, ‘Ano ang pulos kon  suod ang amon bata sa iya mga kaupod sa basketbol kon indi man sia suod sa amon pamilya?’

Sugdi ini samtang bata pa sila. Ang pila ka ginikanan nagasiling nga tudluan sang mga ulubrahon ang mga bata sa edad nga tres anyos. Ang iban naman nagasiling nga puede ini himuon bisan duha ka tuig pa lang ang bata ukon mas bata pa. Ang matuod, nalipay ang mga bata nga mag-obra upod sa ila mga ginikanan kag gusto nila sila ilugon.—Prinsipio sa Biblia: Hulubaton 22:6.

Hatagi sila sing obra nga masarangan nila. Halimbawa, ang tres anyos nga bata puede pahimuson sang mga hampanganan, patrapuhon sang mga naula, ukon papainon sang mga lalabhan. Ang mas magulang naman puede makapanilhig, makapaninlo sang salakyan, ukon makadigamo pa gani. Paobraha sia sang masarangan lang niya. Mahimo makibot ka nga nanamian gali sia sa pagbulig sa mga ulubrahon sa balay.

Tudlui sila kon ano ang unahon. Mahimo mabudlay ini himuon kon madamo pirme sang asaynment ang imo bata. Pero kon wala mo sia ginapabulig sa balay para magtaas ang iya grado, “patimaan ini nga indi husto ang imo ginauna,” siling sang libro nga The Price of Privilege. Sa nasambit kaina, ang pag-obra sa balay nagabulig sa mga bata nga mangin mas maayo nga mga estudyante. Kag ang mga natun-an nila magabulig sa ila kon may pamilya naman sila sa ulihi.—Prinsipio sa Biblia: Filipos 1:10.

Dumduma ang imo tulumuron. Mahimo mas madugay matapos sang imo bata ang obra sangsa ginapaabot mo. Mahimo makita mo man nga indi pulido ang iya obra. Kon amo sini, likawi nga ikaw ang matapos sang iya obra. Ang imo tulumuron indi nga mangin pulido ang iya obra, kundi mabuligan sia nga mangin responsable kag malipayon sa pag-obra.—Prinsipio sa Biblia: Manugwali 3:22.

Ihatag ang premyo sa husto nga tion. Ang pila nagasiling nga mangin responsable ang bata kon ginasuhulan mo sia sa pagbulig sa balay. Ang iban naman nagasiling nga kon amo sini, mas hunahunaon sang mga bata kon ano ang makuha nila sa pamilya sangsa kon ano ang mahatag nila. Nagsiling pa sila nga mahimo indi na magbulig ang bata sa ulubrahon kon madamo na sia sing kuarta—patimaan nga wala mo nalab-ot ang imo tulumuron. Ano ang matun-an naton? Mas maayo nga kon maghatag ka gid man sing kuarta, indi bilang suhol sa pagbulig sa mga ulubrahon sa balay.