SI Soo-jeong, guidance counselor sa hayskul sa South Korea, naggamit sing mga video halin sa jw.org nga website sa iya klase. Nagsiling sia: “Kanami gid sang reaksion sang mga estudyante sa Ano ang Matuod nga Abyan? nga video! Pagkatapos matan-aw ang video, nagsiling sila, ‘Wala ko gid nahunahuna nga amo gali sini dapat ang pag-abyanay. Bag-o gid ini nga paagi sang pagtudlo!’ Nagsiling ang pila nga kadtuan nila ini nga website kon kinahanglan nila ang laygay.” Nagsiling pa gid si Soo-jeong: “Ginrekomendar ko ini nga video sa iban pa nga manunudlo, kag nalipay gid sila sa paggamit sining epektibo nga galamiton sa ila mga klase.”

Ang isa pa ka video nga nakabulig sa madamo nga estudyante sa South Korea amo ang whiteboard animation nga Dauga ang Nagapangdaugdaug. Ginpatan-aw ini sang isa ka maestra nga nagaobra sa Juvenile Violence Prevention Foundation sa isa ka klase sang mga estudyante. “Nanamian gid ang madamo nga pamatan-on sa sini nga video bangod sang matahom nga artwork,” siling niya. “Isa pa, praktikal gid ang video kay ginapakita sini indi lang kon paano atubangon ang pagpangdaugdaug kundi kon paano man ini malikawan.” Nangayo sing permiso ang foundation nga gamiton ang video sa ila mga lektyur, nga ila ginpakita sa madamo nga eskwelahan sang elementarya kag hayskul. Ginpasugtan sila. Ginagamit man gani sang mga pulis ang mga video sa jw.org.

Kon wala mo pa nakadtuan ini nga website, kadtui ini. Mahapos lang ang pag-navigate diri, kag wala sing bayad ang pag-download sang tanan nga publikasyon pareho sang audio, video, Biblia, kag iban pa.