1, 2. (a) Ngaa pirme ginaistoryahan sang mga tawo sang panahon ni apostol Pablo ang parte sa pagkaulipon kag kahilwayan? (b) Sin-o ang ginsiling ni Pablo nga makahatag sang matuod nga kahilwayan?

ANG una nga mga Cristiano nagkabuhi sa tion sang Emperyo sang Roma, kag ginapabugal gid sang mga tawo sadto ang ila mga kasuguan, pagpabalor sa hustisya, kag kahilwayan. Pero, ining gamhanan nga Emperyo nagadepende sa mga ulipon sini. May tion nga mga 30 porsiento sang ila populasyon ang mga ulipon. Gani, pirme ginaistoryahan sang ordinaryo nga mga tawo, lakip ang mga Cristiano, ang parte sa pagkaulipon kag kahilwayan.

² Sa mga sulat ni apostol Pablo, madamo sia sing ginsiling parte sa kahilwayan. Pero, ang katuyuan sang iya ministeryo indi ang pagbag-o sang kahimtangan, nga amo ang gusto sang mga tawo sadto. Sa baylo nga magsalig sa gumalahom ukon sa gobierno para sa kahilwayan, si Pablo kag ang iya masigka-Cristiano nagpanikasog gid nga tudluan ang iban parte sa maayong balita sang Ginharian sang Dios kag parte sa indi matupungan nga balor sang halad-gawad ni Cristo Jesus. Ginsilingan ni Pablo ang iya mga masigkatumuluo kon sin-o ang makahatag sang matuod nga kahilwayan. Sa iya ikaduha nga sulat sa mga Cristiano sa Corinto,  nagsiling sia: “Si Jehova isa ka Espiritu, kag kon diin ang espiritu ni Jehova, may kahilwayan.”—2 Cor. 3:17.

3, 4. (a) Ngaa nasiling ni Pablo ang mabasa sa 2 Corinto 3:17? (b) Ano ang dapat naton himuon para matigayon ang kahilwayan halin kay Jehova?

³ Sa sulat ni Pablo sa mga taga-Corinto, ginsambit niya ang himaya ni Moises sang nagdulhog sia halin sa Bukid Sinai pagkatapos sia magpakighambal sa anghel ni Jehova. Pagkakita sang katawhan kay Moises, hinadlukan sila, gani gintabunan ni Moises ang iya nawong. (Ex. 34:29, 30, 33; 2 Cor. 3:7, 13) “Apang kon ang isa magbag-o sang iya dalanon agod simbahon si Jehova, ang tabon makuha,” paathag ni Pablo. (2 Cor. 3:16) Ano ang buot silingon ni Pablo?

⁴ Natun-an naton sa nagligad nga artikulo nga si Jehova, ang Manunuga sang tanan nga butang, amo lang ang may bug-os kag wala sing limitasyon nga kahilwayan. Gani makatarunganon isiling nga kon ara ang presensia ni Jehova kag “kon diin ang espiritu ni Jehova,” may kahilwayan. Pero, para matigayon ini nga kahilwayan, dapat naton ‘bag-uhon ang aton dalanon agod simbahon si Jehova,’ ukon dapat may ara kita kaangtanan sa iya. Sang ara sa kamingawan ang mga Israelinhon, indi husto ang pagtamod nila sa pagpakig-angot ni Jehova sa ila. Daw may tabon kag nagtig-a ang ila tagipusuon kag hunahuna, kay gusto nila gamiton ang ila kahilwayan sa Egipto para busgon ang ila handum.—Heb. 3:8-10.

5. (a) Ano nga kahilwayan ang ginahatag sang espiritu ni Jehova? (b) Ngaa masiling naton nga matigayon gihapon sang isa ka ulipon ukon priso ang kahilwayan nga ginahatag ni Jehova? (c) Ano nga mga pamangkot ang dapat naton sabton?

⁵ Ang kahilwayan nga ginahatag sang espiritu ni Jehova mas labaw sangsa kahilwayan nga ginahatag sa ulipon. Ini nga espiritu makahatag sang kahilwayan nga indi mahatag sang tawo. Makahilway ini sa aton sa pagkaulipon sa sala kag kamatayon, pati sa pagkaulipon sa butig nga pagsimba kag mga buhat sini. (Roma 6:23; 8:2) Dalayawon gid ini nga kahilwayan! Bisan ang mga ulipon ukon priso makatigayon sini nga kahilwayan. (Gen. 39:20-23) Matuod gid ini kanday Sister Nancy Yuen kag Brother Harold King, nga nagbatas sing madamo nga tuig nga pagkapriso bangod sang ila pagtuo. Matan-aw mo ang ila eksperiensia sa JW Broadcasting. (Buksi ang INTERVIEWS AND EXPERIENCES > ENDURING TRIALS.) Pero, paano naton mapakita nga ginapabaloran naton ang aton kahilwayan? Kag paano naton gamiton sing maalamon ini nga kahilwayan?

6. Paano ginpakita sang mga Israelinhon nga wala sila nagpasalamat sa kahilwayan nga ginhatag ni Jehova sa ila?

⁶ Kon makabaton kita sang malahalon nga regalo, indi bala nga pasalamatan gid naton ang naghatag? Pero, wala nagpasalamat ang mga Israelinhon sa kahilwayan nga ginhatag sa ila ni Jehova sang ginluwas niya sila sa pagkaulipon sa Egipto. Pagligad lang sang pila ka bulan, ginhandum nila ang mga pagkaon kag ilimnon sa Egipto kag nagreklamo sila parte sa mga aman ni Jehova, kag gusto pa gani nila magbalik sa Egipto. Mas importante pa sa ila ang ‘isda, pipino, sandiya, sibuyas, kag ahos’ sangsa kahilwayan nga ginhatag sa ila ni Jehova para masimba nila sia bilang matuod nga Dios. Gani, naakig gid si Jehova sa iya katawhan. (Num. 11:5, 6, 10; 14:3, 4) Leksion gid ini sa aton!

7. Paano ginpakita ni Pablo nga gin-aplikar man niya ang iya laygay nga mabasa sa 2 Corinto 6:1, kag paano man naton ini mahimo?

⁷ Ginpalig-on ni apostol Pablo ang tanan nga Cristiano nga indi pagpasapayanan ang  kahilwayan nga ginhatag ni Jehova sa aton paagi sa iya Anak, si Jesucristo. (Basaha ang 2 Corinto 6:1.) Nasubuan gid kag nakonsiensia si Pablo bangod sang pagkaulipon sa sala kag kamatayon. Pero, nagsiling sia: “Nagapasalamat ako sa Dios paagi kay Jesucristo nga aton Ginuo!” Ngaa? Amo ini ang paathag niya sa iya masigka-Cristiano: “Kay ang kasuguan sang balaan nga espiritu nga nagahatag sa imo sing kabuhi bilang sumulunod ni Cristo Jesus naghilway na sa imo sa kasuguan sang sala kag sang kamatayon.” (Roma 7:24, 25; 8:2) Pareho kay Pablo, indi man naton dapat pagpasapayanan ang paghilway sa aton ni Jehova sa pagkaulipon sa sala kag kamatayon. Paagi sa gawad, maalagad naton ang aton Dios nga may matinlo nga konsiensia kag nagahatag ini sa aton sing kalipay.—Sal. 40:8.

8, 9. (a) Ano ang ginpaandam ni apostol Pedro parte sa paggamit sang aton kahilwayan? (b) Ano nga mga katalagman ang ginaatubang naton subong?

⁸ Pero, magluwas sa pagpasalamat, dapat man kita maghalong kay basi magamit naton sa indi husto nga paagi ang aton kahilwayan. Nagpaandam si apostol Pedro parte sa paggamit sang kahilwayan nga balibad sa paghimo sing malain. (Basaha ang 1 Pedro 2:16.) Nagapahanumdom ini sa aton sang natabo sa mga Israelinhon sa kamingawan. Kinahanglan man naton ini nga paandam. Ang matuod, mahimo mas kinahanglan naton ini subong. Ginagamit ni Satanas kag sang iya kalibutan ang madamo nga makagalanyat nga panapton, pagkaon, ilimnon, kalingawan, kag iban pa. Ginagamit sang tuso nga mga nagahimo sing pasayod ang mga guapo kag guapa para hayluhon kita nga baklon ang mga butang nga indi man naton kinahanglan. Mahapos lang kita mahaylo sini nga gamiton ang aton kahilwayan sa indi husto nga paagi.

⁹ Ang laygay ni Pedro maaplikar man sa mas serioso nga bahin sang aton kabuhi, pareho sang edukasyon, trabaho, ukon propesyon. Halimbawa, ang mga pamatan-on subong nagabatyag nga dapat gid sila magpaninguha para makaeskwela sila sa kilala nga mga unibersidad. Ginapapati sila nga kon may tinapusan sila, makakita sila sing maayo kag daku sing sueldo nga trabaho. Ginapakitaan man sila sang mga impormasyon nga mas daku kuno ang sueldo sang mga nakagradwar sa unibersidad sangsa mga nakagradwar lang sa hayskul. Mahimo maganyat sa sini ang mga pamatan-on nga nagaplano sang ila kabuhi. Pero, ano ang dapat nila dumdumon kag sang ila mga ginikanan?

10. Bisan pa may kahilwayan kita, ano ang dapat naton dumdumon kon nagahimo kita sing desisyon?

¹⁰ Ang iban nagahunahuna nga bangod ang kada isa ang magadesisyon parte sa sini, may kahilwayan sila sa pagdesisyon kon ano ang gusto nila basta ginatugot ini sang ila konsiensia. Mahimo ginahunahuna nila ang ginsiling ni Pablo sa mga Cristiano sa Corinto parte sa pagkaon: “Bisan pa may kahilwayan ako, indi ko luyag nga hukman ini suno sa konsiensia sang iban.” (1 Cor. 10:29) Bisan pa may kahilwayan kita sa pagdesisyon parte sa edukasyon kag propesyon, dapat naton dumdumon nga indi bug-os ang aton kahilwayan kag ang tanan naton nga desisyon may epekto gid sa aton. Bangod sini, si Pablo nagsiling: “Ang tanan nga butang ginatugot [ukon suno sa footnote, “puede”] sa akon, apang indi tanan nga butang mapuslanon. Ang tanan nga butang ginatugot sa akon, apang indi tanan nga butang makapalig-on.” (1 Cor. 10:23) Ginapahangop sini nga bisan pa may kahilwayan kita sa pagdesisyon sa aton kabuhi, may mas importante nga mga butang nga  dapat binagbinagon sangsa kon ano lang ang aton gusto.

11. Ano ang katuyuan ngaa ginhilway kita?

¹¹ Sang nagpaandam si Pedro parte sa indi husto nga paggamit sang kahilwayan, ginhambal man niya ang husto nga paggamit sini. Ginpalig-on niya kita nga gamiton ini “subong mga ulipon sang Dios.” Gani, ang katuyuan gid kon ngaa gingamit ni Jehova si Jesus para hilwayon kita sa pagkaulipon sa sala kag kamatayon amo nga para madedikar naton ang aton kabuhi “subong mga ulipon sang Dios.”

12. Paano nangin maayo nga halimbawa si Noe kag ang iya pamilya para sa aton?

¹² Ang pinakamaayo nga paagi para malikawan naton nga gamiton sa indi husto nga paagi ang aton kahilwayan kag indi kita maulipon sang mga ginahandum kag mga ginatinguhaan sang kalibutan amo ang mangin masako sa espirituwal nga mga hilikuton. (Gal. 5:16) Halimbawa, binagbinaga si Noe kag ang iya pamilya. Nagkabuhi sila sa tion nga mapintas kag imoral ang mga tawo. Pero, wala sila mahaylo nga ilugon ang mga ginahimo sang mga tawo sa ila palibot. Paano nila nahimo ini? Nangin masako sila sa pagtuman sang tanan nga asaynment nga ginhatag sa ila ni Jehova, pareho sang paghimo sang arka, pagtipon sang pagkaon para sa ila kag sa mga sapat, kag pagpaandam sa iban. “Ginhimo ni Noe ang tanan nga ginsugo sang Dios sa iya. Amo gid ini ang ginhimo niya.” (Gen. 6:22) Ano ang resulta? Naluwas si Noe kag ang iya pamilya sang ginlaglag ang kalibutan sadto.—Heb. 11:7.

13. Ano ang ginsugo kay Jesus nga amo man ang ginsugo niya sa iya mga sumulunod?

¹³ Ano ang ginsugo sa aton ni Jehova subong? Bilang mga disipulo ni Jesus, nabal-an naton ang ginsugo sa aton sang Dios. (Basaha ang Lucas 4:18, 19.) Ang kalabanan subong ginbulag sang dios sini nga sistema sang mga butang kag ulipon sila sang butig nga relihion, materyal nga mga butang, kag pulitika. (2 Cor. 4:4) Pribilehiyo naton nga sundon si Jesus sa pagbulig sa  mga tawo nga makilala kag simbahon si Jehova, ang Dios sang kahilwayan. (Mat. 28:19, 20) Indi ini mahapos, kag madamo sing kabudlayan. Sa pila ka lugar, madamo ang wala nagasapak, kag ang iban naakig pa gani sa aton. Gani, maayo nga pamangkuton naton ang aton kaugalingon, ‘Ginagamit ko bala ang akon kahilwayan para masakdag ko pa gid ang hilikuton sang Ginharian?’

14, 15. Ano ang ginhimo sang madamo nga katawhan ni Jehova para sakdagon ang pagbantala? (Tan-awa ang piktyur sa umpisa sini nga artikulo.)

¹⁴ Makapalig-on gid makita nga madamo ang nakahangop nga malapit na ang katapusan sini nga sistema gani ginpasimple nila ang ila kabuhi para mag-alagad sing bug-os tion. (1 Cor. 9:19, 23) Ang pila nagaalagad sa ila lugar; kag ang iban nagsaylo sa lugar nga kinahanglan ang dugang nga manugbantala. Ginapakita sang mga rekord nga sang nagligad nga lima ka tuig, sobra 250,000 ang nagpayunir, kag sobra na 1,100,000 ang mga regular payunir subong. Dalayawon gid ini nga paggamit sang kahilwayan para alagaron si Jehova!—Sal. 110:3.

¹⁵ Ano ang nakabulig sa sini nga mga kauturan nga gamiton sing maalamon ang ila kahilwayan? Binagbinaga sanday John kag Judith, nga nakaalagad sa madamo nga pungsod sang nagligad nga 30 ka tuig. Nadumduman nila nga sang ginsugdan ang Pioneer Service School sang 1977, ginpalig-on ang mga estudyante nga magsaylo kag mag-alagad sa lugar nga kinahanglan ang dugang nga manugbantala. Para masunod ini, madamo nga beses nga nangita si John sing lain nga trabaho para mapasimple ang ila kabuhi. Sang ulihi, sang nagkadto sila sa iban nga pungsod, kinahanglan nila mag-adjust sa bag-o nga lenguahe, kultura, kag klima. Ano ang nakabulig sa ila? Ang pagpangamuyo kay Jehova kag pagsalig sa iya. Ano ang masiling nila sa ila malawig nga pag-alagad? Nagsiling si John: “Amo ini ang pinakamaayo nga hilikuton nga akon naeksperiensiahan. Napamatud-an ko nga isa gid ka mahigugmaon nga amay si Jehova sa akon. Mas nahangpan ko ang Santiago 4:8: ‘Magpalapit kamo sa Dios, kag magapalapit sia sa inyo.’ Natun-an ko kon ano ang makahatag sing kalipay sa kabuhi.”

16. Paano maalamon nga gingamit sang linibo ka katawhan ang ila kahilwayan?

¹⁶ Indi pareho kanday John kag Judith, ang iban makapayunir lang sa malip-ot nga tion bangod sang ila kahimtangan. Pero, madamo ang nagboluntaryo sa mga proyekto sang konstruksion sa bilog nga kalibutan. Halimbawa, sang ginahimo ang ulong talatapan sa Warwick, New York, mga 27,000 ka kauturan ang nagboluntaryo. Ang iban duha ka semana, ang iban pila ka bulan, kag ang iban isa ka tuig ukon mas malawig pa. Madamo sa ila ang nagsakripisyo para makaboluntaryo. Maayo gid sila nga halimbawa sang katawhan nga naggamit sang ila kahilwayan para dayawon kag padunggan si Jehova, ang Dios sang kahilwayan!

17. Ano nga pagpakamaayo ang nagahulat sa mga maalamon nga naggamit sang ila kahilwayan?

¹⁷ Nalipay gid kita nga nakilala naton si Jehova kag natigayon naton ang kahilwayan nga resulta sang matuod nga pagsimba. Kabay pa nga ipakita naton paagi sa aton mga desisyon nga ginapabaloran naton ini nga kahilwayan. Sa baylo nga gamiton sa indi husto ang aton kahilwayan, gamiton naton ini sa pag-alagad kay Jehova sing bug-os. Kon himuon naton ini, matigayon naton ang mga pagpakamaayo nga ginpromisa ni Jehova kon matuman na ini nga tagna: “Ang mga tinuga hilwayon man sa pagkaulipon sa lawas nga nagakadunot kag mabaton nila ang mahimayaon nga kahilwayan sang mga anak sang Dios.”—Roma 8:21.