1. Pagkatapos gid sang pagrebelde sa Eden, paano ginpalig-on ni Jehova ang katawhan?

SUGOD sang nagpakasala ang katawhan kag nangin indi perpekto, ginpakita ni Jehova nga sia ang Dios nga nagahatag sing pagpalig-on. Pagkatapos gid sang pagrebelde sa Eden, ginhatagan niya dayon sing rason nga magpakabakod ang mga kaliwat ni Adan. May paglaum pa ang katawhan. Ang promisa nga gintagna sa Genesis 3:15 naghatag sa katawhan sing paglaum nga sa ulihi “ang orihinal nga man-ug,” si Satanas nga Yawa, kag ang tanan niya nga malain nga binuhatan pagalaglagon.—Bug. 12:9; 1 Juan 3:8.

2. Paano ginpalig-on ni Jehova si Noe?

² Ang alagad ni Jehova nga si Noe nagkabuhi sang tion nga sila lang sang iya pamilya ang nagasimba kay Jehova. Bangod lapnag  ang kasingki kag imoral nga mga buhat, mahimo nga naluyahan sing buot si Noe. (Gen. 6:4, 5, 11; Jud. 6) Pero ginhatagan sia ni Jehova sing mensahe nga nagpabakod sa iya nga magpadayon nga ‘maglakat upod ang Dios.’ (Gen. 6:9) Ginsilingan ni Jehova si Noe nga laglagon Niya ang malaut nga kalibutan kag kon ano ang dapat niya himuon para maluwas ang iya pamilya. (Gen. 6:13-18) Ginpakita ni Jehova kay Noe nga Sia ang Dios nga nagahatag sing pagpalig-on.

3. Paano ginpalig-on si Josue? (Tan-awa ang piktyur sa umpisa sini nga artikulo.)

³ Sang ulihi, dapat pangunahan ni Josue ang katawhan sang Dios pakadto sa Ginsaad nga Duta. Mabug-at ini nga responsibilidad kay dapat nila pierdihon ang madamo nga mga soldado sang mga pungsod nga nagaistar didto. Nakahibalo si Jehova nga may rason si Josue nga mahadlok, gani ginsugo niya si Moises nga palig-unon si Josue. Nagsiling ang Dios: “Itangdo mo si Josue bilang lider kag palig-una sia kag pabakura, bangod sia ang manguna sa sini nga katawhan sa pagtabok agod panublion ang duta nga makita mo.” (Deut. 3:28) Dayon ginpalig-on ni Jehova si Josue: “Gani ginasugo ko ikaw, ‘Magpakaisog ka kag magpakabakod. Indi ka mahadlok, kay kaupod mo si Jehova nga imo Dios bisan diin ka magkadto.’” (Jos. 1:1, 9) Makapalig-on gid ini!

4, 5. (a) Paano ginpalig-on ni Jehova ang iya mga katawhan sang una? (b) Paano ginpalig-on ni Jehova ang iya Anak?

⁴ Indi lang mga indibiduwal ang ginapalig-on ni Jehova kundi ginapalig-on man niya ang iya katawhan bilang grupo. Halimbawa, ginpalig-on ni Jehova ang mga Judiyo nga nabihag sa Babilonia paagi sa pagtagna: “Indi ka mahadlok, kay kaupod mo ako. Indi ka magkabalaka, kay ako imo Dios. Pabaskugon ko ikaw, huo, buligan ko ikaw, uyatan ko ikaw sang akon tuo nga kamot sang pagkamatarong.” (Isa. 41:10) Nakabaton man sing pagpalig-on ang mga Cristiano sang una, kag amo man ang mga katawhan sang Dios subong.—Basaha ang 2 Corinto 1:3, 4.

⁵ Ginpalig-on man si Jesus sang iya Amay. Sang ginbawtismuhan si Jesus, nabatian niya ang tingog halin sa langit nga nagasiling: “Ini ang akon Anak, ang hinigugma, nga ginakahamut-an ko.” (Mat. 3:17) Nagpalig-on gid ini kay Jesus samtang ginahimo niya ang iya ministeryo sa duta!

6. Paano kita mapalig-on sang parabola parte sa mga talanton?

⁶ Gin-ilog ni Jesus ang iya Amay paagi sa pagpalig-on sa iban nga mangin matutom. Ginhimo niya ini paagi sa parabola parte sa mga talanton nga bahin sang iya tagna parte sa katapusan sang sistema sang mga butang. Sa sini nga parabola, isaisa nga ginpadunggan sang agalon ang matutom nga mga ulipon: “Dalayawon gid ang ginhimo mo, maayo kag matutom nga ulipon! Bangod matutom ka sa diutay nga mga butang, itangdo ko ikaw sa madamo pa nga butang. Magkalipay ka upod sa imo agalon.” (Mat. 25:21, 23) Napalig-on gid sa sini ang iya mga disipulo nga padayon nga mangin matutom sa pag-alagad kay Jehova!

7. Paano ginpalig-on ni Jesus ang iya mga apostoles, ilabi na si Pedro?

⁷ Ang mga apostoles ni Jesus masami nagabaisay kon sin-o ang pinakamataas sa ila, pero mapinasensiahon sa ila si Jesus. Ginpalig-on niya sila nga magpaubos kag mag-alagad sa iban, indi nga iban ang mag-alagad para sa ila. (Luc. 22:24-26) Pila ka beses nga ginpaslaw ni Pedro si Jesus. (Mat. 16:21-23; 26:31-35, 75) Pero wala ginsikway ni Jesus si Pedro, kundi ginpalig-on  niya sia kag ginsugo pa gani sia nga pabakuron ang iya mga kauturan.—Juan 21:16.

8. Paano ginpalig-on ni Ezequias ang mga pangulo sang mga soldado kag ang katawhan sang Juda?

⁸ Antes pa magkadto sa duta ang Anak ni Jehova kag nagpakita sing perpekto nga halimbawa kon paano magpalig-on, ang matutom nga mga alagad ni Jehova sang una nakabalo nga dapat sila magpalig-unay. Sang hana nga magsalakay ang mga Asirianhon, gintipon ni Ezequias ang mga pangulo sang mga soldado kag ang katawhan sang Juda kag ginpalig-on sila. Kag “napalig-on ang katawhan sa ginsiling [niya].”—Basaha ang 2 Cronica 32:6-8.

9. Ano ang matun-an naton sa libro sang Job parte sa pagpalig-on?

⁹ Kinahanglan kuntani ni Job ang pagpalig-on, pero sia pa ang nagtudlo sa iya tatlo ka “masabad nga manuglugpay” kon paano magpalig-on. Ginsilingan niya sila nga kon sia ang sa lugar nila, ‘palig-unon niya sila, kag pahaganhaganon ang ila kasakit.’ (Job 16:1-5) Sang ulihi, ginpalig-on si Job ni Elihu kag ni Jehova mismo.—Job 33:24, 25; 36:1, 11; 42:7, 10.

10, 11. (a) Ngaa kinahanglan sang anak ni Jefte ang pagpalig-on? (b) Sin-o subong ang nagakinahanglan man sini nga pagpalig-on?

¹⁰ Nagakinahanglan man sadto sing pagpalig-on ang anak nga babayi ni Jefte. Antes magpakig-away si Hukom Jefte sa mga Ammonhon, nagpanaad sia nga kon padaugon sila ni Jehova, ang una nga tawo nga magagua sa iya balay kag magasugata sa iya magaalagad sa santuaryo ni Jehova. Nagdaug ang Israel, kag ang una nga nagsugata kay Jefte amo ang iya anak nga babayi, nga bugtong niya nga anak. Nasubuan gid si Jefte. Pero gintuman niya ang iya panaad kag ginpakadto niya sa Shilo ang iya birhen nga anak para mag-alagad sa tabernakulo sa bug-os niya nga kabuhi.—Huk. 11:30-35.

¹¹ Mabudlay gid ini para kay Jefte, pero mahimo nga mas mabudlay ini para sa iya anak nga kinabubut-on nga nagtuman sa desisyon sang iya amay. (Huk. 11:36, 37) Bangod sini, indi na sia makapamana kag makaanak, kag indi na mapadayon ang kaliwatan sang ila pamilya. Gani kinahanglan gid niya ang pagpalig-on. Ang Biblia nagasiling: “Nangin kinabatasan ini sa Israel: Sa sulod sang apat ka adlaw kada tuig, ang lamharon nga mga babayi sang Israel nagakadto kag ginadayaw nila ang anak nga babayi ni Jefte nga Gileadnon.” (Huk. 11:39, 40) Indi bala nga dapat man naton komendahan kag palig-unon ang mga Cristiano nga nagdesisyon nga indi mangasawa ukon mamana para mas makapokus sa “mga butang sang Ginuo”?—1 Cor. 7:32-35.

12, 13. Paano ‘ginpabakod ni Pedro ang iya mga kauturan’?

¹² Sang gab-i antes sang kamatayon ni Jesus, ginsilingan niya si apostol Pedro: “Simon, Simon, nagsiling si Satanas nga luyag niya nga ayagon kamo tanan kaangay sang trigo. Apang nag-ampo ako nga kabay nga indi magluya ang imo pagtuo; kag kon makapanumbalik ka na, pabakura ang pagtuo sang imo mga kauturan.”—Luc. 22:31, 32.

¹³ Si Pedro nangin haligi sang kongregasyon sang una. (Gal. 2:9) Ginpalig-on niya ang iya mga kauturan paagi sa kaisog nga ginpakita niya sang tion sang Pentecostes kag pagkatapos sini. Pagkatapos sang iya malawig nga pag-alagad, nagsulat sia sa iya mga masigka-Cristiano. Ngaa? Nagsiling  sia: “Nagsulat ako sing malip-ot sa inyo agod palig-unon kamo kag agod ipahibalo sa inyo nga amo ini ang matuod nga wala tupong nga kaayo sang Dios. Magtindog kamo sing malig-on sa sini.” (1 Ped. 5:12) Ang mga sulat ni Pedro nagpalig-on sa mga Cristiano sang una, kag nagapalig-on man ini sa aton subong. Kinahanglan gid naton ini samtang ginahulat naton nga matuman ang mga promisa ni Jehova!—2 Ped. 3:13.

14, 15. Paano ang mga ginsulat ni apostol Juan nagpalig-on sa mga Cristiano sing ginatos ka tuig?

¹⁴ Si apostol Juan nangin haligi man sang Cristianong kongregasyon sang una. Ang iya ginsulat nga Ebanghelyo parte sa ministeryo ni Jesus nagpalig-on sa mga Cristiano sing ginatos ka tuig, kag nagapalig-on ini asta subong. Sa iya lang Ebanghelyo mabasa ang ginsiling ni Jesus nga makilala ang iya matuod nga mga disipulo paagi sa ila gugma.—Basaha ang Juan 13:34, 35.

¹⁵ Ang tatlo pa ka sulat ni Juan nagaunod man sing hamili nga mga kamatuoran. Kon naluyahan kita sing buot bangod nakasala kita, indi bala nga malugpayan kita kon mabasa naton nga “ang dugo ni Jesus . . . nagatinlo sa aton sa tanan naton nga sala”? (1 Juan 1:7) Kag kon padayon kita nga ginapakamalaut sang aton tagipusuon, indi bala nga maumpawan kita kag magaluha sa kalipay kon mabasa naton nga “ang Dios labaw pa sa aton tagipusuon”? (1 Juan 3:20) Si Juan lang ang nagsulat nga “ang Dios gugma.” (1 Juan 4:8, 16) Sa iya ikaduha kag ikatlo nga sulat, ginkomendahan niya ang mga Cristiano nga padayon nga “nagalakat sa kamatuoran.”—2 Juan 4; 3 Juan 3, 4.

16, 17. Paano ginpalig-on ni apostol Pablo ang mga Cristiano sang una?

¹⁶ Sang unang siglo, ang apostol nga ayhan madamo sing ginhimo para palig-unon ang iya mga kauturan amo si apostol Pablo. Sang bag-o pa lang ang Cristianismo, mahimo nga ang kalabanan nga apostoles nagtener  sa Jerusalem kag diri nagatipon ang nagadumala nga hubon. (Binu. 8:14; 15:2) Ang mga Cristiano sa Judea nagbantala parte sa Cristo sa mga tawo nga nagapati nga may isa lang ka Dios kay amo ini ang ginatudlo sang Judaismo. Pero si apostol Pablo ginpadala sang balaan nga espiritu sa mga tawo sang mga pungsod para magbantala sa mga Griego, Romano, kag iban pa nga nagasimba sa madamo nga dios.—Gal. 2:7-9; 1 Tim. 2:7.

¹⁷ Nakalab-ot si Pablo sa lugar nga ginatawag subong Turkey, pati sa Gresya kag sa Italya, kag nakatukod sia didto sing mga kongregasyon sang mga indi Judiyo. Ining bag-o nga mga Cristiano ‘nag-antos sa mga kamot sang ila mga kasimanwa,’ gani kinahanglan nila ang pagpalig-on. (1 Tes. 2:14) Sang mga 50 C.E., nagsulat si Pablo sa bag-o nga kongregasyon sa Tesalonica: “Nagapasalamat kami pirme sa Dios tungod sa inyo kag pirme namon kamo ginasambit sa amon mga pangamuyo, kay ginadumdom namon sing dayon . . . ang inyo buhat sang pagtuo, ang inyo mahigugmaon nga pagpangabudlay, kag ang inyo pagbatas.” (1 Tes. 1:2, 3) Ginlaygayan man niya sila nga magpalig-unay, kag nagsiling sia: “Padayon nga palig-una kag pabaskuga ang isa kag isa.”—1 Tes. 5:11.

18. Paano ginpalig-on si Felipe sang nagadumala nga hubon sang unang siglo?

¹⁸ Ginpalig-on sang nagadumala nga hubon sang unang siglo ang mga nagapanguna kag ang tanan nga Cristiano. Sang ginbantala ni Felipe nga ebanghelisador sa mga Samaritano ang parte sa Cristo, ginsakdag sia sang nagadumala nga hubon. Ginpadala nila ang duha sa ila miembro, nga sanday Pedro kag Juan, para magpangamuyo nga makabaton sing balaan nga espiritu ang bag-o nga mga tumuluo. (Binu. 8:5, 14-17) Sigurado gid nga napalig-on si Felipe kag ang bag-o nga mga kauturan sa pagsakdag sang nagadumala nga hubon!

19. Ano ang resulta sang sulat nga ginpadala sang nagadumala nga hubon sa mga kongregasyon sang una?

¹⁹ Sang ulihi, dapat magdesisyon ang nagadumala nga hubon kon bala kinahanglan nga magpatuli ang indi Judiyo nga mga Cristiano kay ginpatuman ini sa mga Judiyo suno sa Kasuguan ni Moises. (Binu. 15:1, 2) Pagkatapos makapangamuyo nga tuytuyan sila sang balaan nga espiritu kag mausisa ang Kasulatan, nagdesisyon sila nga indi na ini kinahanglan. Dayon nagsulat sila sa mga kongregasyon para ipahibalo ang ila desisyon. Ang mga representante sang nagadumala nga hubon ang nagdala sang sulat. Ano ang resulta? “Sang mabasa nila ini, nalipay gid sila tungod sa pagpalig-on sa ila.”—Binu. 15:27-32.

20. (a) Paano ginapalig-on sang Nagadumala nga Hubon ang mga kauturan sa bilog nga kalibutan subong? (b) Ano nga pamangkot ang pagasabton sa masunod nga artikulo?

²⁰ Subong, ang Nagadumala nga Hubon sang mga Saksi ni Jehova nagapalig-on sa mga Bethelite, sa mga bug-os tion nga nagaalagad sa ministeryo sa pinasahi nga paagi, kag sa tanan nga kauturan sa bilog nga kalibutan. Pareho sa mga kauturan sang unang siglo, nalipay man kita sa mga pagpalig-on! Kag sang 2015, ang Nagadumala nga Hubon nag-aman sang brosyur nga Magbalik kay Jehova, kag madamo gid ang napalig-on sini sa bilog nga kalibutan. Pero ang mga nagapanguna lang bala nga mga kauturan ang dapat mag-ilog kay Jehova sa paghatag sing pagpalig-on? Pagasabton ini nga pamangkot sa masunod nga artikulo.