1. Sang ginlaygayan ni apostol Pablo ang mga Hebreo nga Cristiano sang una nga magpalig-unay, ngaa nagsiling sia nga “labi na gid”?

NGAA kinahanglan gid naton magpalig-unay? Ginsambit ni apostol Pablo ang rason sa iya sulat para sa mga Hebreo nga Cristiano. Nagsiling sia: “Hunahunaon naton ang isa kag isa agod pahulagon sa gugma kag sa maayong mga buhat, nga wala ginapabay-an ang aton pagtilipon, subong sang kinabatasan sang iban, kundi nagapalig-unay sa isa kag isa, kag labi na gid samtang nakita ninyo nga malapit na ang adlaw.” (Heb. 10:24, 25) Indi na malab-utan lima ka tuig kag makita sang mga Judiyo nga Cristiano nga nagaistar sa Jerusalem nga malapit na ang “adlaw ni Jehova,” kag kinahanglan nila sundon ang ginsiling ni Jesus nga magpalagyo pagua sa siudad. (Binu. 2:19, 20; Luc. 21:20-22) Ang adlaw ni Jehova nag-abot sang 70 C.E. sang ginlaglag sang mga Romano ang Jerusalem.

2. Ngaa dapat mas mangin interesado pa gid kita nga magpalig-unay subong?

² Subong, may rason gid kita nga magpati nga malapit na ang “makahaladlok kag makahalawhaw gid” nga adlaw ni Jehova. (Joel 2:11) Si manalagna Sofonias nagsiling: “Malapit na ang daku  nga adlaw ni Jehova! Malapit na ini kag nagapalapit sing tuman kadasig!” (Sof. 1:14) Ini nga tagna nagapaandam man sa aton subong. Bangod malapit na ang adlaw ni Jehova, ginsilingan kita ni Pablo nga “kabalak-an naton ang isa kag isa agod pahulagon sa gugma kag sa maayong mga buhat.” (Heb. 10:24, footnote) Gani, dapat mangin interesado pa gid kita sa aton mga kauturan, para mapalig-on naton sila kon kinahanglanon.

3. Ano ang ginsiling ni apostol Pablo parte sa pagpalig-on? (Tan-awa ang piktyur sa umpisa sini nga artikulo.)

³ “Ang kabalaka sa tagipusuon sang tawo nagapabug-at sini, apang ang maayo nga pulong nagapasadya sa iya.” (Hulu. 12:25) Matuod ini sa aton tanan. Kinahanglan naton tanan ang pagpalig-on. Maathag sa ginsulat ni Pablo nga bisan ang mga may responsibilidad nga magpalig-on sa iban dapat man palig-unon. Nagsulat sia sa mga Cristiano sa Roma: “Handum ko gid nga makita kamo, agod mapaambit ko sa inyo ang espirituwal nga dulot nga makapalig-on sa inyo; ukon agod makapalig-unay kita paagi sa inyo pagtuo kag sa akon man.” (Roma 1:11, 12) Gani, bisan si Pablo nga maayo gid magpalig-on sa iban, nagakinahanglan man sing pagpalig-on kon kaisa.—Basaha ang Roma 15:30-32.

4, 5. Sin-o ang mahimo naton palig-unon subong, kag ngaa?

⁴ Dapat naton komendahan ang mga nagasakripisyo sang ila kaugalingon, pareho sang matutom nga mga payunir. Madamo sa ila ang indi lahuglahog ang ginsakripisyo para makapayunir. Amo man ang mga misyonero, mga manugtatap sang sirkito kag ila asawa, kag ang mga nagaalagad sa Bethel ukon sa mga remote translation office. Tanan sila nagasakripisyo para mas madamo sila sing mahimo sa sagrado nga pag-alagad. Gani, dapat gid naton sila palig-unon. Dapat man naton palig-unon ang mga kauturan nga gusto gid kuntani magpadayon sa bug-os tion nga pag-alagad pero indi na nila masarangan bangod sang pila ka rason. Pasalamatan gid nila ini.

⁵ Ang mga kauturan nga wala nagpamana ukon nagpangasawa bangod gusto nila tumanon ang sugo nga magminyo “sa sumulunod lamang sang Ginuo” nagakinahanglan man sing pagpalig-on. (1 Cor. 7:39) Nalipay gid ang mapisan nga mga asawa kon makabati sila sing pagpalig-on sang ila mga bana. (Hulu. 31:28, 31) Ang mga Cristiano nga matutom nga nagabatas sang paghingabot ukon balatian kinahanglan man palig-unon. (2 Tes. 1:3-5) Ining tanan nga matutom nga mga alagad ginalugpayan ni Jehova kag sang Cristo.—Basaha ang 2 Tesalonica 2:16, 17.

6. Ano ang katungdanan sang mga gulang nga ginlaragway sa Isaias 32:1, 2?

⁶ Basaha ang Isaias 32:1, 2. Nagakabuhi kita sa mabudlay nga tion gani mahimo kita masubuan ukon maluyahan sing buot. Pero, ginapalig-on kita ni Jesucristo paagi sa iya hinaplas nga mga kauturan kag “mga prinsipe” nga ginpili halin sa iban nga mga karnero. Ini nga mga gulang indi “mga agalon” sang pagtuo sang iban, kundi “mga masigkamanugpangabudlay” sila para sa kalipay sang ila mga kauturan.—2 Cor. 1:24.

7, 8. Magluwas sa makapalig-on nga mga pulong, paano pa gid mapalig-on sang mga gulang ang iban?

⁷ Maayo nga halimbawa si apostol Pablo nga dapat ilugon. Nagsulat sia sa ginahingabot nga mga Cristiano sa Tesalonica: “Bangod palangga namon kamo, determinado kami nga ipaambit sa inyo, indi lamang ang maayong balita sang Dios, kundi ang amon man kaugalingon.”—1 Tes. 2:8.

⁸ Nahibaluan ni Pablo nga indi bastante ang makapalig-on nga mga pulong, gani  ginsilingan niya ang mga gulang sa Efeso: “Dapat ninyo buligan ang mga maluya kag dapat ninyo dumdumon ang ginsiling ni Ginuong Jesus: ‘Mas malipayon ang nagahatag sangsa nagabaton.’” (Binu. 20:35) Indi lang pagpalig-on ang handa nga himuon ni Pablo para sa iya mga kauturan, kundi handa man sia nga ‘ihatag ang tanan kag gamiton sia sing bug-os’ para sa ila. (2 Cor. 12:15) Dapat man palig-unon kag paumpawan sang mga gulang ang ila mga kauturan indi lang sa hambal kundi pati sa buhat nga nagapakita sang ila pag-ulikid.—1 Cor. 14:3.

9. Ano ang himuon sang mga gulang para makapalig-on ang ila laygay?

⁹ Para palig-unon ang mga kauturan, mahimo nga kinahanglan kon kaisa maglaygay ang mga gulang. Pero, dapat nila sundon ang mga halimbawa sa Biblia parte sa paglaygay sing makapalig-on. Ang isa ka maayo nga halimbawa amo ang ginhatag ni Jesus nga laygay pagkatapos sang iya kamatayon kag pagkabanhaw. Prangka niya nga ginlaygayan ang mga kongregasyon sa Asia Minor, pero talupangda kon paano niya ini ginhimo. Antes maglaygay, ginkomendahan niya anay ang mga kongregasyon sa Efeso, Pergamo, kag Tiatira. (Bug. 2:1-5, 12, 13, 18, 19) Ginsilingan niya ang kongregasyon sa Laodicea: “Ginasabdong ko kag ginadisiplina ang tanan nga ginahigugma ko. Gani mangin makugi ka kag maghinulsol.” (Bug. 3:19) Maayo gid nga ilugon sang mga gulang ang halimbawa sang Cristo kon nagalaygay.

10. Paano kita tanan makapalig-on sa isa kag isa?

¹⁰ Indi lang mga gulang ang may responsibilidad nga magpalig-on. Ginlaygayan ni Pablo ang tanan nga Cristiano nga maghambal sing ‘maayo nga pinamulong nga makapabakod suno sa kinahanglanon, agod mahatag sini ang maayo’ sa iban. (Efe. 4:29) Kada isa sa aton dapat mangin sensitibo sa “kinahanglanon” sang iban. Ginlaygayan ni Pablo ang mga Hebreo nga Cristiano: “Pabaskuga ang nagahuyhoy nga mga kamot kag ang maluya  nga mga tuhod, kag padayon nga tadlunga ang mga banas para sa inyo mga tiil, agod ang bahin nga nahalitan indi maglala kundi mag-ayo.” (Heb. 12:12, 13) Tanan kita, lakip ang mga pamatan-on, makahatag sing pagpalig-on.

11. Paano nabuligan si Marthe sang na-depress sia?

¹¹ Si Marthe, * nga isa ka utod nga babayi nga na-depress sang una, nagsiling: “Isa ka adlaw samtang nagapangamuyo ako nga kinahanglan ko ang pagpalig-on, naistorya ko ang isa ka may edad na nga utod nga babayi nga nagpabatyag sa akon sang pagpalangga kag pag-ulikid, nga amo gid ang kinahanglan ko sadto. Gin-istorya man niya sa akon nga naeksperiensiahan man niya ang akon ginaatubang nga kabudlayan, gani nabatyagan ko nga wala ako nagaisahanon.” Mahimo nga wala narealisar sang may edad na nga utod ang maayo nga epekto sang iya mga ginsiling kay Marthe.

12, 13. Paano naton maaplikar ang laygay sang Filipos 2:1-4?

¹² Ginlaygayan ni Pablo ang tanan nga kauturan sa kongregasyon sa Filipos: “Gani, kon may yara kamo pangpalig-on paagi sa Cristo, paglipay paagi sa inyo gugma, espirituwal nga pagpakig-upod, pagpalangga kag kaawa, bug-usa ninyo ang akon kalipay paagi sa pagpakita nga nagahiliugyon kamo kag nagahigugmaanay, nga nahiusa sing bug-os, kag isa sing panghunahuna. Indi maghimo sang bisan ano bangod sa huyog nga makigbais ukon bangod sa sobra nga pagpaimportante sa kaugalingon, kundi mapainubuson nga kabiga ang iban nga labaw sa inyo, samtang ginapangita ninyo indi lamang ang inyo personal nga kaayuhan, kundi ang iya man sang iban.”—Fil. 2:1-4.

¹³ Huo, tanan kita dapat mangita sing paagi kon paano buligan ang iban. Mapalig-on naton ang mga kauturan paagi sa ‘paglipay sa ila paagi sa aton gugma,’ “espirituwal nga pagpakig-upod,” kag “pagpalangga kag kaawa.”

14. Ano ang mahimo magpalig-on sa aton?

¹⁴ Makapalig-on gid kon mabalitaan naton ang katutom sang aton mga nabuligan sang una. Amo sini ang ginbatyag ni apostol Juan sang nagsulat sia: “Wala na sang makapahalipay sa akon sangsa sini: Ang mabatian ko nga ang akon mga anak nagalakat sa kamatuoran.” (3 Juan 4) Madamo nga payunir ang makapamatuod nga napalig-on gid sila sang mabal-an nila nga ang pila sa mga nabuligan nila sang una padayon nga nagaalagad sing matutom, kag ang iban nagapayunir na man. Kon ang isa ka payunir naluyahan sing buot, mapalig-on gid sia kon ipadumdom naton sa iya ang mga maayo niya nga eksperiensia sang una.

15. Paano naton mapalig-on ang mga nagaalagad sing matutom?

¹⁵ Madamo nga manugtatap sang sirkito ang nagsiling nga napalig-on gid sila sang ila asawa kon makabaton sila bisan sing malip-ot lang nga sulat nga nagapasalamat sa ila pagbisita sa kongregasyon. Amo man sini ang ginabatyag sang mga gulang, misyonero, payunir, kag Bethelite kon ginaapresyar ang ila katutom.

16. Ano ang pinakasimple mo nga mahimo para mapalig-on ang iban?

¹⁶ Indi naton pagpamensaron nga indi kita makahatag sing pagpalig-on sa iban kay hipuson kita. Indi mabudlay ang magpalig-on sa iban. Puede mo bugnuhon ang isa ka utod kag yuhuman. Kon indi sia magyuhum, mahimo may problema sia, gani mangin handa nga pamatian sia para malugpayan sia.—Sant. 1:19.

17. Paano nabuligan ang isa ka pamatan-on nga utod sang tion nga nasubuan sia?

 ¹⁷ Si Henri, nga isa ka pamatan-on nga utod, nasubuan gid sang ang iya suod nga mga paryente, lakip ang iya amay nga ginataha nga gulang, nagbiya sa kamatuoran. Ginpalig-on si Henri sang manugtatap sang sirkito nga naghagad sa iya nga mangape kag namati gid sa iya. Nabinagbinag ni Henri nga ang paagi lang para mabuligan niya ang iya pamilya nga makabalik sa kamatuoran amo ang pagpabilin nga matutom. Nalugpayan gid sia sa pagbasa sang Salmo 46; Sofonias 3:17; kag Marcos 10:29, 30.

18. (a) Ano ang ginsiling ni Hari Solomon parte sa pagpalig-on? (b) Ano ang ginpanugda ni apostol Pablo?

¹⁸ Ang eksperiensia nanday Marthe kag Henri nagapakita nga mahimo naton mapalig-on ang mga kauturan nga nagakinahanglan sing lugpay. Si Hari Solomon nagsulat: “Ang tinaga nga ginhambal sa husto nga tion—tuman gid kaayo! Ang malipayon nga pagpasiplat nagapasadya sa tagipusuon; ang maayo nga balita nagapapagsik sa mga tul-an.” (Hulu. 15:23, 30, footnote) Puede man naton basahan sang artikulo halin sa Ang Lalantawan ukon sa aton website ang mga nasubuan. Suno kay Pablo, ang pag-amba sang mga ambahanon sa Ginharian makahatag sing pagpalig-on. Nagsulat sia: “Padayon nga magpanudlo kag magpalig-on sa isa kag isa nga may mga salmo, mga pagdayaw sa Dios, espirituwal nga mga ambahanon nga ginaamba ninyo sing mapinasalamaton kag tinagipusuon kay Jehova.”—Col. 3:16; Binu. 16:25.

19. Ngaa kinahanglan gid naton magpalig-unay samtang nagaligad ang tion, kag ano ang dapat naton himuon?

¹⁹ Kinahanglan gid naton magpalig-unay kay “malapit na” gid ang adlaw ni Jehova. (Heb. 10:25) Gani sundon naton ang ginlaygay ni Pablo sa iya mga masigka-Cristiano sang una: “Padayon nga palig-una kag pabaskuga ang isa kag isa, subong sang ginahimo na ninyo.”—1 Tes. 5:11.