1-3. (a) Ano nga sitwasyon ang ginaatubang sang tanan nga pamatan-on, kag sa ano naton ini mapaanggid? (Tan-awa ang piktyur sa umpisa sini nga artikulo.) (b) Ano ang makabulig sa mga pamatan-on nga Cristiano?

IBUTANG ta nga nagaplano ka nga magbiyahe sa malayo nga banwa para sa isa ka importante nga okasyon. Para makalab-ot didto, kinahanglan mo magsakay sa bus. Sa terminal sang bus, medyo binudlayan ka bangod kadamo gid sang pasahero kag salakyan. Pero maayo lang kay maathag ang imo plano, nga amo ang pagsakay sa bus nga pakadto sa imo destinasyon. Kon masakay ka sa iban nga bus, mapalayo ka sa imo kaladtuan.

² Daw pareho sa sini nga mga pasahero ang sitwasyon sang mga pamatan-on subong. Ang ila kabuhi mapaanggid sa pagbiyahe. Mahimo nga nabudlayan sila kon kaisa bangod kadamo gid sang desisyon nga dapat himuon. Mga pamatan-on, mangin mahapos sa inyo magdesisyon kon may tulumuron kamo sa inyo kabuhi. Pero, ano dapat ang inyo tulumuron?

³ Sabton ini sa sini nga artikulo paagi sa pagpalig-on sa mga pamatan-on nga unahon sa ila kabuhi ang pagpahamuot kay Jehova. Buot silingon, dapat nila ilakip si Jehova sa tanan nga bahin sang ila kabuhi, pareho sang pag-eskwela, pagtrabaho, obligasyon sa pamilya, kag iban pa. Kag dapat may espirituwal sila nga mga  tulumuron. Kon unahon nila ang pag-alagad kay Jehova, makasalig sila sang iya pagpakamaayo kag buligan niya sila nga magmadinalag-on.—Basaha ang Hulubaton 16:3.

4. Ano ang binagbinagon naton sa sini nga artikulo?

⁴ Maayo gid kon may espirituwal ka nga mga tulumuron. Ngaa? Binagbinagon naton ang tatlo ka rason. Ipadaku sang una kag ikaduha nga rason nga ang paglab-ot sang espirituwal nga mga tulumuron magapabakod sang imo kaangtanan kay Jehova. Ipadaku naman sang ikatlo nga rason ang benepisyo kon may espirituwal ka nga mga tulumuron samtang bata pa.

5. Ano ang panguna nga rason kon ngaa dapat may espirituwal kita nga mga tulumuron?

⁵ Ang panguna nga rason kon ngaa dapat may espirituwal kita nga mga tulumuron amo ini: Gusto naton pasalamatan si Jehova sa iya gugma kag sa tanan nga ginhimo niya para sa aton. Ang salmista nagsiling: “Maayo nga magpasalamat kay Jehova . . . Kay ginpasadya mo ako, O Jehova, bangod sang imo mga binuhatan; nagasinggit ako sa kalipay bangod sang imo mga hinimuan.” (Sal. 92:1, 4) Kon isa ikaw ka pamatan-on, hunahunaa ang tanan nga ginhatag ni Jehova sa imo. Ang imo kabuhi, ang kamatuoran parte sa iya, ang Biblia, ang kongregasyon, kag ang imo dalayawon nga paglaum sa palaabuton. Kon ginauna mo ang espirituwal nga mga hilikuton, ginapakita mo nga ginapasalamatan mo ang Dios sa sini nga mga pagpakamaayo, kag magasuod ka sa iya.

6. (a) Ano ang epekto sang espirituwal nga mga tulumuron sa aton kaangtanan kay Jehova? (b) Ano nga mga tulumuron ang puede lab-uton samtang bata pa?

⁶ Ang ikaduha nga rason amo ini: Kon ginapanikasugan mo nga malab-ot ang espirituwal nga mga tulumuron, nagahimo ka sing rekord sang maayo nga mga binuhatan sa panulok ni Jehova. Bangod sini, magasuod ka sa iya. Si apostol Pablo nagpromisa: “Ang Dios matarong kag indi niya pagkalimtan ang inyo binuhatan kag ang gugma nga ginpakita ninyo para sa iya ngalan.” (Heb. 6:10) Indi maghunahuna nga bata ka pa para maglab-ot sang espirituwal nga mga tulumuron. Dies anyos si Christine sang namat-od sia nga basahon sing regular ang mga sugilanon sang kabuhi sang matutom nga mga Saksi. Sang dose anyos si Toby, nangin tulumuron niya nga basahon ang bilog nga Biblia antes sia magpabawtismo. Onse anyos si Maxim kag dies anyos si Noemi nga iya manghod sang ginbawtismuhan sila. Dayon nangin tulumuron nila nga duha nga mag-alagad sa Bethel. Para indi nila malimtan ang ila tulumuron, ginpakabit nila sa dingding sang ila balay ang pormas para mag-aplay sa Bethel. Hunahunaa kon ano ang gusto mo nga mga tulumuron kag umpisahi ang paglab-ot sa sini.—Basaha ang Filipos 1:10, 11.

7, 8. (a) Paano makabulig ang espirituwal nga mga tulumuron para mangin mahapos ang pagdesisyon? (b) Ngaa nagdesisyon ang isa ka tin-edyer nga indi mag-eskwela sa unibersidad?

⁷ Ang ikatlo nga rason kon ngaa maayo nga may espirituwal nga mga tulumuron samtang bata pa amo ini: Makabulig ini sa paghimo sing desisyon. Ang mga pamatan-on dapat magdesisyon parte sa ila pag-eskwela, pagtrabaho, kag iban pa. Daw pareho ini sa nagasanga nga dalan kon nagabiyahe ka. Kon kabalo ka kon diin ka makadto, mahapos lang ang pagpili sang husto nga dalan. Sing kaanggid, kon kabalo ka sang imo mga tulumuron, mangin mahapos ang pagdesisyon. Ang Hulubaton 21:5 nagasiling: “Ang mga plano sang mapisan pat-od nga magamadinalag-on.” Kon may espirituwal ka nga mga tulumuron samtang bata pa, madasig ka nga mangin madinalag-on. Amo ini ang naeksperiensiahan ni Damaris sang kinahanglan niya maghimo sing importante nga desisyon sang tin-edyer pa sia.

 ⁸ Mataas ang grado ni Damaris sang naggradwar sia sa hayskul. Puede kuntani sia makaeskwela sing abogasiya bilang iskolar sa isa ka unibersidad, pero nagdesisyon sia nga magtrabaho sa bangko. Ngaa? “Bata pa ako, gusto ko na magpayunir. Gani dapat part-time ang akon trabaho. Kon abogada ako, makatipon kuntani ako sing madamo nga kuarta, pero mabudlayan ako sa pagpangita sing part-time nga trabaho.” Nagapayunir si Damaris sing 20 na ka tuig. Husto bala ang iya tulumuron kag desisyon sang tin-edyer pa sia? “Sa akon trabaho sa bangko, madamo ako sing maistorya nga mga abogado. Kon nag-eskwela ako sing abogasiya, pareho man kuntani sa ila ang akon trabaho. Pero, madamo sa ila ang indi gid malipayon. Bangod nagpayunir ako, wala ko maeksperiensiahan ang kasubo nga resulta sang paghimakas sa isa ka propesyon kundi ang kalipay sa tinuig nga pag-alagad kay Jehova.”

9. Ngaa dapat naton komendahan ang aton mga pamatan-on?

⁹ Linibo ka pamatan-on sa mga kongregasyon sa bilog nga kalibutan ang dapat naton komendahan. Ginauna nila si Jehova kag ang ila espirituwal nga mga tulumuron. Malipayon gid sila kag ginasunod nila ang mga panuytoy ni Jehova sa tanan nila nga ginahimo. Nalakip sa sini ang pag-eskwela, pagtrabaho, kag kaangtanan sa pamilya. “Magsalig ka kay Jehova sa bug-os mo nga tagipusuon,” sulat ni Solomon. “Hunahunaa sia sa tanan mo nga dalanon, kag tadlungon niya ang imo mga banas.” (Hulu. 3:5, 6) Mga pamatan-on sa Cristianong kongregasyon, hamili kamo sa panulok ni Jehova. Palangga gid niya kamo. Amligan niya kamo, tuytuyan, kag pakamaayuhon.

10. (a) Ngaa dapat isa sa pinakaimportante sa aton kabuhi ang ministeryo? (b) Paano kita mangin epektibo sa ministeryo?

¹⁰ Ang pamatan-on nga ginauna ang pagpahamuot kay Jehova nagapabalor gid sa ministeryo. Nagsiling si Jesucristo nga “dapat anay ibantala ang maayong balita.” (Mar. 13:10) Bangod hilingagawon ang pagbantala, dapat isa ini sa pinakaimportante sa aton kabuhi. Puede mo bala mangin tulumuron nga dugangan ang imo pagpakigbahin sa ministeryo? Makapayunir ka bala? Pero ano abi kon daw wala ka nanamian magbantala? Kag paano ka mangin epektibo pa gid sa pagpanaksi? Duha ka butang ang makabulig: Maghanda sing maayo, kag indi mag-untat sa pagsugid sa iban sang imo nahibaluan. Kon himuon mo ini, mahimo matingala ka nga nanamian ka na magbantala.

11, 12. (a) Paano makahanda ang mga pamatan-on para makapanaksi? (b) Ano ang ginhimo sang isa ka pamatan-on sang may kahigayunan sia nga makapanaksi sa eskwelahan?

¹¹ Maghanda paagi sa pagsabat sa mga pamangkot nga pirme ginapamangkot sang imo mga kaeskwela, pareho sang “Ngaa nagapati ka nga may Dios?” Ang aton website nga jw.org may mga artikulo nga makabulig sa mga pamatan-on nga sabton ini nga pamangkot. Buksi ang PANUDLO SANG BIBLIA > TIN-EDYER. Makita mo diri ang worksheet nga “Ngaa Nagapati Ako nga May Dios?” Buligan ka sini nga makahanda sang imo sabat. May tatlo ini ka teksto nga magamit mo sa pagpaathag sang imo ginapatihan: Hebreo 3:4, Roma 1:20, kag Salmo 139:14. Paagi sa sini nga mga worksheet, makahanda ka sa pagsabat sa madamo nga pamangkot.—Basaha ang 1 Pedro 3:15.

¹² Kon may kahigayunan, palig-una ang imo mga kaeskwela nga buksan ang jw.org. Ginhimo ini ni Luca. Sang ginbinagbinag sa ila klase ang parte sa mga relihion, natalupangdan niya nga may mga sala sa ginasiling sang libro parte sa mga Saksi ni Jehova. Bisan pa ginakulbaan sia, naglisensia sia sa ila maestra nga ipaathag ini. Nagsugot ang maestra. Ginpaathag ni Luca ang iya mga ginapatihan kag napakita niya sa klase ang  aton website. Dayon ginhatagan sang maestra sing asaynment ang mga estudyante nga tan-awon ang whiteboard animation nga Dauga ang Nagapangdaugdaug. Nalipay gid si Luca nga nakapanaksi sia.

13. Kon may mga kabudlayan, ngaa dapat padayon naton nga lab-uton ang aton mga tulumuron?

¹³ Kon may mga kabudlayan, indi maluyahan sing buot kundi padayon nga lab-uta ang imo mga tulumuron. (2 Tim. 4:2) Nagaedad si Katharina sing 17 anyos sang naghimo sia sing tulumuron nga panaksihan ang tanan niya nga katrabaho. Ang isa nag-insulto sa iya sing pila ka beses, pero wala sia maluyahan sing buot. Bangod sang iya maayo nga paggawi, nagdayaw ang isa pa niya nga katrabaho nga si Hans. Ginbasa ni Hans ang aton mga publikasyon, nagtuon sang Biblia, kag nagpabawtismo. Nakasaylo na sadto si Katharina gani wala niya ini mahibaluan. Pero pagligad sang 13 ka tuig, sang nagapungko sia sa Kingdom Hall upod sa iya pamilya, ginpakilala si Hans bilang ila bisita nga humalambal. Imadyina ang kalipay ni Katharina! Maayo lang kay wala sia mag-untat sa pagpanaksi sa iya mga katrabaho.

14, 15. (a) Ano ang dapat himuon sang mga pamatan-on kon ginahagad sila sang iban sa ila ginahimo? (b) Paano mabatuan sang mga pamatan-on ang impluwensia sang ila mga katubotubo?

¹⁴ Ginapalig-on ka sang sini nga artikulo nga unahon sa imo kabuhi ang pagpahamuot kay Jehova. Buot silingon, unahon ang espirituwal nga mga tulumuron. Mahimo nga ginauna sang iban nga kaedad mo ang paglingawlingaw, kag mahimo nga hagaron ka nila. Dapat mo ipakita nga mas importante sa imo ang imo mga tulumuron. Indi pagtuguti ang impluwensia sang imo mga katubotubo nga malimtan mo ang imo mga tulumuron. Dumduma ang ilustrasyon parte sa bus. Masakay ka bala sa bus nga wala ka kabalo kon diin pakadto bangod lang nakita mo nga daw malipayon ang mga pasahero diri? Sigurado nga indi gid!

¹⁵ Madamo ang paagi para mabatuan mo ang impluwensia sang imo mga katubotubo. Halimbawa, likawi ang mga sitwasyon nga mahimo masulay ka nga sundon sila. (Hulu. 22:3) Kag hunahunaa ang masakit nga mga resulta kon mag-upod ka sa iban nga nagahimo  sing malain. (Gal. 6:7) Makabulig man kon batunon mo nga kinahanglan mo ang laygay. Mangin mapainubuson nga pamatii ang mga panugda sang imo mga ginikanan kag mga hamtong nga kauturan sa kongregasyon.—Basaha ang 1 Pedro 5:5, 6.

16. Isaysay ang eksperiensia parte sa benepisyo sang pagkamapainubuson.

¹⁶ Ang pagkamapainubuson nagbulig kay Christoph nga batunon ang maayo nga laygay. Wala madugay pagkatapos sia mabawtismuhan, ginsugdan niya ang pag-ehersisyo sing regular sa fitness center. Ginpilit sia sang iban nga pamatan-on didto nga mag-entra sa ila sports club. Gin-istorya niya ini sa isa ka gulang. Ginsilingan sia sang gulang nga antes sia magdesisyon, pamensaron niya anay ang pila ka katalagman pareho sang posibilidad nga mailog niya ang panimuot nga dapat himuon ang tanan para magdaug. Nagdesisyon si Christoph nga mag-entra sa club. Pero sang ulihi, nakita niya nga bayolente kag delikado ang ila hampang. Gin-istorya niya liwat ang pila ka gulang, kag tanan sila naglaygay sa iya halin sa Biblia. “Ginpadalhan ako ni Jehova sing maayo nga mga manuglaygay, kag namati ako sa Iya, bisan pa nadugayan ako nga magtuman.” Mangin mapainubuson ka man bala nga batunon ang maayo nga laygay?

17, 18. (a) Ano ang gusto ni Jehova para sa mga pamatan-on subong? (b) Ano ang ginhinulsulan sang pila ka adulto, kag paano ini malikawan? Maghatag sing halimbawa.

¹⁷ “Magkalipay ka, pamatan-on, samtang bataon ka pa, kag magkalipay ka sa adlaw sang imo pagkapamatan-on.” (Man. 11:9) Huo, gusto ni Jehova nga mangin malipayon kamo nga mga pamatan-on. Ginpadaku sa sini nga artikulo ang isa ka paagi para matigayon ini. Unaha ang espirituwal nga mga tulumuron, nga ginalakip si Jehova sa tanan mo nga plano. Kon himuon mo ini dayon, maeksperiensiahan mo man dayon ang panuytoy, pag-amlig, kag pagpakamaayo ni Jehova. Hunahunaa ang tanan nga maayo nga laygay sang Pulong sang Dios, kag iaplikar ang laygay nga “dumduma ang imo Daku nga Manunuga sa mga adlaw sang imo pagkapamatan-on.”—Man. 12:1.

¹⁸ Madasig lang mangin adulto ang mga pamatan-on. Makapasubo nga madamo nga adulto ang naghinulsol kay sala nga tulumuron ang ila ginpanikasugan sang pamatan-on sila, ukon wala gid sila tulumuron. Pero ang mga pamatan-on nga ginauna ang espirituwal nga mga tulumuron mangin malipayon gid sa ila desisyon asta mangin adulto sila. Amo ini ang ginbatyag ni Mirjana, nga maayo gid sa sports sang tin-edyer sia. Ginsilingan sia nga mag-entra sa Winter Olympic Games, pero mas ginpili niya nga mag-alagad sing bug-os tion. Pagligad sang sobra 30 ka tuig, nagaalagad gihapon si Mirjana sing bug-os tion upod ang iya bana. Nagsiling sia: “Ang mga tulumuron nga mangin bantog, dungganon, pinakamaayo, kag manggaranon temporaryo lang kag wala sing balor. Ang pinakamapuslanon nga tulumuron nga may permanente nga benepisyo amo ang pag-alagad sa Dios kag pagbulig sa mga tawo nga makilala sia.”

19. Ano ang mga benepisyo kon unahon sang mga pamatan-on ang espirituwal nga mga tulumuron?

¹⁹ Dapat gid komendahan ang mga pamatan-on nga ginauna ang pag-alagad kay Jehova bisan may mga kabudlayan. Ginapanikasugan nila ang espirituwal nga mga tulumuron kag ginahatagan sing importansia ang pagbantala. Wala man nila ginatugutan ang impluwensia sang kalibutan nga mangin rason nga malimtan nila ang ila mga tulumuron. Mga pamatan-on, makasalig kamo nga pakamaayuhon ang inyo mga panikasog. Palangga kamo sang mga kauturan kag sakdagon nila kamo. Kon itugyan ninyo kay Jehova ang tanan ninyo nga ginahimo, mangin madinalag-on kamo.