1, 2. (a) Ano ang koneksion sang gugma sa pagtuo? (b) Ano nga mga pamangkot ang binagbinagon naton?

GINAHIGUGMA naton si Jehova “bangod sia ang una nga naghigugma sa aton.” (1 Juan 4:19) Para ipakita ini, ginpakamaayo ni Jehova ang iya matutom nga mga alagad. Samtang nagadugang ang aton gugma sa Dios, nagabakod pa gid ang aton pagtuo, indi lamang nga nagaluntad sia, kundi nagapadya gid sia sa mga nagahigugma sa iya.—Basaha ang Hebreo 11:6.

² Ang paghatag sing padya ni Jehova nagapakilala kon sin-o sia kag kon ano ang iya ginahimo. Indi mangin kompleto ang aton pagtuo kon indi kita kumbinsido nga padyaan sang Dios ang mga hanuot nga nagapangita sa iya kay “ang pagtuo amo ang masaligan nga pagpaabot sa kon ano ang ginalauman.” (Heb. 11:1) Ang pagtuo nagalakip sa pagpati nga pakamaayuhon sang Dios ang mga matutom sa iya. Pero paano kita makabenepisyo kon maglaum kita sa padya? Paano ginpadyaan ni Jehova ang iya mga alagad sadto kag subong? Binagbinagon naton ini.

3. Ano ang ginapromisa sa Malaquias 3:10?

³ Nagpromisa si Jehova nga Dios nga padyaan niya ang iya matutom nga mga alagad, gani ginaagda niya kita nga himuon ang aton bug-os nga masarangan para matigayon ini. Aton mabasa: “‘Tilawi ninyo ako . . . ,’ siling ni Jehova sang mga kasuldadusan, ‘agod makita ninyo kon bala indi ko pagbuksan sa inyo ang langit kag ibubo sa inyo ang mga pagpakamaayo tubtob wala na sing kulang.’” (Mal. 3:10) Mapakita naton ang aton apresasyon kag pagpasalamat kay Jehova kon batunon naton ining maalwan niya nga pangagda.

4. Ngaa makasalig kita sa ginpromisa ni Jesus sa Mateo 6:33?

⁴ Ginpasalig ni Jesus ang iya mga disipulo nga kon unahon nila ang Ginharian, suportahan sila sang Dios. (Basaha ang Mateo 6:33.) Makasiling sini si Jesus kay nahibaluan niya nga masaligan si Jehova. Nahibaluan niya nga natuman ang tanan nga promisa sang Dios. (Isa. 55:11) Gani makasiguro man kita nga kon magtuo kita kay Jehova, tumanon niya ang iya ginpromisa: “Indi ko gid kamo pagbayaan, kag indi ko gid kamo pagpabay-an.” (Heb. 13:5) Ini nga promisa may kaangtanan sa ginsiling ni Jesus parte sa pagpangita sing una sang Ginharian kag sang pagkamatarong sang Dios.

5. Ngaa makapabakod sing pagtuo ang sabat ni Jesus kay Pedro?

⁵ Namangkot si apostol Pedro kay Jesus: “Ginbiyaan namon ang tanan kag nagsunod sa imo; ano gid bala ang mabaton namon?” (Mat. 19:27) Sa baylo nga akigan si Pedro sa pagpamangkot sini, ginsilingan ni Jesus ang iya mga disipulo nga pagapadyaan sila bangod sang ila mga ginsakripisyo. Ang matutom nga mga apostoles kag ang iban magagahom sa langit upod sa iya. Pero may mga  padya bisan subong. Si Jesus nagsiling: “Ang tanan nga nagbiya sang mga balay ukon mga utod nga lalaki ukon mga utod nga babayi ukon amay ukon iloy ukon mga anak ukon mga duta tungod sa akon ngalan magabaton sing isa ka gatos ka pilo kag magapanubli sing kabuhi nga wala sing katapusan.” (Mat. 19:29) Mas labaw ang mga pagpakamaayo nga matigayon sang iya mga disipulo sangsa ila mga isakripisyo. Indi bala nga mas malahalon ang espirituwal nga mga amay, iloy, utod nga lalaki kag babayi, kag mga anak sangsa bisan ano nga ginsikway ukon ginbiyaan naton tungod sa Ginharian?

6. Ngaa nagpromisa sing padya si Jehova sa iya mga sumilimba?

⁶ Makabulig sa mga sumilimba ni Jehova ang iya ginapromisa nga padya kon makaatubang sila sing mga pagtilaw. Magluwas nga matigayon subong ang bugana nga mga pagpakamaayo sa espirituwal, ginalauman gid sang matutom nga mga alagad ni Jehova nga Dios ang mas daku nga mga pagpakamaayo sa palaabuton. (1 Tim. 4:8) Makabulig gid sa aton nga mangin mabakod ang aton pagtuo kon kumbinsido gid kita nga si Jehova “nagapadya sa mga hanuot nga nagapangita sa iya.”—Heb. 11:6.

7. Paano ang paglaum pareho sa angkla?

⁷ Sa Sermon sa Bukid, si Jesus nagsiling: “Magkasadya kamo kag magkalipay, kay daku ang inyo padya sa langit, bangod amo man sina ang paghingabot nila sa mga manalagna nga nauna sa inyo.” (Mat. 5:12) Magluwas sa mga makabaton sing padya sa langit, ang paglaum nga mabuhi sing dayon sa paraiso nga duta makahatag gid sing ‘kasadya kag kalipay.’ (Sal. 37:11; Luc. 18:30) Nagalaum man kita nga mapuyo sa langit ukon sa duta, ang aton paglaum mangin “angkla para sa [aton] kalag, pat-od kag malig-on.” (Heb. 6:17-20) Pareho sang angkla nga nagapugong sa barko nga indi maanod bisan may bagyo, ang aton ginalauman nga padya makabulig man sa aton nga mangin malig-on. Makahatag ini sa aton sing kusog nga mabatas ang mga kabudlayan.

8. Paano mapahaganhagan sang paglaum ang kabalaka?

⁸ Ang aton paglaum nga base sa Biblia makabulig para pahaganhaganon ang aton kabalaka subong. Pareho sang balsamo nga makaparepresko sang aton panit, ang mga promisa sang Dios makapahaganhagan sang aton kabalaka. Makapaumpaw gid nga ‘itugyan ang aton lulan kay Jehova,’ kay nahibaluan naton nga ‘sia magaalay-ay sa aton’! (Sal. 55:22) Makasalig gid kita nga ang Dios “makahimo sing sobra pa kabugana labaw sa aton ginapangayo ukon ginahunahuna.” (Efe. 3:20) Talupangda nga indi lang kita pagbuligan sang Dios sing bugana kundi buligan niya kita sing “sobra pa kabugana.”

9. Paano kita makasiguro nga mabaton naton ang pagpakamaayo ni Jehova?

⁹ Para mabaton ang padya, dapat magtuo gid kita kay Jehova kag tumanon naton ang tanan niya nga panuytoy. Ginsilingan ni Moises ang pungsod sang Israel: “Pakamaayuhon kamo ni Jehova sa duta nga ginahatag sa inyo ni Jehova nga inyo Dios bilang palanublion, kon mamati lang kamo kay Jehova nga inyo Dios kag tumanon gid ninyo ining tanan nga ginasugo ko sa inyo subong nga adlaw. Kay pakamaayuhon kamo ni Jehova nga inyo Dios suno sa ginsaad niya sa inyo.” (Deut. 15:4-6) Nagasalig ka gid bala nga pakamaayuhon ka ni Jehova kon mag-alagad ka sa iya sing matutom? Makasalig ka gid sa sini.

10, 11. Paano ginpadyaan ni Jehova si Jose?

¹⁰ Ginsulat ang Biblia para sa aton kaayuhan. Nagaunod ini sing mga halimbawa kon paano ginpadyaan sang Dios ang iya matutom nga mga alagad. (Roma 15:4) Ang isa ka maayo nga halimbawa amo si Jose. Una, ginbaligya sia nga ulipon sang iya mga utod. Sang ulihi, napriso sia sa Egipto kay ginpatupatuan  sia sang asawa sang iya agalon. Nadula na bala ang iya kaangtanan sa Dios? Wala! “Si Jehova padayon nga nag-upod kay Jose kag nagpakita sa iya sing mainunungon nga gugma . . . Si Jehova kaupod ni Jose kag ginhimo ni Jehova nga madinalag-on ang iya ginahimo.” (Gen. 39:21-23) Mapailubon nga naghulat si Jose sa iya Dios bisan sa sining mabudlay nga mga kahimtangan.

¹¹ Pila ka tuig sang ulihi, ginpagua sang Paraon sa prisuhan si Jose kag ginhimo ining ahaw nga ulipon nga mangin ikaduha nga gumalahom sa Egipto. (Gen. 41:1, 37-43) Sang nagbata sing duha ka lalaki ang iya asawa, “ginhingalanan ni Jose ang iya panganay nga Manases, kay siling niya, ‘Ginpahanabo sang Dios nga malimtan ko ang tanan ko nga kabudlayan kag ang bug-os nga panimalay sang akon amay.’ Ginhingalanan niya ang ikaduha nga Efraim, kay siling niya, ‘Ginhimo ako sang Dios nga mabungahon sa duta diin nagkalisod ako.’” (Gen. 41:51, 52) Bangod nangin matutom si Jose sa Dios, ginpadyaan sia sing mga pagpakamaayo amo kon ngaa naluwas ang kabuhi sang mga Israelinhon kag sang mga Egiptohanon. Nahibaluan ni Jose nga si Jehova amo ang nagpadya sa iya kag nagpakamaayo sa iya.—Gen. 45:5-9.

12. Paano nangin matutom si Jesus sang gintilawan sia?

¹² Nangin matinumanon man si Jesucristo sa Dios wala sapayan sang nanuhaytuhay nga mga pagtilaw sa iya, kag ginpadyaan sia. Ano ang nakabulig sa iya? Ang Pulong sang Dios nagapaathag: “Tungod sa kalipay nga ginbutang sa iya atubangan ginbatas niya ang usok sang pag-antos, ginbalewala ang kahuluy-an.” (Heb. 12:2) Nalipay si Jesus nga mapakabalaan ang ngalan sang Dios. Dugang pa, ginpadyaan sia kay ginkahamut-an sia sang iya Amay kag natigayon niya ang madamo nga mga pribilehiyo. Ang Biblia nagreport nga “nagpungko [sia] sa tuo sang trono sang Dios.” Kag mabasa man naton: “Ginbayaw sia sang Dios sa mataas gid nga posisyon kag mainayuhon nga ginhatagan sing ngalan nga labaw sa tanan nga ngalan.”—Fil. 2:9.

13, 14. Ano ang ginabatyag ni Jehova sa ginahimo naton para sa iya?

¹³ Makasalig kita nga ginapabaloran gid ni Jehova ang aton mga panikasog nga alagaron sia. Nahangpan niya ang bisan ano nga mga ginakabalak-an naton ukon mga pangduhaduha sa aton ikasarang. Nagakabalaka gid sia sa aton kon nabudlayan kita sa pinansial ukon kon nabudlayan kita mag-alagad bangod sang balatian ukon problema sa emosyon. Kag makasalig gid kita nga nalipay si Jehova sa ginahimo sang iya mga alagad para makapabilin nga matutom sa iya.—Basaha ang Hebreo 6:10, 11.

¹⁴ Dumduma man nga makapalapit kita sa “Manugpamati sang pangamuyo” kag makasalig nga pamatian niya ang aton mga ginakabalak-an. (Sal. 65:2) Sakdagon kita sing bug-os sa emosyon kag sa espirituwal sang “Amay nga may mapinalanggaon nga kaluoy kag [sang] Dios nga nagahatag sang tanan nga sahi sang lugpay,” ayhan paagi sa aton mga masigkasumilimba. (2 Cor. 1:3) Luyag ni Jehova nga kaluuyan naton ang iban. “Ang isa nga nagakaluoy sa kubos nagapahulam kay Jehova, kag bayaran Niya ang iya ginahimo.” (Hulu. 19:17; Mat. 6:3, 4) Gani kon maalwan kita kag nagabulig sa aton mga kauturan, ginatamod ini ni Jehova nga hulam Niya sa aton. Kag nagapromisa sia nga padyaan niya ini.

15. Ano nga mga padya ang imo ginalauman? (Tan-awa ang piktyur sa umpisa sini nga artikulo.)

¹⁵ Ang hinaplas sang espiritu nga mga Cristiano ginasakdag sang paglaum nga makabaton sang “purongpurong sang pagkamatarong, nga ihatag . . . sang Ginuo, ang  matarong nga hukom, subong padya sa amo nga adlaw.” (2 Tim. 4:7, 8) Pero indi buot silingon nga indi ka malahalon sa Dios kon tuhay ang ihatag niya nga paglaum para sa imo. Minilyon ka “iban nga mga karnero” ni Jesus ang nagapaabot gid nga padyaan sing kabuhi nga dayon sa paraiso nga duta. “Mangin malipayon gid sila [didto] sa bugana nga paghidait.”—Juan 10:16; Sal. 37:11.

16. Paano kita mapalig-on sang 1 Juan 3:19, 20?

¹⁶ Kon kaisa, mahimo magabatyag kita nga diutay lang ang aton nahimo sa pag-alagad, ukon mahimo magpalibog kita kon nahamut-an ini ni Jehova. Mahimo pa gani nga magduhaduha kita kon may mabaton pa kita nga padya. Pero indi naton dapat pagkalimtan nga “ang Dios labaw pa sa aton tagipusuon kag nakahibalo sang tanan nga butang.” (Basaha ang 1 Juan 3:19, 20.) Ginapadyaan niya ang bisan ano nga pag-alagad naton basta may pagtuo kita kag gugma, kag bisan pa sa pamatyag naton diutay lang ang aton pagsakripisyo.—Mar. 12:41-44.

17. Ano ang pila ka padya nga natigayon naton subong?

¹⁷ Bisan sa katapusan nga mga adlaw sining malain nga sistema sang mga butang ni Satanas, ginapakamaayo ni Jehova ang iya katawhan. Ginasiguro niya nga magauswag sila sa espirituwal nga paraiso, nga indi matupungan ang ila espirituwal nga kabuganaan. (Isa. 54:13) Suno sa ginpromisa ni Jesus, ginapadyaan kita subong ni Jehova sing isa ka mahigugmaon nga pamilya sang mga kauturan sa bug-os nga kalibutan. (Mar. 10:29, 30) Dugang pa, ang hanuot nga nagapangita sa Dios ginapadyaan sing mas malinong nga hunahuna, pagkakontento, kag kalipay.—Fil. 4:4-7.

18, 19. Ano ang ginabatyag sang mga alagad ni Jehova sa mga padya nga nabaton nila?

¹⁸ Naeksperiensiahan sang mga alagad ni Jehova sa bilog nga kalibutan ang tumalagsahon nga mga padya nga nabaton nila sa iya. Halimbawa, si Bianca nga taga-Germany nagsiling: “Nagapasalamat gid ako kay Jehova sa pagbulig sa akon parte sa akon mga ginakabalak-an kag sa pagsakdag niya sa akon adlaw-adlaw. Magamo kag wala sing paglaum ang kalibutan. Pero samtang nagaalagad ako kay Jehova, nagabatyag pa gid ako sang iya mahigugmaon nga pag-atipan. Kon maghimo ako sing mga pagsakripisyo, ginabalusan niya ako sing pila ka pilo.”

¹⁹ Binagbinaga man ang 70 anyos nga si Paula sa Canada nga may spina bifida, isa ka malubha nga balatian sa taludtod. “Indi buot silingon nga kon indi ka makahulag sing maayo, indi ka na makaalagad,” siling niya. “Nagapakigbahin ako sa nanuhaytuhay nga paagi sa pagbantala pareho sang paggamit sing telepono kag indi pormal nga pagpanaksi. Para mapalig-on ako, may kuaderno ako nga ginasulatan sang mga teksto kag sang matahom nga mga panghunahuna halin sa aton mga publikasyon kag pirme ko ini ginabasa. Ginatawag ko ini nga ‘My Survival Notebook.’ Temporaryo lang ang pagluya sing buot kon magpokus kita sa mga promisa ni Jehova. Pirme kita nga ginabuligan ni Jehova, bisan ano pa ang aton mga kahimtangan.” Mahimo tuhay gid ang imo kahimtangan kay Bianca ukon kay Paula. Pero mahimo mo mabinagbinag kon paano ka ginpadyaan ni Jehova kag ang imo mga kaupdanan. Makalilipay gid kon pamensaron mo nga ginapadyaan ka subong ni Jehova, kag padyaan ka niya sa palaabuton!

20. Ano ang mapaabot naton kon magpadayon kita sa pag-alagad sing bug-os kalag kay Jehova?

²⁰ Indi pagkalimti nga ang imo sinsero nga mga pangamuyo sa Dios “pagapadyaan sing daku.” Makasalig ka nga ‘sa tapos mo mahimo ang kabubut-on sang Dios, mabaton mo ang katumanan sang saad.’ (Heb. 10:35, 36) Gani padayon naton nga pabakuron ang aton pagtuo kag padayon nga alagaron si Jehova sing bug-os kalag. Mahimo naton ini, kay nahibaluan naton nga si Jehova magapadya sa aton.—Basaha ang Colosas 3:23, 24.