1, 2. Ngaa ang pila ka ginikanan nagakabalaka kon magdedikar kay Jehova ang ila kabataan kag magpabawtismo?

LINIBO ka estudyante sang Biblia ang nagdedikar kay Jehova kag nagpabawtismo. Madamo sa ila ang pamatan-on nga nagdaku sa pamilya nga Saksi kag ginpili nila ang pinakamaayo nga pagkabuhi. (Sal. 1:1-3) Kon isa ikaw ka Cristiano nga ginikanan, ginapaabot mo nga magpabawtismo ang imo bata.—Ipaanggid ang 3 Juan 4.

² Pero mahimo nga may mga ginakabalak-an ka. Mahimo nga nakita mo ang pila ka pamatan-on nga nagpabawtismo pero wala magsunod sa mga talaksan sang Dios sang ulihi. Ang pila nagbiya pa gani sa kamatuoran. Gani mahimo nabalaka ka nga basi mag-untat sa pag-alagad kay Jehova ang imo bata. Ukon basi mangin pareho sia sa pila ka Cristiano sa kongregasyon sa Efeso sang unang siglo nga ginsilingan ni Jesus: “Ginbayaan mo ang  imo una nga gugma.” (Bug. 2:4) Paano mo buligan ang imo bata para mangin mabakod ang iya gugma kag ‘magtubo sia sa kaluwasan’? (1 Ped. 2:2) Sa pagsabat sini nga pamangkot, binagbinagon naton ang halimbawa ni Timoteo.

3. (a) Paano nangin Cristiano si Timoteo, kag ano ang iya ginhimo sa mga panudlo ni Jesus? (b) Anong tatlo ka punto parte sa pagtuon ang ginpatalupangod ni Pablo kay Timoteo?

³ Mahimo nga nahibaluan ni Timoteo ang mga panudlo ni Jesus sang 47 C.E., sang nagkadto si apostol Pablo sa Listra sa nahauna nga tion. Mahimo nga tin-edyer pa lang sadto si Timoteo, pero gin-aplikar niya ang iya mga natun-an. Duha ka tuig sang ulihi, nag-upod na sia kay Pablo sa paglakbay. Pagligad sang mga 16 ka tuig, si Pablo nagsulat kay Timoteo: “Magpadayon ka sa mga butang nga imo natun-an kag nabuyok ka nga patihan, nga nakahibalo kon kay sin-o mo natun-an ini kag kutob sa pagkalapsag nahibaluan mo ang balaan nga mga sinulatan [ang Hebreong Kasulatan], nga makapaalam sa imo para sa kaluwasan paagi sa pagtuo kay Cristo Jesus.” (2 Tim. 3:14, 15) Talupangda nga si Pablo nagsambit sang (1) paghibalo sang balaan nga mga sinulatan, (2) nabuyok sa pagpati sang mga butang nga natun-an, kag (3) nangin maalam para sa kaluwasan paagi sa pagtuo kay Cristo Jesus.

4. Ano ang imo ginagamit sa pagtudlo sa imo bata? (Tan-awa ang piktyur sa umpisa sini nga artikulo.)

⁴ Bilang Cristiano nga ginikanan, luyag mo nga buligan ang imo bata nga mahibaluan ang balaan nga mga sinulatan, nga amo ang Hebreong Kasulatan kag ang Cristianong Griegong Kasulatan. Bisan ang mga bata pa puede matudluan parte sa mga tawo kag mga hitabo sa Biblia. Ang organisasyon ni Jehova may mga libro, brosyur, kag mga video para buligan ang mga ginikanan sa pagtudlo sa ila kabataan. Diin sini ang puede matigayon sa imo lenguahe? Dapat mahibaluan sang imo bata ang ginatudlo sang Biblia para mangin mabakod ang iya kaangtanan kay Jehova.

5. (a) Ano ang buot silingon sang ‘nabuyok nga magpati’? (b) Paano naton mahibaluan nga nabuyok si Timoteo nga magpati sang maayong balita parte kay Jesus?

⁵ Importante nga makahibalo ang isa sang balaan nga mga sinulatan. Pero indi bastante nga tudluan lang ang kabataan parte sa mga tawo kag mga hitabo sa Biblia. Si Timoteo ‘nabuyok man nga magpati.’ Sa orihinal nga lenguahe, ini nga prase nagakahulugan sing “pasaligon” ukon “mangin kumbinsido kag sigurado sa isa ka butang.” Nahibaluan ni Timoteo ang Hebreong Kasulatan sugod sa pagkalapsag. Pero nakumbinsi pa gid sia bangod sa maathag nga pamatuod nga si Jesus ang Mesias. Buot silingon nga ang iya ihibalo nagbakod pa gid kay kumbinsido sia. Mabakod gid ang pagtuo ni Timoteo amo nga nagpabawtismo sia kag nangin kaupod ni Pablo bilang misyonero.

6. Paano mo buligan ang imo kabataan nga mabuyok sa pagpati sa ila matun-an sa Pulong sang Dios?

⁶ Paano mo mapabakod ang pagtuo sang imo kabataan para mabuyok mo sila nga magpati pareho ni Timoteo? Una, dapat mangin mapinasensiahon. Nagakinahanglan sing tion para mangin mabakod ang pagtuo, kag indi buot silingon nga kon nagapati ka, mapati man sila. Dapat gamiton sang kada bata ang iya “ikasarang sa pagpangatarungan” para magtuo sia sa kamatuoran sa Biblia. (Basaha ang Roma 12:1.) Daku gid ang mabulig mo bilang ginikanan, ilabi na kon mamangkot ang imo bata. Binagbinagon naton ang isa ka halimbawa.

7, 8. (a) Paano nangin mapinasensiahon ang isa ka Cristianong amay sa pagtudlo sang iya bata? (b) San-o ka dapat mangin mapinasensiahon sa imo bata?

 ⁷ Si Thomas, nga amay sang 11 anyos nga bata nga babayi, nagsiling: “Kon kaisa ginapamangkot ako sang akon bata, ‘Gingamit bala ni Jehova ang ebolusyon para magtuga sang kabuhi sa duta?’ ukon, ‘Ngaa wala kita nagasuporta sa komunidad, halimbawa sa eleksion, para mangin maayo ang kahimtangan?’ Kon kaisa dapat ko punggan ang akon kaugalingon para indi ko pagtadlungon dayon ang iya panghunahuna. Kay man ang pagtuo indi dayon matigayon sa isa lang ka pamatuod kundi sing amat-amat nga pagpaathag sing mga ebidensia.”

⁸ Nahibaluan ni Thomas nga dapat mangin mapinasensiahon ang isa kon nagatudlo. Importante ini para sa tanan nga Cristiano. (Col. 3:12) Narealisar niya nga dapat maghinguyang sia sing madamo nga tion sa pagpakighambal sa iya bata. Dapat mangatarungan sia sa Kasulatan para magbakod ang pagtuo sang iya bata sa iya natun-an. “Ilabi na sa importante nga mga punto,” siling ni Thomas, “gusto namon mabal-an sang akon asawa kon bala nagapati ang amon bata sa iya natun-an kag kon bala ugyon sia sa sini. Maayo gid kon mamangkot sia. Ang matuod, nabalaka ako kon batunon niya dayon ang isa ka butang nga wala pulupamangkot.”

9. Paano mo buligan ang imo kabataan nga magtuo sa Pulong sang Dios?

⁹ Kon mapinasensiahon nga tudluan sang mga ginikanan ang ila kabataan, amat-amat nga mahangpan nila “ang kasangkaron, kalabaon, kataason, kag kadalumon” sang pagtuo. (Efe. 3:18) Puede naton ibagay sa ila edad kag ikasarang ang aton itudlo. Kon mangin kumbinsido na sila sa ila natun-an, amat-amat nga madepensahan nila ang ila mga pagpati sa iban, lakip ang ila mga kaupod sa eskwelahan. (1 Ped. 3:15) Halimbawa, mapaathag bala sang imo kabataan suno sa Biblia kon ano ang nagakatabo kon mapatay ang isa? Kumbinsido bala sila sa paathag sang Biblia? * Huo, dapat ka mangin mapinasensiahon sa pagtudlo sang Pulong sang Dios sa imo bata, pero may pulos gid ang imo panikasog.—Deut. 6:6, 7.

10. Ano ang isa ka importante nga paagi sa pagtudlo?

¹⁰ Siempre, importante man ang imo halimbawa kon nagapabakod sang pagtuo sang imo kabataan. Si Stephanie, nga iloy sang tatlo ka bata nga babayi, nagsiling: “Bisan sang gamay pa ang akon kabataan, dapat ko pamangkuton ang akon kaugalingon, ‘Ginasugiran ko bala ang akon kabataan kon ngaa kumbinsido ako nga nagaluntad si Jehova, nga ginahigugma niya kita, kag kon daw ano katarong sang iya mga dalanon? Makita bala sang akon kabataan nga palangga ko gid si Jehova?’ Indi ko mapaabot nga makumbinsi ko ang akon kabataan kon indi ako kumbinsido.”

11, 12. Ano ang kaalam, kag ngaa wala nagadepende sa edad ang pagtigayon sini?

¹¹ Natun-an naton nga si Timoteo (1) may ihibalo sang Kasulatan kag (2) kumbinsido sia sang iya mga ginapatihan. Pero ano ang buot silingon ni Pablo sang nagsiling sia nga ang balaan nga mga sinulatan ‘makapaalam kay Timoteo para sa kaluwasan’?

¹² Ang Insight on the Scriptures, Volume 2, nagpaathag nga sa Biblia, ang kaalam nagalakip sang “ikasarang sa paggamit sing maayo sang ihibalo kag paghangop para masolbar  ang mga problema, paglikaw sa mga katalagman, paglab-ot sang pila ka tulumuron, ukon pagtudlo sa iban kon ano ang ila himuon. Kabaliskaran ini sang kabuangan.” Ang Biblia nagasiling nga “ang kabuangan yara sa tagipusuon sang bata.” (Hulu. 22:15) Gani kon ang isa may kaalam, patimaan ini nga hamtong na sia. Ang pagkahamtong sa espirituwal wala nabase sa edad kundi sa iya kahadlok kay Jehova kag bangod gusto niya nga tumanon sia.—Basaha ang Salmo 111:10.

13. Paano mapakita sang isa ka lamharon nga maalam na sia para sa kaluwasan?

¹³ Ang mga lamharon nga medyo hamtong na sa espirituwal wala “ginaanod-anod sang mga balod kag ginapalidpalid” sang ila mga handum ukon sang impluwensia sang ila mga kaedad. (Efe. 4:14) Sa baylo, nagauswag sila kay ang “ila mga ikasarang sa paghangop nahanas . . . nga makilala ang maayo kag malain.” (Heb. 5:14) Ginapakita nila nga nagahamtong sila paagi sa paghimo sing maalam nga mga desisyon, bisan wala ang ila mga ginikanan ukon ang iban nga adulto. (Fil. 2:12) Ini nga ihibalo importante para sa kaluwasan. (Basaha ang Hulubaton 24:14.) Paano mo buligan ang imo kabataan nga matigayon ini nga kaalam? Dapat itudlo mo sa ila ang mga prinsipio nga natun-an mo sa Biblia. Paagi sa imo ginahambal kag ginahimo, makita nila nga ginatinguhaan mo nga sundon ang mga talaksan sa Pulong sang Dios.—Roma 2:21-23.

14, 15. (a) Ano ang dapat binagbinagon sang lamharon nga gusto magpabawtismo? (b) Paano mo buligan ang imo kabataan para mahibaluan nila ang mga pagpakamaayo sa pagtuman sang mga kasuguan sang Dios?

¹⁴ Pero indi lang dapat nga isugid mo sa imo kabataan kon ano ang maayo kag kon ano ang malain. Dapat buligan mo man sila nga mangatarungan sa mga pamangkot subong sang: ‘Ngaa ginadilian sa Biblia ang mga butang nga makagalanyat? Ano ang nagpakumbinsi sa akon nga ang mga talaksan sa Biblia para gid pirme sa akon kaayuhan?’—Isa. 48:17, 18.

¹⁵ Kon gusto sang imo bata nga magpabawtismo, buligi man sia sa pagbinagbinag kon  ano ang mga responsibilidad sang isa ka Cristiano. Ano ang iya masiling parte sa sini? Ano ang mga benepisyo kon himuon ini? Ano ang mga kabudlayan? Ngaa mas daku ang benepisyo sangsa mga kabudlayan? (Mar. 10:29, 30) Mahimo ini maatubang sang nagpabawtismo. Gani maayo nga binagbinagon gid ini antes magpabawtismo. Kon buligan ang kabataan nga mahangpan sing maayo ang mga benepisyo sa pagsunod kag kon ano ang malain nga matabo kon mangin indi matinumanon, mahimo nga magabakod gid ang ila pagtuo. Mangin kumbinsido sila nga ang pagsunod sa mga talaksan sang Biblia para gid pirme sa ila kaayuhan.—Deut. 30:19, 20.

16. Ano ang himuon sang mga ginikanan kon magluya ang pagtuo sang ila bata nga nabawtismuhan na?

¹⁶ Pero ano ang imo himuon kon magaduhaduha na sa kamatuoran ang imo bata pagkatapos nga mabawtismuhan sia? Halimbawa, mahimo maluyagan niya ang mga butang sa kalibutan ukon daw wala na sia nagapati nga maayo gid nga sundon ang mga prinsipio sa Biblia. (Sal. 73:1-3, 12, 13) Dapat mo dumdumon bilang ginikanan nga may epekto sa imo bata ang imo pag-atubang sini nga sitwasyon, kay mahimo magabakod ang iya pagtuo ukon mahimo magaluya ini. Tinguhai nga indi kamo magbais, bata man sia ukon tin-edyer na. Sa baylo, pahibalua sia nga palangga mo sia kag luyag mo magbulig.

17, 18. Kon nagaduhaduha ang isa ka pamatan-on, paano sia mabuligan sang iya mga ginikanan?

¹⁷ Ang lamharon nga nagpabawtismo nakadedikar na kay Jehova. Sa iya pagdedikar, nagpromisa sia nga higugmaon ang Dios kag unahon ang iya kabubut-on. (Basaha ang Marcos 12:30.) Ginatamod ini ni Jehova nga serioso nga promisa, kag dapat amo man sini ang pagtamod sang nagdedikar sa iya. (Man. 5:4, 5) Ipahanumdom ini sa imo bata sa nagakaigo nga tion kag sa malulo nga paagi. Pero antes himuon ini, basaha anay kag tun-i ang mga publikasyon nga gin-aman sang organisasyon ni Jehova para sa mga ginikanan. Kon himuon mo ini, mapaathag mo sing maayo sa iya kon daw ano ka serioso ang pagdedikar kay Jehova kag ang pagpabawtismo, pero matigayon niya ang madamo nga pagpakamaayo.

¹⁸ Halimbawa, may maayo nga laygay sa apendise sang “Questions Parents Ask,” sa likod sang libro nga Questions Young People Ask—Answers That Work, Volume 1. Ini nagasiling: “Indi dayon paghunahunaa nga ang imo tin-edyer nagasikway sang imo pagtuo. Basi may problema lang sia.” Mahimo nga ginapilit sia sang iya mga kaedad. Mahimo nasubuan sia ukon pamatyag niya madasig mag-uswag sa espirituwal ang iban nga pamatan-on nga Cristiano. Ang apendise nagpadayon: “Wala ini nagapakita nga indi mag-ugyon ang imo bata sa imo mga ginapatihan. Epekto lang ini sang mga kabudlayan nga iya ginaatubang subong.” Naghatag dayon sing pila ka panugda ang apendise kon paano ang isa ka Cristiano nga ginikanan makabulig sa iya pamatan-on nga nagaduhaduha sa iya pagtuo.

19. Paano buligan sang mga ginikanan ang ila kabataan nga mangin ‘maalam para sa kaluwasan’?

¹⁹ Bilang ginikanan, may daku ka nga responsibilidad kag pribilehiyo nga padakuon ang imo kabataan “sa disiplina kag laygay ni Jehova.” (Efe. 6:4) Suno sa aton natun-an, indi lamang ini pagtudlo sa ila sang ginasiling sang Biblia kundi pagbulig man sa ila nga magbakod ang ila pagtuo sa ila natun-an. Dapat mangin mabakod gid ang ila pagtuo para idedikar nila ang ila kabuhi kay Jehova kag alagaron sia sing bug-os. Kabay nga ang Pulong ni Jehova, ang iya espiritu, kag ang imo mga panikasog bilang ginikanan makabulig sa imo kabataan nga mangin ‘maalam para sa kaluwasan.’