Amo sini sadto ang aton pagpati kay daw ginapakita ini sang Hebreo 12:16. Ini nga bersikulo nagasiling nga si Esau “wala nagaapresyar sa sagrado nga mga butang” kag “ginbaylo ang iya mga kinamatarong subong panganay” kay Jacob sa isa lang ka pagkaon. Daw ginapahangop sini nga sang natigayon na ni Jacob ang “kinamatarong subong panganay,” nakalipikar man sia nga mangin katigulangan sang Mesias.—Mat. 1:2, 16; Luc. 3:23, 34.

Pero ang pagbinagbinag sang rekord sa Biblia magapakita nga indi tanan nga katigulangan sang Mesias panganay. Yari ang pila ka ebidensia:

Sa mga anak ni Jacob (Israel), si Ruben ang iya panganay kay Lea. Sang ulihi, si Jose ang iya nangin panganay kay Raquel, ang mas palangga niya nga asawa. Sang nakasala si Ruben, ang kinamatarong subong panganay ginsaylo kay Jose. (Gen. 29:31-35; 30:22-25; 35:22-26; 49:22-26; 1 Cron. 5:1, 2) Pero ang katigulangan sang Mesias wala maghalin kay Ruben ukon kay Jose. Naghalin ini kay Juda, ang ikap-at nga anak ni Jacob kay Lea.—Gen. 49:10.

 Ginlista sa Lucas 3:32 ang lima pa ka katigulangan sang Mesias. Tanan sila mahimo panganay. Gani si Boaz nangin amay ni Obed. Si Obed nangin amay ni Jesse.—Rut 4:17, 20-22; 1 Cron. 2:10-12.

Pero si David indi ang panganay ni Jesse. Sia ang kamanghuran sa walo ka anak nga lalaki. Pero ang katigulangan sang Mesias naghalin sa iya. (1 Sam. 16:10, 11; 17:12; Mat. 1:5, 6) Si Solomon amo ang masunod nga katigulangan sang Mesias, pero indi man sia ang panganay ni David.—2 Sam. 3:2-5.

Indi buot silingon nga wala sing pulos ang pagkapanganay. Ang panganay nga anak nga lalaki ginapadunggan gid kag sa masami sia amo ang masunod nga ulo sang panimalay. Doble man ang iya palanublion.—Gen. 43:33; Deut. 21:17; Jos. 17:1.

Pero ang kinamatarong subong panganay puede masaylo. Ginsikway ni Abraham si Ismael, amo nga ang kinamatarong subong panganay nagsaylo kay Isaac. (Gen. 21:14-21; 22:2) Kag sa nasambit na, ginsaylo ang kinamatarong subong panganay halin kay Ruben pakadto kay Jose.

Basahon naton ang Hebreo 12:16: “Mag-andam nga wala sing isa sa inyo nga nagahimo sang seksuwal nga imoralidad ukon wala nagaapresyar sa sagrado nga mga butang, kaangay ni Esau, nga ginbaylo ang iya mga kinamatarong subong panganay sa isa lang ka pagkaon.” Ano ang buot silingon sini?

Wala diri ginabinagbinag ni apostol Pablo ang katigulangan sang Mesias. Ginapalig-on lamang niya ang mga Cristiano nga ‘tadlungon ang ila mga banas para sa ila mga tiil.’ Kay kon himuon nila ini, ‘mabaton nila ang wala tupong nga kaayo sang Dios,’ pero indi ini matabo kon maghimo sila sang seksuwal nga imoralidad. (Heb. 12:12-16) Sa baylo, mangin pareho sila kay Esau. Wala niya ‘gin-apresyar ang sagrado nga mga butang,’ kag gin-una niya ang indi espirituwal nga mga butang.

Nagkabuhi si Esau sa tion sang mga patriarka, kag mahimo nga kon kaisa naghalad sia. (Gen. 8:20, 21; 12:7, 8; Job 1:4, 5) Pero bangod ang iya ginapamensar indi ang espirituwal nga mga butang, ginbaylo niya ining tanan nga pribilehiyo sa isa lang ka yahong sang linaga. Mahimo nga indi niya gusto nga maeksperiensiahan ang gintagna nga pag-antos sang mga kaliwat ni Abraham. (Gen. 15:13) Ginpakita man ni Esau nga nahuyog sia sa indi espirituwal nga mga butang kag wala niya ginaapresyar ang sagrado nga mga butang kay ginpangasawa niya ang duha ka pagano nga babayi. Ginkasubo ini sang iya mga ginikanan. (Gen. 26:34, 35) Tuhay sia kay Jacob nga nangasawa sang sumilimba sang matuod nga Dios!—Gen. 28:6, 7; 29:10-12, 18.

Gani, ano ang masiling naton parte sa katigulangan ni Jesus, ang Mesias? Indi tanan nga katigulangan niya panganay. Nahibaluan ini sang mga Judiyo kag ginbaton nila ini, kay nagsiling sila nga ang Cristo kaliwat ni David, ang kamanghuran ni Jesse.—Mat. 22:42.