Nabasa mo na bala sing maayo ang ulihi nga mga isyu sang Ang Lalantawan? Kon amo, tilawi kon masabat mo ang masunod nga mga pamangkot:

Kon ginabuligan sang imigrante nga mga ginikanan ang ila kabataan sa espirituwal, ngaa dapat nila binagbinagon ang lenguahe?

Ang lenguahe sang lugar nga ila ginsayluhan mahimo matun-an sang ila kabataan sa eskwelahan kag sa iban. May bentaha kon indi lang isa ka lenguahe ang matun-an sang bata. Dapat binagbinagon sang mga ginikanan kon diin nga lenguahe nga mahangpan gid sang mga pamatan-on ang kamatuoran kag mag-uswag sila sa espirituwal, kon bala maayo nga makig-upod sila sa kongregasyon nga tumandok ang lenguahe ukon sa namat-an nga lenguahe sang ila imigrante nga ginikanan. Ginauna sang Cristiano nga mga ginikanan ang espirituwal nga kaayuhan sang ila kabataan sangsa gusto sang mga ginikanan.—w17.05, p. 9-11.

Sang ginpamangkot ni Jesus si Pedro: “Ginahigugma mo bala ako sing labi sa sini?” ano ang ginapatuhuyan sang “sini”? (Juan 21:15)

Mahimo nga ang ginapatuhuyan ni Jesus amo ang mga isda ukon ang negosyo sang pagpangisda. Sang napatay si Jesus, nagbalik si Pedro sa iya sadto obra, ang pagpangisda. Dapat usisaon sang mga Cristiano ang ila kaugalingon kon daw ano ka importante para sa ila ang ila trabaho.—w17.05, p. 22-23.

Ngaa ginpangabay ni Abraham ang iya asawa nga magpakilala nga utod niya? (Gen. 12:10-13)

Sanday Sara kag Abraham mag-utod sa amay. Kon magsiling si Sara nga asawa sia ni Abraham, mahimo nga patyon si Abraham kag indi na sila makapanganak sang kaliwat nga ginsaad sang Dios kay Abraham.—wp17.3, p. 14-15.

Ano nga pamaagi ang gingamit ni Elias Hutter sa mga gusto makatuon sang Hebreo?

Luyag niya nga mahibaluan sang mga estudyante ang kinatuhayan sang orihinal nga Hebreo nga tinaga sa Biblia kag ang ginadugang nga mga prefix ukon suffix. Amo nga gin-imprinta niya ang orihinal nga tinaga sa masiri nga mga letra, pero ang mga prefix kag suffix indi masiri. Amo man sini ang ginhimo sa mga footnote sang New World Translation of the Holy Scriptures—With References.—wp17.4, p. 11-12.

Ano ang mga dapat binagbinagon sang isa ka Cristiano kon magpanag-iya sia sang armas bilang proteksion sa malain nga mga tawo?

Amo ini: Sagrado para sa Dios ang kabuhi. Wala ginpalig-on ni Jesus ang iya mga sumulunod nga amligan ang ila kaugalingon paagi sa espada. (Luc. 22:36, 38) Dapat salsalon naton ang aton mga espada para mangin mga punta sang arado. Mas importante ang kabuhi sangsa materyal nga mga butang. Ginarespeto naton ang konsiensia sang iban, kag gusto naton nga mangin maayo nga halimbawa. (2 Cor. 4:2)—w17.07, p. 31-32.

Ngaa indi pareho ang rekord ni Mateo sa rekord ni Lucas parte sa kabuhi ni Jesus sang bata pa sia?

Nagpokus si Mateo kay Jose, kon ano ang reaksion ni Jose sa pagbusong ni Maria, kag ang mensahe sang Dios nga dapat magpalagyo sa Egipto kag magbalik man sa ulihi. Nagpokus si Lucas kay Maria; halimbawa, ang pagkadto ni Maria kay Elisabet kag ang reaksion niya sang nagpabilin ang bata nga si Jesus sa templo.—w17.08, p. 32.

Ano nga mga hangkat ang dapat atubangon sang Biblia para makapadayon ini?

Nagbag-o ang kahulugan sang mga tinaga kag ekspresyon nga gingamit sa Biblia sa pagligad sang tion. Naapektuhan ang komon nga lenguahe bangod sang pagbulosbulos sang mga gumalahom. May pagpamatok sa pag-translate sang Biblia sa komon nga mga lenguahe.—w17.09, p. 19-21.

May anghel de la guardia bala kita?

Wala. Si Jesus nagsiling nga makita sang mga anghel sang iya mga disipulo ang nawong sang Dios. (Mat. 18:10) Buot niya silingon nga ang mga anghel interesado sa iya mga disipulo, indi nga ginaamligan nila ang tagsa niya ka disipulo paagi sa milagro.—wp17.5, p. 5.

Ano ang pinakaimportante nga sahi sang gugma?

Ang a·gaʹpe amo ang pinakaimportante nga sahi sang gugma kay nabase ini sa husto nga mga prinsipio. Nalakip sa sini ang pagpakita sang pagpalangga. Ginapakita man sini ang mataas nga mga prinsipio, pareho sa pagbulig sa iban nga wala nagapaabot sing balos.—w17.10, p. 7.