1. Ano ang ginalauman ni Marta nga matabo sa iya utod? (Tan-awa ang piktyur sa umpisa sini nga artikulo.)

SI Marta, nga suod nga abyan kag disipulo ni Jesus, nagapangasubo kay napatay ang iya utod nga si Lazaro. May makapaumpaw bala sa iya? Huo. Ginpasalig sia ni Jesus: “Ang imo utod mabanhaw.” Mahimo nga wala sini madula ang iya kasubo, pero napalig-on sia ni Jesus. Si Marta nagsiling: “Nakahibalo ako nga mabanhaw sia sa tion sang pagkabanhaw sa katapusan nga adlaw.” (Juan 11:20-24) Kumbinsido sia nga matabo ini sa palaabuton. Pero naghimo sing milagro si Jesus. Ginbanhaw niya si Lazaro sina mismo nga adlaw.

2. Ngaa gusto mo nga mangin pareho ang imo pagpati kay Marta?

² Indi naton mapaabot nga maghimo subong sini nga milagro si Jesus ukon ang iya Amay. Pero, kumbinsido ka man bala pareho ni Marta nga banhawon sa palaabuton ang imo pinalangga? Mahimo nga napatay ang imo tiayon, ang imo iloy, ang imo amay, ukon ang imo pinalangga nga lolo ukon lola. Ukon mahimo nga nagapangasubo ka sa pagkapatay sang imo bata. Nahidlaw ka sa imo pinalangga nga hakson sia, istoryahon, kag magkadlaw upod sa  iya. Maayo lang kay pareho ni Marta, makasiling ka nga, ‘Nakahibalo ako nga mabanhaw ang akon pinalangga sa tion sang pagkabanhaw.’ Pero makabulig sa tagsa ka Cristiano nga binagbinagon ang mga pamatuod sining aton pagpati.

3, 4. Paano mahimo napalig-on ang pagpati ni Marta sa bag-o lang nga ginhimo ni Jesus?

³ Mahimo nga wala nasaksihan ni Marta ang pagbanhaw ni Jesus sang anak sang balo malapit sa Nain sa Galilea kay nagaistar sia malapit sa Jerusalem. Pero mahimo nga nabalitaan niya ini. Ginbanhaw man ni Jesus ang anak nga babayi ni Jairo. Ang mga tawo nga yara sa balay sang dalagita ‘nakahibalo nga patay na sia.’ Pero gin-uyatan ni Jesus ang iya kamot kag nagsiling: “Inday, bangon ka!” Kag nagbangon dayon sia. (Luc. 7:11-17; 8:41, 42, 49-55) Nahibaluan ni Marta kag sang utod sini nga si Maria nga mapaayo ni Jesus ang mga nagabalatian. Amo kon ngaa nga nagapati sila nga kon ara lang si Jesus, wala kuntani mapatay si Lazaro. Pero bangod patay na ang pinalangga nga abyan ni Jesus, ano ang ila ginapaabot? Talupangda nga nagsiling si Marta nga banhawon si Lazaro sa palaabuton, “sa katapusan nga adlaw.” Ngaa sigurado sia parte sa sini? Kag paano naton mapat-od nga may pagkabanhaw sa palaabuton kag nga malakip sa sini ang aton mga pinalangga?

⁴ May mga pamatuod sa aton ginapatihan. Binagbinagon naton ang pila sini. Mahimo nga may pila ka punto sa Pulong sang Dios nga wala mo pa marealisar nga makapabakod sang imo pagtuo nga mabanhaw ang imo mga pinalangga.

5. Ngaa kumbinsido si Marta nga mabanhaw si Lazaro?

⁵ Talupangda nga wala magsiling si Marta: ‘Tani banhawon ang akon utod.’ Sa baylo, nagsiling sia: “Nakahibalo ako nga mabanhaw sia.” Kumbinsido si Marta bangod sang mga milagro nga iya nahibaluan bisan antes magsugod si Jesus sa iya ministeryo. Natun-an niya ini sang pamatan-on sia kay ginatudlo ini sa ila puluy-an kag sa sinagoga. Binagbinagon naton ang tatlo sini nga hitabo nga ginsambit sa Kasulatan.

6. Ano nga milagro ang nahibaluan ni Marta?

⁶ Natabo ang una nga pagkabanhaw sang ginhatagan sang Dios si manalagna Elias sing gahom para makahimo sing mga milagro. Sa naaminhan sang Israel, gin-abiabi ang manalagna sang isa ka imol nga balo nga babayi sa banwa sang Sarepta nga sakop sang Fenicia. Paagi sa milagro sang Dios, wala maubos ang harina kag lana sang balo, amo nga nabuhi sila sang iya anak. (1 Hari 17:8-16) Sang ulihi, nagbalatian ang iya anak kag napatay. Ginbuligan sia ni Elias. Samtang ginakaptan ang bata, si Elias nangamuyo: “O Jehova nga akon Dios, palihug ibalik ang kabuhi sang bata.” Kag natabo gid ini! Ginpamatian sang Dios si Elias, kag nabuhi ang bata. Amo ini ang una nga pagkabanhaw nga ginrekord sa Biblia. (Basaha ang 1 Hari 17:17-24.) Pat-od gid nga nahibaluan ni Marta ining tumalagsahon nga hitabo.

7, 8. (a) Ipaathag kon ano ang ginhimo ni Eliseo para madula ang kasubo sang babayi. (b) Ano ang ginapamatud-an sang milagro ni Eliseo parte kay Jehova?

⁷ Ang ikaduha nga pagkabanhaw nga ginrekord sa Kasulatan amo ang ginhimo sang nagbulos kay Elias nga si manalagna Eliseo. Gin-abiabi gid sang isa ka prominente nga Israelinhon nga babayi sa Sunem si Eliseo. Bangod sang ginpakita nga kaayo sang baw-as nga babayi kag sang iya tigulang nga bana sa manalagna, ginhatagan sila sang Dios sing anak. Pila ka tuig sang ulihi, napatay ang bata. Handurawa kon daw ano ang kasubo sang iloy. Gintugutan sang bana  ang iya asawa nga maglakbay sing mga 30 ka kilometro pakadto kay Eliseo sa Bukid Carmel. Ginpauna sang manalagna ang iya alagad nga si Gehazi sa Sunem. Wala mabanhaw ni Gehazi ang bata. Nag-abot sang ulihi ang masinulub-on nga iloy upod kay Eliseo.—2 Hari 4:8-31.

⁸ Nagsulod si Eliseo sa balay sa Sunem diin yara ang patay nga bata, kag nangamuyo sia. Paagi sa milagro, nabuhi ang bata kag nalipay gid ang iya iloy! (Basaha ang 2 Hari 4:32-37.) Mahimo nga nadumduman sang iloy ang pangamuyo ni Hana sang gindala sini si Samuel para mag-alagad sa tabernakulo: “Ginadala [ni Jehova] ang tawo sa Lulubngan, kag ginakuha niya ang tawo didto.” (1 Sam. 2:6) Paagi sa pagbanhaw sang bata sa Sunem, ginpamatud-an sang Dios nga may ikasarang sia sa pagbanhaw.

9. Ipaathag kon paano si Eliseo nadalahig sa ikatlo nga pagbanhaw nga ginsambit sa Biblia.

⁹ Pero indi lang amo sini ang makatilingala nga hitabo nga nagdalahig kay Eliseo. Nangin manalagna sia sa masobra 50 ka tuig, pero “nagmasakit [sia] sing grabe nga ginkamatay niya sang ulihi.” Pagligad sang tion, tul-an na lang ang nabilin sa iya bangkay. Isa ka adlaw, may pila ka Israelinhon nga malubong kuntani sang isa ka tawo pero nagsalakay ang mga kaaway. Bangod gusto nila nga makapalagyo sa mga kaaway, ginhaboy na lang nila sa lulubngan ni Eliseo ang patay. Ang Biblia nagasiling: “Pagtupa sang patay nga tawo sa mga tul-an ni Eliseo, nabuhi ang tawo kag nagtindog.” (2 Hari 13:14, 20, 21) Daku gid ang epekto kay Marta sining mga hitabo sa Biblia parte sa pagkabanhaw! May gahom gid ang Dios sa pagdula sang kamatayon. Kag hunahunaa kon ano man ang epekto sini sa imo. Dapat mangin kumbinsido ka nga tuman gid ka gamhanan ang Dios.

10. Paano ginbuligan ni Pedro ang isa ka Cristiano nga babayi sang napatay ini?

¹⁰ Sa Cristianong Griegong Kasulatan, mabasa man naton ang mga pagbanhaw nga ginhimo sang matutom nga mga alagad sang Dios. Maathag ini sang may ginbanhaw si Jesus malapit sa Nain kag sa puluy-an ni Jairo. May ginbanhaw man si apostol Pedro. Ginbanhaw niya si Dorcas (Tabita) nga isa ka Cristiano. Ginkadtuan niya ang nahamyangan ni Dorcas. Nangamuyo si Pedro sang makapalapit sia sa bangkay. Dayon nagsiling sia: “Tabita, magbangon ka!” Nabuhi sia dayon, kag ‘ginpakita ni Pedro nga buhi na’ si Tabita sa mga masigka-Cristiano. Matuod ini nga natabo amo nga “madamo ang nangin tumuluo sa Ginuo.” Masugid nila sa iban ang maayong balita parte kay Jesus kag ang ikasarang ni Jehova nga magbanhaw.—Binu. 9:36-42.

11. Ano ang ginreport sang manugbulong nga si Lucas parte sa isa ka pamatan-on, kag ano ang reaksion sang iban parte sa sini?

¹¹ May pila nga nakasaksi sang isa pa ka pagkabanhaw. Isa ka bes, nagtambong si apostol Pablo sa isa ka miting nga ginhiwat sa kuarto sa ibabaw didto sa Troas, nga nahamtang subong sa aminhan-katundan nga bahin sang Turkey. Namulongpulong si Pablo asta sa tungang gab-i. Nagapamati ang pamatan-on nga si Eutico nga nagapungko sa bintana. Pero natulugan sia kag nahulog halin sa ikatlo nga panalgan. Mahimo nga si Lucas, nga isa ka manugbulong, amo ang una nga nakapalapit kay Eutico kag gin-usisa ini: Si Eutico wala lang nahalitan kag nalipong kundi napatay gid sia! Nanaug si Pablo kag ginhakos niya ang bangkay, kag dayon nagsiling: “Buhi sia.” Daku gid ang epekto sini sa mga nakasaksi! Bangod nahibaluan nila ang natabo nga pagkabanhaw, “nalipay gid sila.”—Binu. 20:7-12.

12, 13. Kon parte sa pagkabanhaw, ano nga mga pamangkot ang binagbinagon naton?

¹² Ang mga hitabo nga ginsambit bag-o lang pat-od nga magahatag sa imo sing paglaum pareho ni Marta. Makasalig gid kita nga ang aton Dios kag Manughatag sing Kabuhi makasarang sa pagbanhaw. Ang matutom nga mga alagad sang Dios, pareho nanday Elias, Jesus, ukon Pedro, yara mismo sang naghimo sing milagro si Jehova. Pero kamusta naman ang mga napatay sa iban nga tion nga wala sing ginbanhaw? Makatuo man bala ang matutom nga mga alagad sang Dios nga banhawon sang Dios ang mga patay sa palaabuton? Magabatyag man bala sila pareho ni Marta, nga nagsiling: “Nakahibalo ako nga mabanhaw [ang akon utod] sa tion sang pagkabanhaw sa katapusan nga adlaw”? Ngaa makapati si Marta sa sini, kag ngaa makapati ka man pareho sa iya?

¹³ May pila ka teksto sa Pulong sang Dios nga nagapakita nga nahibaluan sang matutom nga mga alagad ni Jehova nga may pagkabanhaw sa palaabuton. Binagbinagon naton ini.

14. Ano ang matun-an naton sa natabo kay Abraham kon parte sa pagkabanhaw?

¹⁴ Talupangda kon ano ang ginsiling sang Dios kay Abraham nga himuon niya kay Isaac, ang madugay na nga ginahulat nga manunubli. Si Jehova nagsiling: “Dalha palihug ang imo anak, ang imo bugtong nga anak nga si Isaac nga imo gid ginahigugma, kag . . . ihalad mo sia . . . bilang dulot nga sinunog.” (Gen. 22:2) Handurawa kon ano ang ginabatyag ni Abraham sa sini nga sugo. Nagsaad si Jehova nga paagi sa kaliwat ni Abraham pakamaayuhon ang tanan nga pungsod. (Gen. 13:14-16; 18:18; Roma 4:17, 18) Nagsiling man si Jehova nga ang kaliwat “magahalin kay Isaac.” (Gen. 21:12) Pero paano ini matabo kay ihalad sia ni Abraham? Gintuytuyan sang Dios si Pablo sa pagpaathag nga si Abraham nagapati nga mabanhaw sang Dios si Isaac. (Basaha ang Hebreo 11:17-19.) Ang Biblia wala magsiling nga naghunahuna si Abraham nga kon magtuman sia, banhawon na dayon si Isaac sa sulod lang sang pila ka oras, isa ka adlaw, ukon isa ka semana. Wala makahibalo si Abraham kon san-o banhawon ang iya anak. Pero nagasalig sia nga banhawon ni Jehova si Isaac.

15. Ano ang paglaum sang patriarka nga si Job?

¹⁵ Nagalaum man ang patriarka nga si Job nga may pagkabanhaw sa palaabuton. Nahibaluan niya nga kon utdon ang kahoy, mahimo nga manalingsing ini liwat kag magadabong. Pero indi amo sini ang tawo. (Job 14:7-12; 19:25-27) Kon mapatay ang  isa, indi niya mabanhaw ang iya kaugalingon. (2 Sam. 12:23; Sal. 89:48) Pero indi buot silingon nga indi sia mabanhaw sang Dios. Ang matuod, nagapati si Job nga si Jehova magatalana sing tion nga dumdumon sia. (Basaha ang Job 14:13-15.) Wala makahibalo si Job kon san-o ini matabo. Pero nagsalig sia sa Isa nga nagtuga sang tawo nga dumdumon sia kag banhawon.

16. Ano ang ginpalig-on sang anghel kay manalagna Daniel?

¹⁶ Si Daniel isa man ka matutom nga tawo suno sa Hebreong Kasulatan. Mainunungon sia sa Dios sa bug-os niya nga kabuhi, kag ginsakdag sia ni Jehova. Isa ka bes, gintawag sang isa ka anghel si Daniel nga “hamili gid nga tawo,” kag ginsilingan nga “kabay pa nga may paghidait” sia kag dapat “magpakabakod.”—Dan. 9:22, 23; 10:11, 18, 19.

17, 18. Ano ang ginsaad kay Daniel parte sa iya palaabuton?

¹⁷ Si Daniel nagaedad na sing mga 100 ka tuig kag madali na lang mapatay. Mahimo nga nagapamensar sia kon ano ang iya mangin palaabuton. Mabuhi bala liwat si Daniel? Huo! Sa katapusan nga bahin sang libro ni Daniel, mabasa naton ang pasalig sang Dios sa iya: “Apang ikaw, magmalig-on ka tubtob sa katapusan. Magapahuway ka.” (Dan. 12:13) Nahibaluan sang tigulang na nga si Daniel nga ang patay nagapahuway, nga wala na sing “plano ukon ihibalo sa Lulubngan.” Dali na lang nga amo sini ang matabo sa iya. (Man. 9:10) Pero, indi ini ang katapusan para kay Daniel. Nagsaad sa iya si Jehova sing makalilipay nga paglaum sa palaabuton.

¹⁸ Ang mensahe kay manalagna Daniel nagpadayon: “Magatindog ka para sa imo bahin sa katapusan sang mga adlaw.” Wala ginsiling kon san-o ini matabo ukon daw ano ini kadugay. Nahangpan ni Daniel nga mapatay sia kag magapahuway. Pero ang pagsiling nga ‘magatindog sia para sa iya bahin’ nagapasalig sang pagkabanhaw sa palaabuton. Matabo ini sa “katapusan sang mga adlaw.” Suno sa isa ka bersion sang Biblia nga Ang Pulong sang Dios, amo sini ang saad kay Daniel: “Pagabanhawon ka sa katapusan nga mga inadlaw.”

19, 20. (a) Ano ang labot sang mga hitabo nga nabinagbinag na naton sa ginsiling ni Marta kay Jesus? (b) Ano ang binagbinagon naton sa masunod nga artikulo?

¹⁹ May basihan gid si Marta sa pagpati nga “mabanhaw [ang iya matutom nga utod nga si Lazaro] sa tion sang pagkabanhaw sa katapusan nga adlaw.” Amo man sini ang pagpati sang mga Cristiano subong. Ang ginhatag nga promisa kay Daniel kag ang mabakod nga kombiksion ni Marta sa sabat niya kay Jesus maathag nga nagapakita nga may pagkabanhaw gid.

²⁰ Natun-an naton base sa matuod nga mga hitabo sang una nga may pagkabanhaw. Ginapaabot sang mga alagad sang Dios nga may matabo pa nga pagkabanhaw sa palaabuton. Pero may pamatuod bala nga natabo ang pagkabanhaw bisan madugay na ini nga ginpromisa? Kon matuod ini, magahatag pa ini sa aton sing dugang nga rason nga paabuton ini pareho ni Marta. Pero san-o ini matabo? Binagbinagon ini sa masunod nga artikulo.