MAY mga tion nga gingamit ini. Binagbinaga ang isa ka halimbawa. Ang Deuteronomio 24:14, 15 nagasiling: “Indi ninyo pagdayaan ang ginasuhulan nga trabahador nga pigado kag imol . . . , utod man ninyo sia ukon dumuluong nga pumuluyo sa inyo duta. . . . Kon [himuon ninyo] ini, magapanawag sia kay Jehova batok sa inyo, kag makasala kamo.”

Nakita malapit sa Asdod ang isa ka buka nga banga nga may nakasulat nga panumbungon nga natabo sang ikapito nga siglo B.C.E. Mahimo nga ginsulat ini para sa isa ka mangunguma nga kulang kuno ang nahatag nga patubas nga uyas. Amo ini ang nakasulat: “Pila na ka adlaw ang nagligad, pagkatapos matipon sang imo alagad [nagapatuhoy sa nagsumbong] ang patubas, ginkuha ni Hoshayahu nga anak ni Shobay ang kunop sang imo alagad. . . . Mapamatud-an sang tanan ko nga kaupod nga nagapangani sa nagatagiti nga init . . . nga matuod ang akon ginasugid. Wala ako sang nahimo nga sala. . . . Kon para sa gobernador indi niya obligasyon nga ibalik ang kunop sang imo alagad, palihug himua ini bangod sa imo kaluoy! Indi pagpabay-i nga wala sing kunop ang imo alagad.”

Ini nga panumbungon “wala lamang nagapakita nga determinado gid ang trabahador nga mabalik [ang iya kunop],” siling sang isa ka manunulat sa kasaysayan nga si Simon Schama. “Ginapakita man sini nga may nahibaluan parte sa mga kasuguan sa Biblia ang nagsumbong, ilabi na gid sa mga sugo nga makita sa Levitico kag Deuteronomio parte sa malain nga pagtratar sa mga imol.”