INI nga mga libro gintawag nga rainbow set. Sang gintan-aw ko ini, madamo ini sing mga retrato nga nanamian ko gid. Gani sugod sang bata pa ako, gusto ko na tun-an ang Biblia, ilabi na ang ginaunod sini nga mga libro.

Sang dali na lang madalahig ang India sa Bug-os Kalibutan nga Inaway II, gulpi lang nagbag-o ang akon kabuhi. Nagbulagay ang akon mga ginikanan kag sang ulihi nagdiborsio. Indi ko mahangpan kon ngaa mabulagay ang duha ko ka pinalangga. Nasubuan gid ako kag nagbatyag nga ginsikway. Bugtong ako, gani gusto ko kuntani nga may magpaumpaw sa akon pero daw wala gid sing naghimo sini.

Nagaistar kami sadto ni Nanay sa Karachi, ang kapital sang probinsia. Isa ka adlaw, nagkadto sa amon balay si Fred Hardaker, isa ka tigulang na nga doktor nga Saksi ni Jehova. Pareho sila sing relihion sang misyonero nga naghatag sadtong mga libro sa akon pamilya. Gintanyagan niya si Nanay sing pagtuon sa Biblia. Nangindi si Nanay  pero nagsiling sia nga basi gusto ko. Pagkasunod nga semana, nagtuon ako sang Biblia upod kay Utod Hardaker.

Pila ka semana sang ulihi, nagtambong ako sa mga miting sa klinika ni Utod Hardaker. Mga 12 ka medyo may edad na nga Saksi ang nagtambong. Gin-atipan nila ako kag ginkabig nga ila anak. Nalipay gid ako kon madumduman ko nga gintuparan nila ako kag gin-istorya sing mainabyanon, kay kinahanglan ko gid yadto.

Wala magdugay, gin-upod ako ni Utod Hardaker sa pagministeryo. Gintudluan niya ako kon paano patokaron ang mga plaka sa radyo pono nga may malip-ot nga mga pamulongpulong sa Biblia. May pila ka pamulongpulong nga tama ka prangka, kag wala ini maluyagan sang pila ka tagbalay. Pero nalipay ako nga manaksi sa iban. Madamo ako sing natun-an sa Biblia kag gusto ko gid nga isugid ini sa iban.

Sang manugsalakay na ang Japan sa India, ang taga-Britanya nga mga awtoridad nga ara sa India naghingabot sa mga Saksi ni Jehova. Ginhingabot ako sang Hulyo 1943. Ginpahalin ako sang prinsipal sang eskwelahan, nga isa ka Anglikano nga klero. Ginsilingan niya si Nanay nga malain ang akon impluwensia sa iban nga estudyante kay nakig-upod ako sa mga Saksi ni Jehova. Naakig si Nanay, gani wala na niya ako ginpaupod sa mga Saksi. Ginpakadto niya ako sang ulihi kay Tatay sa Peshawar, isa ka banwa nga ang kalayuon mga 1,370 ka kilometro pa aminhan. Nagluya ako sa espirituwal kay wala na ako sing espirituwal nga pagkaon kag indi na makapakig-upod sa mga kauturan.

Sang 1947, nagbalik ako sa Karachi para mangita sing obra. Sang didto na ako, ginkadtuan ko ang klinika ni Dr. Hardaker. Gin-abiabi gid niya ako.

“Nagamasakit ka?” pamangkot niya, kay abi niya mapabulong ako.

“Wala, Dok,” sabat ko. “Gusto ko lang magtuon sa Biblia.”

“San-o?” pamangkot niya.

“Kon puede subong na,” sabat ko.

Nagtuon kami sa Biblia sina nga gab-i. Naumpawan gid ako kay kaupod ko liwat ang katawhan ni Jehova. Ginpunggan gid ako ni Nanay sa pagpakig-upod sa mga Saksi, pero wala na ako magpapugong. Sang Agosto 31, 1947, nagpabawtismo ako bilang simbulo sang akon dedikasyon kay Jehova. Nangin regular payunir ako sang 17 anyos ako.

Ang una ko nga asaynment bilang payunir amo ang Quetta, isa ka kampo sadto sang mga militar sang Britanya. Sang 1947, gintunga ang pungsod sang India, nangin India ini kag Pakistan. * Bangod sini, naglapnag ang kasingki sa relihion, amo nga natabo ang pinakamadamo nga pagsaylo sa kasaysayan. Mga 14 milyones ang nangin refugee. Ang mga Muslim sa India nagsaylo sa Pakistan, samtang ang mga Hindu kag mga Sikh sa Pakistan nagsaylo sa India. Sa sining kinagamo, nagkabit na lang ako sa kargado na katama nga tren halin sa Karachi pa Quetta.

Nagkilalahay kami ni George Singh sa Quetta, isa ka espesyal payunir nga mga beintehon. Ginhatagan niya ako sing daan nga bisikleta para sakyan ko (ukon habayon) kon taklaron ang teritoryo. Pirme ako nga nagaisahanon kon magbantala. Sa sulod sang anom ka bulan, may 17 ako ka pagtuon sa Biblia, kag ang pila sa ila nagbaton sang kamatuoran. Ang isa sa ila amo si Sadiq Masih nga isa ka opisyal sang soldado. Ginbuligan niya kami ni George nga i-translate ang pila ka literatura sang Biblia sa Urdu, ang pungsudnon nga lenguahe sang Pakistan. Nangin mapisan nga manugbantala sang maayong balita si Sadiq.

Sang ulihi, nagbalik ako sa Karachi kag nangin kaupod ko sanday Henry Finch kag Harry Forrest, bag-o nga mga misyonero halin sa Gilead School. Maayo gid ang paghanas nila sa akon! Isa ka bes, nag-upod ako kay Utod Finch sa pagbantala sa naaminhan sang Pakistan. Didto sa kunsaran sang mataas nga mga kabukiran, madamo kami sing nabantalaan nga nagahambal sing Urdu nga gusto  magtuon sang Biblia. Duha ka tuig sang ulihi, nag-eskwela ako sa Gilead; nagbalik ako sa Pakistan kag nangin part-time nga manugtatap sang sirkito. Nangin misyonero ako sa Lahore upod sa tatlo pa ka misyonero.

Sang 1954, nagginamo ang mga misyonero sa Lahore amo nga ginsaylo sang branch office ang pila sa ila. Ginsabdong ako bangod may gindampigan ako. Nasubuan gid ako kag ginbasol ko ang akon kaugalingon. Nagpauli ako sa Karachi kag sang ulihi, nagpa-London, England, para makasugod liwat sa pag-alagad.

Sang didto ako sa London, madamo nga miembro sang pamilya Bethel ang nangin kaupod ko sa kongregasyon. Ginhanas ako sing maayo ni Pryce Hughes, ang branch servant. Isa ka adlaw, ginsugiran niya ako sang isa ka bes nga ginlaygayan sia ni Joseph F. Rutherford, ang nagadumala sadto sang pagbantala sa bilog nga kalibutan. Sang magrason si Utod Hughes, ginsabdong sia ni Utod Rutherford. Nakibot ako sang nagyuhum si Utod Hughes. Nagsiling sia nga sang primero naakig sia. Pero narealisar niya sang ulihi nga dapat gid man sia laygayan kag pagpakita yadto sang gugma ni Jehova. (Heb. 12:6) Nabuligan ako sang iya ginsugid para mangin malipayon liwat sa pag-alagad.

Nagsaylo man ang akon iloy sa London kag nagtuon sang Biblia upod kay John E. Barr, nga nangin miembro sang ulihi sang Nagadumala nga Hubon. Nag-uswag sia kag ginbawtismuhan sang 1957. Nahibaluan ko sang ulihi nga nagtuon man gali si Tatay upod sa mga Saksi ni Jehova antes sia mapatay.

Sang 1958, ginpangasawa ko si Lene, isa ka sister nga taga-Denmark nga nagpuyo sa London. Pagkadason nga tuig, nagbata sia kay Jane, ang subang sa lima namon ka kabataan. Nakabaton man ako sing pribilehiyo sa Fulham Congregation. Pero sang ulihi, dapat kami magsaylo sa medyo mainit sing klima nga lugar kay naglain ang panglawas ni Lene. Gani sang 1967, nagsaylo kami sa Adelaide, Australia.

Ang amon kongregasyon sa Adelaide may 12 ka tigulang nga hinaplas nga mga Cristiano. Mapisan sila magbantala. Nakapasibu kami dayon kag nangin maayo ang amon espirituwalidad.

Sang 1979, nalipay kami ni Lene sang ginbata niya si Daniel, ang amon ikalima nga bata. May Down  syndrome * sia kag malip-ot lang ang iya kabuhi. Nabudlayan ako gihapon subong sa paglaragway sang kasubo namon. Gin-atipan gid namon sia, pero wala man namon ginpabay-an ang amon apat pa ka kabataan. May duha ka buho ang tagipusuon ni Daniel. Kon kaisa nagapalanggit-om sia amo nga dalidali namon sia nga ginadala sa ospital. Pero bisan masakiton, maalam sia kag mapinalanggaon. Palangga man niya si Jehova. Kon mangamuyo kami antes magkaon, ginatakop niya ang iya duha ka gamay nga palad, nagatangotango, kag naga-“Amen!” sing matunog. Makaon lang sia pagkatapos sini.

Sang apat ka tuig si Daniel, nagmasakit sia sing leukemia kag naggrabe. Nakapoy na kami ni Lene kag nasubuan gid. Pamatyag ko daw mabuang na ako. Pero sang nangin amo sini ang amon kahimtangan, ginduaw kami sang amon manugtatap sang sirkito nga si Neville Bromwich. Sina nga gab-i, nagahilibion kami tanan samtang nagahakos sia sa amon. Naumpawan gid kami sang iya mahigugmaon nga mga pinamulong. Nagpauli sia sang mga ala una sa aga. Napatay sang ulihi si Daniel. Grabe gid ang amon kasubo. Pero naghaganhagan ang amon ginabatyag kay nagasalig kami nga bisan ang kamatayon indi makapahamulag kay Daniel sa gugma ni Jehova. (Roma 8:38, 39) Nahidlaw na gid kami nga maupod sia kon banhawon sia sa bag-ong kalibutan sang Dios!—Juan 5:28, 29.

Gulang gihapon ako subong bisan na-stroke na sing duha ka beses. Bangod sang akon naeksperiensiahan, nangin maluluy-on ako sa iban, ilabi na sa mga may problema. Ginatinguhaan ko nga indi sila paghukman. Sa baylo, ginapamangkot ko ang akon kaugalingon: ‘Naapektuhan bala sang ila naeksperiensiahan ang ila balatyagon kag panghunahuna? Paano ko ipakita nga nagaulikid ako sa ila? Paano ko sila mapalig-on nga sundon ang mga dalanon ni Jehova?’ Nanamian gid ako mag-shepherding sa kongregasyon! Kay kon ginalugpayan ko kag ginapaumpawan ang iban sa espirituwal, amo man sini ang akon ginabatyag.

Pareho kami sing ginabatyag sang salmista nga nagsiling: “Sang nagdamo ang akon kabalaka, ginlugpayan kag ginpaumpawan [ako ni Jehova].” (Sal. 94:19) Ginsakdag niya ako sa madamo nga mga kabudlayan sa pamilya, sa mga paghingabot, sa personal nga mga problema, kag sa kasubo. Nangin Amay ko gid si Jehova!