Nabasa mo na bala sing maayo ang ulihi nga mga isyu sang Ang Lalantawan? Kon amo, tilawi kon masabat mo ang masunod nga mga pamangkot:

Ano ang apat ka panugda para mapanami naton ang aton pagkanta?

Dapat magtindog kita sing tadlong kag uyatan ang aton songbook sing iguigo lang kataas nga wala kita nagaduko. Dapat magginhawa kita sing nagakaigo. Dapat dakuon naton ang pagnganga sang aton baba, kag magkanta sing matunog.—w17.11, p. 5.

Ano ang masiling naton sa ginahamtangan sang mga siudad nga dalangpan sang Israel kag sa mga dalan nga nagaangot sa sini?

May anom ka siudad nga dalangpan sa bilog nga pungsod, nga mahapos kadtuan kay maayo ang mga dalan. Mahapos kag madasig makapalagyo pakadto diri ang isa ka tawo.—w17.11, p. 14.

Ngaa ang regalo sang Dios nga gawad paagi kay Jesus amo ang pinakahamili nga regalo nga mabaton naton?

Ginapuno sini ang aton handum nga mabuhi, kag nagaaman ini sang aton kinahanglanon para mahilway sa pagkaulipon sa sala kag kamatayon. Bangod palangga sang Dios ang mga kaliwat ni Adan, ginhatag niya si Jesus samtang makasasala pa kita.—wp17.6, p. 6-7.

Paano ginapatuhuyan sang Salmo 118:22 ang pagkabanhaw ni Jesus?

Si Jesus ginsikway nga Mesias kag ginpatay sia. Para mangin “pinakaimportante [sia] nga pamusod nga bato,” dapat sia banhawon.—w17.12, p. 9-10.

Kinamatarong lang bala sang panganay ang halinan sang katigulangan sang Mesias?

Indi pirme panganay ang katigulangan ni Jesus. Si David indi panganay ni Jesse; pero naghalin kay David ang Mesias.—w17.12, p. 14-15.

Ano ang pila ka prinsipio parte sa medisina nga makita sa Biblia?

Sa Kasuguan nga ginhatag kay Moises, may pila ka balatian nga dapat ipain ang mga nagamasakit. Dapat manghugas sang kamot ang mga nakatandog sang bangkay. Ang Kasuguan nga ginhatag kay Moises nagapatuman nga dapat ilubong ang higko sang tawo. Ang pagtuli dapat himuon sa ikawalo nga adlaw, kay madali na magtugon ang dugo.—wp18.1, p. 7.

Ngaa indi sala nga higugmaon naton ang aton kaugalingon sing nagakaigo?

Dapat higugmaon naton ang aton isigkatawo subong sang aton kaugalingon. (Mar. 12:31) Ang mga bana dapat “maghigugma sang ila asawa kaangay sang ila kaugalingon nga lawas.” (Efe. 5:28) Siempre, indi dapat pagpasobrahan ang paghigugma sa kaugalingon.—w18.01, p. 23.

Ano ang himuon naton para mag-uswag sa espirituwal?

Dapat tun-an naton sing maayo ang Pulong sang Dios, pamalandungan ini, kag iaplikar ang aton natun-an. Tugutan naton ang balaan nga espiritu nga mag-impluwensia sa aton tagipusuon kag hunahuna, batunon ang bulig sang iban, kag pasalamatan ini.—w18.02, p. 26.

Ngaa ang astrolohiya kag pagpamakot indi makasugid sang palaabuton?

Madamo sing rason, pero ang panguna gid nga rason amo nga ginapakamalaut ini sang Biblia.—wp18.2, p. 4-5.

Ngaa dapat gid naton kadtuan ang ginbaton naton nga pangagda?

Kon may ginbaton kita nga imbitasyon, dapat kadtuan naton ini magluwas lang kon may indi mapaiway nga kabangdanan. (Sal. 15:4) Mahimo naghanda na ang nag-agda sa aton.—w18.03, p. 18.

Ano ang matun-an sang mga tinangduan nga lalaki kay Timoteo?

Nagaulikid gid si Timoteo sa mga tawo kag ginauna niya ang espirituwal nga mga hilikuton. Mapisan sia sa sagrado nga pag-alagad kag ginaaplikar niya ang iya natun-an. Padayon sia nga naghanas kag nagsalig sa espiritu ni Jehova. Mailog sia sang mga gulang kag sang iban.—w18.04, p. 13-14.