Si Rehoboam anak ni Solomon, nga naggahom sa Israel sing 40 ka tuig. (1 Hari 11:42) Napatay si Solomon sang 997 B.C.E. Nagpaaminhan dayon si Rehoboam halin sa Jerusalem pakadto sa Siquem para itangdo nga hari. (2 Cron. 10:1) Mahimo nga nagaduhaduha sia sa pagsunod sa mga ginhimo ni Solomon, nga tuman kaalam. Wala magdugay, dapat pamatud-an ni Rehoboam nga maalam man sia sa pagsolbar sang isa ka mabudlay nga problema.

Mahimo nga nabatyagan ni Rehoboam ang matabo nga gamo sa Israel. Nagkadto sa iya ang mga representante sang katawhan kag ginsugid sa iya ang problema: “Ginpabug-atan kami sang imo amay. Apang kon pamag-anon mo ang mabudlay nga obra kag ang mabug-at nga lulan nga ginpahimo niya sa amon, magaalagad kami sa imo.”—2 Cron. 10:3, 4.

Nabudlayan gid si Rehoboam! Kon sundon niya ang luyag sang katawhan, dapat buhinan niya ang badyet sang iya pamilya kag sang mga nagaistar sa palasyo kag pamag-anon ang trabaho sang katawhan. Pero kon mangindi sia, mahimo magrebelde ang mga tawo. Ano ang iya himuon? Gin-istorya niya anay ang mga tigulang nga nagbulig sa iya amay. Pero nangayo man sia sang panugda sang mga kaedad niya. Ginsunod ni Rehoboam ang ila laygay kag namat-od sia nga pintasan ang katawhan. Sia nagsabat: “Pabug-aton ko pa ang inyo lulan, kag dugangan ko pa gid ini. Kon ginlatigo kamo sang akon amay, latiguhon ko kamo sing latigo nga may matalom nga mga metal.”—2 Cron. 10:6-14.

Ano ang leksion sini sa aton? Maayo gid nga mamati sa laygay sang mga hamtong sa espirituwal. Bangod sang ila eksperiensia, mahimo nila mahibaluan ang mangin resulta sang isa ka desisyon kag makalaygay sila sa aton kon ano ang maayo.—Job 12:12.

Bangod sang pagrebelde, gintipon ni Rehoboam ang iya mga soldado. Pero nagpasilabot si Jehova paagi kay manalagna Semaias, nga nagasiling: “Indi kamo magpakig-away sa inyo mga utod nga mga Israelinhon. Magpauli na kamo, kay ako ang nagpahanabo sini.”—1 Hari 12:21-24. *

Indi makig-away? Mahimo nga nabudlayan gid si Rehoboam nga himuon ini! Ano ang isiling sang mga tawo sa hari nga nagpamahog nga silutan niya ang iya mga sakop sing “latigo nga may matalom nga mga metal” nga wala sing ginhimo sa sini nga pagrebelde? (Ipaanggid ang 2 Cronica 13:7.) Pero “gintuman [sang hari kag sang iya mga soldado] ang ginsiling ni Jehova kag nagpauli sila, suno sa ginsiling ni Jehova.”

Ano ang leksion sini sa aton? Maayo gid nga sundon naton ang Dios bisan pa nga mahimo kita pakalainon. Kon tumanon naton ang Dios, kahamut-an niya kita kag pakamaayuhon.—Deut. 28:2.

Ano ang natabo kay Rehoboam? Wala sia makig-away sa bag-o natukod nga pungsod, kag nagkonsentrar sia sa pagtukod sing mga siudad sa mga teritoryo sang Juda kag Benjamin nga iya sakop. “Ginpabakod pa gid” niya ang pila ka siudad. (2 Cron. 11:5-12) Kag labaw sa tanan, may mga panahon nga ginsunod niya ang mga kasuguan ni Jehova. Sang nagsimba sa mga diosdios ang napulo ka tribo nga ginharian sang Israel nga ginagamhan ni Jeroboam, madamo sa ila ang ‘nagsakdag kay Rehoboam’ paagi sa pagkadto sa Jerusalem kag suportahan ang matuod nga pagsimba. (2 Cron. 11:16, 17) Gani bangod gintuman ni Rehoboam si Jehova, nagbakod ang iya ginharian.

Pero sang nagbakod na ang ginharian ni Rehoboam, may ginhimo sia nga wala ginapaabot. Ginbiyaan niya ang kasuguan ni Jehova kag nagsimba sa butig nga mga dios! Pero ngaa? Naimpluwensiahan bala sia sang iya iloy, nga isa ka Ammonhon? (1 Hari 14:21) Ano man ang rason, gin-ilog sia sang bilog nga pungsod. Gani gintugutan ni Jehova si Hari Sisak sang Egipto nga agawon ang madamo nga siudad sang Juda, bisan pa ginpabakod ni Rehoboam ang depensa sini!—1 Hari 14:22-24; 2 Cron. 12:1-4.

Naglain pa gid ang kahimtangan sang ginsalakay na ni Sisak ang Jerusalem, ang ginagamhan ni Rehoboam. Si manalagna Semaias nagdala sang mensahe sang Dios kay Rehoboam kag sa iya mga pangulo: “Ginbayaan ninyo ako, gani pabay-an ko man kamo sa kamot ni Sisak.” Ano ang reaksion ni Rehoboam sa sini nga disiplina? Maayo gid! Ang Biblia nagsiling: “Nagpaubos ang mga pangulo sang Israel kag ang hari, kag nagsiling sila: ‘Matarong si Jehova.’” Gani ginluwas ni Jehova si Rehoboam kag wala malaglag ang Jerusalem.—2 Cron. 12:5-7, 12.

Pagkatapos sini, padayon nga naggahom si Rehoboam sa nabagatnan nga ginharian. Antes sia mapatay, ginhatagan niya sing madamo nga dulot ang iya madamo nga anak para indi sila magrebelde sa ila utod nga si Abias, ang magabulos sa iya. (2 Cron. 11:21-23) Sa paghimo sini, nangin maalamon na si Rehoboam kon ipaanggid sadto.

Pero bisan pa nga may ginhimo nga maayo si Rehoboam, wala sia mahamut-an sang Dios. Ang Biblia nagsiling parte sa iya paggahom: “Ginhimo niya ang malain.” Ngaa? Bangod “wala sia magpamat-od sa iya tagipusuon nga pangitaon si Jehova.”—2 Cron. 12:14.

Ano ang matun-an naton kay Rehoboam? May mga kahimtangan nga gintuman niya ang Dios. May ginhimo sia nga maayo para sa pungsod ni Jehova. Pero wala sia makigsuod kay Jehova ukon nanikasog gid nga pahamut-an sia. Gani nagpakasala sia kag nasiod sang butig nga pagsimba. Mahimo mamangkot ka: ‘Sang ginsunod ni Rehoboam ang panuytoy sang Dios, ginhimo bala niya ini bangod sa impluwensia sang iban ukon bangod naghinulsol gid sia kag gusto niya nga pahamut-an  ang Dios?’ (2 Cron. 11:3, 4; 12:6) Sang ulihi, naghimo sia liwat sing malain. Tuhay gid sia sa iya lolo nga si Hari David. Huo, nakasala si David, pero makita sa iya pagkabuhi nga palangga niya si Jehova, matutom sia sa matuod nga pagsimba, kag naghinulsol gid sia sa iya mga sala.—1 Hari 14:8; Sal. 51:1, 17; 63:1.

May matun-an gid kita kay Rehoboam. Dapat naton amanan ang aton pamilya kag dapat mangin matutom kita sa pag-alagad kay Jehova. Pero indi pa ini bastante. Dapat simbahon naton ang Dios suno sa iya gusto, kag dapat may mabakod kita nga kaangtanan sa iya.

Mahimo naton ini kon may mabakod kita nga gugma kay Jehova. Pareho sa pagsugnod sang kahoy para magpadayon ini sa pagsiga, dapat pabakuron naton ang aton gugma sa Dios paagi sa regular nga pagtuon sang iya Pulong, pagpamalandong sang aton nabasa, kag pagpadayon sa pagpangamuyo. (Sal. 1:2; Roma 12:12) Ang gugma naton kay Jehova magapahulag sa aton nga pahamut-an sia sa tanan naton nga ginahimo. Magapahulag man ini sa aton nga maghinulsol kag mangayo sang pagpatawad ni Jehova kon makasala kita. Kag indi pareho ni Rehoboam, makapabilin kita nga matutom sa matuod nga pagsimba.—Jud. 20, 21.