Ang matuod, wala sing nakahibalo subong sang hitsura ni Pablo. Ang mga laragway sa aton mga publikasyon gindrowing lang sang mga artist, kay wala man sing mga nakutkutan ang mga arkeologo para basihan sini.

Pero, may mga reperensia nga nagahatag sing ideya sang posible nga hitsura ni Pablo. Halimbawa, ang Zion’s Watch Tower sang Marso 1, 1902, nagsiling: “Kon parte sa hitsura ni Pablo: . . . Sa ‘Acts of Paul and Thecla,’ . . . nga ginsulat sang mga A. D. 150, may paglaragway kay Pablo nga mahimo amo ang pinakamaayo kag pinakamalapit sa iya hitsura. Ginlaragway sia diri nga ‘putot, kalbo, baka, mabukod, nagasampok ang kilay; mataas ang ilong.’”

Ang The Oxford Dictionary of the Christian Church (1997 nga edisyon) nagsiling parte sa sining dumaan nga sinulatan: “May pila ka kamatuoran ang ginasiling sang ‘Acts.’” Ang The Acts of Paul and Thecla ginasaligan gid sang una nga mga siglo, kay may ara pa subong 80 ka Griego nga manuskrito sini, kag gin-translate ini sa iban nga lenguahe. Gani, ang gindrowing sang aton mga artist nga hitsura sang apostol malapit man sa paglaragway sang mga sinulatan sang una.

Pero, dumduma nga may iban pa nga butang nga mas importante sangsa hitsura ni Pablo. Sang ginahimo ni Pablo ang iya ministeryo, ang pila nga nagayaguta sa iya hitsura nagsiling nga “sa personal kinaandan lang sia kag wala sing pulos ang iya ginapanghambal.” (2 Cor. 10:10) Pero indi naton dapat pagkalimtan nga nangin Cristiano sia paagi sa milagro ni Jesus. Dumdumon man naton ang mga hinimuan ni Pablo bilang ‘tawo nga ginpili sang Cristo agod dalhon ang ngalan ni Jesus sa mga pungsod.’ (Binu. 9:3-5, 15; 22:6-8) Kag binagbinaga ang mga benepisyo nga aton makuha sa pagbasa sang mga libro sa Biblia nga ginsulat ni Pablo nga gintuytuyan ni Jehova.

Wala ginpabugal ni Pablo ang iya mga hinimuan antes sia nangin Cristiano; kag wala man niya ginlaragway ang iya hitsura. (Binu. 26:4, 5; Fil. 3:4-6) Nagsiling sia: “Ako ang labing kubos sa mga apostoles, kag indi ako takus tawgon nga apostol.” (1 Cor. 15:9) Nagsulat man sia sang ulihi: “Ining wala tupong nga kaayo ginhatag sa akon, nga pinakakubos sa tanan nga balaan, agod mapahayag ko sa mga pungsod ang maayong balita tuhoy sa indi matungkad nga kamanggaran sang Cristo.” (Efe. 3:8) Ini nga mensahe mas importante sangsa hitsura ni Pablo.