1, 2. (a) Ano ang ginahunahuna sang pila ka Cristianong ginikanan kon gusto sang ila bata magpabawtismo? (b) Ngaa ginapamangkot ang mga kandidato sa bawtismo kon bala nakadedikar na sila kay Jehova? (Tan-awa ang piktyur sa umpisa sini nga artikulo.)

ANG bata nga si Maria ginatan-aw sang iya mga ginikanan samtang nagatindog sia upod sa iban nga kandidato sa bawtismo. Ginsabat niya sing matunog kag maathag ang duha ka pamangkot sang humalambal. Wala magdugay, ginbawtismuhan sia.

² Nalipay gid ang mga ginikanan ni Maria kay nagdesisyon sia nga magdedikar kay Jehova kag magpabawtismo. Pero antes sini, medyo nabalaka ang iya iloy. Nagapamensar sia: ‘Masyado pa bala ka bata nga magpabawtismo si Maria? Nahangpan gid bala niya kon daw ano ka serioso ang magdedikar sang iya kaugalingon kay Jehova? Mas maayo bala kon indi lang anay sia magpabawtismo?’ Amo ini ang mga pamangkot nga ginahunahuna sang mahigugmaon nga mga ginikanan kon gusto sang ila bata nga magpabawtismo. (Man. 5:5) Kay man, pinakaimportante nga bahin sa kabuhi sang isa ka Cristiano ang magdedikar kag magpabawtismo. —Tan-awa ang kahon nga “ Nakadedikar Ka Na Bala kay Jehova?”

3, 4. (a) Paano gintudlo sa aton ni apostol Pedro nga importante ang pagpabawtismo? (b) Ngaa mapaanggid ang pagpabawtismo sa paghimo sang arka sang panahon ni Noe?

³ Ginpaanggid ni apostol Pedro ang bawtismo sa paghimo ni Noe sang arka. Sia nagsiling: “Ang katumbas sini amo ang bawtismo, nga nagaluwas man karon sa inyo.” (Basaha ang 1 Pedro 3:20, 21.) Ang arka maathag nga pamatuod nga ginhimo ni Noe ang kabubut-on sang Dios. Gintuman niya ang hilikuton nga ginhatag sa iya ni Jehova. Bangod sang pagtuo ni Noe, naluwas niya ang iya kaugalingon kag ang iya pamilya sa Baha. Ano ang gusto itudlo sa aton ni Pedro?

⁴ Subong nga ang arka amo ang pamatuod nga may pagtuo si Noe, ang pagpabawtismo sa atubangan sang mga tumalambong pamatuod man nga ang isa ka Cristiano nagdedikar na sang iya kaugalingon kay Jehova kay nagatuo sia sa ginbanhaw nga Cristo. Pareho ni Noe, ginatuman sang nakadedikar na nga mga Cristiano ang hilikuton nga ginhatag sa ila sang Dios. Subong nga si Noe naluwas sa Baha, ang matutom nga mga nabawtismuhan maluwas man kon laglagon ang malaut nga kalibutan. (Mar. 13:10; Bug. 7:9, 10) Ginapakita sini nga importante gid ang pagdedikar kag pagpabawtismo. Gani ang isa nga nagapangalag-ag sa pagpabawtismo mahimo indi makatigayon sing kahigayunan nga mabuhi sing dayon.

5. Ano ang binagbinagon naton sa sini nga artikulo?

⁵ Bangod serioso ang magpabawtismo, tatlo ka pamangkot ang dapat naton sabton. Ano ang ginasiling sang Biblia parte sa pagpabawtismo? Ano ang dapat himuon sang isa antes sia mabawtismuhan? Ngaa dapat naton pirme dumdumon kon daw ano ka importante ang pagpabawtismo samtang nagatudlo  kita sa aton bata ukon ginatudluan sang Biblia?

6, 7. (a) Ipaathag kon parte sa ano ang pagbawtismo ni Juan. (b) Ano nga pinasahi nga bawtismo ang ginhimo ni Juan?

⁶ Ang una nga tawo nga nabasa naton sa Biblia nga nagbawtismo sa iban amo si Juan nga Manugbawtismo. (Mat. 3:1-6) Ang iya mga ginbawtismuhan naghinulsol sang ila mga sala sa Mosaikong Kasuguan. Pero talalupangdon nga ang pinakaimportante nga pagbawtismo nga ginhimo niya wala sing labot sa paghinulsol. Pribilehiyo gid ni Juan nga mabawtismuhan si Jesus, ang himpit nga Anak sang Dios. (Mat. 3:13-17) Wala sing sala si Jesus, gani indi na kinahanglan nga maghinulsol sia. (1 Ped. 2:22) Ang iya pagpabawtismo nagapakita nga handa sia nga himuon ang kabubut-on sang Dios.—Heb. 10:7.

⁷ Sang magbantala na si Jesus, nagsugod sa pagbawtismo ang iya mga disipulo. (Juan 3:22; 4:1, 2) Pareho sang ginhimo ni Juan, ang mga ginbawtismuhan naghinulsol sa ila mga sala sa Mosaikong Kasuguan. Pero sa tapos mapatay si Jesus kag mabanhaw, tuhay na ang kahulugan sang bawtismo sa iya mga sumulunod.

8. (a) Pagkatapos nga mabanhaw si Jesus, ano ang iya ginsugo sa iya mga sumulunod? (b) Ipaathag kon ngaa dapat magpabawtismo ang isa ka Cristiano.

⁸ Sang 33 C.E., nagpakita si Jesus sa masobra 500 ka lalaki, babayi, kag mahimo lakip ang mga bata. Mahimo nga sa sini nga kahimtangan nga sia nagsiling: “Gani kadtui ninyo ang mga tawo sa tanan nga pungsod kag tudlui ninyo sila agod mangin disipulo ko. Bawtismuhi ninyo sila sa ngalan sang Amay kag sang Anak kag sang balaan nga espiritu. Tudlui ninyo sila nga tumanon ang tanan nga ginsugo ko sa inyo.” (Mat. 28:19, 20; 1 Cor. 15:6) Mahimo nga ginatos ka sumulunod ni Jesus ang nagapamati sang nagsugo sia nga tudluan ang mga tawo agod mangin disipulo niya. Gani ginpakita ni Jesus nga kinahanglan nga magpabawtismo ang isa para mangin disipulo niya, ukon matakod niya ang “gota” ni Jesus. (Mat. 11:29, 30) Kon luyag sang isa nga kahamut-an sang Dios ang iya pag-alagad, dapat batunon niya nga ginagamit ni Jehova si Jesus para himuon ang iya kabubut-on. Sa paghimo sini, puede na sia magpabawtismo. Amo lamang ini nga pagbawtismo sa tubig ang ginakahamut-an sang Dios. Madamo sing pamatuod sa Biblia nga sang unang siglo, nahangpan sang bag-o nga mga disipulo kon daw ano ka importante ang pagpabawtismo amo nga wala sila magpangalag-ag nga himuon ini.—Binu. 2:41; 9:18; 16:14, 15, 32, 33.

9, 10. Ano ang matun-an naton parte sa pagpabawtismo sang Etiopianhon nga proselita kag ni apostol Pablo?

⁹ Basaha ang Binuhatan 8:35, 36. Talupangda ang halimbawa sang Etiopianhon nga proselita nga nagapauli pagkatapos magsimba sa Jerusalem. Ginsugo si Felipe sang anghel ni Jehova amo nga ginpalapitan niya ang Etiopianhon kag “ginbantala niya sa iya ang maayong balita tuhoy kay Jesus.” Ano ang ginhimo sang Etiopianhon? Nagpasalamat gid sia sa mga kamatuoran nga iya natun-an kag gusto niya nga sundon ang kahimusan ni Jehova, amo nga nagpabawtismo dayon sia.

¹⁰ Ang ikaduha nga halimbawa amo ang isa ka Judiyo nga naghingabot sa mga Cristiano. Natawo sia sa isa ka pungsod nga gindedikar sa Dios. Pero nadula sang mga Judiyo ang ila pinasahi nga kaangtanan kay Jehova. Ginasunod gid sini nga tawo ang mga tradisyon sang Judaismo, pero nakatuon sia sing mas maayo nga dalanon.  Ginpanaksihan sia mismo sang ginbanhaw kag ginhimaya nga si Jesucristo. Ano ang iya ginhimo? Ginbaton niya ang bulig sang Cristianong disipulo nga si Ananias. Tuhoy sa sini nga tawo, ang Biblia nagasiling: “Dayon nagtindog sia kag ginbawtismuhan.” (Binu. 9:17, 18; Gal. 1:14) Mahimo nga nakilala mo nga ining Judiyo amo ang nakilal-an sang ulihi nga si apostol Pablo. Talupangda nga nanghikot dayon sia sang nahibaluan niya ang kamatuoran parte sa ginhimo ni Jesus sa katuyuan sang Dios. Nagpabawtismo sia dayon.—Basaha ang Binuhatan 22:12-16.

11. (a) Ano ang rason nga nagapabawtismo ang mga ginatudluan sang Biblia subong? (b) Ano ang ginabatyag naton kon may nagapabawtismo?

¹¹ Amo man sini ang nagakatabo sa mga ginatudluan sang Biblia subong, pamatan-on man sila ukon tigulang na. Ang mga nagatuo kag nalipay sa ila natun-an sa Biblia gusto nga magdedikar kag magpabawtismo. Ang pamulongpulong sa bawtismo importante gid sa kada asembleya kag kombension. Nalipay ang mga Saksi ni Jehova kon may ginatudluan sang Biblia nga magbaton sang kamatuoran kag magpabawtismo. Nalipay man ang Cristianong mga ginikanan kon himuon ini sang ila kabataan. Sang 2017 nga tuig sang pag-alagad, masobra sa 284,000 ka indibiduwal nga “may husto nga panimuot” ang nagdedikar kay Jehova kag nagpabawtismo. (Binu. 13:48) Nahangpan gid sining bag-o nga mga disipulo nga kinahanglan sang mga Cristiano nga magpabawtismo. Ano ang ila ginhimo para makapabawtismo?

12. Ano ang himuon sang mga ginatudluan sang Biblia antes sila mabawtismuhan?

¹² Antes mabawtismuhan ang isa nga ginatudluan sang Biblia, dapat pabakuron niya ang iya pagtuo paagi sa pagtigayon sang sibu nga ihibalo parte sa Dios, sa Iya katuyuan, kag sa Iya kahimusan kon paano luwason ang katawhan. (1 Tim. 2:3-6) Ini nga pagtuo magapahulag sa iya nga sikwayon ang mga buhat nga wala nagapahamuot sa Dios kag tumanon ang matarong nga mga talaksan ni Jehova. (Binu. 3:19) Importante ini kay indi makadedikar ang isa sa Dios kon may ginahimo sia nga indi takus sa Ginharian. (1 Cor. 6:9, 10) Pero indi bastante nga magsunod lang sa mataas nga mga talaksan ni Jehova sa moral. Ang mga gusto maghimo sang pagkamatarong dapat magtambong man sa mga miting sang kongregasyon kag makigbahin sing regular sa pagbantala kag pagtudlo sa mga tawo. Si Jesus nagsiling nga ining hilikuton himuon sang iya matuod nga mga disipulo. (Binu. 1:8) Amo sini ang dapat himuon sang isa. Pagkatapos, puede na niya madedikar ang iya kaugalingon kay Jehova paagi sa personal nga pangamuyo kag magpabawtismo.

13. Ngaa nga dapat dumdumon sang mga nagatudlo sa Biblia nga kinahanglanon ang bawtismo para mangin Cristiano?

¹³ Kon ginabuligan naton ang aton kabataan kag ang iban nga ginatudluan sang Biblia, dapat naton dumdumon nga ang mga gusto nga mangin matuod nga sumulunod ni Jesus kinahanglan magpabawtismo. Kon dumdumon naton ini, mapahulag kita nga makig-angot sing maayo sa aton mga ginatudluan sang Biblia. Indi kita magpangalag-ag nga ihambal sa ila sa nagakaigo nga tion kon daw ano ka importante ang dedikasyon kag bawtismo. Gusto naton nga mag-uswag ang aton kabataan kag ang iban nga ginatudluan sang Biblia asta nga magpabawtismo sila!

14. Ngaa nga indi naton dapat pagpiliton ang isa nga magpabawtismo?

¹⁴ Siempre, indi dapat pagpiliton sang ginikanan, manunudlo sang Biblia, ukon sang bisan sin-o sa kongregasyon ang isa nga magpabawtismo. Indi ini gusto ni Jehova. (1 Juan 4:8) Sa baylo, dapat naton itudlo sa aton ginatun-an kon daw ano ka importante  nga may personal sia nga kaangtanan sa Dios. Dapat nga ang iya apresasyon sa kamatuoran kag ang iya handum nga mangin Cristiano amo ang magapahulag sa iya nga magpabawtismo.—2 Cor. 5:14, 15.

15, 16. (a) May ginpat-od bala nga edad para magpabawtismo ang isa? Ipaathag. (b) Ngaa nga dapat magpabawtismo ang ginatudluan sang Biblia para mangin Saksi ni Jehova bisan pa nga nabawtismuhan na sia sa iban nga relihion?

¹⁵ Wala sing ginpat-od nga edad para magpabawtismo ang isa. Indi pareho ang kadasigon sang pag-uswag sang kada ginatudluan sang Biblia. Madamo ang nabawtismuhan nga bata pa, pero nagpabilin sila nga matutom kay Jehova. Ang iban tigulang na sang nakatuon sang kamatuoran sa Biblia kag nagpabawtismo, ang pila masobra sa 100 ka tuig!

¹⁶ Namangkot ang isa ka tigulang nga ginatudluan sang Biblia sa nagatudlo sa iya kon kinahanglan nga bawtismuhan sia liwat kay nakapabawtismo na sia sa iban nga relihion pila ka tuig ang nagligad. Ginbinagbinag nila nga duha ang mga teksto sa Biblia parte sa sini. Natun-an niya ang ginatudlo sang Biblia kag nagpabawtismo sia. Nahangpan na niya nga dapat sia magpabawtismo bisan manug-80 anyos na sia. Huo, ang matuod nga pagpabawtismo nabase sa sibu nga ihibalo sa kabubut-on sang Dios. Gani ang bag-o nga mga disipulo dapat magpabawtismo bisan pa nga nabawtismuhan na sila sa iban nga relihion.—Basaha ang Binuhatan 19:3-5.

17. Ngaa dapat mamalandong ang isa sa adlaw sang iya pagpabawtismo?

¹⁷ Makalilipay gid ang adlaw nga nabawtismuhan ang isa. Pero tion man ini nga dapat niya pamalandungan kon ano ang nadalahig sa iya pagpabawtismo. Kinahanglan ang daku nga pagpanikasog para mangin isa ka matuod nga Cristiano, amo kon ngaa nga ginpaanggid ini ni Jesus sa gota. Ang mga disipulo ni Jesus dapat “indi na magkabuhi para sa ila kaugalingon, kundi para sa iya nga napatay para sa ila kag ginbanhaw.”—2 Cor. 5:15; Mat. 16:24.

18. Ano nga mga pamangkot ang binagbinagon naton sa masunod nga artikulo?

¹⁸ Amo sini ang ginahunahuna sang iloy ni Maria sang namangkot sia sa umpisa sini nga artikulo. Kon ikaw isa ka ginikanan, mahimo napamangkot mo ang imo kaugalingon: ‘Handa na gid bala ang akon bata nga magpabawtismo? Bastante na bala ang iya ihibalo para magdedikar sa Dios? Dapat bala nga makatapos sia anay sa pag-eskwela kag makatrabaho antes magpabawtismo? Ano abi kon mabawtismuhan ang akon bata kag makasala sia sing serioso?’ Binagbinagon naton ini nga mga pamangkot sa masunod nga artikulo, kag hibaluon man naton kon paano matigayon sang mga ginikanan ang husto nga pagtamod parte sa pagpabawtismo.