1. Paano ginalaragway sang Biblia ang disiplina?

ANO ang imo ginapensar kon mabatian mo ang tinaga nga “disiplina”? Mahimo pensaron mo dayon ang pagsilot, pero indi lang amo sini. Sa Biblia, ang disiplina ginagamit sing positibo, kag kon kaisa ginalakip ini sa ihibalo, kaalam, gugma, kag kabuhi. (Hulu. 1:2-7; 4:11-13) Amo sini ang paggamit kay ginapakita sang Dios ang iya gugma sa aton kag ang iya handum nga matigayon naton ang kabuhi nga wala sing katapusan. (Heb. 12:6) Bisan pa nga kon kaisa nagalakip ini sang pagsilot, indi ini mapintas. Ang matuod, ang pinakaimportante nga kahulugan sang “disiplina” amo ang pagtudlo, pareho sang pagpadaku sa pinalangga nga bata.

2, 3. Paano nga ang pagdisiplina nagalakip sa pagtudlo kag pagsilot? (Tan-awa ang piktyur sa umpisa sini nga artikulo.)

² Binagbinaga ini nga halimbawa: Ang bata nga si Johnny nagahampang sing bola sa ila balay. Ang iya iloy nagsiling: “To, indi ka dapat maghampang sang bola sa sulod sang balay! Basi may mabuka ka.” Pero wala sia mamati sa ginhambal sang iya iloy, gani may nabuka sia nga plorera. Paano sia disiplinahon sang iya iloy? Tudluan sia kag silutan man. Sa pagtudlo sa iya, pahanumdumon sia sang iya iloy kon ngaa sala ang iya ginhimo. Tudluan sia kon  ngaa dapat tumanon ang iya mga ginikanan, kag kon ngaa dapat may kasuguan sila nga ihatag kag ini nga kasuguan indi mapintas. Para tudluan sia sing leksion, silutan sia sang iya iloy suno sa iya ginhimo. Halimbawa, mahimo nga indi niya anay pagpahampangon sing bola si Johnny para marealisar niya nga kon indi sia magtuman sa iya mga ginikanan, disiplinahon sia.

³ Bilang mga miembro sang kongregasyon, bahin kita sang panimalay sang Dios. (1 Tim. 3:15) Gani ginatahod naton ang kinamatarong ni Jehova nga maghatag sing mga talaksan kag magdisiplina sing mahigugmaon kon ginlapas naton ini. Dugang pa, kon malain ang mga resulta sang aton mga buhat, tudluan kita sang iya disiplina nga dapat sundon gid naton ang aton Amay sa langit. (Gal. 6:7) Palangga gid kita sang Dios kag gusto niya nga indi kita mag-antos.—1 Ped. 5:6, 7.

4. (a) Ano nga paghanas ang ginapakamaayo ni Jehova? (b) Ano ang binagbinagon naton sa sini nga artikulo?

⁴ Kon magdisiplina kita base sa mga prinsipio sa Biblia, mahanas naton ang aton bata ukon ang aton ginatudluan sang Biblia nga malab-ot ang tulumuron nga mangin sumulunod sang Cristo. Ang Pulong sang Dios amo ang panguna nga ginagamit naton sa paghanas, kag nagabulig ini sa aton “sa pagdisiplina sa pagkamatarong.” Gani mabuligan naton ang aton bata ukon ginatudluan sang Biblia nga mahangpan kag ‘tumanon ang tanan nga ginsugo ni Jesus sa aton.’ (2 Tim. 3:16; Mat. 28:19, 20) Ginapakamaayo ni Jehova ini nga paghanas kay ginabuligan sini ang mga ginatudluan sang Biblia nga magbulig sa iban para mangin disipulo man sang Cristo. (Basaha ang Tito 2:11-14.) Binagbinagon naton ang sabat sa tatlo ka importante nga pamangkot: (1) Paano ang disiplina sang Dios nagapakita nga palangga niya kita? (2) Ano ang matun-an naton sa mga gindisiplina sadto sang Dios? (3) Paano naton mailog si Jehova kag ang iya Anak kon nagadisiplina kita?

5. Paano ginapakita ni Jehova ang pagpalangga niya sa aton kon ginadisiplina kita?

⁵ Bangod sang gugma, ginatadlong, ginatudluan kag ginahanas kita ni Jehova para makapabilin kita nga suod sa iya kag mabuhi sing dayon. (1 Juan 4:16) Wala gid niya kita ginapakanubo ukon ginainsulto. (Hulu. 12:18) Kundi ginapabaloran niya kita paagi sa pagpokus sa maayo naton nga mga kinaiya kag pagtahod sa aton kinamatarong sa pagpili. Amo bala sini ang imo pagtamod sa pagdisiplina sang Dios, naghalin man ini sa iya Pulong, mga publikasyon base sa Biblia, mga ginikanan, ukon mga gulang sa kongregasyon? Ang mga gulang nga nagatinguha nga tadlungon kita sing malulo kag mahigugmaon bisan wala pa naton marealisar nga nakahimo kita sang “sayop nga tikang,” nagapakita sang gugma ni Jehova sa aton.—Gal. 6:1.

6. Paano ginapakita ang gugma sang Dios kon ang disiplina nagalakip sa pagdula sang pribilehiyo sang isa?

⁶ Pero kon kaisa, indi lang laygay ang pagdisiplina. Sa mas serioso nga mga sala, mahimo madula sang isa ang iya mga pribilehiyo sa kongregasyon. Bisan amo pa sini ang kahimtangan, ini nga pagdisiplina nagapakita gihapon sang gugma sang Dios sa aton. Halimbawa, kon nadula sang isa ang iya pribilehiyo, marealisar niya kon daw ano ka importante nga magtuon pa gid sia sa Biblia, magpamalandong, kag magpangamuyo. Kon himuon niya ini, magabakod pa gid ang iya espirituwalidad. (Sal. 19:7) Sa ulihi, mahimo mabalik liwat ang iya mga pribilehiyo. Makita man ang gugma ni Jehova bisan sa  pag-disfellowship, kay ginaamligan sini ang kongregasyon gikan sa malain nga mga impluwensia. (1 Cor. 5:6, 7, 11) Kag bangod ang Dios nagadisiplina sa nagakaigo nga paagi, mahangpan sang na-disfellowship kon daw ano ka serioso ang iya sala kag maghinulsol sia.—Binu. 3:19.

7. Sin-o si Sebna, kag ano ang malain niya nga kinaiya?

⁷ Para mahangpan naton kon daw ano ka importante ang pagdisiplina, binagbinagon naton ang duha ka tawo nga gindisiplina ni Jehova: si Sebna, nga nagkabuhi sang tion ni Hari Ezequias, kag si Graham, nga isa ka utod. Daku ang awtoridad ni Sebna kay “tulugyanan [sia] sa balay,” nga mahimo iya ni Ezequias. (Isa. 22:15) Pero nangin bugalon sia kag gusto niya nga dayawon. Nagpahimo pa gani sia sang malahalon nga lulubngan, kag nagasakay sia sa “mahimayaon nga mga kangga”!—Isa. 22:16-18.

8. Paano gindisiplina ni Jehova si Sebna, kag ano ang resulta?

⁸ Bangod gusto ni Sebna nga dayawon sia, ‘ginkuha sia sang Dios sa iya katungdanan’ kag ginbuslan sia ni Eliakim. (Isa. 22:19-21) Natabo ini sang gusto salakayon ang Jerusalem ni Hari Senaquerib sang Asiria. Sang ulihi, nagpadala ang hari sang mataas nga mga opisyales sa Jerusalem kag sang madamo nga soldado para pahugon ang mga Judiyo kag si Ezequias nga mag-ampo. (2 Hari 18:17-25) Si Eliakim ang ginpadala para mag-istorya sa mga opisyales, pero may upod sia. Duha ang nag-upod sa iya, kag ang isa amo si Sebna nga sekretaryo na lang subong. Maathag nga wala maglain ang buot ni Sebna kundi nagpaubos sia kag ginbaton ang mas manubo nga mga responsibilidad. Gani ano nga leksion ang aton matun-an sa sini? Binagbinagon naton ang tatlo.

9-11. (a) Anong importante nga mga leksion ang matun-an naton sa natabo kay Sebna? (b) Ano ang imo masiling sa pagpakig-angot ni Jehova kay Sebna?

⁹ Una, nadula ni Sebna ang iya posisyon. Ginapakita sang natabo sa iya nga “ang bugal nagauna sa pagkapukan, kag ang matinaastaason nga espiritu sa pagkasandad.” (Hulu. 16:18) Kon may mga pribilehiyo ka sa kongregasyon, kag basi pinasahi ini, tinguhaan mo bala nga mangin mapainubuson? Padunggan mo bala si Jehova sang imo mga ikasarang ukon sang imo nahimo? (1 Cor. 4:7) Si apostol Pablo nagsulat: “Ginasilingan ko ang tagsatagsa sa inyo nga indi kamo magpakataas sa inyo kaugalingon, kundi ipakita ninyo nga may maligdong kamo nga panghunahuna.”—Roma 12:3.

 ¹⁰ Ikaduha, maathag nga bisan pa ginsabdong ni Jehova si Sebna, nagalaum sia nga magabag-o pa si Sebna. (Hulu. 3:11, 12) Maayo ini nga leksion sa mga nadulaan sing pribilehiyo subong! Sa baylo nga maakig kag magsunggod, kabay nga manikasog gid sila sa pag-alagad sa Dios sa ila bag-o nga kahimtangan, kag kabigon nila ang disiplina bilang pamatuod sang gugma ni Jehova. Dumduma, padyaan kita sang aton Amay kon magpaubos kita sa iya. (Basaha ang 1 Pedro 5:6, 7.) Ang mahigugmaon nga pagdisiplina sang Dios makadihon sa aton kon magpaubos kita kag mangin pareho sa mahumok nga daga.

¹¹ Ikatlo, may leksion man nga makuha sa pagpakig-angot ni Jehova kay Sebna ang mga nagadisiplina, pareho sang mga ginikanan kag mga manugtatap. Ano ini? Bisan pa nga ginadumtan ni Jehova ang sala, nabalaka sia sa nakasala. Bilang ginikanan ukon manugtatap nga nagadisiplina, ilugon mo bala si Jehova paagi sa pagdumot sa sala nga nahimo pero nagakabalaka sa kaayuhan sang imo bata ukon masigkatumuluo?—Jud. 22, 23.

12-14. (a) Ano ang reaksion sang iban sa disiplina ni Jehova? (b) Paano nabuligan sang Pulong sang Dios ang isa ka utod nga bag-uhon niya ang iya panimuot, kag ano ang resulta?

¹² Pero, may pila nga gindisiplina nga naglain gid ang ila buot kag nagpalayo sila sa Dios kag sa iya katawhan. (Heb. 3:12, 13) Mabuligan pa bala sila? Binagbinaga si Graham, nga na-disfellowship, kag sang ulihi nagbalik, pero nag-untat sa pagbantala kag pagtambong sa mga miting. Pila ka tuig sang ulihi, ginpangabay niya ang gulang nga nakig-abyan sa iya nga tun-an sia sa Biblia.

¹³ Ang gulang nagsiling: “May problema si Graham parte sa bugal. Ginabasol niya ang mga gulang nga nag-disfellowship sa iya. Ginbinagbinag namon sa pila ka pagtuon ang mga teksto parte sa bugal kag ang epekto sini. Nakita sing maathag ni Graham ang iya kaugalingon sang mangispiho sia sa Pulong sang Dios, kag wala sia nanamian sang iya nakita! Talalupangdon gid ang iya pagbag-o! Ginbaton niya nga nabulag sia sang ‘balayan’ sang bugal kag problema gid niya ang iya pagpamasol. Regular sia nga nagtambong sa mga miting, gintun-an niya sing maayo ang Pulong sang Dios, kag adlaw-adlaw sia nga nagapangamuyo. Gintungdan man niya ang iya responsibilidad bilang ulo sang pamilya, kag nalipay gid ang iya asawa kag kabataan.”—Luc. 6:41, 42; Sant. 1:23-25.

¹⁴ Nagsiling pa ang gulang: “Isa ka adlaw, may ginsiling si Graham nga natandog gid ako. ‘Pila na ka tuig nga nahibaluan ko ang kamatuoran,’ siling niya, ‘kag nagpayunir pa gani ako. Pero subong lang ako makasiling nga palangga ko si Jehova.’ Wala magdugay, nangin microphone handler sia sa Kingdom Hall—kag ginpasalamatan gid niya ini nga pribilehiyo. Ang iya halimbawa nagtudlo sa akon nga kon magpaubos ang isa sa Dios kag batunon niya ang disiplina, matigayon niya ang bugana nga mga pagpakamaayo!”

15. Ano ang aton himuon kon gusto naton nga mangin epektibo ang aton disiplina?

¹⁵ Para mangin maayo nga mga manunudlo, dapat mangin maayo anay kita nga mga estudyante. (1 Tim. 4:15, 16) Gani ang ginhatagan ni Jehova sing awtoridad nga magdisiplina dapat magpasakop sing kinabubut-on sa iya panuytoy. Kon makita sang iban nga mapainubuson sila, tahuron sila kag mas mahapos nga batunon ang ila paghanas ukon pagtadlong sa iban. Binagbinaga ang halimbawa ni Jesus.

16. Ano ang matun-an naton kay Jesus parte sa maayo nga pagdisiplina kag pagpanudlo?

¹⁶ Ginatuman gid ni Jesus ang iya Amay bisan tuman pa ini kabudlay. (Mat. 26:39)  Kag ginpahanumdom niya sa iya mga tagpalamati nga ang iya mga panudlo kag kaalam halin sa iya Amay. (Juan 5:19, 30) Bangod mapainubuson kag matinumanon si Jesus, nangin maluluy-on sia kag maayo nga manunudlo amo nga nalipay ang sinsero nga mga tawo nga mag-upod sa iya. (Basaha ang Mateo 11:29.) Napalig-on ang mga naluyahan sing buot nga daw tabun-ak nga nadugmok ukon daw pabilo nga nagapiraw bangod sang iya maayo nga mga pinamulong. (Mat. 12:20) Bisan ginatilawan sia, mahigugmaon gihapon sia. Natabo ini sang gintadlong niya ang iya mga apostoles kay nangin makagod sila kag ambisyuso.—Mar. 9:33-37; Luc. 22:24-27.

17. Ano nga mga kinaiya ang makabulig sa mga gulang para maatipan nila sing maayo ang panong sang Dios?

¹⁷ Dapat ilugon sang mga gulang ang Cristo kon nagadisiplina sila paagi sa mga prinsipio sa Kasulatan. Ginapakita sini nga gusto nila dihunon sang Dios kag sang iya Anak. Si apostol Pedro nagsulat: “Bantayi ninyo ang panong sang Dios nga yara sa inyo pag-atipan, nga nagaalagad subong mga manugtatap, indi nga napilitan, kundi sing kinabubut-on sa atubangan sang Dios; indi tungod sa gugma sa mga bentaha, kundi sing malangkagon; wala nagapakaginuo sa mga ginapanag-iyahan sang Dios, kundi mangin mga halimbawa sa panong.” (1 Ped. 5:2-4) Ang mga gulang nga nalipay magpasakop sa Dios kag sa Cristo, ang ulo sang kongregasyon, makabenepisyo sa sini lakip ang ila mga ginaatipan.—Isa. 32:1, 2, 17, 18.

18. (a) Ano ang ginapaabot ni Jehova nga himuon sang mga ginikanan? (b) Paano buligan sang Dios ang mga ginikanan nga matuman ang ila mga responsibilidad?

¹⁸ Amo man sini nga mga prinsipio ang dapat himuon sa sulod sang pamilya. Ginsugo ang mga ulo sang pamilya: “Indi ninyo pagpaakiga ang inyo mga anak, kundi padayon sila nga padakua sa disiplina kag laygay ni Jehova.” (Efe. 6:4) Importante gid bala ini? Ang Hulubaton 19:18 nagasiling: “Disiplinaha ang imo anak samtang may paglaum pa, agod wala ka sing salabton sa iya kamatayon.” Huo, manabat ang mga ginikanan kay Jehova kon indi nila pagdisiplinahon ang ila bata! (1 Sam. 3:12-14) Pero hatagan ni Jehova ang mga ginikanan sing kaalam kag kusog kon mapainubuson nga mangayo sila sing bulig paagi sa pangamuyo, paagi sa iya Pulong, kag balaan nga espiritu.—Basaha ang Santiago 1:5.

19, 20. (a) Ano nga mga pagpakamaayo ang matigayon naton kon batunon naton ang disiplina sang Dios? (b) Ano ang binagbinagon naton sa masunod nga artikulo?

¹⁹ Madamo nga pagpakamaayo ang matigayon sang isa kon batunon niya kag ilugon ang pagdisiplina ni Jehova kag ni Jesus. Mangin malipayon kag may paghidait ang mga pamilya kag mga kongregasyon. Ang kada isa magabatyag nga ginapalangga gid, ginapabaloran, kag mangin kontento. Pila lang ini ka halimbawa sang mga pagpakamaayo nga matigayon naton sa palaabuton. (Sal. 72:7) Ginahanda kita sang disiplina ni Jehova nga mabuhi sing dayon sa paghidait kag paghiusa bilang isa ka pamilya sa idalom sang iya pag-atipan subong aton Amay. (Basaha ang Isaias 11:9.) Kon dumdumon naton ini, mahangpan naton kon ano gid ang disiplina: isa ka matahom nga paagi nga ginapakita sang Dios ang iya gugma sa aton.

²⁰ Sa masunod nga artikulo, matun-an pa gid naton ang pagdisiplina sa sulod sang pamilya kag sa kongregasyon. Binagbinagon man naton kon paano disiplinahon ang aton kaugalingon. Kag binagbinagon man naton ang isa ka butang nga mas masakit pa sa disiplina.