SANG Biernes sang aga sang Septiembre 1922, nagagin-ot sa sulod sang awditoryum nga puno sang 8,000 ka tawo. Ginpahibalo sang tsirman nga sa sining importante nga programa, puede makahalin ang gusto nga magua, pero indi na puede makasulod liwat.

Gin-umpisahan ini paagi sa “Praise Service” kag nagkanta sing mga ambahanon. Dayon nagpalapit si Joseph F. Rutherford sa podyum. Ginahawathawat ang kalabanan nga tumalambong. Ang pila nagalakatlakat nga daw indi mahim-os bangod sang kagin-ot. Ginpangabay sila ni Utod Rutherford nga magpungko kag magpamati. Samtang nagapamulongpulong sia, may nakatalupangod ayhan sang isa ka malaba nga telon nga nalukot sing mahipid kag nahigot sa ibabaw sang entablado?

“Ang ginharian sang langit malapit na” amo ang tema sang pamulongpulong ni Utod Rutherford. Naglawig ini sing mga isa ka oras kag tunga. Nagalanog ang iya mabaskog nga tingog samtang ginapaathag niya ang kaisog sang mga manalagna sang una nga ibantala ang nagapakari nga Ginharian. Sang malapit na sia matapos, namangkot sia, “Nagapati bala kamo nga ang mahimayaon nga Hari nagsugod na sa iya paggahom?” Ang mga tumalambong nagsabat sing mabaskog: “Huo!”

“Kon amo, balik kamo sa latagon, mga anak sang labing mataas nga Dios!” mabaskog nga siling ni Utod Rutherford. “Tan-awa, nagagahom na ang Hari! Kamo ang iya mga manugbantala. Gani, ibantala, ibantala, ibantala, ang Hari kag ang iya ginharian.”

Naghumlad dayon ang telon nga may nakasulat: “Advertise the King and Kingdom.”

“Nakunyag gid ang mga tumalambong,” hinumdom ni Ray Bopp. Ginlaragway ni Anna Gardner kon paano “ang mga balayan daw nag-uyog tungod sa palakpak.” “Dungan nga nagtindog ang mga tumalambong,” siling ni Fred Twarosh. Si Evangelos Scouffas nagsiling, “Daw may puersa nga nagpatindog sa amon, kag naglumawlumaw ang amon mga mata.”

Madamo nga tumalambong ang nagabantala na sang maayong balita sang Ginharian. Pero subong, mas nangin determinado sila nga magbantala. Ginsaysay ni Ethel Bennecoff nga ang mga Estudyante sang Biblia naglakat nga “nadugangan ang [ila] kakugi kag gugma.” Si Odessa Tuck, nga 18 anyos sadto, nagpauli halin sa kombension nga determinado nga sabton ang pangabay nga “Sin-o ang ipadala?” Nagsiling sia: “Wala ako kabalo kon diin ukon paano ukon ano ang ibantala. Ang nahibaluan ko lang amo nga gusto ko ilugon si Isaias, nga nagsiling: ‘Yari ako! Ipadala ako!’” (Isa. 6:8) “Atong indi malipatan nga adlaw,” siling ni Ralph Leffler, “amo gid ang umpisa sang pagbantala parte sa Ginharian nga naglapnag na sa bilog nga kalibutan.”

Indi katingalahan nga ining kombension sang 1922 sa Cedar Point, Ohio, isa ka importante nga  hitabo sa kasaysayan sang organisasyon sang Dios! Si George Gangas nagsiling: “Ato nga kombension nagpabaskog sang akon determinasyon nga indi gid magpalya sa pagtambong.” Sa iya madumduman, wala gid sia magpalya. Si Julia Wilcox nagsulat: “Indi ko malaragway ang akon kalipay kon ginasambit sa aton mga literatura ang natabo sa Cedar Point sang 1922. Luyag ko pirme isiling, ‘Salamat, Jehova, sa pribilehiyo nga makatambong didto.’”

Mahimo nga madamo sa aton subong ang may indi man malipatan nga mga eksperiensia sa kombension nga nagpahalipay sang aton tagipusuon kag nagdugang sang aton kakugi kag gugma para sa aton gamhanan nga Dios kag sa iya Hari. Samtang ginapamalandungan naton ini nga mga eksperiensia, makasiling man kita, “Salamat, Jehova, sa pribilehiyo nga makatambong didto.”