1. Sa Eden, ano ang ginsugid ni Jehova parte sa aton kaaway?

KABALO si Adan nga indi makahambal ang man-ug. Gani mahimo nga ginhunahuna niya nga gingamit lang sang isa ka espiritu nga tinuga ang man-ug sa pagsugilanon kay Eva. (Gen. 3:1-6) Indi kilala nanday Adan kag Eva ini nga espiritu. Pero mas ginpatihan pa ni Adan ang indi niya kilala kag nagrebelde sia sa iya mahigugmaon nga Amay sa langit. (1 Tim. 2:14) Naghatag gilayon si Jehova sing impormasyon parte sa sini nga kaaway nga gintunaan sang pagpakasala nanday Adan kag Eva, kag nagpromisa nga laglagon sia sa ulihi. Pero nagpaandam man si Jehova nga ang espiritu nga tinuga nga naghambal paagi sa man-ug magapamatok sa tanan nga nagapalangga sa Dios.—Gen. 3:15.

2, 3. Ngaa diutay lang ang impormasyon parte kay Satanas antes mag-abot ang Mesias?

² Wala ginsugid ni Jehova ang ngalan sang anghel nga nagrebelde sa iya. * Pagligad pa sang mga 2,500 ka tuig sugod sang nagrebelde ini nga kaaway nga ginpakilala sia sang Dios. (Job 1:6) Tatlo  lang ka libro sa Hebreong Kasulatan, 1 Cronica, Job, kag Zacarias, ang nagsambit kay Satanas, nga nagakahulugan sing “Manugpamatok.” Ngaa diutay lang ang impormasyon parte sa aton kaaway antes mag-abot ang Mesias?

³ Indi gusto ni Jehova nga ilakip sa Hebreong Kasulatan ang madamo nga detalye parte kay Satanas kag sa iya ginahimo. Ginpasulat ni Jehova ang Hebreong Kasulatan para buligan ang mga tawo nga makilala ang Mesias kag magsunod sa iya. (Luc. 24:44; Gal. 3:24) Sang nag-abot na ang Mesias, gingamit sia ni Jehova kag ang iya mga disipulo para isugid ang mga nabal-an naton subong parte kay Satanas kag sa mga anghel nga nag-upod sa iya. * Nagakaigo ini, kay si Jesus kag ang mga hinaplas nga kaupod niya nga magagahom ang pagagamiton ni Jehova sa paglaglag kay Satanas kag sa iya mga sumulunod.—Roma 16:20; Bug. 17:14; 20:10.

4. Ngaa indi kita dapat mahadlok sa Yawa?

⁴ Nagsiling si apostol Pedro nga si Satanas nga Yawa pareho sang “nagangurob nga leon,” kag si Juan nagtawag sa iya nga “man-ug” kag “dragon.” (1 Ped. 5:8; Bug. 12:9) Pero indi kita dapat mahadlok sa Yawa, kay may ara man sia sing indi mahimo. (Basaha ang Santiago 4:7.) Ginaamligan kita ni Jehova, ni Jesus, kag sang matutom nga mga anghel. Buligan nila kita nga mabatuan ang aton kaaway. Pero dapat naton mahibal-an ang sabat sa tatlo ka importante nga pamangkot: Daw ano kalapnag ang impluwensia ni Satanas? Ano ang ginahimo niya para impluwensiahan ang iban? Ano ang indi niya mahimo? Sabton naton ini nga mga pamangkot, kag binagbinagon man naton ang matun-an naton sa sini.

5, 6. Ngaa indi masarangan himuon sang mga gobierno sang tawo ang pagbag-o nga kinahanglan gid sang katawhan?

⁵ Nag-upod kay Satanas sa pagrebelde ang madamo nga anghel. Antes sang Baha, ginsulay niya ang pila sa ila nga makighilawas sa mga babayi sa duta. Ginlaragway ini sang Biblia paagi sa pagsiling nga ginganoy sang dragon ang ikatlo nga bahin sang mga bituon sa langit nga mag-upod sa iya. (Gen. 6:1-4; Jud. 6; Bug. 12:3, 4) Sang ginbiyaan sini nga mga anghel ang pamilya sang Dios, si Satanas na ang naggahom sa ila. Pero indi kita maghunahuna nga isa lang sila ka grupo sang magamo nga mga rebelde. Naghimo si Satanas sang iya kaugalingon nga ginharian nga daw Ginharian sang Dios kuno. Sia ang hari sa sini, kag gin-organisar niya ang mga demonyo, ginhatagan sila sing awtoridad, kag ginhimo sila nga mga manuggahom sang kalibutan.—Efe. 6:12.

⁶ Ginagamit ni Satanas ang iya organisasyon para kontrolon ang tanan nga gobierno sang tawo. Nangin maathag ini sang ginpakita ni Satanas kay Jesus “ang tanan nga ginharian sang kalibutan” kag nagsiling sia: “Ihatag ko sa imo ini tanan nga awtoridad kag ang ila himaya, bangod ining tanan nga ginharian akon, kag ihatag ko ini bisan kay sin-o nga luyag ko.” (Luc. 4:5, 6) Pero madamo nga gobierno ang nagahimo sang maayo sa ila mga sakop bisan pa naimpluwensiahan sila ni Satanas. Mahimo nga sinsero gid ang pila ka manuggahom sa pagbulig sa mga tawo. Pero indi masarangan himuon sang mga gobierno sang tawo ukon sang mga manuggahom sini ang pagbag-o nga kinahanglan gid sang katawhan.—Sal. 146:3, 4; Bug. 12:12.

7. Magluwas sa mga gobierno, paano ginagamit ni Satanas ang butig nga relihion kag ang komersio? (Tan-awa ang piktyur sa umpisa sini nga artikulo.)

⁷ Magluwas sa mga gobierno, ginagamit  man ni Satanas kag sang mga demonyo ang butig nga relihion kag ang komersio para mapatalang ang “bug-os napuy-an nga duta.” (Bug. 12:9) Ginagamit ni Satanas ang butig nga relihion para ipalapnag ang butig nga mga panudlo parte kay Jehova. Gintinguhaan man sang Yawa nga malimtan sang madamo nga tawo ang ngalan sang Dios. (Jer. 23:26, 27) Gani nadaya ang mga sinsero nga nagapati nga nagasimba sila sa Dios, kay ang matuod, nagasimba na sila sa mga demonyo. (1 Cor. 10:20; 2 Cor. 11:13-15) Ginagamit man ni Satanas ang komersio para ipalapnag ang indi husto nga mga panghunahuna. Halimbawa, ang madamo nga kuarta kag pagkabutang amo kuno ang makapahalipay sa mga tawo. (Hulu. 18:11) Ang mga nagapati sa sini nagpaulipon sa “Manggad” sa bilog nila nga kabuhi sa baylo nga sa Dios. (Mat. 6:24) Gani bisan pa may gugma sila sa Dios sang una, nadula ini kay mas ginpabaloran nila ang materyal nga mga butang.—Mat. 13:22; 1 Juan 2:15, 16.

8, 9. (a) Ano ang duha ka leksion nga matun-an naton sa natabo kanday Adan kag Eva, kag sa mga anghel nga nagrebelde? (b) Ngaa makabulig sa aton kon nabal-an naton ang impluwensia ni Satanas sa kalibutan?

⁸ Duha ka leksion ang matun-an naton sa natabo kanday Adan kag Eva, kag sa mga anghel nga nagrebelde. Una, may duha lang kita ka pililian, kag dapat isa lang ang pilion naton. Puede naton pilion nga magdampig kay Jehova ukon kay Satanas. (Mat. 7:13) Ikaduha, diutay lang ang mabenepisyo sang mga nagadampig kay Satanas. Halimbawa, sanday Adan kag Eva amo na ang nagdesisyon kon ano ang maayo kag malain para sa ila, kag gingamhan sang mga demonyo ang mga gobierno sang tawo. (Gen. 3:22) Pero malain pirme ang resulta sang pagdampig kay Satanas, kag indi matuod ang ginahunahuna nga benepisyo sini.—Job 21:7-17; Gal. 6:7, 8.

⁹ Ngaa makabulig sa aton kon nabal-an naton ang impluwensia ni Satanas sa kalibutan? Bangod sini, may balanse kita nga pagtamod sa mga gobierno kag ginapalig-on kita sini nga magbantala. Nahangpan naton nga gusto ni Jehova nga magtahod kita sa mga gobierno. (1 Ped. 2:17) Gusto man ni Jehova nga tumanon naton ang ila mga kasuguan nga indi supak sa iya mga talaksan. (Roma 13:1-4) Pero nabal-an man naton nga dapat kita mangin neutral kag indi magdampig sa isa ka partido sa pulitika ukon sa isa ka pulitiko. (Juan 17:15, 16; 18:36) Bangod nahangpan naton ang ginahimo ni Satanas sa ngalan kag reputasyon ni Jehova, ginapanikasugan pa gid naton nga itudlo sa iban ang kamatuoran parte sa aton Dios. Nalipay kita nga tawgon sa iya ngalan kag ginagamit gid naton ini, kay mas ginapabaloran naton ang aton pagpalangga sa iya sangsa kuarta ukon pagkabutang.—Isa. 43:10; 1 Tim. 6:6-10.

10-12. (a) Paano gingamit ni Satanas ang paon para sulayon ang mga anghel? (b) Ano ang matun-an naton sa ginhimo sini nga mga anghel?

¹⁰ Nagamadinalag-on si Satanas sa iya mga paagi sa pag-impluwensia sa iban. Halimbawa, nagagamit sia sang paon para sulayon sila. Ginapahog man niya sila para himuon ang gusto niya.

¹¹ Gingamit ni Satanas ang paon para sulayon ang madamo nga anghel. Mahimo nga ginpanilagan niya sila anay sa malawig nga tion para mabal-an niya kon paano sila sulayon nga magdampig sa iya. Nadala niya ang pila sa ila nga makighilawas sa mga babayi, kag ang ila mga anak nangin mga higante nga nagpigos sa mga tawo. (Gen. 6:1-4) Mahimo nga ginsulay ni Satanas ang indi matutom nga mga anghel indi lang para makighilawas kundi para maggahom man sa mga tawo. Mahimo nga gusto niya balabagan ang pag-abot sang ginpromisa nga ‘kaliwat sang babayi.’ (Gen. 3:15) Pero wala sia gintugutan ni Jehova nga magmadinalag-on, kay ginpahanabo ni Jehova ang Baha nga nagpauntat sa mga panikasog ni Satanas kag sang mga anghel nga nagrebelde.

¹² Ano ang matun-an naton sa sini? Nagamadinalag-on gid nga paon ang imoralidad kag bugal. Malawig nga tion nga nakaupod sang Dios ang mga anghel nga nagdampig kay Satanas. Pero gintugutan sang madamo nga anghel nga magtubo ang malain nga mga handum kag magbaskog ini. Mahimo man nga nagaalagad na kita sa Dios sa malawig nga tion upod sa iya organisasyon. Pero puede gihapon magtubo sa aton tagipusuon ang indi matinlo nga mga handum. (1 Cor. 10:12) Gani dapat gid naton pirme usisaon ang aton tagipusuon kag isikway ang imoral nga mga panghunahuna kag bugal!—Gal. 5:26; basaha ang Colosas 3:5.

13. Ano ang isa pa ka paon nga ginagamit ni Satanas, kag ano ang himuon naton para indi niya kita masiod?

¹³ Ginagamit man ni Satanas nga paon ang pag-interes sa espiritismo. Gusto niya nga makig-angot ang mga tawo sa mga demonyo paagi sa butig nga relihion kag paagi sa kalingawan. Daw kanami sang espiritismo kon makita ini sa mga pelikula, electronic game, ukon sa iban pa nga kalingawan. Paano kita makalikaw sa sini nga siod? Wala nagahatag ang organisasyon sang Dios sing lista sang nagakaigo kag indi nagakaigo nga kalingawan. Dapat naton hanason ang aton konsiensia para makadesisyon kita suno sa mga prinsipio sang Dios. (Heb. 5:14) Pero mangin husto ang aton mga desisyon kon sundon naton ang laygay ni apostol Pablo nga “dapat indi salimpapaw” ang aton gugma sa Dios. (Roma 12:9) Salimpapaw ang isa kon wala niya ginahimo ang iya ginasiling.  Pamangkuton naton ang aton kaugalingon: ‘Kon nagapili ako sang kalingawan, ginasunod ko bala ang mga prinsipio nga ginatudlo ko sa iban? Kon makita sang mga ginatudluan ko sang Biblia ukon mga ginaduaw ang gusto ko nga kalingawan, pensaron bala nila nga ginahimo ko ang akon ginabantala?’ Kon ginasunod naton ang mga prinsipio nga ginatudlo naton sa iban, indi kita masiod ni Satanas.—1 Juan 3:18.

14. Paano kita mahimo pahugon ni Satanas, pero ano ang dapat naton himuon?

¹⁴ Ginapahog man kita ni Satanas para mahadlok kita kag indi na mangin matutom kay Jehova. Halimbawa, mahimo niya impluwensiahan ang mga gobierno nga dumilian ang aton pagbantala. Ukon mahimo niya impluwensiahan ang aton mga kaupod sa trabaho ukon sa eskwelahan nga pakalainon kita kay ginasunod naton ang mga talaksan sang Biblia sa moral. (1 Ped. 4:4) Mahimo man niya impluwensiahan ang aton pamilya nga punggan kita sa pagtambong sa mga miting kay nabalaka sila sa aton. (Mat. 10:36) Ano ang dapat naton himuon? Una, pensaron naton nga matabo gid ini kay kontra kita ni Satanas. (Bug. 2:10; 12:17) Dayon, dumdumon naton ang matuod nga rason kon ngaa nagakatabo ini: Nagsiling si Satanas nga nagaalagad lang kita kay Jehova kon mahapos ini himuon, pero kon mabudlayan na kita kuno, isikway na naton ang Dios. (Job 1:9-11; 2:4, 5) Kag dapat kita magsalig kay Jehova kag mangayo sing kusog sa iya. Tandaan naton nga indi gid niya kita pagpabay-an.—Heb. 13:5.

15. Mapilit bala kita ni Satanas nga himuon ang indi naton gusto? Ipaathag.

¹⁵ Indi mapilit ni Satanas ang mga tawo nga himuon ang indi nila gusto. (Sant. 1:14) Madamo ang wala kabalo nga nagadampig na gali sila kay Satanas. Pero kon matun-an sang isa ang kamatuoran, dapat sia magdesisyon kon sin-o ang iya alagaron. (Binu. 3:17; 17:30) Kon determinado kita nga tumanon ang Dios, indi gid makuha ni Satanas ang aton katutom.—Job 2:3; 27:5.

16, 17. (a) Ano pa ang indi mahimo ni Satanas kag sang mga demonyo? (b) Ngaa indi kita dapat mahadlok nga mangamuyo sing mabaskog kay Jehova?

¹⁶ May iban pa nga indi mahimo si Satanas kag ang mga demonyo. Halimbawa, wala ginasiling sang Kasulatan nga mabal-an nila ang ara sa hunahuna ukon tagipusuon sang isa. Si Jehova lang kag si Jesus ang makahimo sini. (1 Sam. 16:7; Mar. 2:8) Pero dapat bala kita mahadlok nga mabatian kita sang Yawa ukon sang mga demonyo kon maghambal kita ukon mangamuyo sing mabaskog, kag himuan nila kita sang malain? Indi. Ngaa? Wala kita nahadlok maghimo sang maayo sa pag-alagad kay Jehova bisan pa makita kita sang Yawa. Gani indi man kita dapat mahadlok nga mangamuyo sing mabaskog bangod lang kay basi mabatian kita sang Yawa. Madamo nga beses nga mabasa sa Biblia nga nagpangamuyo sing mabaskog ang mga alagad sang Dios, pero wala sila nahadlok nga basi mabatian sila sang Yawa. (1 Hari 8:22, 23; Juan 11:41, 42; Binu. 4:23, 24) Kon panikasugan naton nga ihambal kag himuon ang gusto sang Dios, makasalig kita nga indi pagtugutan ni Jehova ang Yawa nga halitan kita sing permanente.—Basaha ang Salmo 34:7.

¹⁷ Dapat naton makilala sing maayo ang aton kaaway, pero indi kita dapat mahadlok sa iya. Bisan pa indi kita perpekto, buligan kita ni Jehova nga madaug si Satanas. (1 Juan 2:14) Kon pamatukan naton sia, magapalagyo sia sa aton. (Sant. 4:7; 1 Ped. 5:9) Gusto gid ni Satanas nga madala ang mga pamatan-on. Paano nila mabatuan ang Yawa? Binagbinagon naton ini sa masunod nga artikulo.