1, 2. (a) Sang gab-i antes napatay si Jesus, ano ang ginsugid niya sa iya mga disipulo? (Tan-awa ang piktyur sa umpisa sini nga artikulo.) (b) Ngaa dapat naton dumdumon kon ngaa nagabantala kita? (c) Ano ang aton binagbinagon?

SANG gab-i antes napatay si Jesus, malawig niya nga ginsugilanon ang iya mga apostoles kag ginpasalig sila nga palangga gid niya sila. Ginsugid man niya sa ila ang ilustrasyon parte sa puno sang ubas, nga ginbinagbinag naton sa nagligad nga artikulo. Paagi sa sini nga ilustrasyon, ginpalig-on niya ang iya mga disipulo nga ‘padayon nga magpamunga sing madamo,’ ukon magbatas sa pagbantala sang mensahe sang Ginharian.—Juan 15:8.

² Ginsiling ni Jesus sa iya mga disipulo indi lang kon ano ang dapat nila himuon kundi pati man kon ngaa dapat nila ini himuon. Ginsugid niya ang mga rason kon ngaa dapat sila padayon nga magbantala. Ngaa dapat naton ini binagbinagon? Kon dumdumon naton kon ngaa dapat kita padayon nga magbantala, mapalig-on kita nga magbatas sa ‘pagpanaksi sa tanan nga pungsod.’ (Mat. 24:13, 14) Gani binagbinagon naton ang apat ka rason suno sa Kasulatan kon ngaa nagabantala kita. Binagbinagon man naton ang apat ka regalo ni Jehova nga nagabulig sa aton nga padayon nga magpamunga.

3. (a) Suno sa Juan 15:8, ngaa nagabantala kita? (b) Ano ang ginapatuhuyan sang mga ubas sa ilustrasyon ni Jesus, kag ngaa nagakaigo ini?

³ Ang panguna nga rason kon ngaa nagabantala kita amo nga para himayaon si Jehova kag pakabalaanon ang iya ngalan sa tanan nga tawo. (Basaha ang Juan 15:1, 8.) Ginpaanggid ni Jesus ang iya Amay, nga si Jehova, sa mangunguma nga nagatanom sing ubas. Ginpaanggid ni Jesus ang iya kaugalingon sa puno sang ubas kag ang iya mga sumulunod sa mga sanga. (Juan 15:5) Gani ang mga ubas sa sini nga ilustrasyon nagapatuhoy sa ginapatubas sang mga sumulunod sang Cristo nga bunga sang Ginharian, ukon ang ila pagbantala. Nagsiling si Jesus sa iya mga apostoles: “Ang akon Amay ginahimaya kon padayon kamo nga nagapamunga sing madamo.” Dungog sang isa ka mangunguma kon magpamunga sang maayo nga mga ubas ang iya gintanom. Gani ginapadunggan man naton, ukon ginahimaya, si Jehova kon ginabantala naton ang mensahe sang Ginharian sa bug-os naton nga masarangan.—Mat. 25:20-23.

4. (a) Paano naton ginapakabalaan ang ngalan sang Dios? (b) Ano ang masiling mo sa imo pribilehiyo nga pakabalaanon ang ngalan sang Dios?

⁴ Paano mapakabalaan ang ngalan sang Dios kon nagabantala kita? Indi naton madugangan ang pagkabalaan sang ngalan sang Dios kay balaan na ini. Pero talupangda ang ginsiling ni manalagna Isaias: “Si Jehova sang mga kasuldadusan—sia ang Isa nga dapat ninyo tamdon nga balaan.” (Isa. 8:13) Ginapakabalaan naton ang ngalan sang Dios kon tamdon naton ini nga labaw gid sa tanan nga ngalan kag buligan ang iban nga tamdon man ini nga balaan. (Mat. 6:9) Halimbawa, kon ginasugid naton sa iban ang kamatuoran parte sa dalayawon nga mga kinaiya ni Jehova kag sa iya katuyuan para sa mga tawo, mahangpan nila nga indi matuod ang tanan nga ginsiling ni Satanas parte kay Jehova. (Gen. 3:1-5) Ginapakabalaan man naton ang ngalan sang Dios kon ginabuligan naton ang mga tawo nga mahibaluan nga takus si Jehova “nga magbaton sang himaya kag dungog kag gahom.” (Bug. 4:11) Si Rune, nga nagapayunir sing 16 na ka tuig, nagsiling: “Nagapasalamat gid ako sa pribilehiyo nga mangin saksi sang Manunuga sang uniberso. Ginapalig-on ako sini nga padayon nga magbantala.”

5. (a) Suno sa Juan 15:9, 10, ngaa nagabantala kita? (b) Paano ginpakita ni Jesus nga importante gid ang pagbatas?

⁵ Basaha ang Juan 15:9, 10. Ang isa ka importante nga rason kon ngaa ginabantala naton ang mensahe sang Ginharian amo nga bangod palangga naton si Jehova kag si Jesus. (Mar. 12:30; Juan 14:15) Ginsilingan ni Jesus ang iya mga disipulo nga dapat sila ‘magpabilin sa iya gugma.’ Ngaa? Bangod kinahanglan nila ang pagbatas para padayon sila nga mangin matuod nga mga disipulo sang Cristo. Importante gid ini kay madamo nga beses nga gingamit ni Jesus ang tinaga nga ‘magpabilin’ sa Juan 15:4-10.

6. Paano naton mapakita nga gusto naton magpabilin sa gugma sang Cristo?

⁶ Paano naton mapakita nga gusto naton magpabilin sa gugma sang Cristo kag matigayon ang iya kahamuot? Paagi sa pagtuman sa mga sugo ni Jesus. Daw nagasiling si Jesus sa aton, ‘Tumana ako.’ Ginhimo man ni Jesus ang ginsugo niya sa aton, kay nagsiling sia: “Ginatuman ko ang mga sugo sang Amay kag nagapabilin ako sa iya gugma.” Sundon naton ang halimbawa ni Jesus.—Juan 13:15.

7. Ano ang kaangtanan sang pagtuman sa gugma?

⁷ Ginpaathag ni Jesus ang kaangtanan sang pagtuman sa gugma sang nagsiling sia sa iya mga apostoles: “Ang bisan sin-o nga nagabaton sang akon mga sugo kag nagatuman  sini amo ang nagahigugma sa akon.” (Juan 14:21) Kon ginatuman naton ang sugo ni Jesus nga magbantala, ginapakita man naton ang gugma sa Dios bangod ang mga sugo ni Jesus naghalin sa iya Amay. (Mat. 17:5; Juan 8:28) Bangod palangga naton si Jehova kag si Jesus, palangga man nila kita.

8, 9. (a) Ano pa ang isa ka rason kon ngaa nagabantala kita? (b) Ngaa mapalig-on kita sang ginsiling ni Jehova sa Ezequiel 3:18, 19 kag 18:23 nga padayon nga magbantala?

⁸ May isa pa ka rason kon ngaa dapat kita padayon nga magbantala. Nagapaandam kita sa mga tawo. Ginsiling sang Biblia nga si Noe “isa ka manugbantala.” (Basaha ang 2 Pedro 2:5.) Antes sang Baha, ginpaandaman ni Noe ang mga tawo nga iya ginbantalaan parte sa maabot nga kalaglagan. Ngaa masiling naton ini? Talupangda ang ginsiling ni Jesus: “Kay kaangay sang panahon sang wala pa ang Baha, ang mga tawo nagakaon kag nagainom, nagapangasawa kag nagapamana, tubtob sa adlaw nga nagsulod si Noe sa arka, kag wala gid sila magtalupangod tubtob nga nag-abot ang Baha kag nag-anod sa ila tanan, kaangay man sini ang matabo sa presensia sang Anak sang tawo.” (Mat. 24:38, 39) Bisan pa wala ginsapak sang mga tawo si Noe, matutom niya nga ginbantala ang mensahe nga nagapaandam sa ila.

⁹ Subong, ginabantala naton ang mensahe sang Ginharian para mabal-an sang mga tawo ang himuon sang Dios para sa katawhan sa palaabuton. Pareho kay Jehova, gusto gid naton nga pamatian nila ini nga mensahe kag “padayon nga magkabuhi.” (Ezeq. 18:23) Kon nagabantala kita sa mga balay kag sa publiko nga mga lugar, nagapaandam kita sa madamo nga tawo nga magaabot ang Ginharian sang Dios para laglagon ining malaut nga kalibutan.—Ezeq. 3:18, 19; Dan. 2:44; Bug. 14:6, 7.

10. (a) Suno sa Mateo 22:39, ngaa nagabantala kita? (b) Paano ginbuligan nanday Pablo kag Silas ang guardia sang prisuhan sa Filipos?

¹⁰ Amo ini ang isa pa ka importante nga rason kon ngaa dapat kita padayon nga magbantala: Palangga naton ang aton isigkatawo. (Mat. 22:39) Gani nagabatas kita sa pagbantala kay nabal-an naton nga mahimo magbag-o ang panimuot sang mga tawo kon magbag-o ang ila kahimtangan. Binagbinaga ang natabo kay apostol Pablo kag sa iya kaupod nga si Silas. Sa siudad sang Filipos, ginpapriso sila sang mga nagpamatok sa ila. Sang mga tungang-gab-i na, hinali lang nga naglinog kag nag-uyog ang prisuhan kag nagbukas ang mga puertahan. Hinadlukan ang guardia sang prisuhan kay abi niya nalagyo ang mga priso. Mahikog na tani sia, pero nagsinggit si Pablo: “Indi paghaliti ang imo kaugalingon!” Ang kinulbaan nga guardia namangkot: “Ano ang dapat ko himuon agod maluwas ako?” Nagsiling sila sa iya: “Magtuo ka kay Ginuong Jesus, kag maluwas ka.”—Binu. 16:25-34.

11, 12. (a) Ano ang matun-an naton sa kasaysayan sang guardia sang prisuhan nga magamit naton sa aton pagbantala? (b) Ngaa gusto naton nga padayon nga magbantala?

¹¹ Ano ang matun-an naton sa kasaysayan sang guardia sang prisuhan nga magamit naton sa aton pagbantala? Talupangda ini:  Nagbag-o ang panimuot sang guardia kag nagpabulig sia sa tapos lang naglinog. Subong, ang iban nga wala anay namati sa mensahe sang Biblia mahimo man magbag-o kag magpabulig kon maeksperiensiahan nila ang grabe nga problema. Halimbawa, basi hinali lang nga nadulaan sing trabaho ang iban kag nagapalibog gid sila. Mahimo nga nagaproblema gid ang iban sa ila pag-asawahay. Mahimo nga nasubuan naman ang iban sang mabal-an nila nga may malala sila nga balatian ukon sang mapatay ang ila pinalangga. Mahimo sila mamangkot parte sa katuyuan sang ila kabuhi nga wala nila ginpamensar sang una. Basi mamangkot pa gani sila, ‘Ano ang dapat ko himuon agod maluwas ako?’ Kon masugilanon naton sila, basi gusto na nila mamati sa aton mensahe nga nagahatag sing paglaum.

¹² Gani kon padayon kita nga magbantala, mabuligan gid naton ang mga tawo sa tion nga handa na sila mamati. (Isa. 61:1) Si Charlotte, nga nagapayunir sing 38 na ka tuig, nagsiling: “Subong, ang mga tawo daw wala sing pasingadtuan. Kinahanglan nila mabatian ang maayong balita.” Si Ejvor, nga nagapayunir sing 34 na ka tuig, nagsiling man: “Madamo na gid subong ang nasubuan. Gusto ko gid sila buligan. Gani gusto ko sila bantalaan.” Kon palangga naton ang aton isigkatawo, mapalig-on gid kita nga padayon nga magbantala!

13, 14. (a) Ano nga regalo ang ginsiling sang Juan 15:11? (b) Paano naton mabatyagan ang kalipay nga nabatyagan ni Jesus? (c) Paano kita mabuligan sang kalipay sa aton pagbantala?

¹³ Sang gab-i antes napatay si Jesus, may ginhambal man sia nga mga regalo nga magabulig sa iya mga apostoles nga padayon nga magpamunga. Ano ini nga mga regalo, kag paano ini makabulig sa aton?

¹⁴ Ang regalo nga kalipay. Mabudlay bala tumanon ang sugo ni Jesus nga magbantala? Indi. Sang ginsugid ni Jesus ang ilustrasyon parte sa puno sang ubas, nagsiling sia nga malipay gid kita kon ibantala naton ang Ginharian. (Basaha ang Juan 15:11.) Ginpasalig niya nga mabatyagan man naton ang kalipay nga nabatyagan niya. Paano? Sa sini nga ilustrasyon, ginpaanggid ni Jesus ang iya kaugalingon sa puno sang ubas kag ang iya mga disipulo sa mga sanga. Nagadepende ang mga sanga sa puno. Makasuyop ini sing tubig kag sustansia kon naangot ini sa puno. Gani kon magpabilin kita nga nahiusa sa Cristo paagi sa pagsunod sing maayo sa iya mga tikang, mabatyagan man naton ang kalipay nga nabatyagan niya sa paghimo sang kabubut-on sang iya Amay. (Juan 4:34; 17:13; 1 Ped. 2:21) Si Hanne, nga nagapayunir sing sobra 40 na ka tuig, nagsiling, “Ang kalipay nga pirme ko mabatyagan kon nagabantala ako amo ang nagapalig-on sa akon nga padayon nga mag-alagad kay Jehova.” Ang matuod nga kalipay nagahatag sa aton sing kusog para padayon kita nga magbantala bisan pa wala nagapamati ang kalabanan nga tawo.—Mat. 5:10-12.

15. (a) Ano nga regalo ang ginsiling sang Juan 14:27? (b) Paano makabulig ang paghidait para padayon kita nga magpamunga?

¹⁵ Ang regalo nga paghidait. (Basaha ang Juan 14:27.) Temprano pa sang gab-i antes napatay si Jesus, nagsiling sia sa iya mga apostoles: “Ginabilin ko sa inyo ang paghidait nga ginhatag ko sa inyo.” Paano makabulig ang paghidait nga ginahatag ni Jesus para makapamunga kita? Kon padayon kita nga nagabantala, mabatyagan naton ang kalinong sang hunahuna kay nabal-an naton nga napahalipay naton si Jehova kag si Jesus. (Sal. 149:4; Roma 5:3, 4; Col. 3:15) Si Ulf, nga nagapayunir sing 45 na ka tuig, nagsiling, “Sa tapos magbantala, nabatyagan ko ang kakapoy, pero nalipay gid ako kag may katuyuan ang akon kabuhi.” Nagapasalamat  gid kita nga may matuod kita nga kalinong sang hunahuna!

16. (a) Ano nga regalo ang ginsiling sang Juan 15:15? (b) Ano ang dapat himuon sang mga apostoles para padayon sila nga mangin abyan ni Jesus?

¹⁶ Ang regalo nga mangin abyan ni Jesus. Sa tapos ginsiling ni Jesus nga gusto niya mangin malipayon ang iya mga apostoles, ginpaathag niya kon ngaa dapat nila ipakita ang nagasakripisyo nga gugma. (Juan 15:11-13) Dayon, nagsiling sia: “Ginatawag ko kamo nga mga abyan.” Isa gid ka hamili nga regalo nga mangin abyan ni Jesus! Ano ang dapat himuon sang mga apostoles para padayon sila nga mangin iya abyan? Dapat sila ‘padayon nga magpamunga.’ (Basaha ang Juan 15:14-16.) Mga duha ka tuig antes sini, ginsugo ni Jesus ang iya mga apostoles: “Samtang nagapanglakaton kamo, magbantala kamo nga nagasiling, ‘Ang Ginharian sang langit malapit na.’” (Mat. 10:7) Gani sang gab-i antes sia napatay, ginpalig-on niya sila nga magbatas sa hilikuton nga ila ginsugdan. (Mat. 24:13; Mar. 3:14) Indi ini mahapos, pero magamadinalag-on sila kag padayon nga mangin iya abyan. Paano? Paagi sa bulig sang isa pa ka regalo.

17, 18. (a) Ano nga regalo ang ginsiling sang Juan 15:16? (b) Paano nakabulig ini nga regalo sa mga disipulo ni Jesus? (c) Ano nga mga regalo ang nagapalig-on sa aton subong?

¹⁷ Ang regalo nga sabton ang aton mga pangamuyo. Si Jesus nagsiling: “Bisan ano man ang pangayuon ninyo sa Amay sa akon ngalan, ihatag niya ini sa inyo.” (Juan 15:16) Napabakod gid ang mga apostoles sa sini nga promisa! * Wala nila sadto mahangpan nga malapit na mapatay ang ila Lider, pero wala sila ginpabay-an. Sabton gid ni Jehova ang ila mga pangamuyo kag buligan sila sa pagbantala sang mensahe sang Ginharian. Wala magdugay sang nangamuyo sila kay Jehova nga buligan sila, ginsabat ini ni Jehova.—Binu. 4:29, 31.

¹⁸ Matuod man ini subong. Kon padayon kita nga magbantala, mangin abyan kita ni Jesus. Sigurado man kita nga sabton gid ni Jehova ang aton mga pangamuyo nga buligan kita sa pag-atubang sa mga kabudlayan sa pagbantala sang maayong balita sang Ginharian. (Fil. 4:13) Nagapasalamat gid kita nga ginasabat ni Jehova ang aton mga pangamuyo kag abyan kita ni Jesus! Ini nga mga regalo ni Jehova nagapalig-on sa aton nga padayon nga magpamunga.—Sant. 1:17.

19. (a) Ngaa padayon kita nga nagabantala? (b) Ano ang makabulig sa aton nga tapuson ang ginsugo sang Dios sa aton?

¹⁹ Sa sini nga artikulo, natun-an naton nga padayon kita nga nagabantala bangod ginahimaya naton si Jehova kag ginapakabalaan ang iya ngalan, palangga naton si Jehova kag si Jesus, nagapaandam kita sa mga tawo, kag palangga naton ang aton isigkatawo. Ginbinagbinag man naton ang apat ka regalo: kalipay, paghidait, pagpakig-abyan kay Jesus, kag sabat sa aton mga pangamuyo. Nagapalig-on ini sa aton nga tapuson ang ginsugo sang Dios sa aton. Nalipay gid si Jehova nga makita nga ginahimo naton ang aton bug-os nga masarangan nga ‘padayon nga magpamunga sing madamo’!