1, 2. (a) Ngaa napalig-on kita sang mga kauturan nga padayon nga nagabantala sa lugar nga wala nagapamati ang kalabanan nga tawo? (Tan-awa ang piktyur sa umpisa sini nga artikulo.) (b) Ano ang ginsiling ni Jesus parte sa pagbantala sa iya “kaugalingon nga lugar”? (Tan-awa ang footnote.)

ANG mag-asawa nga sanday Sergio kag Olinda nagapayunir sa Estados Unidos kag otsentahon na. Nabudlayan na sila subong sa paglakat. Pero sa madamo nga tinuig, nagalakat sila pakadto sa plasa sang ila banwa kag nagaabot didto sa alas siete sang aga. Nagapuesto sila malapit sa paradahan sang bus kag nagatanyag sang mga publikasyon nga nabase sa Biblia sa mga nagalabay. Wala sila ginasapak sang kalabanan nga tawo, pero ara sila gihapon sa ila puesto nga nagayuhum sa mga nagatulok sa ila. Nagapauli sila kon udto. Pagkadason nga adlaw, sa alas siete sang aga, nagabalik sila sa plasa. Padayon nga ginabantala sining matutom nga mag-asawa ang mensahe sang Ginharian kada aga, anom ka adlaw kada semana, sa bilog nga tuig.

² Pareho kanday Sergio kag Olinda, madamo nga kauturan sa bilog  nga kalibutan ang tinuig na nga nagabantala sa ila lugar bisan pa wala nagapamati ang kalabanan nga tawo. Kon amo sini ang imo kahimtangan, ginakomendahan ka gid namon sa imo pagbatas. * Ang padayon mo nga pag-alagad kay Jehova nagapalig-on sa madamo nga kauturan, bisan sa mga madugay na nga nagaalagad. Binagbinaga ang ginsiling sang mga manugtatap sang sirkito: “Nagabakod ako kon kaupod ko sa ministeryo ang matutom nga mga kauturan.” “Bangod sang ila katutom, napalig-on ako nga magpadayon kag mangin maisugon sa pagbantala.” “Nalipay ako sa ila maayo nga halimbawa.”

3. Ano ang tatlo ka pamangkot nga binagbinagon naton, kag ngaa?

³ Para mapalig-on kita nga magpadayon sa pagbantala nga ginsugo sa aton ni Jesus, binagbinagon naton ang sabat sa tatlo ka pamangkot: Ngaa mahimo magluya ang aton buot kon kaisa? Ano ang buot silingon sang pagpamunga? Ano ang makabulig sa aton nga padayon nga magpamunga samtang nagabatas?

4. (a) Ano ang ginbatyag ni Pablo sang indi gusto mamati sang kalabanan nga Judiyo sa iya? (b) Ngaa amo sini ang ginbatyag ni Pablo?

⁴ Kon naeksperiensiahan mo nga nagluya ang imo buot bangod wala nagapamati ang kalabanan nga tawo sa mensahe sang Ginharian, mahangpan mo ang ginbatyag ni apostol Pablo. Halos 30 ka tuig sia nga nagbantala, kag madamo ang nabuligan niya nga mangin disipulo sang Cristo. (Binu. 14:21; 2 Cor. 3:2, 3) Pero madamo man nga Judiyo ang indi nangin Cristiano. Ang matuod, indi gusto mamati sang kalabanan kay Pablo, kag ginhingabot pa gani sia sang iban. (Binu. 14:19; 17:1, 4, 5, 13) Ano ang ginbatyag ni Pablo sa sini? Nagsiling sia: “Daku gid ang akon kasubo kag kasakit sa akon tagipusuon.” (Roma 9:1-3) Ngaa amo sini ang ginbatyag ni Pablo? Ginpabaloran gid niya ang pagbantala. Nagbantala sia sa mga Judiyo bangod nabalaka gid sia sa ila. Gani nasubuan si Pablo sang wala nila ginbaton ang kaluoy sang Dios.

5. (a) Ngaa nagabantala kita sa aton isigkatawo? (b) Ngaa normal lang nga magluya ang aton buot kon kaisa?

⁵ Pareho kay Pablo, nagabantala kita bangod nabalaka gid kita sa mga tawo. (Mat. 22:39; 1 Cor. 11:1) Ngaa? Naeksperiensiahan naton ang mga pagpakamaayo ni Jehova kag mabaton man ini sang mga magadesisyon nga mag-alagad sa iya. Kon ginapamensar naton ang mga tawo nga aton ginabantalaan, makasiling kita, ‘Tani mabuligan naton sila nga mahangpan nga puede nila matigayon ang mas maayo nga kabuhi.’ Gani padayon naton sila nga ginapalig-on nga magtuon parte kay Jehova kag sa iya katuyuan para sa mga tawo. Daw pareho lang nga nagasiling kita sa ila: ‘May matahom kami nga regalo para sa inyo. Palihug batuna ini.’ Kon pangindian nila ini, mahimo kita magbatyag sing “kasakit sa [aton] tagipusuon.” Indi buot silingon nga wala kita sing pagtuo. Sa baylo, pamatuod ini nga ginapabaloran gid naton ang pagbantala. Gani bisan pa magluya ang aton buot kon kaisa, padayon kita nga nagabantala. Husto gid ang ginsiling ni Elena, nga nagapayunir sing sobra 25 na ka tuig: “Mabudlay gid man magbantala. Pero indi ko ini pag-ibaylo sa iban nga hilikuton.”

6. Ano nga pamangkot ang sabton naton, kag ano ang himuon naton para masabat ini?

⁶ Ngaa makasigurado kita nga puede kita magmadinalag-on sa aton ministeryo bisan diin man kita magbantala? Para masabat ining importante nga pamangkot, binagbinagon  naton ang duha ka ilustrasyon ni Jesus diin ginsambit niya nga importante ang ‘pagpamunga.’ (Mat. 13:23) Parte sa puno sang ubas ang una nga ilustrasyon.

7. (a) Sin-o ang ginapatuhuyan sang “mangunguma,” “puno sang ubas,” kag “mga sanga”? (b) Ano nga pamangkot ang dapat naton sabton?

⁷ Basaha ang Juan 15:1-5, 8. Sa sini nga ilustrasyon, ginpaanggid ni Jesus si Jehova sa “mangunguma,” ang iya kaugalingon sa “puno sang ubas,” kag ang iya mga disipulo sa “mga sanga.” * Dayon nagsiling si Jesus sa iya mga apostoles: “Ang akon Amay ginahimaya kon padayon kamo nga nagapamunga sing madamo kag ginapamatud-an ninyo nga kamo mga disipulo ko.” Gani ano ang buot silingon sang pagpamunga? Sa sini nga ilustrasyon, may ginsiling si Jesus nga makabulig sa aton para masabat ini.

8. (a) Sa ilustrasyon ni Jesus, ngaa wala nagapatuhoy ang pagpamunga sa paghimo sing bag-o nga mga disipulo? (b) Ano ang masiling naton sa tanan nga ginasugo ni Jehova sa aton?

⁸ Nagsiling si Jesus parte sa iya Amay: “Ang akon tagsa ka sanga nga wala nagapamunga ginautod niya.” Buot silingon, mangin alagad lang kita ni Jehova kon nagapamunga kita. (Mat. 13:23; 21:43) Gani sa sini nga ilustrasyon, ang pagpamunga wala nagapatuhoy sa paghimo sing bag-o nga mga disipulo. (Mat. 28:19) Kay kon amo sini ang ginapatuhuyan, ang matutom nga mga Saksi nga wala sing nabuligan nga mangin disipulo, bangod wala nagapamati ang kalabanan sa ila ginabantalaan, daw pareho sang mga sanga nga wala nagapamunga sa ilustrasyon ni Jesus. Pero indi ini makatarunganon! Ngaa? Bangod indi naton mapilit ang mga tawo nga mangin disipulo. Mahigugmaon si Jehova, gani indi niya pag-ipahimo sa iya mga alagad ang indi nila masarangan. Ang tanan nga ginasugo ni Jehova sa aton masarangan gid naton himuon.—Deut. 30:11-14.

9. (a) Paano kita makapamunga? (b) Ano nga ilustrasyon ang binagbinagon naton, kag ngaa?

⁹ Gani ano ang buot silingon sang pagpamunga? Isa ini ka hilikuton nga mahimo naton tanan. Ano nga hilikuton ang ginsugo ni Jehova sa tanan niya nga alagad? Ang pagbantala sang maayong balita sang Ginharian sang Dios. * (Mat. 24:14) Maathag ini sa ilustrasyon ni Jesus parte sa manugsab-ug. Binagbinagon naton ining ikaduha nga ilustrasyon.

10. (a) Sa ilustrasyon ni Jesus, ano ang binhi kag ang duta? (b) Ano ang ginapatubas sang tanom nga trigo?

¹⁰ Basaha ang Lucas 8:5-8, 11-15. Sa ilustrasyon parte sa manugsab-ug, ang binhi amo “ang pulong sang Dios,” ukon ang mensahe sang Ginharian. Ang duta amo ang malaragwayon nga tagipusuon sang tawo. Ang binhi nga nagtupa sa maayo nga duta nanggamot, nagtubo, kag nangin tanom. Dayon, “nagpamunga ini sing 100 ka pilo.” Pero ano ang ginapatubas sang tanom nga trigo? Magapatubas bala ini sang gagmay nga mga tanom nga trigo? Indi, magapatubas ini sang bag-o nga mga binhi, nga mahimo mangin mga tanom nga trigo sa ulihi. Sa sini nga ilustrasyon, ang isa ka binhi nagpatubas sang 100 ka binhi. Ano ang ginatudlo sini parte sa aton ministeryo?

11. (a) Ano ang matun-an naton sa ilustrasyon parte sa manugsab-ug nga may kaangtanan sa aton ministeryo? (b) Paano kita nagapatubas sang bag-o nga binhi sang Ginharian?

¹¹ Sang ginsugiran kita sang pila ka Saksi ukon sang aton Cristiano nga mga ginikanan parte sa Ginharian sang Dios, daw pareho lang nga nagtanom sila sing binhi sa maayo nga duta. Nalipay sila sang nakita nila nga ginbaton naton ang mensahe sang Ginharian kag  ginpabaloran naton ini. Nanggamot kag nagtubo ang mensahe sang Ginharian nga nangin pareho sa tanom nga trigo kag mamunga na man sa ulihi. Pareho sa tanom nga trigo nga nagapatubas sang bag-o nga binhi, kag indi sang bag-o nga mga tanom, nagapatubas kita sang bag-o nga binhi sang Ginharian, indi sang bag-o nga mga disipulo. * Paano kita nagapatubas sang bag-o nga binhi sang Ginharian? Kon ginasugid naton sa iban ang mensahe sang Ginharian, daw pareho lang nga ginapalapta naton ang binhi nga gintanom sa aton tagipusuon. (Luc. 6:45; 8:1) Gani maathag sa sini nga ilustrasyon nga kon padayon naton nga ginabantala ang mensahe sang Ginharian, “nagapamunga [kita] samtang nagabatas.”

12. (a) Ano ang matun-an naton sa mga ilustrasyon ni Jesus parte sa puno sang ubas kag sa manugsab-ug? (b) Ano ang masiling mo sa sini?

¹² Ano ang matun-an naton sa mga ilustrasyon ni Jesus parte sa puno sang ubas kag sa manugsab-ug? Mahangpan naton sa sini nga ang aton pagpamunga wala nagadepende kon bala mamati ukon indi ang mga tawo sa aton mensahe. Nagadepende ini sa aton katutom. Amo man sini ang ginsiling ni Pablo: “Ang kada tawo magabaton sing padya suno sa iya binuhatan.” (1 Cor. 3:8) Padyaan kita sa aton ginahimo, indi sa resulta sang aton ginahimo. Si Matilda, nga nagapayunir sing 20 na ka tuig, nagsiling: “Nalipay ako kay ginapadyaan ni Jehova ang aton mga panikasog.”

13, 14. Suno sa Roma 10:1, 2, ngaa wala nag-untat sa pagbantala si Pablo sa mga wala namati sa mensahe sang Ginharian?

¹³ Ano ang makabulig sa aton nga padayon nga magpamunga samtang nagabatas? Pareho sang nabinagbinag na naton, nagluya ang buot ni Pablo sang wala namati ang mga Judiyo sa mensahe sang Ginharian. Pero wala sia nag-untat sa pagbantala sa ila. Talupangda ang ginsiling pa niya sa mga Cristiano sa Roma parte sa iya ginbatyag sa sini nga mga Judiyo: “Ang handum sang akon tagipusuon kag ang akon ginaampo sa Dios tungod sa ila  amo nga maluwas sila. Mapamatud-an ko nga may kakugi sila sa Dios, apang indi suno sa sibu nga ihibalo.” (Roma 10:1, 2) Gani ngaa padayon nga nagbantala si Pablo?

¹⁴ Una, nagsiling si Pablo nga padayon sia nga nagbantala sa mga Judiyo bangod sang “handum sang [iya] tagipusuon.” Gusto gid niya nga maluwas sila. (Roma 11:13, 14) Ikaduha, ginsambit ni Pablo ang iya “ginaampo sa Dios tungod sa ila.” Ginpangamuyo niya nga kabay pa buligan sang Dios ang mga Judiyo nga batunon ang mensahe sang Ginharian. Ikatlo, nagsiling sia: “May kakugi sila sa Dios.” Nakita niya ang maayo nga kinaiya sang mga tawo. Nahibal-an niya nga ang makugi nga mga Judiyo puede mangin makugi nga mga disipulo sang Cristo, pareho sang natabo sa iya.

15. Paano naton masunod si Pablo? Maghatag sing mga halimbawa.

¹⁵ Paano naton masunod si Pablo? Una, gusto gid naton pangitaon ang “may husto nga panimuot sa pagtigayon sing kabuhi nga wala sing katapusan.” Ikaduha, ginapangamuyo naton nga kabay pa buligan ni Jehova ang sinsero nga mga tawo nga magpamati sa aton mensahe. (Binu. 13:48; 16:14) Si Silvana, nga nagapayunir sing halos 30 na ka tuig, nagsiling, “Antes ako magkadto sa balay nga akon bantalaan, nagapangamuyo ako kay Jehova nga kabay pa buligan niya ako nga mangin positibo.” Nagapangamuyo man kita sa Dios nga buligan kita sang mga anghel nga makita ang mga interesado. (Mat. 10:11-13; Bug. 14:6) Si Robert, nga nagapayunir sing sobra 30 na ka tuig, nagsiling, “Makalilipay gid magbantala upod sa mga anghel nga nakabalo sang matuod nga kahimtangan sang mga tawo.” Ikatlo, makita naton ang maayo nga kinaiya sang mga tawo kag nagapati kita nga puede sila mangin alagad ni Jehova. Ang gulang nga si Carl, nga nabawtismuhan sobra 50 na ka tuig sang una, nagsiling, “Nagapangita ako sang bisan gamay nga palatandaan nga sinsero ang isa ka tawo, ayhan sa iya yuhum, pagtulok, ukon pamangkot.” Gani padayon man kita nga makapamunga pareho kay Pablo.

16, 17. (a) Ano ang matun-an naton sa ginsiling sang Manugwali 11:6? (b) Ano ang epekto sang aton pagbantala sa mga nagapanilag sa aton?

¹⁶ Bisan pa daw wala sing nagapamati sa mensahe sang Ginharian nga ginabantala naton, indi naton pagkalimtan nga may epekto gid sa mga tawo ang aton pagbantala. (Basaha ang Manugwali 11:6.) Matuod, madamo ang wala nagapamati sa aton, pero ginapanilagan nila kita. Makita nila nga mahipid kita mamayo, matinahuron kita, kag nagayuhum. Bangod sini, mahimo pensaron sang iban nga sala gali ang ila indi maayo nga pagtamod sa aton. Natalupangdan ini nanday Sergio kag Olinda, nga ginsambit sa umpisa.

¹⁷ Nagsiling si Sergio: “Sang nagmasakit kami, wala anay kami nagkadto sa plasa. Sang nakakadto na kami, namangkot ang mga tawo, ‘Kamusta kamo? Ginhidlaw man kami sa inyo.’” Nagsiling si Olinda nga nagayuhum: “Ang mga drayber sang mga bus nagbugno sa amon kag ang iban nagsiling sa amon, ‘Maayo gid ang inyo ginahimo!’ Nangayo pa gani sila sang aton mga magasin.” Nakibot gid ini nga mag-asawa sang nagpalapit sa ila cart ang isa ka lalaki nga naghatag sa ila sang bulak, kag ginpasalamatan niya sila bangod sang ila ginahimo.

18. Ngaa determinado ka nga ‘magpamunga samtang nagabatas’?

¹⁸ Kon ‘ginasab-ug’ naton ang binhi sang Ginharian “sa aga tubtob sa gab-i,” may importante kita nga bahin sa ‘pagpanaksi sa tanan nga pungsod.’ (Mat. 24:14) Labaw sa tanan, malipayon gid kita bangod nabal-an naton nga nahamuot si Jehova sa aton, kay palangga niya ang mga “nagapamunga samtang nagabatas”!