1, 2. (a) Ano ang ginasiling sang iban parte sa ideya nga may organisasyon ang Dios? (b) Ano ang binagbinagon naton sa sini nga artikulo?

MAY organisasyon bala ang Dios? “Indi mo kinahanglan ang organisasyon nga magatudlo sa imo,” siling sang iban. “Ang importante amo ang imo relasyon sa Dios.” Husto bala ini? Ano ang ginapakita sang mga ebidensia?

² Binagbinagon naton sa sini nga artikulo ang mga ebidensia nga si Jehova, ang Dios sang kahim-ong, amo ang pinakamaayo nga Organisador. Binagbinagon man naton kon ano dapat ang aton reaksion sa mga panuytoy sang organisasyon ni Jehova. (1 Cor. 14:33, 40) Sang unang siglo kag sa aton tion subong, ang Kasulatan nakabulig sa dutan-on nga bahin sang organisasyon ni Jehova nga mabantala sing lapnag ang maayong balita. Bangod ginasunod naton ang Biblia kag ang mga instruksion sang organisasyon, nagaresulta ini sa katinlo, paghidait, kag paghiusa sang kongregasyon.

3. Ano ang nagkumbinsi sa imo nga si Jehova ang pinakamaayo nga Organisador?

³ Ginapamatud-an sang pagpanuga nga ang Dios ang pinakamaayo nga Organisador. “Paagi sa kaalam ginpasad ni Jehova ang  duta,” siling sang Biblia. “Paagi sa paghantop ginpalig-on niya ang kalangitan.” (Hulu. 3:19) “Diutay lamang . . . nga bahin sang [binuhatan sang Dios]” ang nahibaluan naton, kag “daw hutik lamang ang nabatian naton tuhoy sa iya.” (Job 26:14) Pero, ang diutay nga nahibaluan naton parte sa mga planeta, bituon, kag galaksiya nagakumbinsi sa aton nga ining mga tinuga sa langit organisado gid. (Sal. 8:3, 4) Ang minilyon nga bituon sa mga galaksiya mahim-ong nga nagalibot sa kahawaan. Ang mga planeta sa aton solar system nagaagi sa ila orbit sa paglibot sa adlaw nga daw may ginasunod nga kasuguan sa trapiko! Ang makatilingala nga kahim-ong sa uniberso nagapahulag sa aton nga dayawon, unungan, kag simbahon si Jehova, kay “paagi sa iya kaalam, ginhimo niya ang kalangitan” kag ang duta.—Sal. 136:1, 5-9.

4. Ngaa napaslawan ang siensia sa pagsabat sa madamo nga pamangkot?

⁴ Madamo kita sing natun-an sa siensia parte sa uniberso kag sa aton ginaistaran nga duta, kag nakabulig ini sa aton pagkabuhi. Pero wala masabat sang siensia ang madamo nga pamangkot. Halimbawa, indi masabat sang mga astronomo kon paano nagluntad ang uniberso ukon ngaa ari kita sa planeta nga Duta nga madamo sing buhi nga tinuga. Indi man mapaathag sang kalabanan kon ngaa handum gid sang tawo nga mabuhi sing dayon. (Man. 3:11) Ngaa madamo sing importante nga pamangkot ang wala masabat? Ang isa ka rason amo nga madamo nga sientipiko kag iban pa ang nagasiling nga wala sing Dios kag ginasuportahan nila ang ebolusyon. Pero sa Libro halin kay Jehova, ginasabat niya ang mga pamangkot nga ginapamensaran sang mga tawo bisan diin.

5. Ngaa masiling nga nagadepende ang aton kabuhi sa mga kasuguan sang kinaugali?

⁵ Nagadepende ang aton kabuhi sa wala nagabag-o kag masaligan nga mga kasuguan sang kinaugali nga ginhimo ni Jehova. Ginasunod sang mga elektrisyan, tubero, enhinyero, piloto, kag doktor ining mga kasuguan para makaobra sila. Halimbawa, sigurado ang doktor nga wala nagabag-o sing puesto ang mga bahin sang lawas sang tawo. Gani indi na kinahanglan nga pangitaon pa niya kon diin nayon ang tagipusuon sang pasyente. Ginatahod naton tanan ang mga kasuguan sang kinaugali. Mahimo pa gani kita mapatay kon indi naton pagsundon ang kasuguan sang grabidad!

6. Ngaa mapaabot naton nga naorganisar ang mga sumilimba ni Jehova?

⁶ Dalayawon gid kon paano gin-organisar ang uniberso. Bangod sini, mapaabot naton nga gusto gid ni Jehova nga ang iya mga sumilimba naorganisar sing maayo. Ang matuod, amo ini ang rason kon ngaa nag-aman ang Dios sang Biblia para tuytuyan kita. Kon ang isa indi magpatuytoy sa organisasyon sang Dios kag sa iya mga talaksan, mangin masubo kag problemado ang iya kabuhi.

7. Ano ang pamatuod nga ang Biblia isa ka libro nga naorganisar sing maayo?

⁷ Ang Biblia indi koleksion sang mga literatura sang mga Judiyo kag mga Cristiano nga wala nagaalalangot. Libro ini nga naorganisar sing maayo nga gintuytuyan sang Dios ang pagsulat. Nagaalalangot ang kada libro sang Biblia. Ang mga libro halin sa Genesis asta sa Bugna may mga detalye parte sa panguna nga tema sang Biblia, nga amo ang pagbindikar sa pagkasoberano ni Jehova kag ang pagtuman sa iya katuyuan para sa duta paagi sa iya Ginharian nga pagagamhan sang Cristo, ang ginsaad nga “kaliwat.”—Basaha ang Genesis 3:15; Mateo 6:10; Bugna 11:15.

8. Ngaa masiling naton nga ang mga Israelinhon naorganisar sing maayo?

⁸ Ang katawhan sang Israel sang una naorganisar sing maayo. Halimbawa, sa Mosaikong Kasuguan, may “mga babayi nga nagaalagad  sing organisado sa puertahan sang tolda nga tilipunan.” (Ex. 38:8) Organisado man ang mga Israelinhon kon magsaylosaylo ang ila kampo kag ang tabernakulo. Sang ulihi, gin-organisar ni Hari David ang mga Levinhon kag ang mga saserdote sa mga grupo kag ginhatagan sila sing espesipiko nga mga obra. (1 Cron. 23:1-6; 24:1-3) Kon ginatuman sang mga Israelinhon si Jehova, ginapakamaayo sila nga nagaresulta sa kahim-ong, paghidait, kag paghiusa.—Deut. 11:26, 27; 28:1-14.

9. Ano ang pamatuod nga organisado ang Cristianong kongregasyon sang unang siglo?

⁹ Organisado man ang Cristianong kongregasyon sang unang siglo, kag ginpakamaayo sila sa ila pagsunod sa panuytoy sang nagadumala nga hubon nga ang mga katapo lang sang primero mga apostoles. (Binu. 6:1-6) Sang ulihi, gindugang sa nagadumala nga hubon ang iban nga gulang. (Binu. 15:6) Ginahatag man ang mga laygay kag mga instruksion paagi sa mga sulat nga gintuytuyan sang Dios. Ginsulat ini sang mga katapo sang nagadumala nga hubon sang unang siglo ukon sang mga kaupod nila. (1 Tim. 3:1-13; Tito 1:5-9) Paano ginpakamaayo ang mga kongregasyon sa ila pagsunod sa panuytoy sang nagadumala nga hubon?

10. Ano ang resulta sang ginsunod sang mga kongregasyon sang una ang mga pagsulundan nga ginpamat-uran sang nagadumala nga hubon? (Tan-awa ang piktyur sa umpisa sini nga artikulo.)

¹⁰ Basaha ang Binuhatan 16:4, 5. Ginpahibalo sang mga utod nga nagalakbay kag nagatiglawas sa nagadumala nga hubon ang “mga pagsulundan nga ginpamat-uran sang mga apostoles kag sang mga gulang sa Jerusalem.” Ginsunod sang mga kongregasyon ini nga mga pagsulundan, gani “padayon [sila] nga naglig-on sa pagtuo . . . kag nagdugang ang ila kadamuon adlaw-adlaw.” May matun-an bala kita nga leksion sa sini nga kasaysayan sa Biblia nga maayo nga sundon naton sa organisasyon sang Dios subong?

11. Ano ang dapat himuon sang gintangdo nga mga lalaki sa panuytoy nga mabaton nila halin sa organisasyon sang Dios?

¹¹ Ano ang dapat himuon sang mga katapo sang Komite sang Sanga ukon Komite sang Pungsod, mga manugtatap sang sirkito, kag mga gulang sa kongregasyon kon makabaton sila sing panuytoy halin sa organisasyon sang Dios subong? Ang Libro halin kay Jehova nagalaygay sa aton tanan nga magtuman kag magpasakop. (Deut. 30:16; Heb. 13:7, 17) Wala dapat sing reklamador ukon rebelyuso sa organisasyon sang Dios, kay makaguba ini sa gugma, paghidait, kag paghiusa sa sulod sang kongregasyon. Siempre, wala sing matutom nga Cristiano ang luyag mag-ilog kay Diotrefes nga wala sing pagtahod kag indi mainunungon. (Basaha ang 3 Juan 9, 10.) Pamangkuton naton ang aton kaugalingon: ‘Nagabulig bala ako sa pag-uswag sang espirituwalidad sang mga kaupod ko? Ginasunod ko bala dayon ang panuytoy sang mga utod nga nagapanguna?’

12. Ano nga pagbag-o ang ginhimo sa paagi sang pagtangdo sa mga gulang kag mga ministeryal nga alagad?

¹² Binagbinaga ang desisyon sang Nagadumala nga Hubon sining karon lang. Ginpaathag sang “Mga Pamangkot Gikan sa mga Bumalasa” sa Nobiembre 15, 2014, nga Ang Lalantawan ang pagbag-o sa paagi sang pagtangdo sa mga gulang kag mga ministeryal nga alagad. Ginsambit sa sini nga artikulo nga ang nagadumala nga hubon sang unang siglo naghatag sing awtoridad sa mga nagalakbay nga manugtatap nga maghimo sang pagtangdo. Pasad sa sini, sugod sang Septiembre 1, 2014, ang mga manugtatap sang sirkito amo ang nagatangdo sang mga gulang kag mga ministeryal nga alagad. Ginakilala sing maayo sang manugtatap sang sirkito ang mga utod nga lalaki nga ginarekomendar kag ginaupdan niya sila sa ministeryo kon posible. Ginaobserbahan man niya ang pamilya  sang utod nga ginarekomendar. (1 Tim. 3:4, 5) Ginabinagbinag sing maayo sang hubon sang mga gulang kag sang manugtatap sang sirkito ang mga kalipikasyon sa Kasulatan para sa mga ministeryal nga alagad kag mga gulang.—1 Tim. 3:1-10, 12, 13; 1 Ped. 5:1-3.

13. Paano naton mapakita ang aton pagsakdag sa panuytoy sang mga gulang?

¹³ Dapat naton sundon ang base sa Biblia nga panuytoy sang mga gulang. Ining mainunungon nga mga manugbantay sa organisasyon sang Dios ginatuytuyan sang “maayo,” ukon “makapapagros; mapuslanon,” nga instruksion sang Libro halin sa Dios. (1 Tim. 6:3; footnote) Dumduma ang laygay ni Pablo sa mga indi matinumanon sa kongregasyon. Ang pila “wala gid sing ginaobra kundi nagapasilabot sa mga butang nga wala sila sing labot.” Maathag nga ginlaygayan sila sang mga gulang pero wala gid sila nagapamati. Paano dapat pakig-angutan sang kongregasyon ini nga mga tawo? Naglaygay si Pablo: “Tandai ninyo sia kag untati ninyo ang pagpakig-upod sa iya.” Pero nagsiling man sia nga indi pagkabigon nga kaaway ini nga tawo, gani balanse ang iya laygay. (2 Tes. 3:11-15) Subong, ang mga gulang mahimo magpamulongpulong bilang paandam parte sa paggawi sang isa ka utod nga nagapakahuya sa kongregasyon, pareho sang pag-deyt sa indi tumuluo. (1 Cor. 7:39) Ano dapat ang reaksion mo kon magpamulongpulong ang mga gulang parte sa sini? Kon kilala mo ang utod nga ginapatuhuyan sa pamulongpulong, likawan mo bala ang pagpakigsuod sa iya? Ang imo gugma sa sini nga utod kag malig-on nga panindugan mahimo magpahulag sa iya nga untatan ang iya indi maayo nga ginahimo. ^[1]

14. Paano kita makabulig sa katinlo sang kongregasyon?

¹⁴ Makabulig kita sa espirituwal nga katinlo sang kongregasyon kon ginasunod naton ang panuytoy sang Pulong sang Dios. Binagbinaga ang sitwasyon sa Corinto sang una. Makugi nga nagbantala si Pablo sa sini nga siudad, kag palangga niya ang pareho niya nga “mga balaan” didto. (1 Cor. 1:1, 2) Gani hunahunaa ang iya kasubo sang mahibaluan niya nga ginatugutan sang kongregasyon ang seksuwal nga imoralidad! Ginlaygayan ni Pablo ang mga gulang nga itugyan ang imoral nga tawo kay Satanas, ukon i-disfellowship. Para mahuptan ang katinlo sang kongregasyon, dapat kuhaon sang mga gulang ang “lebadura.” (1 Cor. 5:1, 5-7, 12) Kon ginasakdag naton ang desisyon sang mga gulang nga i-disfellowship ang indi mahinulsulon, nagabulig kita nga mahuptan ang katinlo sang kongregasyon kag posible mapahulag naton ang nakasala nga maghinulsol kag magpangayo sing patawad kay Jehova.

15. Paano naton mahuptan ang paghidait sang kongregasyon?

¹⁵ May isa pa ka problema sa Corinto. Ang pila ka utod nagpasaka sing kaso sa ila kauturan. Makapahunahuna ang pamangkot sa ila ni Pablo: “Ngaa indi na lang ninyo pagbatason kon himuan kamo sing sayop?” (1 Cor. 6:1-8) Mahimo man ini matabo subong. Kon kaisa, mahimo madula ang paghidait sa tunga sang mga utod kon naputo ang isa ka negosyo ukon may gin-akusar nga nangdaya. Ang pila nagpasaka sing kaso sa ila utod, pero ang Libro halin sa Dios nagalaygay sa aton nga mas maayo nga mapierde kita sangsa mahuy-an ang ngalan sang Dios ukon madula ang paghidait sa kongregasyon. ^[2] Para mahusay ang serioso nga mga problema kag mga indi paghangpanay, dapat naton sundon ang laygay ni Jesus. (Basaha ang Mateo 5:23, 24; 18:15-17.) Kon himuon naton ini, nagabulig kita sa paghiusa sang pamilya sang mga sumilimba ni Jehova.

16. Ngaa mapaabot naton nga nahiusa ang katawhan sang Dios?

¹⁶ Ginapakita sang Libro halin kay Jehova kon ngaa mapaabot naton nga nahiusa ang  iya katawhan. Nag-amba ang salmista: “Tuman kaayo kag tuman katahom kon ang mag-ulutod magkabuhi nga may paghiusa!” (Sal. 133:1) Kon ginatuman sang mga Israelinhon si Jehova, organisado sila kag nahiusa. Amo ini ang gintagna sang Dios sa kahimtangan sang iya katawhan sa palaabuton: “Tingbon ko sila nga may paghiusa, pareho sang mga karnero sa toril.” (Miq. 2:12) Nagtagna pa gid si Jehova paagi kay manalagna Sofonias: “Tudluan ko ang tanan nga katawhan nga maghambal sing putli nga lenguahe [sang kamatuoran sa Kasulatan], agod nga sila tanan magtawag sa ngalan ni Jehova, kag magsimba sa iya sing nahiusa.” (Sof. 3:9) Nalipay gid kita sa pribilehiyo nga simbahon si Jehova sing nahiusa!

17. Para mahuptan ang paghiusa kag katinlo sang kongregasyon, ano ang dapat himuon sang mga gulang sa mga nakahimo sing serioso nga sala?

¹⁷ Para mahuptan ang paghiusa kag katinlo sang kongregasyon, dapat tatapon gilayon sang mga gulang sa mahigugmaon nga paagi ang mga nakahimo sing serioso nga sala. Nahibaluan ni Pablo nga ang gugma sang Dios wala nagapahangop nga pabay-an Niya lang ang sala, kag wala man Niya ini ginapabulagbulagan. (Hulu. 15:3) Gani wala nangalag-ag si Pablo nga maghimo sing una nga sulat sa mga taga-Corinto. Prangka ini pero mahigugmaon nga sulat. Ang ikaduha nga sulat sa mga taga-Corinto, nga ginsulat mga pila ka bulan ang nagligad, nagapakita nga nag-uswag sila bangod ginsunod sang mga gulang ang panuytoy sang apostol. Kon ang isa ka Cristiano makahimo sang sayop nga tikang antes niya matalupangdan ini, ang kalipikado nga mga utod dapat magtinguha nga tadlungon sia sa espiritu sang kalulo.—Gal. 6:1.

18. (a) Sa ano nga mga paagi nakabulig ang Pulong sang Dios sa mga kongregasyon sang unang siglo? (b) Ano ang binagbinagon sa masunod nga artikulo?

¹⁸ Maathag nga ang laygay sang Libro halin sa Dios nakabulig sa mga Cristiano sa Corinto kag sa iban pa sang unang siglo nga mahuptan ang katinlo, paghidait, kag paghiusa sang ila kongregasyon. (1 Cor. 1:10; Efe. 4:11-13; 1 Ped. 3:8) Bangod sini, ang aton mga kauturan sadto nga tion madamo sing nahimo sa ministeryo. Ang matuod, nagsiling si Pablo nga ang maayong balita “ginbantala sa tanan nga tinuga sa idalom sang langit.” (Col. 1:23) Subong, ang ihibalo sa dalayawon nga mga katuyuan sang Dios nagalapnag sa bug-os nga duta bangod sang pagpanikasog sang mga miembro sang isa ka organisasyon nga nahiusa sa pagbantala. Ang masunod nga artikulo magahatag sing dugang nga pamatuod nga ginapabaloran gid nila ang Biblia kag determinado sila nga padunggan ang Soberanong Ginuong Jehova.—Sal. 71:15, 16.