Nagadangop Ka Bala kay Jehova?
“Ginatubos ni Jehova ang kabuhi sang iya mga alagad; ang mga nagadangop sa iya, indi niya paghukman nga nakasala.”—SAL. 34:22.
1. Bangod sang sala, ano ang ginabatyag sang madamo nga matutom nga mga alagad sang Dios?
“MAKALULUOY gid ako!” siling ni apostol Pablo. (Roma 7:24) Pareho sa sini ang ginabatyag sang madamo nga matutom nga mga alagad sang Dios subong. Tanan kita nakapanubli sang sala, kag mahimo nga nasubuan kita kon may nahimo kita nga wala nagpahamuot kay Jehova. Ang pila ka Cristiano nga nakahimo sang serioso nga sala nagbatyag pa gani nga indi gid sila mapatawad sang Dios.
2. (a) Suno sa Salmo 34:22, ngaa indi dapat magbatyag sing sobra nga kasubo ang mga alagad sang Dios bangod sang ila sala? (b) Ano ang binagbinagon sa sini nga artikulo? (Tan-awa ang kahon nga “ May Ginalarawan Ukon May Leksion?”)
2 Pero ginapasalig kita sang Kasulatan nga ang mga nagadangop kay Jehova indi dapat magbatyag sing sobra nga kasubo bangod sang ila sala. (Basaha ang Salmo 34:22.) Ano ang buot silingon sang pagdangop kay Jehova? Ano ang dapat naton himuon para kaluuyan kita kag patawaron ni Jehova? Masabat ini nga mga pamangkot kon binagbinagon naton kon ngaa may mga siudad sa Israel sang una nga ginhimo nga dalangpan. Matuod, ginpatuman ini sa Kasuguan nga katipan, nga ginbuslan sa tion sang Pentecostes 33 C.E. Pero dumdumon naton nga naghalin kay Jehova ang Kasuguan. Gani, sa sini nga mga siudad nga dalangpan, matun-an naton kon paano ginatamod ni Jehova ang sala, ang nakasala, kag ang nagahinulsol. Binagbinagon anay naton kon ano ang katuyuan sini nga mga siudad.
“MAGPILI KAMO SING MGA SIUDAD NGA DALANGPAN”
3. Ano ang dapat himuon sang mga Israelinhon sa hungod nga nagpatay sing tawo?
3 Nabalaka gid si Jehova kon may ginpatay nga tawo sa Israel sang una. Ang hungod nga nagpatay sing tawo dapat patyon sang pinakamalapit nga lalaki nga paryente sang biktima, nga ginatawag nga “manugtimalos sang dugo.” (Num. 35:19) Paagi sa sini, matumbasan ang dugo sang inosente nga tawo nga ginpatay. Kon indi dayon pagpatyon ang manugpatay, mahigkuan ang Ginsaad nga Duta. Nagsugo si Jehova: “Indi ninyo paghigkuan ang duta nga inyo ginaistaran” paagi sa pagpaagay sang dugo, buot silingon, paagi sa pagpatay sa isa ka tawo.—Num. 35:33, 34.
4. Ano ang himuon sa isa ka Israelinhon nga indi hungod nga nakapatay sing tawo?
4 Pero ano ang himuon sa isa ka Israelinhon nga indi hungod nga nakapatay sing tawo? Bisan pa indi ini hungod, nakasala gihapon sia kay ginpaagay niya ang dugo sang inosente nga tawo. (Gen. 9:5) Pero pakitaan sia sing kaluoy kay tugutan sia nga makapalagyo sa isa sa anom ka siudad nga dalangpan para indi sia mapatay sang manugtimalos sang dugo. Maamligan sia didto. Pero dapat sia mag-istar sa siudad nga dalangpan asta mapatay ang mataas nga saserdote.—Num. 35:15, 28.
5. Paano makabulig sa aton nga makilala pa gid si Jehova kon binagbinagon naton ang parte sa mga siudad nga dalangpan?
5 Ini nga mga siudad nga dalangpan wala ginhunahuna sang mga tawo. Si Jehova mismo ang nagsugo kay Josue: “Silinga ang mga Israelinhon, ‘Magpili kamo sing mga siudad nga dalangpan.’” “Ginpakabalaan” ini nga mga siudad. (Jos. 20:1, 2, 7, 8) Bangod si Jehova mismo ang nagpain sini nga mga siudad para sa pinasahi nga katuyuan, mahimo kita mamangkot: Paano ini makabulig sa aton nga mahangpan sing maayo ang kaluoy ni Jehova? Kag ano ang ginatudlo sini sa aton kon paano kita makadangop sa iya subong?
“IPAATHAG NIYA SA MGA GULANG . . . KON ANO ANG NATABO”
6, 7. (a) Ilaragway ang responsibilidad sang mga gulang sa paghukom sa indi hungod nga nakapatay. (Tan-awa ang piktyur sa umpisa sini nga artikulo.) (b) Ngaa dapat magkadto sa mga gulang ang isa nga nagapalagyo?
6 Kon indi hungod nga nakapatay ang isa ka Israelinhon, dapat sia magpalagyo sa siudad nga dalangpan kag “ipaathag niya sa mga gulang [sa gawang] sang siudad kon ano ang natabo.” Dapat sia batunon sang mga gulang sa siudad. (Jos. 20:4) Sa ulihi, pakadtuon sia sa mga gulang sang siudad diin natabo ang pagpatay kag hukman nila sia. (Basaha ang Numeros 35:24, 25.) Kon magdesisyon sila nga indi hungod ang nahimo nga pagpatay, pabalikon nila sia sa siudad nga dalangpan.
7 Ngaa dapat magkadto sa mga gulang ang isa nga nagapalagyo? Siguraduhon sang mga gulang nga padayon nga mangin matinlo ang katawhan sang Israel kag buligan nila ang indi hungod nga nakapatay nga makabaton sang kaluoy ni Jehova. Suno sa isa ka iskolar sa Biblia, kon ang nagapalagyo indi magkadto sa mga gulang, “ginbutang niya sa katalagman ang iya kabuhi.” Nagsiling pa sia: “Sia ang may sala kon may magpatay sa iya, bangod wala sia magdangop sa pangamlig nga gin-aman sang Dios sa iya.” May gin-aman nga bulig para sa indi hungod nga nakapatay, pero dapat sia magdangop sa sini kag batunon ini nga bulig. Kon indi sia magkadto sa isa sa mga siudad nga ginpili ni Jehova, may kinamatarong sa pagpatay sa iya ang pinakamalapit nga paryente sang tawo nga napatay niya.
8, 9. Ngaa dapat magpabulig sa mga gulang ang Cristiano nga nakahimo sang serioso nga sala?
8 Subong, ang Cristiano nga nakahimo sang serioso nga sala dapat magpabulig sa mga gulang sa kongregasyon para mangin maayo liwat ang iya kaangtanan kay Jehova. Ngaa importante gid ini? Una, si Jehova ang nagtangdo sa mga gulang sa pag-asikaso sa serioso nga mga sala, nahisuno sa iya Pulong. (Sant. 5:14-16) Ikaduha, mabuligan sang mga gulang ang nakasala nga nagahinulsol para kahamut-an sia liwat sang Dios kag para malikawan niya nga masulit ang iya sala. (Gal. 6:1; Heb. 12:11) Ikatlo, ginpili kag ginhanas ang mga gulang para pasaligon ang nakasala nga nagahinulsol kag buligan sia nga maghaganhagan ang iya kasakit kag kasubo. Ginlaragway ni Jehova ini nga mga gulang nga “isa ka duog nga dalangpan sa unos.” (Isa. 32:1, 2, footnote) Indi bala nga isa gid ini ka paagi nga ginapakita sang Dios ang iya kaluoy?
9 Madamo nga alagad sang Dios ang nakabatyag sang paumpaw sang nagkadto sila sa mga gulang kag ginbaton ang ila bulig. Halimbawa, ang utod nga si Daniel nakahimo sang serioso nga sala. Pero nagpangalag-ag sia sa pagkadto sa mga gulang bisan nagligad na ang pila ka bulan. Nagsiling sia: “Pagligad sang malawig nga tion, abi ko indi na gid ako mabuligan sang mga gulang. Pero pirme ako ginakibang nga may makahibalo sang akon ginhimo kag disiplinahon ako. Kag kada mangamuyo ako kay Jehova, dapat mangayo anay ako sing pasaylo sa iya bangod sang nahimo ko.” Sang ulihi, nagpabulig na si Daniel sa mga gulang. Nagsiling sia: “Nahadlok gid ako sadto magkadto sa ila. Pero sang ginhimo ko ini, daw nagmag-an ang akon palas-anon. Wala na ako nagapangalag-ag sa pagpalapit kay Jehova.” Subong, may matinlo na nga konsiensia si Daniel, kag isa na sia ka ministeryal nga alagad.
“MAGDANGOP SIA SA ISA SINI NGA MGA SIUDAD”
10. Para kaluuyan ang indi hungod nga nakapatay sing tawo, ano ang dapat niya himuon?
10 Para kaluuyan ang indi hungod nga nakapatay sing tawo, dapat magdangop sia dayon sa pinakamalapit nga siudad nga dalangpan. (Basaha ang Josue 20:4.) Mahingagaw gid sia nga makalab-ot sa sini nga siudad kag magpabilin diri kay nagadepende sa sini ang iya kabuhi! Dapat gid sia magsakripisyo. Biyaan niya ang iya trabaho kag balay, kag indi na sia hilway magkadto sa iban nga lugar asta mapatay ang mataas nga saserdote. * (Num. 35:25) Pero para ini sa iya kaayuhan. Kon maggua sia sa siudad, ginapakita niya nga daw wala lang sa iya nga nakapatay sia, kag mangin delikado ang iya kabuhi.
11. Paano mapakita sang nagahinulsol nga Cristiano nga wala niya ginabalewala ang kaluoy sang Dios?
11 Subong, may dapat man himuon ang nakasala nga nagahinulsol para kaluuyan sia sang Dios. Dapat niya untaton ang paghimo sang sala. Lakip sa sini ang paglikaw sa paghimo sang bisan ano nga posible magresulta sa serioso nga sala. Ginlaragway ni apostol Pablo ang ginhimo sang naghinulsol nga mga Cristiano sa Corinto. Nagsulat sia: “Tan-awa ninyo ang daku nga kaukod nga resulta sang inyo kasubo sa diosnon nga paagi, huo, ang pamatud-an nga wala kamo sing sala, huo, ang inyo kaakig sa sala, huo, ang inyo kahadlok sa Dios, huo, ang inyo hanuot nga handum, huo, ang inyo kakugi, huo, ang inyo pagtadlong sa sayop!” (2 Cor. 7:10, 11) Kon desidido gid kita nga untaton ang paghimo sang sala, ginapakita naton kay Jehova nga wala naton ginapakadiutay ang aton sala kag wala naton ginaabusuhan ang iya kaluoy.
12. Ano mahimo ang dapat isakripisyo sang isa ka Cristiano para padayon niya nga mabaton ang kaluoy sang Dios?
12 Ano mahimo ang dapat isakripisyo sang isa ka Cristiano para padayon niya nga mabaton ang kaluoy sang Dios? Dapat handa niya isakripisyo ang bisan ano nga importante sa iya kon mangin kabangdanan ini nga makasala sia. (Mat. 18:8, 9) Kon ginaimpluwensiahan ka sang imo mga abyan nga himuon ang indi makapahamuot kay Jehova, untatan mo bala ang pagpakig-upod sa ila? Kon nabudlayan ka nga maghaganhagan sa pag-inom sang makahulubog nga ilimnon, likawan mo bala ang mga sitwasyon nga magasulay sa imo nga magpatama inom? Kon nagapakigbato ka sa imoral nga mga handum sa sekso, ginalikawan mo bala ang mga pelikula, website, ukon ang bisan ano nga magapasulod sa imo pensar sang indi matinlo nga panghunahuna? Dumduma, dapat gid kita magsakripisyo para makapabilin kita nga matutom kay Jehova, kag para ini sa aton kaayuhan. Tuman gid kalain batyagon kon patumbayaan kita ni Jehova. Pero indi matupungan ang aton kalipay kon mabatyagan naton ang iya “wala sing katubtuban nga mainunungon nga gugma.”—Isa. 54:7, 8.
“MANGIN DALANGPAN NINYO INI”
13. Ngaa puede magbatyag ang nagpalagyo nga hilway sia sa katalagman, naamligan, kag malipayon sa siudad nga dalangpan?
13 Hilway na sa katalagman ang nagpalagyo kon ara na sia sa sulod sang siudad nga dalangpan. Nagsiling si Jehova parte sa sini nga siudad: “Mangin dalangpan ninyo ini.” (Jos. 20:2, 3) Wala na magsugo si Jehova nga hukman liwat ang nakapatay sing tawo sa amo gihapon nga sala, kag wala gintugutan ang manugtimalos sang dugo nga magsulod sa siudad para patyon ang nagpalagyo. Indi sia dapat magbatyag nga may magatimalos pa sa iya. Samtang ara sia sa siudad, mabaton niya ang pag-amlig ni Jehova. Ini nga siudad indi prisuhan. Makatrabaho sia diri, makabulig sia sa iban, kag maalagad niya si Jehova nga may kalinong. Huo, puede gid sia mangin malipayon!
Magsalig nga patawaron ka ni Jehova (Tan-awa ang parapo 14-16)
14. Ano ang masaligan sang naghinulsol nga Cristiano?
14 May pila sa katawhan sang Dios nga nakahimo anay sang serioso nga sala ang nagabatyag nga wala sila napatawad bisan pa naghinulsol na sila. Pamatyag nila indi gid malimtan ni Jehova ang ila ginhimo nga sala. Kon amo sini ang imo ginabatyag, magsalig gid nga si Jehova nagapatawad sing bug-os! Kon ginpatawad ka na niya, indi ka na dapat magbatyag nga wala ka ginpatawad. Napamatud-an ini ni Daniel, nga ginsambit kaina. Sa tapos gin-asikaso sang mga gulang ang iya sala, kag ginbuligan sia nga mangin matinlo liwat ang iya konsiensia, nagsiling sia: “Naumpawan gid ako. Sang naasikaso na ang akon sala, nagbatyag ako nga ginpatawad na ako. Kon napatawad na ang sala, wala na ini. Pareho sang ginsiling ni Jehova, ginakuha niya ang imo mga problema kag ginapahilayo ini sa imo. Indi mo na ini dapat hunahunaon pa.” Kon ara na sa sulod sang siudad nga dalangpan ang nagpalagyo, indi na sia dapat magbatyag sing kahadlok nga basi patyon sia sang manugtimalos sang dugo. Gani kon napatawad na ni Jehova ang aton sala, indi na kita dapat magbatyag sing kahadlok nga nagapangita pa sia sing rason para ungkaton ini nga sala ukon para silutan kita.—Basaha ang Salmo 103:8-12.
15, 16. Bangod si Jesus ang aton Manuggawad kag Mataas nga Saserdote, paano sini mapabakod ang imo pagsalig sa kaluoy sang Dios?
15 Kon may rason ang mga Israelinhon nga magsalig sa kaluoy ni Jehova, mas may rason kita nga magsalig sa sini. Pagkatapos mahambal ni Pablo nga makaluluoy gid sia kay indi niya matuman sing himpit si Jehova, nagsiling sia: “Nagapasalamat ako sa Dios paagi kay Jesucristo nga aton Ginuo!” (Roma 7:25) Nagpakigbato si Pablo bangod sa sala kag nakahimo sia sang sala sang una, pero ginhinulsulan niya ini. Gani nagsalig sia nga ginpatawad sia sang Dios paagi kay Jesus. Bilang aton Manuggawad, gintinluan ni Jesus ang aton konsiensia kag ginhatagan kita sing kalinong sa hunahuna. (Heb. 9:13, 14) Bilang aton Mataas nga Saserdote, “maluwas man niya sing bug-os ang mga nagapalapit sa Dios paagi sa iya, bangod padayon sia nga nagakabuhi agod mangabay para sa ila.” (Heb. 7:24, 25) Kon nabuligan sang mataas nga saserdote ang mga Israelinhon nga magsalig nga mapatawad ang ila sala, mas mabuligan kita sang aton Mataas nga Saserdote nga si Jesus nga magsalig nga “matigayon naton ang kaluoy kag ang wala tupong nga kaayo sa tion nga nagakinahanglan kita sang bulig.”—Heb. 4:15, 16.
16 Gani para makadangop kay Jehova, dapat kita magtuo sa halad ni Jesus. Indi paghunahunaa nga ang gawad para lang sa katawhan sa kabilugan. Magtuo nga makabulig sa imo ang gawad. (Gal. 2:20, 21) Magtuo nga paagi sa gawad, mapatawad ni Jehova ang imo mga sala. Magtuo nga ang gawad nagahatag sa imo sing paglaum nga kabuhi nga wala sing katapusan. Ang halad ni Jesus regalo ni Jehova sa imo.
17. Ngaa gusto mo magdangop kay Jehova?
17 Ang mga siudad nga dalangpan nagabulig sa aton nga mahangpan ang kaluoy ni Jehova. Paagi sa sini, ginatudluan kita sang Dios nga sagrado ang kabuhi. Ginatudluan man kita sini kon paano nagabulig ang mga gulang sa aton, kon ano ang matuod nga paghinulsol, kag kon ngaa makasalig gid kita nga patawaron kita ni Jehova. Nagadangop ka bala kay Jehova? Wala na sang iban pa nga mas maayo nga dalangpan! (Sal. 91:1, 2) Sa masunod nga artikulo, binagbinagon naton kon paano kita mabuligan sang mga siudad nga dalangpan para mailog naton ang hustisya kag kaluoy ni Jehova.
^ par. 10 Suno sa mga reperensia sang mga Judiyo, posible nga ang pamilya sang indi hungod nga nakapatay sing tawo nagaapas sa iya sa siudad nga dalangpan.
