1. Ano ang mahimo naton kon nagaamba kita?

NAGSILING ang isa ka bantog nga manunulat sang kanta: “Kon may mabatian ka nga mga tinaga, may mahunahuna ka. Kon may mabatian ka nga musika, may mabatyagan ka. Pero kon magkanta ka, matandog sang mga tinaga ang imo balatyagon.” Paagi sa aton mga ambahanon, mapabutyag naton ang aton pagdayaw kag gugma sa aton Amay sa langit nga si Jehova, kag mabatyagan naton nga nagasuod kita sa iya. Gani ang pag-amba importante gid nga bahin sang putli nga pagsimba. Matuod ini kon nagaamba kita sing isahanon ukon sa tion nga kaupod naton ang aton mga kauturan sa kongregasyon.

2, 3. (a) Paano ginatamod sang iban ang pag-amba sing matunog sa kongregasyon? (b) Ano nga mga pamangkot ang binagbinagon naton?

² Nagaamba ka bala sing matunog sa kongregasyon? Ukon nahuya ka bala nga himuon ini? Sa iban nga kultura, mahimo nasaw-ahan ang mga lalaki sa pag-amba sa publiko. May epekto ini sa kongregasyon, ilabi na kon ang mga gulang daw wala gana sa pag-amba ukon may iban sila nga ginahimo samtang nagaamba ang kongregasyon.—Sal. 30:12.

³ Kon ginatamod gid naton ang pag-amba nga bahin sang aton pagsimba, indi kita maggua sa tion sang ambahanon kag ara gid kita sa tanan nga ambahanon sa aton miting. Gani dapat naton  pamangkuton ang aton kaugalingon: ‘Paano ko ginatamod ang pag-amba sa aton mga miting? Ano ang himuon ko para makaamba ako nga may kasadya? Kag paano ako makaamba sing tinagipusuon?’

4, 5. Paano nangin bahin sang pagsimba sa Israel sang una ang pag-amba?

⁴ Madugay na nga ginagamit sang matutom nga mga sumilimba ni Jehova ang musika sa pagdayaw sa iya. Talalupangdon gid ang pag-amba sa pagsimba sang mga Israelinhon sang una sang matutom sila nga nagaalagad kay Jehova. Halimbawa, sang ginahanda ni Hari David ang pag-alagad sa templo, gin-organisar niya ang 4,000 ka Levinhon para magdayaw kay Jehova paagi sa musika. Lakip sa ila ang 288 nga “nahanas sa pag-amba kay Jehova, . . . kag sampaton sila tanan.”—1 Cron. 23:5; 25:7.

⁵ Nangin importante man nga bahin ang musika kag pag-amba sa inagurasyon sang templo. Nagsiling ang rekord: “Sang nagdungan ang pagpatunog sing mga trumpeta kag ang pag-amba sang mga manug-amba sa pagdayaw kag pagpasalamat kay Jehova, kag sang ginpatunog ang mga trumpeta, ang mga simbal, kag ang iban pa nga mga instrumento sa musika samtang ginadayaw nila si Jehova, . . . napuno sang himaya ni Jehova ang balay sang matuod nga Dios.” Nagpabakod gid sang pagtuo ini nga okasyon!—2 Cron. 5:13, 14; 7:6.

6. Ilaragway ang pinasahi nga musika kag pag-amba sang tion nga gobernador si Nehemias sa Jerusalem.

⁶ Sang gin-organisar ni Nehemias ang matutom nga mga Israelinhon sa pagkay-o sa mga pader sang Jerusalem, gin-organisar man niya ang mga Levinhon para sa pag-amba kag pagtokar sang musika. Sang gindedikar na ang mga pader, nangin masadya pa gid ini nga okasyon bangod sang pinasahi nga musika kag pag-amba. May “duha ka daku nga grupo sang manug-amba sang pagpasalamat sa Dios.” Naghalin ang kada grupo sa magkatuhay nga direksion nga nagalakat sa ibabaw sang mga pader kag nagtabuay malapit sa templo. Matunog gid ang ila pag-amba amo nga nabatian ini sa malayo. (Neh. 12:27, 28, 31, 38, 40, 43) Sigurado gid nga nalipay si Jehova sa pagpamati sa mapagsik nga pag-amba sang iya mga sumilimba nga nagadayaw sa iya.

7. Paano ginpakita ni Jesus nga importante sa pagsimba sang mga Cristiano ang pag-amba?

⁷ Sang panahon ni Jesus, importante gihapon nga bahin sang matuod nga pagsimba ang musika. Sa pinakaimportante nga gab-i sa kasaysayan sang tawo, pagkatapos sang Panihapon sang Ginuo, nag-amba si Jesus upod sa iya mga disipulo.—Basaha ang Mateo 26:30.

8. Ano nga halimbawa ang ginpakita sang mga Cristiano sang unang siglo sa pag-amba sa ila pagsimba?

⁸ Nagpakita sang maayo nga halimbawa ang mga Cristiano sang unang siglo sa pagdayaw sa Dios paagi sa pag-amba. Bisan pa masami sila nagatipon sa ordinaryo lang nga mga balay para sa ila pagsimba, mapagsik sila gihapon nga nagaamba kay Jehova. Ginsilingan ni apostol Pablo ang iya Cristiano nga mga kauturan: “Padayon nga magpanudlo kag magpalig-on sa isa kag isa nga may mga salmo, mga pagdayaw sa Dios, espirituwal nga mga ambahanon nga ginaamba ninyo sing mapinasalamaton kag tinagipusuon kay Jehova.” (Col. 3:16) Ang mga ambahanon sa aton songbook “espirituwal nga mga ambahanon nga [dapat ambahon] sing mapinasalamaton.” Bahin ini sang espirituwal nga pagkaon nga ginaaman sang “matutom kag mainandamon nga ulipon.”—Mat. 24:45.

9. (a) Ngaa wala nagakanta sing matunog ang iban sa aton mga miting kag asembleya? (b) Paano kita dapat mag-amba sing mga pagdayaw kay Jehova, kag sin-o ang dapat manguna sa sini? (Tan-awa ang piktyur sa umpisa sini nga artikulo.)

⁹ Kamusta kon indi palakanta ang inyo pamilya bangod sang inyo kultura ukon gindak-an? Mahimo nga nanamian ka magpamati sa propesyonal nga mga singer sa radyo ukon sa TV. Basi nahuya ka ukon naluyahan kon ikumparar mo sa ila ang imo tingog. Pero indi ini dapat makaapekto sa imo responsibilidad nga mag-amba sing mga pagdayaw kay Jehova. Gani uyati ang imo songbook sing iguigo lang kataas nga wala ka nagaduko, kag tinagipusuon nga magkanta! (Esd. 3:11; basaha ang Salmo 147:1.) Sa madamo nga Kingdom Hall subong, makita sa monitor ang mga tinaga sang mga ambahanon, kag makabulig ini sa aton nga makakanta sing matunog. Ginlakip man ang pag-amba sang mga ambahanon sang Ginharian sa Kingdom Ministry School para sa mga gulang. Ginapakita sini nga dapat manguna ang mga gulang sa pag-amba sa kongregasyon.

10. Ano ang dapat naton dumdumon kon nakulbaan kita magkanta sing matunog?

¹⁰ Wala nagakanta sing matunog ang iban bangod mahimo nakulbaan sila nga maglabaw ukon maglibag ang ila tingog. Dapat naton dumdumon nga kon nagahambal kita, “nagakasandad [kita] sing madamong beses.” (Sant. 3:2) Pero nagahambal kita gihapon. Gani ngaa indi na kita mag-amba sa pagdayaw kay Jehova bangod lang indi nami ang aton tingog?

11, 12. Ano ang pila ka panugda para mapanami naton ang aton pagkanta?

¹¹ Basi nakulbaan kita magkanta kay indi kita kabalo kon paano magkanta. Pero mapanami naton ang aton pagkanta kon sundon naton ang pila ka panugda. *

 ¹² Makakanta ka sing matunog kon magginhawa ka sing nagakaigo. Ang pagginhawa nagapapagsik sa imo tingog kon nagahambal ka ukon nagakanta, pareho sang elektrisidad nga nagapasiga sa bombilya. Ang imo tingog kon nagakanta dapat pareho katunog kon nagahambal ka ukon mas matunog pa. (Tan-awa ang mga panugda sa Magbenepisyo sa Pagpanudlo sang Teokratikong Eskwelahan Para sa Ministeryo, pahina 181 asta 184, sa subtitulo nga “Magginhawa sing Nagakaigo.”) Ang matuod, may mga tion nga ginasugo sang Kasulatan ang mga sumilimba ni Jehova nga ‘magsinggit sa kalipay’ kon nagaamba sing mga pagdayaw.—Sal. 81:1.

13. Ipaathag kon paano kita makakanta nga may kompiansa.

¹³ Sa inyo pangpamilya nga pagsimba ukon bisan ikaw lang isa, tilawi ini nga panugda: Magpili sing paborito mo nga kanta sa aton songbook. Basaha sing matunog kag maathag ang mga tinaga. Sa pareho nga katunugon, ihambal ang tanan nga tinaga sa isa ka prase sa isa ka pagginhawa. Dayon kantaha ini nga prase sa matunog gihapon nga tingog. (Isa. 24:14) Mangin puersado ang imo tingog, kag maayo ini. Indi ini kululbaan ukon makahuluya.

14. (a) Ano pa gid ang himuon naton para mangin puersado ang aton tingog sa pagkanta? (Tan-awa ang kahon nga “ Kon Paano Mapanami ang Imo Pagkanta.”) (b) Ano nga mga panugda ang makabulig sa imo kon may problema ka sa imo tingog?

¹⁴ Mangin puersado ang imo tingog sa pagkanta kon dakuon mo ang pagnganga sang imo baba. Ginapanugda nga dapat mas daku ini sangsa kon nagahambal ka. Pero ano ang himuon mo kon pamatyag mo kaluya sang imo tingog ukon basi katingil sang imo tingog? Makabulig sa imo ang mga panugda sa Magbenepisyo sa Pagpanudlo sang Teokratikong Eskwelahan Para sa Ministeryo, pahina 184, sa kahon nga “Paglandas sa Espesipiko nga mga Problema.”

15. (a) Ano ang ginpahibalo sa annual meeting sang 2016? (b) Ngaa ginbag-o ang aton songbook?

¹⁵ Nalipay gid ang mga nagtambong sa annual meeting sang Watch Tower Bible and  Tract Society of Pennsylvania sang 2016 sang ginpahibalo ni Utod Stephen Lett, miembro sang Nagadumala nga Hubon, nga malapit na gamiton sa mga miting ang bag-o nga songbook nga may tig-ulo nga “Sing Out Joyfully” to Jehovah (Mag-amba nga May Kasadya kay Jehova). Ginpaathag ni Utod Lett nga ginbag-o ang aton songbook bangod ginrebisar ang New World Translation of the Holy Scriptures sang 2013. Ginkuha ukon gin-islan ang mga tinaga sa daan nga songbook nga wala na sa New World Translation. Gindugang man ang bag-o nga mga ambahanon parte sa pagbantala kag parte sa pag-apresyar sa gawad. Isa pa, bangod importante nga bahin sang aton pagsimba ang pag-amba, gusto sang Nagadumala nga Hubon nga mangin matahom kag mabakod ang aton songbook. Gani pareho ang kober sini sa ginrebisar nga New World Translation.

16, 17. Paano ginpanami ang bag-o nga songbook?

¹⁶ Para mahapos gamiton ang Mag-amba nga May Kasadya kay Jehova, gingrupo ang mga ambahanon suno sa topiko. Halimbawa, ang una nga 12 ka ambahanon parte kay Jehova, ang sunod nga 8 ka ambahanon parte kay Jesus kag sa gawad, kag ginsundan ini sang iban pa nga topiko. May indese sang mga topiko ini nga songbook. Makabulig ini sa pagpili sang ambahanon para sa pamulongpulong publiko.

¹⁷ Para mabuligan ang tanan nga makakanta sing tinagipusuon, ginbag-o ang pila ka liriko. Gani nangin mas maathag ang mensahe sang mga ambahanon. Gin-islan ang mga tinaga nga indi na kinaandan nga ginagamit sing mga tinaga nga pamilyar kag mahapos hangpon. Ang tig-ulo nga “Amligi ang Imo Tagipusuon” gin-islan sing “Bantayan Naton ang Aton Tagipusuon.” Ngaa nagakaigo ini? Bangod kon kantahon sang isa ang daan nga ambahanon, daw pareho lang nga ginasugo niya ang iban. Mahimo nga masaw-ahan sa sini ang madamo nga bag-uhan, mga interesado, mga pamatan-on, kag mga utod nga babayi nga nagatambong sa aton mga miting, asembleya, kag kombension. Gani ginbag-o ang tig-ulo kag liriko sini.

18. Ngaa dapat naton makabisado ang mga ambahanon sa aton bag-o nga songbook? (Tan-awa ang footnote.)

¹⁸ Madamo nga ambahanon sa Mag-amba nga May Kasadya kay Jehova ang daw mga pangamuyo. Paagi sa pag-amba sini, mapabutyag mo kay Jehova ang imo ginabatyag. Ang iban naman nga ambahanon ‘magapahulag sa aton sa gugma kag sa maayong mga buhat.’ (Heb. 10:24) Gusto gid naton nga makabisado ang tono kag mga liriko sang aton mga ambahanon. Kon magpraktis ka sa inyo balay sa pagkanta sang aton mga ambahanon, makakanta ka nga may kompiansa kag sing tinagipusuon. *

19. Paano makapakigbahin sa pagsimba kay Jehova ang tanan sa kongregasyon?

¹⁹ Dumdumon naton nga ang pag-amba importante nga bahin sang aton pagsimba. Paagi sa sini, mapakita gid naton nga ginapalangga naton kag ginapasalamatan si Jehova. (Basaha ang Isaias 12:5.) Kon mapagsik ka nga nagakanta, mapalig-on mo ang iban nga mangin mapagsik man sa pagkanta. Ang tanan sa kongregasyon, ang mga bata, tigulang, kag bag-uhan, makapakigbahin sa sini nga paagi sang pagsimba kay Jehova. Gani indi maghuyahuya sa pagkanta. Himua ang ginsiling sang salmista: “Mag-amba kamo kay Jehova!” Huo, mag-amba nga may kasadya!—Sal. 96:1.