SA ISA ka gamay nga banwa sang Gujarat sa India, nabawtismuhan ang amay ni John bilang isa ka Saksi ni Jehova sang talipuspusan sang dekada ’50. Pero si John kag ang iya lima ka utod kag iloy mga debotado nga Katoliko, gani ginpamatukan nila ang ila amay.

Isa ka adlaw, ginpangabay si John sang iya amay nga idul-ong ang isa ka sobre sa iya abyan sa kongregasyon. Pero, sina nga aga, napilasan ang tudlo ni John sang ginbuksan niya ang isa ka dram. Gintuman gihapon ni John ang iya amay, gani ginputos niya sang tela ang iya nagadugo nga tudlo kag gindul-ong niya ang sobre.

Pag-abot ni John sa balay sang abyan sang iya amay, ang asawa sang tawo, nga isa ka Saksi ni Jehova, ang nagbaton sang sobre. Nakita niya nga may pilas ang tudlo ni John kag nagsiling sia nga bulngon niya ang pilas. Ginkuha niya ang bulutangan sang bulong, gintinluan niya ang pilas, kag ginbutangan niya sang bendahe ang tudlo ni John. Dayon gintimplahan niya si John sang mainit nga tsa. Samtang ginahimo niya ini tanan, ginaistoryahan niya si John parte sa Biblia.

Bangod sini, amat-amat nga nagbag-o ang pagtamod ni John sa mga Saksi. Gani ginpamangkot sia ni John parte sa duha ka topiko nga indi pareho ang pagpati niya sa iya amay. Namangkot sia kon bala si Jesus Dios kag kon dapat bala magpangamuyo kay Maria ang mga Cristiano. Bangod kabalo ang Saksi sang Gujarati, nga amo ang namat-an nga lenguahe ni John, ginsabat niya si John paagi sa paggamit sang Biblia kag ginhatagan niya sia sang bukleta nga “This Good News of the Kingdom.”

Sang ulihi, sang ginbasa ni John ang bukleta, narealisar niya nga amo ini ang kamatuoran. Ginkadtuan niya ang ila pari kag ginpamangkot sia parte sa duha ka pamangkot nga ginpamangkot niya sa Saksi. Naakig ang pari kag ginhaboy niya si John sang Biblia kag nagsinggit: “Satanas! Ipakita sa akon kon diin sa Biblia nagasiling nga indi Dios si Jesus. Ipakita sa akon kon diin sa Biblia nagasiling nga indi dapat pagsimbahon si Maria. Ipakita!” Nakibot gid si John sa reaksion sang pari, gani ginsilingan niya ang pari, “Indi na gid ako magbalikbalik sa simbahan.” Amo gid sini ang ginhimo ni John.

Nagtuon si John sang Biblia sa mga Saksi, ginsakdag niya ang matuod nga pagsimba, kag nag-alagad sia kay Jehova. Sang ulihi, amo man sini ang ginhimo sang pila ka miembro sang ila pamilya. Subong, ara gihapon ang pinalian sa tudlo sang tuo nga kamot ni John bangod sang iya pilas mga 60 ka tuig na ang nagligad. Nagapahanumdom ini sa iya sang isa ka buhat nga nagapakita sang kaayo nga nagbulig sa iya nga mahibaluan ang putli nga pagsimba.—2 Cor. 6:4, 6.