Iluga ang Pagtuo kag Pagtuman Nanday Noe, Daniel, kag Job
“Maluwas lamang [nanday Noe, Daniel, kag Job] ang ila kaugalingon bangod sang ila pagkamatarong.”—EZEQ. 14:14.
1, 2. (a) Ngaa mapalig-on kita sang halimbawa nanday Noe, Daniel, kag Job? (b) Ano ang kahimtangan sadto sang ginsulat ni Ezequiel ang mabasa sa Ezequiel 14:14?
MAY ginaatubang ka bala nga pagtilaw, pareho sang balatian, problema sa kuarta, ukon paghingabot? Nagakadula bala ang imo kalipay kon kaisa sa pag-alagad kay Jehova? Mapalig-on ka sang halimbawa nanday Noe, Daniel, kag Job. Indi sila himpit, kag nakaatubang man sila sang mga problema nga ginaatubang naton. May tion pa gani nga nabutang sa katalagman ang ila kabuhi. Pero nagpabilin sila nga matutom, kag gintamod sila sang Dios nga mga halimbawa sang pagtuo kag pagtuman.—Basaha ang Ezequiel 14:12-14.
2 Ginsulat ni Ezequiel sa Babilonia sang 612 B.C.E. ang teksto nga ginbasihan sang tema sini nga artikulo. * (Ezeq. 1:1; 8:1) Malapit na sadto laglagon ang apostata nga Jerusalem, nga natabo sang 607 B.C.E. Pila lang ka tawo ang pareho nanday Noe, Daniel, kag Job, kag naluwas sila. (Ezeq. 9:1-5) Lakip sa ila sanday Jeremias, Baruc, Ebed-melec, kag ang mga Recabnon.
3. Ano ang binagbinagon naton sa sini nga artikulo?
3 Subong, ang mga ginakabig lang ni Jehova nga matarong, pareho nanday Noe, Daniel, kag Job, ang makalampuwas kon laglagon na ini nga sistema. (Bug. 7:9, 14) Gani hibaluon naton kon ngaa gingamit ni Jehova ini nga mga lalaki bilang halimbawa sang pagkamatarong. Binagbinagon naton (1) ang mga kabudlayan nga naatubang sang kada isa sa ila kag (2) kon paano naton mailog ang ila pagtuo kag pagtuman.
NAGTUO KAG NAGTUMAN SI NOE SA SULOD SANG SIAM KA GATOS KA TUIG
4, 5. Ano nga mga kabudlayan ang naatubang ni Noe, kag ngaa talalupangdon gid ang iya pagbatas?
4 Ang mga kabudlayan nga naatubang ni Noe. Sang panahon sang lolo ni Noe nga si Enoc, tuman kalaut na sang mga tawo. Nagahambal pa gani sila sang “makakilibang nga mga butang” parte kay Jehova. (Jud. 14, 15) Nangin masingki pa gid ang mga tawo. Sang panahon ni Noe, “napuno ang duta sang kasingki.” Ang malaut nga mga anghel nagpakatawo kag nagpangasawa sang mga babayi sa duta. Ang ila mga anak nangin mapintas nga mga higante. (Gen. 6:2-4, 11, 12) Pero tuhay gid si Noe. “Nahamut-an ni Jehova si Noe. . . . Wala sia sing kasawayan sa tunga sang iya mga kadungan. Si Noe naglakat upod ang matuod nga Dios.”—Gen. 6:8, 9.
5 Binagbinaga ang ginsiling parte sa sining matarong nga tawo. Una, naglakat si Noe upod sa Dios sa malaut nga kalibutan antes sang Baha, indi lang sa sulod sang 70 ukon 80 ka tuig, kundi halos 600 ka tuig! (Gen. 7:11) Ikaduha, indi pareho sa aton subong, wala sadto sang kongregasyon nga makabulig sa iya sa espirituwal, kay bisan gani ang iya mga utod indi mga sumilimba sang Dios. *
6. Paano ginpakita ni Noe ang tumalagsahon nga kaisog?
6 Para kay Noe, indi bastante nga mangin maayo lang nga tawo. Nangin maisog man sia nga “manugbantala sang pagkamatarong,” kay ginsugid niya sa iban ang iya pagtuo kay Jehova. (2 Ped. 2:5) “Paagi sini nga pagtuo ginpakamalaut niya ang kalibutan,” sulat ni apostol Pablo. (Heb. 11:7) Gani sigurado gid nga ginyaguta sia kag ginpamatukan, kag mahimo nga ginpahog pa gani sia nga sakiton sang iban. Pero wala sia ‘nahadlok sa tawo.’ (Hulu. 29:25) Ginpakita niya ang kaisog nga ginahatag ni Jehova sa iya matutom nga mga alagad.
7. Ano nga mga kabudlayan ang naatubang ni Noe sang ginhimo niya ang arka?
7 Pagligad sang sobra lima ka gatos ka tuig nga paglakat ni Noe upod sa Dios, ginsugo sia ni Jehova nga maghimo sing arka para maluwas ang mga tawo kag sapat. (Gen. 5:32; 6:14) Mabudlay gid ini nga proyekto. Nabal-an man ni Noe nga labi pa sia nga yagutaon kag pamatukan bangod sini. Pero nagtuo sia kag nagtuman. “Amo gid ini ang ginhimo niya.”—Gen. 6:22.
8. Paano ginpakita ni Noe nga nagasalig sia kay Jehova sa pag-aman sa iya pamilya?
8 Naatubang man ni Noe ang kabudlayan sa pag-aman sang materyal nga kinahanglanon sang iya asawa kag kabataan. Antes sang Baha, dapat magpangabudlay sing todo ang mga tawo sa pagpanguma para may kaunon sila, kag ginhimo man ini ni Noe. (Gen. 5:28, 29) Pero ang pinakaimportante sa iya amo ang pag-alagad sa Dios, indi ang pagtigayon sang materyal nga mga kinahanglanon. Nagpokus sia kay Jehova sang ginhimo niya ang arka sa sulod sang 40 ukon 50 ka tuig. Kag nakapokus sia gihapon pagligad sang 350 ka tuig pagkatapos sang Baha. (Gen. 9:28) Maayo gid sia nga halimbawa sang pagtuo kag pagtuman!
9, 10. (a) Paano naton mailog ang pagtuo kag pagtuman ni Noe? (b) Paano ginatamod sang Dios ang tanan nga nagasunod sang iya mga kasuguan?
9 Kon paano naton mailog ang pagtuo kag pagtuman ni Noe. Mahimo naton ini kon sakdagon naton ang pagkamatarong sang Dios, kon indi kita bahin sang kalibutan ni Satanas, kag kon unahon naton ang Ginharian. (Mat. 6:33; Juan 15:19) Bangod sini, indi gid mahamuot sa aton ang kalibutan. Bangod ginasunod gid naton ang mga kasuguan sang Dios parte sa sekso kag pag-asawahay, ginapakalain kita sa pila ka pungsod paagi sa media. (Basaha ang Malaquias 3:17, 18.) Pareho kay Noe, wala kita nahadlok sa mga tawo, kundi nahadlok kita nga indi mapahamut-an si Jehova. Kabalo kita nga sia lang ang makahatag sa aton sang kabuhi nga wala sing katapusan.—Luc. 12:4, 5.
10 Kamusta ka naman? Padayon ka bala nga ‘magalakat upod sa Dios,’ bisan pa hikayan ka ukon pakalainon sang iban? Magasalig ka bala kay Jehova sa pag-aman sang mga kinahanglanon sang imo pamilya bisan pa mabudlay ang pangabuhi? Kon magtuo ka kag magtuman pareho kay Noe, makasalig ka nga atipanon gid ikaw ni Jehova.—Fil. 4:6, 7.
NAGTUO KAG NAGTUMAN SI DANIEL BISAN ARA SA MALAUT NGA SIUDAD
11. Ano nga mga kabudlayan ang naatubang ni Daniel kag sang iya tatlo ka abyan sa Babilonia? (Tan-awa ang piktyur sa umpisa sini nga artikulo.)
11 Ang mga kabudlayan nga naatubang ni Daniel. Nagkabuhi si Daniel nga isa ka bihag sa Babilonia, isa ka siudad nga lapnag ang pagsimba sa mga diosdios kag espiritismo. Ginpakanubo sang mga taga-Babilonia ang mga Judiyo kag ginyaguta sila kag ang ila Dios nga si Jehova. (Sal. 137:1, 3) Nagpasubo gid ini sa matutom nga mga Judiyo pareho kay Daniel! Madamo man ang nagapanilag sa iya kag sa iya tatlo ka abyan nga sanday Hananias, Misael, kag Azarias kay ginahanas sila sadto sa pag-alagad sa hari. May ginpatuman pa gani nga espesipiko nga pagkaon kag ilimnon para sa ila. Ang matuod, nangin problema ini bangod indi gusto ni Daniel nga ‘dagtaan ang iya kaugalingon sang pagkaon sang hari.’—Dan. 1:5-8, 14-17.
12. (a) Ano ang maayo nga mga kinaiya ni Daniel? (b) Paano ginkabig ni Jehova si Daniel?
12 May isa pa ka kahimtangan nga naatubang si Daniel nga mahimo daw indi problema sa umpisa. Bangod sang iya mga ikasarang, ginhatagan sia sing pinasahi nga mga pribilehiyo. (Dan. 1:19, 20) Pero sa baylo nga mangin arogante kag magpensar nga sia lang ang husto, padayon sia nga nagpaubos kag pirme niya ginapadunggan si Jehova. (Dan. 2:30) Sang pamatan-on pa lang si Daniel, ginkabig na sia ni Jehova nga isa ka halimbawa sang pagkamatarong, upod nanday Noe kag Job. Nagsala bala ang Dios sa iya pagkabig kay Daniel? Wala! Padayon nga nagtuo kag nagtuman si Daniel sa bug-os niya nga kabuhi. Mahimo nga malapit na 100 ka tuig ang iya edad sang nagsiling sa iya ang anghel sang Dios: “Daniel, ikaw nga hamili gid nga tawo.”—Dan. 10:11.
13. Ngaa nakabulig si Daniel sa pareho niya nga mga Judiyo?
13 Bangod sang pagpakamaayo sang Dios, nangin mataas nga opisyal si Daniel sa Babilonia kag Medo-Persia. (Dan. 1:21; 6:1, 2) Mahimo nga ginpahanabo ini ni Jehova para mabuligan ni Daniel ang iya katawhan, pareho sang natabo kay Jose sa Egipto kag kanday Ester kag Mardoqueo sa Persia. * (Dan. 2:48) Sigurado nga napalig-on gid ang mga Judiyo nga bihag, pati si Ezequiel, sang nakita nila kon paano sila ginbuligan ni Jehova paagi kay Daniel.
Hamili kay Jehova ang mga matutom sa iya (Tan-awa ang parapo 14 kag 15)
14, 15. (a) Paano nangin pareho sa kahimtangan ni Daniel ang aton kahimtangan subong? (b) Ano ang matun-an sang mga ginikanan sa halimbawa sang mga ginikanan ni Daniel?
14 Kon paano naton mailog ang pagtuo kag pagtuman ni Daniel. Subong, daw mga estranghero kita sa kalibutan nga lapnag ang imoralidad kag butig nga pagsimba bangod sang impluwensia sang Babilonia nga Daku, ang bug-os kalibutan nga emperyo sang butig nga relihion, nga nangin ‘ilistaran sang mga demonyo.’ (Bug. 18:2) Makita sang mga tawo nga tuhay gid kita, gani ginayaguta nila kita. (Mar. 13:13) Pareho kay Daniel, magpalapit kita kay Jehova nga aton Dios. Kon magpaubos kita, magsalig kay Jehova, kag magtuman sa iya, mangin hamili man kita sa iya.—Hag. 2:7.
15 May matun-an ang mga ginikanan sa halimbawa sang mga ginikanan ni Daniel. Bisan pa malaut ang kalabanan nga tawo sa Juda sang bata pa si Daniel, nagdaku sia nga nagahigugma sa Dios. Indi ini natabuan lang. Ginhanas gid sia sang iya mga ginikanan. (Hulu. 22:6) Ang ngalan ni Daniel nga nagakahulugan, “Dios ang Akon Hukom,” nagapakita nga may kahadlok sa Dios ang iya mga ginikanan. (Dan. 1:6, footnote) Mga ginikanan, mangin mapinasensiahon sa pagtudlo sa inyo kabataan, kag indi magpangampo. (Efe. 6:4) Magpangamuyo upod sa ila kag ipangamuyo man sila. Kon himuon ninyo ang inyo masarangan nga ipatudok sa ila tagipusuon ang kamatuoran sa Biblia, pakamaayuhon gid kamo ni Jehova.—Sal. 37:5.
NAGTUO KAG NAGTUMAN SI JOB, MANGGARANON MAN SIA UKON IMOL
16, 17. Ano nga mga kabudlayan ang naagyan ni Job sang manggaranon sia kag sang nag-antos sia?
16 Ang mga kabudlayan nga naatubang ni Job. Naagyan ni Job ang daku nga pagbag-o sa iya kabuhi. Sang primero, “sia ang pinakamanggaranon nga tawo sa Sidlangan.” (Job 1:3) Bantog man sia kag ginataha gid sang iban. (Job 29:7-16) Pero wala gid sia maghunahuna nga mas maayo sia sa iban ukon magbatyag nga indi na niya kinahanglan ang Dios. Ang matuod, gintawag sia ni Jehova nga “akon alagad,” kag nagsiling: “Matarong sia kag may integridad nga tawo. Nagakahadlok sia sa Dios kag nagalikaw sa malain.”—Job 1:8.
17 Pero gulpi lang nga nagbag-o ang kabuhi ni Job. Nadula ang tanan niya nga pagkabutang kag nagbatyag sia sang grabe nga kasubo. Nabal-an naton nga ginpahanabo ini ni Satanas, nga nagsiling nga nagaalagad lang kuno si Job sa Dios bangod sa kaayuhan nga makuha niya. (Basaha ang Job 1:9, 10.) Wala ini ginbalewala ni Jehova. Ginhatagan niya si Job sing kahigayunan nga pamatud-an ang iya katutom kag ipakita nga nagaalagad sia bangod sa gugma.
18. (a) Ngaa nagadayaw ka sa katutom ni Job? (b) Ano ang matun-an naton parte kay Jehova sa ginhimo niya kay Job?
18 Sunodsunod nga ginpahanabo ni Satanas ang malain nga mga hitabo kay Job para pensaron niya nga halin ini sa Dios. (Job 1:13-21) Nag-abot dayon ang iya tatlo kuno ka abyan nga naghambal sa iya sang masakit nga mga tinaga, kag nagsiling nga ginasilutan sia sang Dios bangod malaut sia! (Job 2:11; 22:1, 5-10) Pero nagpabilin nga matutom si Job. Matuod, may tion man nga nagpadasudaso si Job sa paghambal, pero nahangpan ni Jehova ang kasakit nga nabatyagan ni Job. (Job 6:1-3) Nakita sang Dios nga nabudlayan na gid si Job pero wala gid sia magtalikod sa iya, bisan pa daw ginlampos na si Job ni Satanas kag daw ginsipasipa paagi sa pag-insulto sa iya. Pagkatapos sang pagtilaw kay Job, gindoble ni Jehova ang ginapanag-iyahan anay ni Job, kag ginpalawig ang iya kabuhi sing 140 pa ka tuig. (Sant. 5:11) Padayon nga nag-alagad si Job kay Jehova sing bug-os tagipusuon. Ngaa masiling naton ini? Pila ka gatos ka tuig na nga napatay si Job sang ginsulat ni Ezequiel ang mabasa sa teksto nga ginbasihan sang tema sini nga artikulo.
19, 20. (a) Paano naton mailog ang pagtuo kag pagtuman ni Job? (b) Paano naton mapakita ang kaluoy sa iban pareho sang ginahimo sang Dios?
19 Kon paano naton mailog ang pagtuo kag pagtuman ni Job. Bisan ano pa ang aton kahimtangan, si Jehova dapat ang pinakaimportante sa aton kabuhi. Dapat kita magsalig kag magtuman sa iya sing bug-os tagipusuon. Ang matuod, mas madamo ang rason naton sangsa kay Job para himuon ini! Binagbinaga ini: Madamo kita sing nabal-an parte kay Satanas kag sa iya mga pamaagi. (2 Cor. 2:11) Paagi sa libro sang Job, nabal-an naton kon ngaa ginatugutan sang Dios ang pag-antos. Sa tagna naman ni Daniel, nahangpan naton nga ang Ginharian sang Dios isa ka gobierno nga ginagamhan ni Cristo Jesus. (Dan. 7:13, 14) Nabal-an man naton nga malapit na maggahom sa duta ini nga Ginharian kag dulaon sini ang tanan nga pag-antos.
20 Ginatudluan man kita sang eksperiensia ni Job nga magpakita sing kaluoy sa aton mga kauturan nga nagabatas sang mga kabudlayan. Basi magpadasudaso man sila sa paghambal pareho kay Job. (Man. 7:7) Sa baylo nga hukman sila, hangpon naton sila kag kaluuyan. Gani mailog naton ang aton mahigugmaon kag maluluy-on nga Amay, si Jehova.—Sal. 103:8.
‘PABAKURON KAMO’ NI JEHOVA
21. Ano ang ginapahanumdom sa aton sang 1 Pedro 5:10 parte sa naagyan nanday Noe, Daniel, kag Job?
21 Indi dungan nga nagkabuhi sanday Noe, Daniel, kag Job, kag indi pareho ang ila mga kahimtangan, pero ginbatas nila ang mga kabudlayan nga ila naatubang. Ang ila naagyan sa kabuhi nagapahanumdom sa aton sang ginsiling ni apostol Pedro: “Sa tapos kamo mag-antos sa malip-ot nga tion, ang Dios nga puno sang wala tupong nga kaayo . . . magatapos sang inyo paghanas. Pabaskugon niya kamo, pabakuron niya kamo, kag lig-unon sing maayo.”—1 Ped. 5:10.
22. Ano ang binagbinagon naton sa masunod nga artikulo?
22 Suno sa ginsiling ni Pedro, ginapasalig kita ni Jehova nga pabaskugon niya kag pabakuron ang iya mga alagad. Matuod man ini sa katawhan sang Dios subong. Gusto naton tanan nga pabakuron kita ni Jehova kag mangin malig-on sa pagsimba sa iya. Gani ilugon gid naton ang pagtuo kag pagtuman nanday Noe, Daniel, kag Job! Sa masunod nga artikulo, matun-an naton nga nangin matutom sila kay Jehova bangod kilala gid nila sia. Ang matuod, ‘nahangpan nila ang tanan’ nga ginapatuman niya sa ila. (Hulu. 28:5) Mahimo man naton ini.
^ par. 2 Gindala nga bihag si Ezequiel sang 617 B.C.E. Ginsulat niya ang Ezequiel 8:1–19:14 sang “ikan-om nga tuig” sugod sang nangin bihag sia, ukon sang 612 B.C.E.
^ par. 5 Ang amay ni Noe nga si Lamec may kahadlok sa Dios pero napatay sia mga lima ka tuig antes sang Baha. Kon buhi pa ang iloy kag mga utod ni Noe sang nagsugod ang Baha, wala sila makalampuwas.
