Ang Pagtuo Makapabag-o sang Imo Kabuhi

“POSIBLE gid nga may yara maayo nga mga prinsipio nga wala sing isa ka Dios.” Amo ini ang siling sang isa ka agnostiko. Nagsiling sia nga napadaku niya ang iya kabataan nga may mataas nga mga prinsipio sa moral, kag sila man, nagpadaku sang ila kabataan nga may amo man nga mataas nga mga talaksan​—⁠ang tanan nga wala gid sing pagtuo sa Dios.

Nagakahulugan bala ini nga ang pagtuo sa Dios indi kinahanglanon? Maathag nga subong sini ang panghunahuna sining babayi. Kag matuod nga ang tanan nga wala nagatuo sa Dios indi gid man malain nga tawo. Si apostol Pablo naghambal tuhoy sa “mga tawo sang mga pungsod” nga wala makakilala sa Dios apang “nagahimo sa kinaugali sang mga butang sang kasuguan.” (Roma 2:14) Ang tanan​—⁠lakip ang mga agnostiko​—⁠natawo nga may konsiensia. Madamo ang nagatinguha nga sundon ang dikta sang ila konsiensia bisan pa wala sila nagatuo sa Dios nga naghatag sa ila sining duna nga igbalatyag sang husto kag sayop.

Apang, ang malig-on nga pagtuo sa Dios​—⁠ang isa nga napasad sa Biblia​—⁠isa ka mas mabaskog gid nga puwersa para sa ikaayo sangsa wala sing bulig nga panuytoy sang konsiensia. Ang pagtuo nga napasad sa Pulong sang Dios, ang Biblia, nagapahibalo sa konsiensia, sa amo labi pa nga nagapaalisto sa paghantop sing husto gikan sa sayop. (Hebreo 5:14) Dugang pa, ang pagtuo nagapabakod sa mga tawo agod mahuptan ang mataas nga mga talaksan sa atubangan sang mabug-at nga pag-ipit. Halimbawa, sang ika-20 nga siglo, madamo nga pungsod ang napaidalom sa gahom sang garok nga mga rehimen sa politika, amo nga napilitan ang daw desente nga mga tawo nga maghimo sing grabe nga mga pagpamintas. Apang, ang mga may matuod nga pagtuo sa Dios nangindi sa pagkompromiso sang ila mga prinsipio, bisan pa yara sa katalagman ang ila kabuhi. Dugang pa, sarang mabag-o sang napasad-sa-Biblia nga pagtuo ang mga tawo. Matubos sini ang mga kabuhi nga daw nadula na kag nagabulig sa mga  tawo nga malikawan ang paghimo sing daku nga mga kasaypanan. Binagbinaga ang pila ka halimbawa.

Mabag-o Sang Pagtuo ang Kabuhi sa Pamilya

“Bangod sang inyo pagtuo nahimo ninyo ang imposible.” Amo ini ang ginsiling sang isa ka Ingles nga huwes sang ginhatag niya ang iya desisyon tuhoy sa pag-atipan sa kabataan nanday John kag Tania. Sang gin-usisa sang mga awtoridad sanday John kag Tania, indi sila kasal kag ang ila kabuhi subong pamilya magamo kaayo. Si John, nga may problema sa droga kag sugarol, nangin kriminal agod masakdag ang iya mga bisyo. Ginpabay-an niya ang iya kabataan kag ang ila iloy. Gani, ano nga “milagro” ang natabo?

Isa ka adlaw, nabatian ni John ang iya bata pa nga hinablos nga lalaki nga nagahambal tuhoy sa Paraiso. Napukaw ang interes, ginpamangkot niya ang mga ginikanan sang bata. Mga Saksi ni Jehova gali ang mga ginikanan, kag ginbuligan nila si John nga makatuon tuhoy sini gikan sa Biblia. Sing amat-amat, napalambo nanday John kag Tania ang pasad-sa-Biblia nga pagtuo nga nagpabag-o sang ila kabuhi. Ginhimo nila nga legal ang ila pag-updanay paagi sa pagpakasal kag ginlandas ang ila mga bisyo. Nasapwan sang mga awtoridad nga nag-usisa sang ila panimalay ang isa ka butang nga daw imposible kasan-o lang​—⁠isa ka malipayon nga pamilya sa isa ka matinlo nga puluy-an, nga isa ka maayo nga duog sa pagpadaku sa kabataan. Husto ang huwes sa pagpatungod sining “milagro” sa bag-o-nasalapuan nga pagtuo nanday John kag Tania.

Linibo ka kilometro halin sa Inglaterra, isa ka lamharon nga asawa sa Malapit nga Sidlangan ang buot na mangin bahin sang isa ka masubo nga estadistika. Nagaplano sia nga magbuylog sa minilyon kada tuig nga ang pag-asawahay nagresulta sa diborsio. May anak sia, apang ang iya bana mas tigulang sangsa iya. Bangod sini, ginapilit sia sang iya mga paryente nga magdiborsio, kag nasugdan na gani niya ang mga kahimusan sa paghimo sini. Apang, nagatuon sia sing Biblia upod sa isa sang mga Saksi ni Jehova. Sang nahibal-an sang Saksi ang kahimtangan, ginpaathag niya kon ano ang ginasiling sang Biblia tuhoy sa pag-asawahay​—⁠halimbawa, nga ang pag-asawahay isa ka dulot gikan sa Dios kag indi isa ka butang nga dapat pasapayanan. (Mateo 19:​4-6, 9) Naghunahuna ang babayi, ‘Tumalagsahon nga ining babayi [Saksi], nga isa ka estranghero, nagatinguha nga matipigan ang amon pamilya samtang ang mga suod sa akon luyag nga gub-on ini.’ Ang iya bag-o natigayon nga pagtuo nagbulig sa iya nga matipigan ang iya pag-asawahay.

Ang isa ka masubo nga estadistika nga nagaapektar sa kabuhi sang pamilya amo ang may kaangtanan sa aborsion. Ginbulubanta sang isa ka report sang Nasyones Unidas nga kada tuig sa di-magkubos 45 milyones ka wala pa mabun-ag nga mga lapsag ang hungod nga ginpahulog. Ang tagsa sining hitabo isa ka trahedya. Bangod sang ihibalo sa Biblia nalikawan sang isa ka babayi sa Pilipinas nga mangin bahin sinang estadistika.

Nasugilanon sang mga Saksi ni Jehova ang babayi, nagbaton sing brosyur para sa pagtuon sing Biblia nga natig-uluhan Ano ang Ginapatuman sang Dios sa Aton?,⁠ * kag nagsugod sa pagtuon sa Biblia. Binulan sang ulihi, ginpaathag niya kon ngaa ginbaton niya ang pagtuon sa Biblia. Nagabusong ang babayi sang una sia nga ginduaw sang mga Saksi, apang namat-od sila sang iya bana nga ipahulog ang lapsag. Apang, ang laragway sang wala pa mabun-ag nga lapsag sa pahina 24 sang brosyur nagtandog sa tagipusuon sang babayi. Ang nagaupod nga pasad-sa-Biblia nga paathag nga ang kabuhi sagrado bangod ‘yara sa Dios ang tuburan sang kabuhi’ nagkumbinsi sa iya nga indi pag-ipahulog ang iya lapsag. (Salmo 36:9) Iloy na sia karon sang isa ka matahom, mapagros nga lapsag.

Ang Pagtuo Nagabulig sa mga Ginatamay

Sa Etiopia, duha ka lalaki nga nagapanapot sing gurisnay ang nagtambong sa pagtinipon para sa pagsimba nga ginahiwat sang mga Saksi ni Jehova. Pagkatapos sang miting, mainabyanon nga nagpakilala ang isa ka Saksi sa ila. Nangayo sing limos ang mga lalaki. Ginhatagan sila sang Saksi, indi sing kuwarta, kundi sing isa ka butang nga mas maayo pa. Ginpalig-on niya sila nga magpalambo sing pagtuo sa Dios, nga “daku pa ang balor sangsa bulawan.” (1 Pedro 1:7) Ang isa sa ila nagbaton kag nagsugod sa pagtuon sa Biblia. Nagpabag-o ini sang iya kabuhi. Samtang nag-uswag sia sa pagtuo, gin-untatan niya ang pagpanigarilyo, lakas nga pag-inom, imoralidad, kag ang paggamit sing khat (isa ka nagapagiyan nga stimulant). Natun-an niya kon paano buhion ang iya kaugalingon sa baylo nga magpakilimos kag nagakabuhi karon sing matinlo, mabungahon nga kabuhi.

Sa Italya isa ka 47-anyos nga lalaki ang ginpamatbatan sing napulo ka tuig nga pagkabilanggo kag  ginhunong sa isa ka psychiatric nga ospital para sa mga bilanggo. Ang isa sang mga Saksi ni Jehova nga awtorisado sa pagsulod sa mga bilangguan agod maghatag sing espirituwal nga bulig nagtuon sing Biblia upod sa iya. Madasig nga nag-uswag ang lalaki. Ginbag-o gid sing daku sang pagtuo ang iya kabuhi amo nga ang iban nga mga bilanggo nagapangayo karon sing laygay sa iya kon paano atubangon ang ila mga problema. Bangod sang iya napasad-sa-Biblia nga pagtuo, natigayon niya ang pagtahod, pagdayaw, kag pagsalig sang mga awtoridad sa bilangguan.

Sang nagligad lang nga tinuig ginbalita sang mga pamantalaan ang tuhoy sa inaway sibil sa Aprika. Ilabi na nga makakulugmat ang kasaysayan tuhoy sa mga kabataan nga lalaki nga ginahanas subong mga soldado. Ining mga kabataan ginadroga, ginapintasan, kag ginapilit nga himuon ang di-tawhanon nga panimuot batok sa ila mga paryente agod pat-uron nga mainunungon lamang sila sa bahin nga sila nagapakig-away. Ang napasad-sa-Biblia nga pagtuo mabaskog gid bala sa pagpabag-o sa kabuhi sining mga pamatan-on? Huo, sa di-magkubos duha ka hitabo.

Sa Liberia, si Alex nag-alagad subong sakristan sa Katoliko nga Simbahan. Apang sa edad nga 13, nagbuylog sia sa nagainaway nga grupo kag nangin bantog nga bata nga soldado. Agod mangin maisog sia sa inaway, nagdangop sia sa binabaylan. Nakita ni Alex ang madamo sang iya mga kaupod nga napatay, apang nakalampuwas sia. Sang 1997 nasugilanon niya ang mga Saksi ni Jehova kag nasapwan niya nga wala nila sia ginatamay. Sa baylo, ginbuligan nila sia nga matun-an ang ginasiling sang Biblia tuhoy sa kasingki. Naghalin si Alex sa pagkasoldado. Samtang nagatubo ang iya pagtuo, gintuman niya ang sugo sang Biblia: “Talikdan niya ang malain kag himuon ang maayo; pangitaon niya ang paghidait kag sundon ini.”​—⁠1 Pedro 3:⁠11.

Samtang, ang isa anay ka bata nga soldado nga si Samson nagkadto sa banwa nga ginapuy-an karon ni Alex. Katapo anay sia sang koro apang sang 1993 nangin soldado sia kag nadalahig sa pag-abuso sa droga, espiritismo, kag imoralidad. Sang 1997 ginpahalin sia. Manugkadto sadto si Samson sa Monrovia agod magbuylog sa isa ka espesyal nga puwersa sa seguridad sang ginhaylo sia sang isa ka abyan nga magtuon sing Biblia upod sa mga Saksi ni Jehova, kag subong resulta, napalambo niya ang isa ka napasad-sa-Biblia nga pagtuo. Naghatag ini sa iya sing kaisog nga bayaan ang iya makiawayon nga mga dalanon. Sanday Alex kag Samson karon nagakabuhi sing malinong kag maayo nga kabuhi. May yara pa bala butang kundi ang napasad-sa Biblia nga pagtuo ang makapabag-o sa mga kabuhi nga ginpabangis gid?

Ang Nagakaigo nga Sahi Sang Pagtuo

Pila lamang ini sang madamo kaayo nga halimbawa nga sarang masambit sa pag-ilustrar sang gahom sang matuod nga pagtuo nga napasad sa Biblia. Sa pagkamatuod, indi tanan nga nagapangangkon lamang nga nagatuo sa Dios ang nagakabuhi suno sa mataas nga mga talaksan sang Biblia. Ang matuod, ang pila ka ateista mahimo nga nagakabuhi sing mas maayo sangsa iban nga nagapangangkon nga mga Cristiano. Ina bangod ang napasad-sa-Biblia nga pagtuo indi lamang pagpangangkon nga nagatuo sa Dios.

Gintawag ni apostol Pablo ang pagtuo nga “amo ang masaligan nga pagpaabot sang mga butang nga ginalauman, ang maathag nga pagpasundayag sang mga katunayan bisan nga di-makita.” (Hebreo 11:1) Busa, ang pagtuo nagalakip sing isa ka mabaskog nga pagpati​—⁠pasad sa di-mapanghiwala nga pamatuod​—⁠sa di-makita nga mga butang. Ilabi na nga nagalakip ini sang indi gid pagduhaduha nga ang Dios nagaluntad, nga interesado sia sa aton, kag nga pakamaayuhon niya ang mga nagahimo sang iya kabubut-on. Ang apostol nagsiling man: “Sia nga nagapalapit sa Dios dapat magpati nga amo sia kag nga sia ang nangin manugpadya sadtong hanuot nga nagapangita sa iya.”​—⁠Hebreo 11:⁠6.

Amo ini nga sahi sang pagtuo ang nagpabag-o sang kabuhi nanday John, Tania, kag sang iban pa nga ginsambit sa sining artikulo. Nagtuytoy ini sa ila nga magsalig sing bug-os sa Pulong sang Dios, ang Biblia, para sa panuytoy sa paghimo sing mga desisyon. Nagbulig ini sa ila nga maghimo sing umalagi nga mga sakripisyo agod indi maglakat sa isa ka masulhay, apang sayop, nga dalanon. Magkatuhay man ang tagsa ka eksperiensia, ang tanan nagsugod sa pareho nga paagi. Ang isa sang mga Saksi ni Jehova nagtuon sing Biblia upod sa sining mga indibiduwal, kag naeksperiensiahan nila ang kamatuoran sang ginasiling sang Biblia: “Ang pulong sang Dios buhi kag gamhanan.” (Hebreo 4:12) Ang gahom sang Pulong sang Dios nagbulig sa tagsa ka indibiduwal agod makatukod sing malig-on nga pagtuo nga nagpabag-o sang iya kabuhi nga mangin mas maayo.

Ang mga Saksi ni Jehova aktibo sa kapin sa 230 ka kadutaan kag mga isla sang dagat. Ginaagda nila kamo nga magtuon sa Biblia. Ngaa? Bangod kumbinsido sila nga ang napasad-sa-Biblia nga pagtuo makahatag sing daku nga mga pag-uswag sa inyo man nga kabuhi.

[Nota]

[Retrato sa pahina 3]

Ang napasad-sa-Biblia nga pagtuo nagpabag-o sang mga kabuhi nga mangin mas maayo

 [Picture Credit Line sa pahina 2]

Title card of Biblia nieświeska by Szymon Budny, 1572