Mahimo Mo Mahibaluan ang Palaabuton!

Ang kalabanan nga tawo nagahunahuna sing serioso tuhoy sa palaabuton. Luyag nila magplano, magpuhunan sing maalamon, kag magbatyag sing kalig-unan. Apang may paagi bala agod mapat-od kon ano ang nagahulat sa palaabuton?

SA PANIKASOG nga mahibaluan ang palaabuton, gin-eksperimentuhan sang mga tawo ang tanan nga sahi sang butang. Ang mga social scientist nga ginatawag nga mga futurologist nagausisa sang mga huyog sa karon kag nagatagna pasad sa sini. Ginahimo man ini sang mga ekonomista sa patag nila. Ang mga astrologo kag mga manugpakot nagatan-aw sa mga horoscope, mga bola nga kristal, kag sa okulto, kag madamo ang ila mga sumulunod. Halimbawa, ang Pranses nga astrologo nga si Nostradamus padayon nga nangin bantog, bisan pa mga siglo na sia nga patay.

Ining tanan nga nagapangangkon nga mga manalagna napamatud-an nga indi gid masaligan kag makapalaslaw. Ngaa? Bangod ginasikway nila si Jehova nga Dios kag ang iya Pulong, ang Biblia. Bangod sini wala nila masabat ang sadsaran nga mga pamangkot kaangay sini: ‘Ngaa makasalig ako nga mahanabo ang mga butang nga gintagna sa Biblia? Paano ini nagahisanto sa katuyuan sang Dios sa mga tawo? Paano kami sang akon pamilya makabenepisyo sa sini nga mga tagna?’ Ginasabat sang Biblia ini nga mga pamangkot.

Ang tagna sang Biblia labaw man sa madamo pa nga paagi. Indi kaangay sang mga pakotpakot sang mga astrologo, ginapahanugutan sini ang hilway nga pagbuot sang isa ka tawo. Busa, wala sing bisan sin-o nga biktima sang kapalaran. (Deuteronomio 30:19) Ang mga sinulatan subong sang kay Nostradamus kulang sing moral nga kabilihanan, kag ginapun-an nila ining kakulangan sing tanhaga kag pagpukaw sa balatyagon. Apang ang tagna sang Biblia may malig-on nga sadsaran sa moral. Ginapaathag sini kon ngaa himuon sang Dios ang iya gintuyo. (2 Cronica 36:15) Kag ang mga tagna ni Jehova wala nagakapaslawi, tungod ang “Dios . . . indi makabutig.” (Tito 1:2) Sa amo, ang mga indibiduwal nga ginatuytuyan sang Pulong sang Dios nagakabuhi nga nasanagan, may katuyuan, kag malipayon nga wala nagausik sang ila hamili nga tion kag manggad sa walay pulos nga mga pagpaninguha.​—⁠Salmo 25:​12, 13.

Ini kag ang madamo pa nga punto ginbinagbinag sa 1999/2000 “Matagnaon nga Pulong Sang Dios” Distrito nga mga Kombension sang mga Saksi ni Jehova nga ginhiwat sa bug-os nga kalibutan. Ginpatalupangod sang mga pamulongpulong, mga interbyu, mga pasundayag, kag isa ka drama sa Biblia sa tumalambong ang matahom espirituwal nga palanublion nga ginaagom sang mga nagatuon kag nagatuman sang matagnaon nga pulong sang Dios. Repasuhon sang masunod nga artikulo ang pila ka makakulunyag nga talalupangdon nga mga punto sang kombension.