Paano Mo Ginatamod ang Imo Kaugalingon?

BUGALON sia nga tawo. Bangod ginpataasan ang iya posisyon sa gobierno, ginhandum gid niya nga yauban kag dayawon sia. Apang sa daku niya nga kaugot, ang isa pa ka opisyal wala maghatag sa iya sing amo sina nga pagpadungog. Sa pagtimalos, ining matinaastaason nga opisyal nagbuko nga laglagon ang tanan nga tawo sa emperyo nga may etniko nga ginhalinan subong sa nakasala. Daw ano ka tiko nga pagpaimportante sa kaugalingon!

Ang manugpadihot amo si Haman, isa ka mataas nga opisyal ni Hari Asuero sang Persia. Kag ang iya ginakaugtan? Ang Judiyo nga si Mardoqueo. Bisan pa nga sobra gid ang reaksion ni Haman sa pagpapas sang lahi, ginailustrar sini ang katalagman kag ang malain nga mga resulta sang bugal. Indi lamang nagtuga sing kahalitan sa iban ang iya matinaastaason nga espiritu kundi nagdul-ong man ini sa iya dayag nga kahuy-anan kag sang ulihi sa iya kamatayon.​—⁠Ester 3:​1-9; 5:​8-14; 6:​4-10; 7:​1-10.

Ang Matuod nga mga Sumilimba Indi Hilway sa Bugal

Ginasugo ni Jehova nga dapat kita mangin ‘maugdang sa paglakat upod sa aton Dios.’ (Miqueas 6:8) Ang Biblia may yara nagkalainlain nga mga kasaysayan sang mga indibiduwal nga napaslawan sa paghupot sing isa ka maugdang nga pagtamod sa ila kaugalingon. Naghatag ini sa ila sing mga problema kag kasubo. Ang pagbinagbinag sa pila sining mga halimbawa makabulig sa aton nga makita ang kabuangan kag katalagman sang indi balanse nga panghunahuna.

Ang panghunahuna sang manalagna sang Dios nga si Jonas nangin indi gid balanse amo nga gintilawan niya nga malagyo sang ginsugo sia sang Dios nga paandaman ang malauton nga mga tawo sa Ninive tuhoy sa paghukom ni Jehova batok sa ila. (Jonas 1:​1-3) Sang ulihi, sang nagmadinalag-on ang iya pagbantala nga hilikuton amo kon ngaa naghinulsol ang mga taga-Ninive, nagsunggod si Jonas. Nabalaka gid sia tuhoy sa iya reputasyon subong isa ka manalagna amo nga ang kabuhi sang linibo ka taga-Ninive diutay lamang ukon wala sing kabilinggan sa iya. (Jonas 4:​1-3) Kon mabalaka gid kita sa aton dungog, mahimo kita mabudlayan sa paghupot sing walay pinasulabi kag sibu nga paglantaw sa mga tawo kag sa mga hitabo sa palibot naton.

Binagbinaga man si Uzzias, nga nangin maayo anay nga hari sang Juda. Sang nangin indi sia balanse sa iya panghunahuna, matinaastaason nga gintilawan niya nga agawon ang pila ka mga katungdanan sang mga saserdote. Bangod sang iya indi mapainubuson kag tuman ka matinaastaason nga mga buhat, ginbayaran niya ini sang iya kapagros kag pagkadula sang kahamuot sang Dios.​—⁠2 Cronica 26:​3, 16-21.

Ang indi balanse nga panghunahuna diutayan lang magsiod sa mga apostoles ni Jesus. Nabalaka gid sila sa ila kaugalingon nga himaya kag gahom. Sang nag-abot ang daku nga pagtilaw, ginbayaan nila si Jesus kag nalagyo. (Mateo 18:​1; 20:​20-​28; 26:​56; Marcos 9:​33, 34; Lucas 22:24) Ang ila kakulang sang pagpaubos kag ang ila mga panghunahuna sang pagpaimportante sa kaugalingon halos nagresulta sa pagkadula nila sing panglantaw sa katuyuan ni Jehova kag sa ila papel sa iya katuyuan.

Ang Malain nga mga Epekto Sang Pagpaimportante sa Kaugalingon

Ang indi balanse nga pagtamod sa aton kaugalingon makatuga sing kasakit kag makaguba sang aton relasyon sa iban. Halimbawa, mahimo nga nagapungko kita sa isa hulot kag natalupangdan nga may duha ka tawo nga nagahutikay kag nagakadlaw. Kon maiyaiyahon kita, mahimo nga magahaumhaum kita sing sayop nga ginakadlawan nila kita bangod nagahutikay sila. Ang aton hunahuna mahimo nga indi magtugot sa aton nga binagbinagon ang bisan ano iban pa nga posible nga rason sa ila paggawi. Ti, sin-o pa abi ang ila pagahambalan? Mahimo nga maakig kita kag mamat-od nga indi na gid magpakighambal sa ila nga duha. Sa sinang paagi ang indi balanse nga pagtamod sa aton pagkaimportante makadul-ong sa indi paghangpanay kag naguba nga relasyon upod sa mga abyan, mga miembro sang pamilya, kag iban.

Yadtong nagapaimportante gid sang ila kaugalingon mahimo mangin tikalon, padayon nga nagapabugal  sang ila kuno daku nga mga ikasarang, mga binuhatan, ukon mga pagkabutang. Ukon mahimo nila nga pangunahan ang mga paghambalanay, pirme nagahinambit sang pila ka butang tuhoy sa ila kaugalingon. Ini nga paghambal nagapakita sing kakulang sang matuod nga gugma kag tuman ka makaulugot. Sa amo, ang mga matinaastaason masami nga nagapain sang ila kaugalingon gikan sa iban.​—⁠1 Corinto 13:⁠4.

Subong mga Saksi ni Jehova, mahimo kita makasumalang sing pagyaoyao kag pagsikway sa aton publiko nga ministeryo. Dapat naton dumdumon nga ina nga pagpamatok ginapatuhoy, indi sa aton kaugalingon, kundi kay Jehova, ang Ginhalinan sang aton mensahe. Apang, ang tiko nga pagtamod sa aton pagkaimportante magadul-ong sa makahalalit nga mga resulta. Sang nagligad nga mga tinuig, ginkabig sang isa ka utod ang pagpangakig sang tagbalay nga batok sa iya kag nagbalos man sia sa paghambal sing malain. (Efeso 4:29) Pagkatapos sadto, ang utod wala na magpakigbahin sa balay-balay nga ministeryo. Huo, ang bugal mahimo nga magapahulag sa aton nga madula ang aton pagpugong kon nagabantala. Tinguhaan naton nga indi gid matabo ini sa aton. Sa baylo, mapainubuson nga mangayo kita sing bulig ni Jehova nga mahuptan ang nagakaigo nga apresasyon sa pribilehiyo nga makapakigbahin sa Cristianong ministeryo.​—⁠2 Corinto 4:​1, 7; 10:​4, 5.

Ang may pagpaimportante sa kaugalingon nga panimuot makapugong man sa aton gikan sa pagbaton sing kinahanglanon gid nga laygay. Mga pila ka tuig ang nagligad sa isa ka pungsod sa Sentral nga Amerika, isa ka solterito ang naghatag sing pamulongpulong sa Teokratikong Eskwelahan sa Pagministeryo sa Cristianong kongregasyon. Sang ang manugtatap sa eskwelahan naghatag sa iya sing medyo masakit nga laygay, ang nainit nga pamatan-on nagpahurabog sang iya Biblia sa salog kag nagpudagpudag paguwa sa Kingdom Hall nga may buko nga indi na magbalik. Apang pagligad sang pila ka adlaw, gintulon niya ang iya bugal, nakig-uli sa manugtatap sa eskwelahan, kag mapainubuson nga nagbaton sing iya laygay. Sang ulihi, ining pamatan-on nga lalaki nagtubo sa Cristianong pagkahamtong.

Ang di-maugdang kag sobra nga pagtamod sa kaugalingon makadul-ong sa kahalitan sang aton relasyon sa Dios. Ang Hulubaton 16:5 nagapaandam: “Ang tagsatagsa nga bugalon sa tagipusuon kalangil-aran kay Jehova.”

Isa ka Balanse nga Pagtamod Sang Aton Kaugalingon

Sing maathag, indi naton dapat pagseriosohon gid ang aton kaugalingon. Sa pagkamatuod, indi ini pagsiling nga indi kita dapat nga serioso sa kon ano ang aton ginahimo ukon ginasiling. Ginapakita sang Biblia nga ang mga manugtatap, mga ministeryal nga alagad​—⁠sa katunayan, ang tanan sa kongregasyon​—⁠dapat mangin serioso. (1 Timoteo 3:​4, 8, 11; Tito 2:2) Busa paano ang mga Cristiano makapalambo kag makahupot sang isa ka maugdang, balanse, kag serioso nga pagtamod sang ila kaugalingon?

Ang Biblia nagaaman sing madamong makapalig-on nga mga halimbawa sang indibiduwal nga naghupot sang isa ka balanse nga pagtamod sa ila kaugalingon. Tumalagsahon ang halimbawa ni Jesucristo sa pagkamapainubuson. Agod mahimo ang kabubut-on sang iya Amay kag maluwas ang katawhan, kinabubut-on nga ginbayaan sang Anak sang Dios ang iya mahimayaon langitnon nga posisyon kag nangin kubos nga tawo sa duta. Walay sapayan sang mga insulto, pag-abuso, kag makahuluya nga kamatayon, nahuptan niya ang pagpugong sa kaugalingon kag dignidad. (Mateo 20:​28; Filipos 2:​5-8; 1 Pedro 2:​23, 24) Paano ini nahimo ni Jesus? Nagsalig sia sing bug-os kay Jehova kag determinado nga himuon ang kabubut-on sang Dios. Gintun-an sing maukod ni Jesus ang Pulong sang Dios, nangamuyo sing hanuot, kag nagpanikasog sing lakas sa ministeryo. (Mateo 4:​1-​10; 26:​36-​44; Lucas 8:​1; Juan 4:​34; 8:​28; Hebreo 5:7) Ang pagsunod sa halimbawa ni Jesus makabulig sa aton nga mapalambo kag mahuptan ang isa ka balanse nga pagtamod sa aton kaugalingon.​—⁠1 Pedro 2:⁠21.

Talupangda man ang maayo nga halimbawa sang anak ni Hari Saul nga si Jonatan. Bangod sang pagkadimatinumanon sang iya amay, nadula ni Jonatan ang kahigayunan nga buslan si Saul subong hari. (1 Samuel 15:​10-29) Naglain bala ang buot ni Jonatan sa iya nadula? Nangimon bala sia kay David, ang pamatan-on nga lalaki nga magagahom sa tal-us niya? Bisan pa nga mas gulang si Jonatan kag ayhan mas eksperiensiado sangsa kay David, maugdang kag mapainubuson nga nagsunod sia sa kahimusan ni Jehova kag mainunungon nga nagsakdag kay David. (1 Samuel 23:​16-​18) Ang pagtigayon sing maathag nga panglantaw sa kabubut-on sang Dios kag ang kahanda nga magpasakop sa sini makabulig sa aton nga ‘indi maghunahuna sang aton kaugalingon sing kapin pa sangsa nagakadapat naton nga hunahunaon.’​—⁠Roma 12:​3

 Gintudlo ni Jesus ang balor sang pagpakita sang kaugdang kag pagkamapainubuson. Gin-ilustrar niya ini paagi sa pagsiling nga kon ang iya mga disipulo yara sa punsion sa kasal, indi sila dapat magpungko sa “labing mataas nga duog” bangod mahimo nga ang isa nga mas kilala magaabot kag mahimo sila mahuy-an kon pasayluhon sa pinakamanubo nga duog. Nagapaathag sing maayo sang leksion, si Jesus nagdugang: “Bangod ang nagapakataas sang kaugalingon paubson kag sia nga nagapaubos sang kaugalingon pataason.” (Lucas 14:​7-11) Maalamon kita kon pamatian naton ang laygay ni Jesus kag ‘panaptan ang aton kaugalingon sang pagkakubos sing hunahuna.’​—⁠Colosas 3:​12; 1 Corinto 1:⁠31.

Mga Pagpakamaayo Sang Isa ka Balanse nga Pagtamod

Ang pagtigayon sing maugdang kag kubos nga espiritu nagapaposible sa mga alagad ni Jehova nga makatigayon sing matuod nga kalipay sa ila ministeryo. Ang mga gulang mas madali palapitan kon mapainubuson nila nga “pakig-angutan ang panong sing mapinalanggaon.” (Binuhatan 20:​28, 29) Nian mapahamtang ang buot sang tanan sa kongregasyon sa pagpakighambal sa ila kag sa pagpangayo sang ila bulig. Mahimo nga mangin suod pa ang kongregasyon sa espiritu sang gugma, kainit, kag pagsalig.

Ang indi pagkabig sang aton kaugalingon nga importante makabulig sa aton nga makatigayon sing maayo nga mga abyan. Ang pagkaugdang kag pagkamapainubuson magapugong sa aton sa pagpalambo sang mapaindis-indison nga espiritu kag sa pagtinguha nga labawan ang iban sa mga binuhatan ukon sa materyal nga mga butang. Ining diosnon nga mga kinaiya makabulig sa aton nga labi nga magmaluluy-on, kag sa amo mangin sa mas maayo nga kahimtangan sa paglugpay kag sa pagsakdag sadtong nagakinahanglan. (Filipos 2:​3, 4) Kon matandog ang mga tawo bangod sang gugma kag kaayo, masunson nga maayo ang ila reaksion. Kag indi bala nga inang di-makagod nga relasyon mangin sadsaran nga sa sini ginatukod ang mabakod nga mga pag-abyanay? Daw ano nga pagpakamaayo kon indi naton pagtamdon sing di-maugdang ang aton kaugalingon sing serioso!​—⁠Roma 12:⁠10.

Ang balanse nga pagtamod sa aton kaugalingon magapahapos man sang pagbaton naton sang aton mga sayop kon may masaklaw kita. (Mateo 5:​23, 24) Nagaresulta ini sa maayo nga mga relasyon, nagapahanugot sa aton nga makapasag-uli kag magtahod sa isa kag isa. Kon mapainubuson sila kag maligdong, yadtong sa mga posisyon sa pagtatap, subong sang Cristianong mga gulang, may kahigayunan nga makahimo sing dugang pa nga kaayuhan sa iban. (Hulubaton 3:​27; Mateo 11:29) Mas mahapos man sa isa ka mapainubuson nga persona nga pasayluhon ang iban nga nakasala sa iya. (Mateo 6:​12-​15) Indi sia magpasobra sa paghunahuna sang sayop, kag magasalig sia kay Jehova nga tadlungon ang mga butang nga indi matadlong sa bisan ano nga paagi.​—⁠ Salmo 37:​5; Hulubaton 3:​5, 6.

Ang pinakadaku nga pagpakamaayo nga matigayon kon may maugdang kag mapainubuson kita nga pagtamod sa aton kaugalingon amo ang pagtigayon sing kahamuot kag pagbaton ni Jehova. “Ang Dios nagasumpong sang mga bugalon, apang nagahatag sia sing dibagay nga kaayo sa mga mapainubuson.” (1 Pedro 5:⁠5) Kabay nga indi gid kita mahulog sa siod paagi sa paghunahuna nga mas maayo kita sangsa kon ano gid kita. Sa baylo, mapainubuson naton nga batunon ang aton duog sa kahimusan ni Jehova sang mga butang. Ang dakung mga pagpakamaayo ginatigana sa tanan nga makatuman sang ginapatuman niya nga ‘mangin maugdang sa paglakat upod sa Dios.’

[Retrato sa pahina 22]

Mapainubuson nga ginsakdag ni Jonatan si David